ратификација – Kurir.mk

Ердоган: Турција до октомври нема да ја ратификува кандидатурата на Шведска за членство во НАТО

Тале Кристо — Wed, 12 Jul 2023 17:02:05 +0000

Претседателот на Турција, Реџеп Таип Ердоган изјави дека турскиот Парламент најмалку до октомври нема да ја ратификува кандидатурата на Шведска за членство во НАТО. Говорејќи пред новинарите во Вилнус по Самитот на НАТО, Ердоган рече дека пратениците се на одмор два месеци, по што „има многу (други) предлог закони за дискусија“. Турција изненадувачки оваа недела по повеќемесечно противење се согласи Шведска да се приклучи на воената алијанса.

Руската Дума ги ратификуваше договорите за анексија на 4 украински територии

Тале Кристо — Mon, 03 Oct 2022 12:03:12 +0000

Руската државната Дума едногласно ги ратификуваше договорите за прием на Доњецката Народна Република, Народна Република Луганск, регионите Керсон и Запорожје, четирите југоисточни украински региони доминатно населени со руско и рускојазично населени во Руската Федерација. Документите беа потпишани во Москва на 30-ти септември. Меѓународните договори, меѓу другото, се занимаваат и со утврдување на границите на новите ентитети. Границите на републиките и регионите ќе бидат одредени со границите на територијата што „постоела на денот на нивното формирање и прифаќање во Руската Федерација“. Меѓународните договори прецизираат дека границите поврзани со територијата на странска држава ќе бидат државната граница на Руската Федерација. Во договорите се наведува и дека од денот на приемот на субјектите во Русија ќе се формираат две републики и два региона кои ќе ги задржат сегашните имиња. Нивните челници ќе добијат статус на гувернери. Вршителот на должноста раководител на субјектите ќе ги назначи Претседателот на Руската Федерација во рок од 10 дена од датумот на прифаќање на субјектите. Регионалните влади ќе бидат формирани од вршители на должност гувернери „во согласност со законодавството на Руската Федерација“. Рускиот претседател Владимир Путин во неделата поднесе до Државната Дума нацрт-федерални уставни закони за прием на субјекти во Русија, како и меѓународни договори за ратификација. Исто така, претходно ресрет на Уставниот суд на Русија ги одобри документите поднесени од шефот на државата

Собранието на 11 февруари ќе го ратификува протоколот за НАТО, на 12-ти ќе се распушти

Ивона Петрова — Thu, 23 Jan 2020 11:09:07 +0000

Претседателот на Собранието Талат Џафери планира на 11 февруари да закаже седница со единствена точка на дневен ред – ратификација на Протоколот за членство на Република Македонија во НАТО. Следниот ден, на 12 февруари, би требало да се одржи последната седница на која ќе биде распуштен сегашниот пратенички состав, и распишани предвремените парламентарни избори на 12 април. Од кабинетот на Џафери за МИА информираат дека до 11 февруари се очекува протоколот да биде ратификуван во Шпанија, последната од 29-земји членки кои досега го немаат направено тоа. Ако дотогаш не заврши процедурата во Шпанија, ратификацијата во македонското Собрание би била донесена со одложено дејство. На 12 февруари, пак, ќе се одржи седницата за распуштање на Собранието. Џафери очекува седницата да заврши истиот ден имајќи предвид дека сите партии се согласни за одржување избори на 12 април.

