реџеп тајип ердоган – Kurir.mk

Ердоган: „Го избришав“ Нетанјаху, со него не може да се разговара

Тале Кристо — Sat, 04 Nov 2023 14:47:14 +0000

Претседателот на Турција, Реџеп Тајип Ердоган денеска изјави дека ги прекинува сите контакти со израелскиот премиер Бенјамин Нетанјаху поради акциите на Израел во Појасот Газа. Според турскиот претседател, Нетанјаху е одговорен за насилството во Појасот Газа и оцени дека израелскиот премиер „ја изгубил поддршката од сопствените граѓани“ и треба да се повлече. - Нетанјаху повеќе не е некој со кој можеме да разговараме. Го избришавме и го отфрливме, наведе Ердоган. Тој истакна дека „нема друга земја чија армија се однесува со таква нечовечност“, истакна Ердоган алудирајќи на одмаздничките мерки на Израел во Појасот Газа по нападот на Хамас на израелска територија на 7 октомври, при што загинаа 1.400 луѓе на израелска страна, главно цивили. Претходно, турското Министерство за надворешни работи соопшти дека Анкара го отповикала својот амбасадор во Израел на консултации поради одбивањето на Израел да се согласи на прекин на огнот во Појасот Газа. - Амбасадорот на Турција, Сакир Озкан Торунлар е отповикан со оглед на хуманитарната трагедија во Газа предизвикана од континуираните напади на Израел против цивили и одбивањето на Израел (да прифати) прекин на огнот, се наведува во соопштението на турското МНР.

Телефонски разговор Ердоган-Зеленски за кризата на Блискиот исток

Ивана Ефремовски — Sat, 21 Oct 2023 13:47:53 +0000

Турскиот претседател Реџеп Тајип Ердоган и украинскиот претседател Володимир Зеленски телефонски разговарале за случувањата на Блискиот Исток, јавува Анадолија. Како што се наведува во соопштението на Дирекцијата за комуникации на Турција, двајцата лидери разговарале за војната што Русија ја води во Украина, израелско-палестинскиот конфликт и хуманитарната криза во регионот. Ердоган посочи дека е можно по мирен пат да се решат конфликтите во регионот, вклучително и израелско-палестинскиот конфликт. Тој рече дека Турција ќе продолжи да ги вложува сите можни напори за да го постигне тоа. (МИА)

Ердоган ги повикува влијателните актери да ги намалат тензиите меѓу Израелците и Палестинците

Катерина Бојаџиева — Thu, 12 Oct 2023 19:52:51 +0000

Турција ги повикува влијателните актери во регионот да ги намалат тензиите, изјави денеска претседателот Реџеп Тајип Ердоган, коментирајќи ги разгорените тензии меѓу Израел и палестинската група Хамас, јавува Анадолија. - Не сакаме конфликтите да се шират во нашиот регион, наместо слепо да поддржуваме некого, ги повикуваме влијателните актери во регионот да ги намалат тензиите, рече Ердоган во Анкара, на собирот „Младинска фондација Турција“. Како нација која со векови не отстапува од правдата и правичноста, нашиот однос кон израелско-палестинскиот конфликт е во таа насока, додаде Ердоган. Тој нагласи дека, за разлика од организациите, државите се обврзани да ги почитуваат законите за војна и човековите права. - Гледаме дека оваа линија постепено исчезнува, рече тој. Турскиот лидер истакна дека исклучувањето на струјата, водата, горивото и храната за два милиони луѓе во Газа не е ниту хумано ниту има место во законите на војната. Кога станува збор за американската политика кон израелско-палестинскиот конфликт, Ердоган праша: Дали е соодветно за земја како САД да бара мир или да долева масло на огнот?, пренесува Анадолија.

Ердоган и Бајден разговараа за авионите Ф-16

Ивана Ефремовски — Sun, 10 Sep 2023 17:18:11 +0000

Претседателот на Турција, Реџеп Тајип Ердоган изјави дека на маргините на Самитот на Г20 разговарал со американскиот претседател Џо Бајден за набавка на борбени авиони Ф-16 од САД. - За жал, нашите пријатели постојано ја споменуваат Шведска кога станува збор за Ф-16. Таквиот пристап сериозно не вознемирува, посочи Ердоган. Тој повтори дека евентуалниот прием на Шведска во НАТО е во надлежност на турскиот Парламент. - Не сум во ситуација да можам сам да одлучувам. Тоа мора да биде усвоено од Парламентот. Шведска мора да ги исполни своите обврски, наведе Ердоган. Турција тврди дека кандидатурата на Шведска за членство во НАТО и прашањето за Анкара за купување на Ф-16 од САД не се поврзани. Официјална Анкара побара борбени авиони и опрема Ф-16 за модернизирање на авионот во октомври 2021 година. Договорот вреден шест милијарди долари ќе вклучува продажба на 40 авиони, како и комплети за модернизација за 79 борбени авиони,. Стејт департментот неформално го извести Конгресот за можната продажба, но клучните пратеници на Капитол Хил предупредија дека ќе го отфрлат договорот поради неколку барања, вклучително и условување на Анкара со купувањето на авиони за одобрување на кандидатурата на Шведска за членство во НАТО. Анкара тврди дека авионите ќе ја зајакнат не само Турција, туку и НАТО. (МИА)

Ердоган најави дека турскиот парламент наскоро ќе почне процедура за менување на Уставот

