река брегалница – Kurir.mk

Малолетник од виничкото село Истибања се удави во Брегалница

Магдалена Андонова — Fri, 11 Sep 2020 19:13:29 +0000

Малолетно момче на 14-годишна возраст од виничкото село Истибања попладнево се удавило во водите на реката Брегалница. Според првичните информации, трагичниот настан се случил во атарот на селото Калиманци, каде што момчето отишло на риболов и според искази на роднини влегло во водата. Полицијата го потврдува трагичниот настан, но не соопштува детали. Потрагата по телото на момчето е во тек.

Бела течност со неиспитани својства се испушта во водите на реката Брегалница

Катерина Бојаџиева — Wed, 08 Jan 2020 16:27:56 +0000

Бела течност со неиспитани својства, според делчевските риболовци предизвикува сериозна опасност по животинскиот свет во реката Брегалница во Делчево. Фотографии од глетката, како што тврдат самите риболовци, веќе се доставени до надлежниот инспекторат, од каде како одговор им било наведено дека не е забележан помор на риби и затоа не се во можност да излезат на терен. -Испуштањето течност е забележано кај познатата делчевска млекара и како што може да се забележи на фотографиите прилично бргу истекува течноста. Не може со сигурност да потврдиме за колкава количина и за каква течност станува збор, но она што може да ги потврдиме дека оваа појава е доста честа. Од надлежниот инспекторат ни наведоа дека не е забележано угинување на рибниот фонд поради што немаа основ за излегување на терен и проверка на состојбат, велат делчевските риболовци. Надлежните во споменатата млекара, за МИА истакнаа дека се работи за компромитирачки фотографии направени во понеделник, а објавени во среда. Околу тоа дали и каква течност се испушта не дадоа свој коментар. Ова не е првпат во Делчево да се забележи испуштање течност која директно се слева во река Брегалница во Делчево. Пред година ипол беше поднесена кривична пријава, до како што тогаш беше наведено, непознат сторител кој предизвика помор на риби во коритото на река Брегалница, но до ден денешен, како што тврдат риболовци судскиот процес против наводниот сторител сè уште трае.

Испуштани отрови во реката Брегалница, поднесени кривични пријави

Катерина Бојаџиева — Thu, 29 Nov 2018 11:00:47 +0000

Надворешната канцеларија за криминалистички работи Делчево поднесе кривична пријава против правно лице со подружница во Делчево и Т.Н. (37) од Скопје, управител на правното лице поради постоење основи на сомнение за сторено кривично дело “загадување на добиточна храна или вода“. На 25.07.2018 година во Делчево, од објектот на првопријавеното правно лице, во кое второпријавениот е управител, преку цевката за отпадни води, во реката Брегалница биле испуштени отпадни води со хемиски агенси кои се отровни за животинскиот свет, со што предизвикале опасност за опстанокот на рибите во реката Брегалница.

Маж се давел во Брегалница, случајни минувачи го извадиле

Катерина Бојаџиева — Mon, 13 Aug 2018 12:34:39 +0000

Маж на возраст од околу 60 години синоќа околу 19 часот бил забележан како се дави во водата во близина на гумената брана кај речното корито на Брегалница во централното градско подрачје во Делчево. Случајни минувачи го забележале лицето и веднаш го извадиле од водата укажувајки му прва помош. - Човекот го забележавме случајно. Минувајќи со другарите покрај централното градско подрачје на потегот кај гумената брана во Брегалница забележав човек како бара помош. Рацете му беа испружени нагоре и без размислување, веднаш влегов во водата при што заедно со другарите, му помогнавме на човекот да се спаси од најлошото, вели Д.Н кој побара да не биде објавено неговото цело име и презиме. Засега, не се познати причините како возрасниот маж се нашол во водата. Според очевидци, веднаш по интервенцијата на делчевецот Д.Н, на местото на настанот пристигнала и медицинска екипа на Итната помош како и екипа на ТППЕ Делчево. За среќа се било навреме завршено, без посериозни последици по животот на лицето кое се давело. МИА

Помор на риби во Брегалница во близина на Делчево

Катерина Бојаџиева — Thu, 26 Jul 2018 11:46:27 +0000

Помор на поголема количина риби е забалежан вчера во водите на Брегалница во близина на Делчево. МВР соопшти дека поморот на риби бил кај место викано „Долен мост“. Полициски службеници во содејство со инспектор од Министерство за шумарство, земјоделство и водостопанство и ветеринарен инспектор, излегле на терен, по што е извршена крим техничка обработка. Од повеќе места долж течението на реката биле земени неколку килограми риби, кои ќе бидат доставени за вештачење на Институтот за сточарство при Универзитетот „Св.Кирил и Методиј“.

Голем помор на риба во реката Брегалница кај Делчево (ФОТО)

Катерина Бојаџиева — Wed, 18 Jul 2018 12:39:10 +0000

Голем помор на риба е забележан во реката Брегалница кај Делчево. Угинатите риби ги забележале загрижени рибари, кои ги испратија фотографиите до КУРИР. Инаку, големиот помор на риби е регистриран по течението на Брегалница после индустриската зона Делчево.