Собранието повторно го изгласа Законот за ратификација на договорот со Грција

Ивона Петрова — Thu, 05 Jul 2018 10:27:07 +0000

Собранието на Република Македонија денеска со 69 гласови „за“ и еден воздржан повторно го изгласа Законот за ратификација на Договорот со Грција за спорот за името, откако на 20 јуни истиот беше усвоен, но претседателот на државата го врати без да го потпише. Опозицијата, за која договорот е капитулантски чин, исто како и минатиот пат, не беше присутна на повторното гласање. Шефот на дипломатијата Никола Димитров во обраќањето пред пратениците, се осврна на укажувањата од претседателот Ѓорге Иванов да не го потпише Законот. Рече дека посебноста на македонскиот идентитет и јазик согласно Спогодбата не се загрозени. - Конечната спогодба не само што не го загрозува македонскиот идентитет туку и го реафирмира и го зацрвстува како никогаш досега. Во пракса договорот ќе донесе етаблирање на идентитетот и ќе ја надмине вечната борба за јазикот, идентитетот, ќе влеземе во ЕУ, ќе се печатат документи на македонски јазик со македонски превод, рече Димитров. Тој рече дека по ова гласање, согласно законите, претседателот е должен да го потпише указот. Димитров, во забелешките од Иванов дека меѓународни договори потпишува само претседателот на државата, рече дека меѓународни договори во име на Република Македонија може да склучи и Владата на РМ. Како ислустрација посочи дека според евиденцијата на МНР, од независниоста до денес Собранието ратификувало 897 меѓународни договори, а од нив само пет склучил претседател на РМ. Повика правилно и вистински да се толкува членот 3 за меѓународни договори, кој може да склучува меѓународни договори во името на РМ. За него е неточна забелешката од претседателот на државата, дека спогодбата шири страв и оти ја доведува Македонија во состојба на потчинетост кон Грција. Тоа, како што кажа, е целосно правно неиздржано, бидејќи РМ презела обврска да членува во ОН и да ја потпише Времената спогодба од 1995. Додаде дека Спогодбата со Грција отвора врати на земјава за членство кон ЕУ и НАТО и тоа само ја потврдува „нашата независност и нашата држава“. - Со преговорите досега Македонија беше во услови на зависност. Спогодбата де факто не извлекува од таа зависност и не носи во услови на независност. Време е да се најдеме на интересите на татковината и сите заедно мора да бидеме сплотени за татковинските интереси, заклучи Димитров. Пратеникот од Коалицијата предводена од СДСМ Ферид Мухиќ, рече дека денеска нема да гласа против, туку воздржано. Според него, самиот услов за промена на името и на Уставот е флагрантно кршење на Повелбата на ОН и на меѓународното право, и оти станува збор за преседан, каде што никој досега не барал од една суверена држава промена на име и Устав. - Ова кршење на повелбата мора да се нотира, гласот на овој народ мора да се слушне и светот мора да знае на што се принудени народот и државата со оваа спогодба, рече Мухиќ. Според него, со спогодбата „се создава погрешен впечаток дека сме украле нешто туѓо, дека сме фатени во таа кражба и оти со каење го враќаме на вистинскиот сопсветник и тој е подготвен да ни прости“. Мухиќ ја цитираше германската канцеларка Ангела Меркел, според која, „националното достоинство не може да биде предмет на никаков компромис“. Законот за ратификација на Конечната спогодба за решавање на разликите опишани во резолуциите 817 (1993) и 845 (1993) на Советот за безбедност на ОН, за престанување на важноста на Привремената спогодба од 1995 година и за воспоставување стратешко партнерство меѓу страните во трето читање беше единствена точка на дневениот ред на 54. собраниска седница. Собранието го ратификуваше Договорот за решението за спорот за името на 20 јуни со 69 гласа „за“ и без против и воздржани. Истиот ден тој беше потпишан од страна на Џафери и испратен до Кабинетот на Иванов, кој како што најави го врати законот во предвидениот рок без да го потпише Указот. Минатата недела во Собранието на РМ беше доставена одлуката на претседателот на државата со која тој информира дека нема да го потпише Указот за прогласување на Законот за ратификација на Kонечната спогодба за решавање на разликите опишани во резолуциите 817 (1993) и 845 (1993) на Советот за безбедност на ОН, за престанување на важноста на Привремената спогодба од 1995 година и за воспоставување стратешко партнерство меѓу страните. Претседателот на Собранието Џафери најави дека по прегласувањето ќе го испрати законот во Службен весник на РМ со еден потпис, а исто така ќе постапи и за Законот за употреба на јазиците, чиј указ Иванов не го потпиша Договорот за решавање на спорот за името помеѓу Македонија и Грција го потпишаа шефовите на дипломатиите на двете земји Никола Димитров и Никос Коѕијас на 17 јуни во Псарадес, на грчката страна на Преспанското Eзеро. На потпишувањето присуствуваа и премиерите Зоран Заев и Алексис Ципрас, медијаторот на ОН во спорот со името Метју Нимиц, потсекретарката за политички прашања на Светската органзиација Розмари Ди Карло, високата претставничка на ЕУ за надворешна и безбедносна политика Федерика Могерини и комесарот за европска соседска политика и преговори за проширување на ЕУ Јоханес Хан. Според договорот, официјално име на државата ќе биде Република Северна Македонија или Северна Македонија (скратено име). Со договорот се признава - македонски јазик, дел од група јужнословенски јазици. За државјанство е предвидено: Македонско/граѓанин на Република Северна Македонија - во сите патни документи. Имплементацијата на договорот ќе се случува етапно. Ќе стапи во сила откако двете страни ќе го прифатат согласно внатрешни процедури, но доколку која било од страните не го прифати договорот согласно внатрешните процедури тоа ќе значи дека договорот не важи. Конечниот збор за договорот ќе го имаат македонските граѓани на референдум, најавен за наесен. МИА