Ивана Ефремовски — Fri, 01 Sep 2023 17:11:22 +0000

Турскиот претседател Реџеп Тајип Ердоган денеска во Анкара изјави дека една од задачите на турскиот Парламент кога ќе продолжи со работа оваа есен ќе биде да усвои нов устав кој ќе го замени оној што беше во републиката по воениот удар во 1980 година. - Нашето ветување за нацијата ќе биде првокласен устав кој ќе ги надополнува првокласните демократија, економија и слободи. Нашата визија за „Векот на Турција“ ќе се зајакне со таков устав“, рече Ердоган . - Со продолжувањето на работата на парламентот, ќе ги обновиме нашите иницијативи за зајакнување на турската демократија со нов устав, додаде тој. Соодветната законска иницијатива ќе биде поднесена на разгледување на есенската седница на парламентот, која започнува во октомври. Сегашниот устав е воведен по воениот удар во 1980 година . Претседателот на Турција двапати поднесе на национално одобрување прашања поврзани со измените на уставот. По референдумот во 2017 година, парламентарната форма на владеење на републиката беше заменета со претседателска, но не беше усвоен нов устав во светлината на овие промени. По неговиот реизбор за нов претседателски мандат во мај, Ердоган рече дека усвојувањето на новиот устав е една од главните задачи на неговата администрација. (МИА)

Приведено лице кое го имитирало гласот на Ердоган со помош на вештачка интелигенција

Ивана Ефремовски — Thu, 17 Aug 2023 17:25:27 +0000

За време на операција на турската разузнавачка агенција МИТ во Турција, приведено е лице кое со помош на вештачка интелигенција го имитирало гласот на претседателот Реџеп Тајип Ердоган и се јавувал кај бизнисмени и високи владини претставници, јави турската телевизија Си-Ен-Ен-Турк. Во операцијата на МИТ беше откриено дека измамникот се обидувал да го имитира гласот на претседателот Ердоган со помош на апликации за вештачка интелигенција. Тој повикал угледни бизнисмени и владини функционери од преку десет телефонски броеви заради различни измами. Единиците за безбедност на МИТ успеале релативно брзо да го утврдат идентитетот и локацијата на измамникот, по што тој бил приведен. Турските власти ги повикуваат граѓаните да бидат внимателни при ваквите обиди за измама, ветувајќи дека мерките против ваквите постапки континуирано ќе се засилуваат. (МИА)

Ердоган: Треба да продолжи процесот за целосно нормализирање на односите Турција – Ерменија

Дарко Андоновски — Wed, 28 Jun 2023 13:59:08 +0000

Претседателот на Турција, Реџеп Тајип Ердоган во денешниот телефонски разговор со ерменскиот премиер Никол Пашинјан истакна дека треба да продолжи процесот на целосна нормализација на односите меѓу двете земји, соопшти кабинетот на Ердоган. Додека според Јавното радио на Ерменија, Пашинјан и Ердоган разговарале за процесот на спроведување на Договорот за отворање на копнената граница меѓу двете земји за лицата кои имаат дипломатски пасоши и за државјаните на трети земји. Пашинјан на претседателот на Турција му го честита Курбан Бајрам, а Ердоган на ерменскиот премиер му го честиташе на ерменскиот премиер Вартавар, празникот Преображение, јави Радиото.

Ердоган повика на составување нов турски устав

Дарко Андоновски — Wed, 21 Jun 2023 15:10:17 +0000

Турскиот претседател Реџеп Таип Ердоган денеска уште еднаш повика на составување нов турски устав, јави агенцијата Анадолија. Турската влада нема да застане додека земјата не се рангира меѓу десетте најголеми економии во светот, рече Ердоган, говорејќи на првиот состанок на парламентарната група на неговата владејачка Партија на правдата и развојот (АКП) на 28. Меџлис. Според шефот на државата, кабинетот продолжува да работи на 12. развоен план на Турција, како и на среднорочната програма за развој на земјата. „Убеден сум дека од економскиот просперитет на Турција ќе имаат корист сите 85 милиони жители на нашата земја. За да ја координираме работата во економската сфера, воспоставивме блиски врски меѓу кабинетот на потпретседателот, Министерството за финансии и Централната банка, рече Ердоган. Тој, исто така, смета дека важен стимул за натамошниот развој на Турција ќе биде усвојувањето нова верзија на уставот на земјата. Концептот за „стогодишнината на Турција“, како што рече, „не може да се реализира врз основа на устав кој беше подготвен и усвоен по воениот удар“. Ердоган предложи во новиот устав да се вметне правото на муслиманките да носат шамии. Тој, исто така, ги повика своите противници да ја поддржат работата за новиот устав на Турција.

Телефонски разговор Ердоган – Лајен

Ивана Ефремовски — Sat, 17 Jun 2023 19:05:34 +0000

Претседателот на Турција, Реџеп Тајип Ердоган денеска телефонски разговараше со претседателката на Европската комисија, Урсула фон дер Лајен, соопшти Кабинетот на шефот на државата. - Фер односот на Европска унија кон Анкара и поддршката за перспективата за полноправно членство ќе бидат од клучно значење за отворање нови хоризонти во меѓусебните односи, посочи Ердоган. Според него зајакнувањето на соработката на ЕУ со Турција „е модалитет за успешна борба со предизвиците со кои се соочуваат на регионално ниво“. Фон дер Лајен му честиташе на Ердоган за неговиот реизбор за претседател. (МИА)

Припадници на турската заедница во Скопје ја прославуваат победата Ердоган

Тале Кристо — Sun, 28 May 2023 20:00:33 +0000

Припадници на турската заедница во земјава вечерва во Скопје ја прославуваат победата на актуелниот претседател на Турција, Реџеп Тајип Ердоган, кој прогласи победа во вториот круг од претседателските избори. Организирани со возила и турски знамиња, припадниците на турската заедница во земјава се движеа низ централното градско подрачје. ТРТ јави дека по преброени 97,9 отсто од гласовите Ердоган води со 52, 14 отсто, додека неговиот противкандидат од опозицијата Кемал Киличдароглу освоил 47,86 отсто.