референдумско прашање – Kurir.mk

Николоски: Референдумското прашање не смее да биде манипулативно

Даниел Василев — Sun, 29 Jul 2018 12:50:13 +0000

Потпретседателот на ВМРО-ДПМНЕ, Александар Николоски во неделното интервју за Радио Слободна Европа изјави дека референдумското прашање, доколку биде така како што го најави премиерот Зоран Заев, е амнипулативно. -Во една цела серија на членови од 20. до 30. член е пропишано како се организира референдум и една од работите што ги пишува е дека референдумското прашање мора да е разбирлива, едноставно и еднозначно. Ова што го поставува премиерот е повеќезначно, односно има најмалку осум до девет комбинации кои што можете да ги одговорите. На пример: Може да сте „за“ членство на Македонија во Европската унија, а да сте „против“ членство на Македонија во НАТО и против Договорот за името..., рече Николоски. Според него, такво прашање е манипулативно и тоа спротивно на законот. Вели дека ВМРО-ДПМНЕ инсистира на едноставно прашање. -Инсистираме на едноставно прашање. Согласно законот едноставно прашање значи еднозначно прашање. Тоа прашање треба да е многу едноставно, односно граѓаните да кажат дали се „за“ или „против“ Договорот со Грција кој предвидува промена на името, истакна потпретседателот на партијата. Вели дека за прашањата за НАТО и ЕУ би требало да бидат организирани посебни референдуми, или пак, на истиот ден кога ќе има референдум за Договорот, да има уште две прашања кои би се однесувале на ЕУ и НАТО. -Впрочем, ние сме имале два референдуми во државата и двете прашања биле едноставни. И за осамостојувањето, и потоа за територијалната реорганизација, вели Николоски. Појаснува дека прашањето, доколку биде како што спомна Заев, не е збунувачко, туку е повеќезначно, односно има три прашања кои можат да бидат искомбинирани во повеќе одговори. -Очигледно власта сака да ја направи таа манипулација затоа што се свесни дека потпишаа Договор кој не поминува кај граѓаните, потенцира Николоски.

Македонците две недели после грчката јавност, беа почестени од Заев со информација за референдумските прашања

Ивана Ефремовски — Thu, 19 Jul 2018 08:52:28 +0000

Македонската јавноста две недели после грчката јавност дозна за содржината на референдумското прашање. Имено премиерот Заев уште на почетокот од месец јуни во интервју за грчката национална телевизија ЕРТ кажа дека референдумското прашање ќе биде - „Дали сте за членство во ЕУ и НАТО со поддршка на договорот со Грција?“ за дури после две недели и македонската јавност да го слушне прашањето, за кое никој друг, туку таа, ќе треба да се изјасни. -Народот, убеден сум дека ќе биде за договорот со Грција, заради тоа што прашањето веројатно ќе биде - „Дали сте за ЕУ и НАТО и за поддршка на договорот со Грција?“, веројатно во тој правец ќе биде заради тоа што едно со друго кај нас е поврзано, кажа Заев на интервјуто за грчката национална телевизија ЕРТ на 05.07.2018 година. Доцна синоќа и македонската јавност го слушна прашањето за референдумот, за кој треба да се изјасни, цели две недели откако Заев го обелодени пред грчките граѓани. -Дали сте за членство во ЕУ и НАТО со прифаќање на договорот меѓу Република Македонија и Република Грција, изјави Заев од вчерашната прес-конференција. Македонската стручна и научна јавност го обвинуваше Заев уште од самиот почеток на преговорите за промена на името со Грција, бидејќи целиот процес се водеше нетранспарентно и надвор од очите на јавноста. Информациите нашите граѓани наместо од официјалните претставници на македонската влада, ги дознаваа од грчките медиуми или изјави на премиерот за некој странски медиум, така е и сега со референдумското прашање.

Цуцуловски ја разобличи манипулацијата на Заев околу референдумското прашање

Даниел Василев — Sat, 07 Jul 2018 12:19:38 +0000

Професор Љубомир Цуцуловски на социјалната мрежа Фејсбук ја разобличи манипулацијата со референдумското прашање за промена на името. Според него, во прашањето кое ќе биде поставено на референдум, всушност се кријат 4 прашања. -ПРЕДЛОГ. Во интервјуто за грчката државна телевизија ЕРТ, Зоран Заев изјави дека најверојатно реферндумското прашање ќе било: „Дали сте за Европската унија и НАТО, и за поддршка на Договорот со Грција.“ Зад навидум едното референдумско прашање, се кријат најмалку четири прашања, кои според логиката и здравиот разум (патем, логиката и задравиот разум секогаш одат заедно) мора да се издвојат и за секое од нив одделно да се изјаснува. Зошто тврдам дека се кријат најмалку четири прашања? Затоа што: (1) Некој може да биде за ЕУ, но да не биде за НАТО и Договорот. (2) Некој може да биде за НАТО, но да не биде за ЕУ и Договорот. (3) Некој може да биде и за ЕУ и за НАТО, но да не биде за Договорот. (4) Некој може да биде за Договорот, но да не биде за ЕУ и НАТО, што е малку веројатно, но што е во ова лудило можно. Значи, да се остане со прстот во устата. Затоа, следејќи го начинот на кој функционира Зоран Заев, предлагам референдумското прашање (ако дојде до него) да биде: „Дали сте за Европската унија и НАТО, и за поддршка Вашето семејство да биде растурено?“ Само така на граѓаните ќе им се „олесни“ изборот. Ќе треба да бираат помеѓу тоа дали се за ЕУ и НАТО, или се евентуално и за своето семејство. Ако го одберат второто (семејство), ќе „покажат“ невиден егоизам, идентичен со патриотизам, што никогаш не му „прилегало“ на Македонецот. Затоа, таквиот резултат од референдумот однапред треба да биде осуден и отфрлен од сите (без исклучок!), вклучувајќи ги и оние кои така гласале.