Собранието повторно ќе гласа за Законот за ратификација на Договорот за името

Ивона Петрова — Thu, 05 Jul 2018 05:53:49 +0000

Собранието на Република Македонија денеска треба повторно да гласа за Законот за ратификација на Договорот со Грција за спорот за името. Се враќа по вторпат на гласање бидејќи Законот не беше потпишан од страна на претседателот на РМ. Законот за ратификација на Конечната спогодба за решавање на разликите опишани во резолуциите 817 (1993) и 845 (1993) на Советот за безбедност на Обединетите нации, за престанување на важноста на Привремената спогодба од 1995 година и за воспоставување на стратешко партнерство меѓу страните во трето читање е единствена точка на дневениот ред на 54. седница на Собранието. Собранието на Република Македонија го ратификуваше Договорот за решението за спорот за името на 20 јуни со 69 гласа „за“ и без против и воздржани. Пратениците од опозициската ВМРО-ДПМНЕ не присуствуваа на седницата. Истиот ден тој беше потпишан од страна на Џафери и испратен до Кабинетот на Иванов, кој како што најави го врати законот во предвидениот рок без да го потпише Указот. Минатата недела во Собранието на Република Македонија беше доставена одлуката на претседателот на државата Ѓорге Иванов со која тој информира дека нема да го потпише Указот за прогласување на Законот за ратификација на Kонечната спогодба за решавање на разликите опишани во резолуциите 817 (1993) и 845 (1993) на Советот за безбедност на Обединетите нации, за престанување на важноста на Привремената спогодба од 1995 година и за воспоставување стратешко партнерство меѓу страните. За да го изгласа законот за ратфикација на Собранието му е потребно мнозинство од 61 глас „за“. Доколку повторно се изгласа, договорот во тој случај повторно се испраќа до претседателот, кој според Уставот е обврзан да го потпише. Очекувањата се дека и по второто гласање Иванов нема да го потпише Указот за законот за ратификација на договорот за името и оти ќе го примени т.н. џебно вето, како што направи со Законот за употреба на јазиците. Иванов за својата одлука за непотпишување на Указот за законот за ратификацијата на договорот наведе повеќе причини. Претседателот на Собранието Џафери најави дека по прегласувањето ќе го испрати законот во Службен весник на Република Македонија со еден потпис, а исто така ќе постапи и за Законот за употреба на јазиците, чијшто указ Иванов не го потпиша Договорот за решавање на спорот за името помеѓу Македонија и Грција го потпишаа министрите за надворешни работи на двете земји Никола Димитров и Никос Коѕијас на 17 јуни во Псарадес, на грчката страна на Преспанското Eзеро. На потпишувањето присуствуваа и премиерите Зоран Заев и Алексис Ципрас, медијаторот на ОН во спорот со името Метју Нимиц, потсекретарката за политички прашања на Светската органзиација Розмари Ди Карло, високата претставничка на ЕУ за надворешна и безбедносна политика Федерика Могерини и комесарот за европска соседска политика и преговори за проширување на ЕУ Јоханес Хан. Според договорот, официјално име на државата ќе биде Република Северна Македонија или Северна Македонија (скратено име). Со договорот се признава - македонски јазик, дел од група јужнословенски јазици. За државјанство е предвидено: Македонско/граѓанин на Република Северна Македонија - во сите патни документи. Имплементацијата на договорот ќе се случува етапно. Ќе стапи во сила откако двете страни ќе го прифатат согласно внатрешни процедури, но доколку која било од страните не го прифати договорот согласно внатрешните процедури тоа ќе значи дека договорот не важи. Конечниот збор за договорот ќе го имаат македонските граѓани на референдум, најавен за наесен. МИА

Собранието ќе го ратификува договорот за името со Грција

Ивона Петрова — Wed, 20 Jun 2018 06:04:46 +0000

Договорот за решавање на спорот со името денеска треба да биде ратификуван во рамки на 51. седница на Собранието на Репубика Македонија. Шефот на дипломатијата Ниола Димитров на собраниската седница која започна вчера рече дека Грција согласно договорот, по неговото ратификување во македонскиот Парламент, има обврска да го извести претседателот на Европскиот совет, Доналд Туск дека дава поддршка за почеток на членството на Македонија во ЕУ и да го извести генералниот секретар на НАТО, Јенс Столтенберг дека ја поддржува поканата за НАТО. - Јунскиот совет е пред нас, министрите за надворешни работи на земјите-членки ќе заседаваат на 25 и 26 јуни, а Самитот е на 28 јуни. Овие датуми се клучни за европската перспектива на нашата земја и зависат од ратификацијата на спогодбата. За да ги испорачаме овие резултати предлагаме Собранието да одлучи законот да се донесе по скратена постапка. Со ратификацијата се отвора можноста граѓаните да се изјаснат за својата иднина на есенскиот референдум, рече Димитров. По донесувањето од страна на Парламентот договорот треба да биде испратен до претседателот Иванов, кој има рок од седум дена да го потпише. Претседателот на државата во своето неодамнешно обраќање кажа дека нема да го поддржи ниту да го потпише договорот за спорот за името, кој според него, е штетен. Доколку Иванов го употреби правото на вето, договорот повторно оди во собраниска процедура, но тогаш ќе мора да биде изгласан со апсолутно мнозинство, 61 пратеник треба да гласа „за“. Договорот во тој случај повторно се испраќа до претседателот, кој според Уставот е обврзан да го потпише. Собранието вчера ја започна постапката за ратификација на договорот, кој се носи во скратена постапка и со европско знаменце. По констатирањето на потребата за негово носење со 69 гласа „за“ и 40 „против“, се одржаа седници на Комисијата за европски прашања и Законодавно-правната комисија. Против договорот гласаше опозициската ВМРО-ДПМНЕ чии пратеници ја напуштија работата на Собранието по ова прашање откако не беа прифатени нивните забелешки дека договорот треба да се разгледува на Комисијата за надворешни работи, каде претседател е поранешниот министер за надворешни работи и пратеник од оваа партија Антонио Милошоски. Тие се против менување на Уставот за промена на уставното име, што се предвидува со договорот. Координаторот на пратеничката група на ВМРО-ДПМНЕ Драган Данев изјави дека договорот е едностран, претставува капитулација за државата и геноцид за македонскиот народ. Според него, се наметнува ново име на државата и се крши уставот, со тоа што е прифатено да се користи за внатрешна употреба. Го обвини претседателот на Собраниети Џафери дека го крши собраинскиот деловник, законите и Уставот. Министерот Димитров имаше обраќање и пред членовите на Комисијата за европски прашања. - Договорот за името со Грција е компромис, со кој и ние и нашите грчки пријатели настојувавме низ сите овие месеци да го зачуваме тоа што ни е најбитно. Ние од наша страна се обидувавме и успеавме да го зачуваме идентитетот и сите атрибути на македонскиот народ, а Грција се обидуваше да добие дистинкција меѓу Македонија - државата и Македонија - регионот во Грција. Тоа е суштината на оваа спогодба, истакна Димитров, кој е потписник на договорот од македонска страна. Овие денови, според него, се историски за Македонија, а текстот на договорот за него е одговорност, патриотизам и храброст. Осврнувајќи се на суштинскиот член 1 од Договорот, министерот за надворешни работи истакна дека се предвидува официјалното име на државата да биде Република Северна Македонија или скратено Северна Македонија. - Дали ова значи менување или значи додавање на одредница пред главната суштина на името Македонија? Северна е географска одредница. Северна е придавка, рече Димитров. Државјанството ќе биде македонско или граѓани на Република Северна Македонија. Официјалниот јазик ќе биде македонски јазик, додаде Димитров. Според него, во насока на помирување и единство дома важно е да се признае дека „и тие што имаат различно гледиште на овој историски момент и историска раскрсница, исто така се патриоти што гледаат различно на работите“. Можеби не се, посочи тој, сосема свесни за влогот и за иднината, можеби има и недоволна информираност. - Мислам дека е важно за оваа дебата за оваа толку важно прашање да прифатиме дека сите си ја сакаме нашата Македонија и сите сакаме да успееме и сите сакаме да си го зачуваме идентитетот и да си ги отвориме вратите на нашата иднина заради идните генерации без разлика што можеби различно гледаме, рече, меѓу другото, министерот за надворешни работи. Пред зградата на Парламентот паралелно со почетокот на седницата се одржа и протест на граѓани кои се против донесувањето на договорот за спорот со името. Етапна реализација на договореното Предлог - законот за ратификација на Конечната спогодба за решавање на разликата како што е опишана во резолуциите на Советот за безбедност на Обединетите нации 817 (1993) и 845 (1993), престанување на Времената спогодба од 1995 година и воспоставување на стратешко партнерство помеѓу страните, беше усвоен во понеделникот на владина седница. Договорот за решавање на спорот за името помеѓу Македонија и Грција го потпишаа министрите за надворешни работи на двете земји Никола Димитров и Никос Коѕијас во неделата во Псарадес, на грчката страна на Преспанското езеро. На потпишувањето присуствуваа и премиерите Зоран Заев и Алексис Ципрас, медијаторот на ОН во спорот со името Метју Нимиц, потсекретарката за политички прашања на Светската органзиација Розмари Ди Карло, високата претставничка на ЕУ за надворешна и безбедносна политика Федерика Могерини и комесарот за европска соседска политика и преговори за проширување на ЕУ Јоханес Хан. Имплементацијата на договорот ќе се случува етапно. Ќе стапи во сила откако двете страни ќе го прифатат согласно внатрешни процедури, но доколку која било од страните не го прифати договорот согласно внатрешните процедури тоа ќе значи дека договорот не важи. Конечниот збор за договорот ќе го имаат македонските граѓани на референдум, најавен за наесен. Премиерот Зоран Заев синоќа во интервју за емисијата „Вистина“ на Канал 5 рече дека верува оти нашиот народ ќе донесе мудра одлука. - Направив договор, не беше лесно да се постигне. Сега имаат шанса граѓаните, ќе се изјаснат дефинитивно на референдум. Јас сум убеден дека огромно мнозинство ќе ги поддржи овие перспективи кои и се на дофат на Македонија, рече Заев. Премиерот тврди дека резултатот од референдумот ќе биде задолжителен без разлика дали ќе биде обврзувачки или консултативен. - Тоа значи ако мнозинството на граѓаните е „за“ тогаш договорот е важечки, ако, пак, мнозинството е „против“ тогаш не важи ниту ратификацијата на договорот ниту, пак, договореното име, прецизира Заев. МИА

Владата го усвои договорот со Грција, ќе го достави на ратификација во Собранието

Ивона Петрова — Mon, 18 Jun 2018 09:42:28 +0000

Владата на Република Македонија на денешната 74. седница го разгледа и усвои Предлог - законот за ратификација на Конечната спогодба за решавање на разликата како што е опишана во резолуциите на Советот за безбедност на Обединетите нации 817 (1993) и 845 (1993), престанување на Времената спогодба од 1995 година и воспоставување на стратешко партнерство помеѓу страните, на предлог на Министерството за надворешни работи. Предлог-законот за ратификација ќе биде доставен до Собранието на Репубика Македонија, соопшти владината прес-служба. Според предвидената динамика, откако ќе биде доставен до Собранието пратениците треба да гласаат и да го усвојат со обично мнозинство, односно со мнозинство од присутните пратеници. Минимален кворум за работата на законодавниот дом е 61 пратеник, што значи дека 31 треба да гласаат „за“, за договорот биде ратификуван. Потоа следува негово испраќање до претседателот Иванов, кој има рок од седум дена да го потпише. Доколку Иванов го употреби правото на вето, договорот повторно оди во собраниска процедура, но тогаш ќе мора да биде изгласан со апсолутно мнозинство, 61 пратеник треба да гласа „за“. Договорот во тој случај повторно се испраќа до претседателот, кој според Уставот е обврзан да го потпише. Спроведувањето на договорот ќе се случува етапно. Ќе стапи во сила откако двете страни ќе го прифатат согласно внатрешните процедури. Но, доколку која било од страните не го прифати договорот согласно внатрешните процедури тоа ќе значи дека договорот не важи. За договореното, конечниот збор ќе го имаат македонските граѓани на референдумот, кој треба да се одржи во септември или октомври. Македонија, според договореното, до крајот на годинава ќе треба да усвои и амандмани на Уставот. Со Договорот за решавање на македонско-грчкиот спор за името и стратегиско партнерство што вчера во Преспа го потпишаа министрите за надворешни работи на Македонија и Грција, Никола Димитров и Никос Коѕијас, официјално име на државата ќе биде Република Северна Македонија или Северна Македонија (скратено име). Со Договорот се признава - Македонски јазик, дел од група јужнословенски јазици. За државјанство е предвидено: Македонско/граѓанин на Република Северна Македонија - во сите патни документи. Грција треба да го ратификува Договорот во Парламентот. Грција се обврзува да не приговара на барањата за членство или членството на Македонија во меѓународните, мултилатералните и регионални организации и институции, во кои членува Грција. Македонија ќе бара прием во меѓународните, мултилатералните и регионалните организации и институции под името Република Северна Македонија. Грција ќе го извести претседателот на Советот на ЕУ дека дава поддршка за почеток на преговори за членство на Македонија. Грција ќе го извести генералниот секретар на НАТО дека дава поддршка НАТО да ѝ упати покана за пристапување на Македонија. Таквата поддршка на Грција е условена, со исходот на референдумот, доколку Македонија одлучи да одржи референдум. Двете страни со потпишаниот Договор, прифаќаат дека нивното односно разбирање на термините „Македонија“ и „македонски“ се однесува на различен историски контекст и културно наследство. За Грција - тие термини ја означуваат не само областа и народот во северниот регион на Грција, туку и нивните одлики, како и елинската цивилизација, историја, култура и наследството на тој регион од антиката до денешен ден. За Македонија - тие термини ја означуваат нејзината територија, јазик, народ и нивните одлики, со нивната сопствена историја, култура, и наследство. Во рок од шест месеци Македонија ќе го преиспита статусот со спомениците, јавните згради и инфраструктурата на нејзината територија и доколку истите на кој било начин упатуваат на античката елинска историја и цивилизација, што претставува составен дел од историското или културно наследство на Грција, ќе преземе соодветни корективни дејствија со цел делотворно да го разгледа прашањето и да обезбеди почитување на таквото наследство. Во рок од еден месец страните преку размена на дипломатски ноти, на рамноправна основа, ќе формираат Заеднички интередисциплинарен комитет на експерти за историски, археолошки и образовни прашања, којшто ќе го разгледува објективното научно толкување на историските настани засновано на автентични, засновани на докази и научно издржани историски извори и археолошки наоди. Страните се согласуваат дека нивната стратешка соработка ќе ги опфати сите сектори, како што се земјоделство, цивилна заштита, одбрана, економија, енергија, животна средина, индустрија, инфраструктура, инвестиции, политички односи, туризам, трговија, прекугранична соработка и транспорт. По стапување во сила – Грција го подига нивото на Канцеларијата за врски во Скопје на ниво на – Амбасада и обратно. Страните натаму ќе ја развиваат нивната економска соработка во сите области. Особен фокус ќе се стави на јакнење, зацврстување и продлабочување на нивната билатерална соработка во областа на земјоделството, енергијата, животната средина, индустријата, инфраструктурата, инвестициите, туризмот, трговијата и транспортот. Со Договорот е предвидено сите спорови да се решаваат единствено со мирољубиви средства, во согласност со Повелбата на Обедините нации. МИА

Собранието треба да го ратификува Договорот со Бугарија

Матеја Петровски — Mon, 15 Jan 2018 08:23:29 +0000

Предлог-законот за ратификација на Договорот за пријателство, добрососедство и соработка меѓу Република Македонија и Република Бугарија е на дневен ред на денешната 30. собраниската седница. Предлогот кон крајот на минатиот месец помина на Комисијата за надворешна политика. Договорот, како што објави МИА, беше потпишан на 1 август 2017 година од страна на премиерите на двете држави, Зоран Заев и Бојко Борисов, заради зацврстување на меѓусебните пријателски односи, унапредување на добрососедството, развивање на сестрани меѓусебни односи, согласно меѓународното право. Тој е резултат на петгодишен договарачки процес на работните групи на двете МНР и претставува наградба на договорот потпишан во 1990 година. Бугарската вицепремиерка за правосудни реформи и министерка за надворешни работи Екатерина Захариева кон крајот на минатиот месец во интервју за Бугарско национално радио (БНР) најави дека дека Договорот ќе биде ратификуван во Народно собрание во јануари. - Договорот за добрососедство со Македонија е проследен од Владата до Собранието, не е ратификуван се уште, но се надевам дека во јануари народните пратеници ќе го поддржат. Поважно е дека уште пред да се ратификува договорот, т.е. да стапи на сила, тој се исполнува. Дури и да беше ратификуван, ако нашите односи продолжија да течат на истиот начин, што од тоа дека сме потпишале Договор за пријателство и добрососедство, изјави Захариева. Денеска официјално ќе биде претставено и претседателството на Бугарија со ЕУ. По тој повод бугарскиот амбасадор во Македонија Иван Петков пред членовите на собраниската Комисија за европски прашања ќе ги презентира програмата и приоритетите за работа на бугарското претседателство во следниве шест месеци.