реконструкција на влада – Kurir.mk

Продолжува собраниската седница за реконструкција на Владата

Ивона Петрова — Wed, 22 Feb 2023 06:12:56 +0000

Со расправа за предлогот за разрешување на министерот без ресор задолжен за дијаспора Џемаил Чупи денеска продолжува 104-тата седница на Собранието посветена на владината реконструкција. Според последните најави за збор по предлогот за разрешување на Чупи се пријавени вкупно 39 пратеници. Претходно, во рамки на оваа прва точка од седницата заврши расправата за предлозите за разрешување на министерот за здравство Беким Сали и за информатичко општество и администрација Адмирим Алити. На дневниот ред на 104-тата седница се и назначувањата на новите министри - Кренар Лога за правда, Фатмир Меџити за здравство, Азир Алиу за информатичко општество и администрација и Каја Шукова за министер за животна средина. Во рамките на оваа седница треба да бидат разрешени и замениците-министри за одбрана, за земјоделство и за образование и наука, Башким Хасани, Абдулшуќур Абедини и Лулзим Алиу. Како последна, четврта точка на 104-та е седница се предлозите за избор на заменици-министри и тоа Тирон Јајага за одбрана, Викторија Аврамовска-Мадиќ за правда, Маја Манолева за здравство, Вјолца Бериша за земјоделство и Агим Нухиу за образование и наука. Седницата почна на 13 февруари, а претходно Собранието ги констатираше оставките на министерот за правда Никола Тупанчевски и на министерот за животна средина Насер Нуредини, како и на замениците-министри за здравство Владимир Рендевски и за правда Агим Нухиу.

Продолжува собраниската седница за реконструкција на Владата

Ивона Петрова — Mon, 20 Feb 2023 06:48:54 +0000

Собранието денеска треба да ја продолжи 104. седница со расправа по предлогот за разрешување на министерот за информатичко општество и администрација Адмирим Алити. Расправата почна во петокот, откако во четвртокот вечерта заврши дебатата за разрешувањето на министерот за здравство Беким Сали. Гласањето за разрешувањето на Сали треба да биде дополнително закажано, а не се одржа бидејќи немаше доволен број пратеници во собраниската сала. Покрај разрешувањата на Беким Сали и Адмирим Алити, на дневен ред на 104-тата седница се и разрешувањето на министерот без ресор задолжен за дијаспора Џемаил Чупи, како и назначувањата на Фатмир Меџити за министер за здравство, Азир Алиу за министер за информатичко општество, Кренар Лога за министер за правда и Каја Шукова за министер за животна средина. Разрешени треба да бидат и заменик–министрите за одбрана, за земјоделство и за образование и наука, Башким Хасани, Абдулшуќур Абедини и Лулзим Алиу, додека за нови заменик-министри во Владата се предлагаат Тирон Јајага за одбрана, Викторија Аврамовска – Мадиќ за правда, Маја Манолева за здравство, Вјолца Бериша за земјоделство и Агим Нухиу за образование и наука. Сто и четвртата седница почна на 13 февруари, а Собранието претходно ги констатираше оставките на министерот за правда Никола Тупанчевски и на министерот за животна средина Насер Нуредини, како и на заменик-министрите за здравство Владимир Рендевски и за правда Агим Нухиу.

Зјаат празни столчиња: Пратениците од СДСМ ги нема на седницата за реконструкција на Владата

Ивона Петрова — Thu, 16 Feb 2023 21:19:37 +0000

Собраниската седница на која се расправа за владината реконструкција ќе продолжи во 23 часот, на барање на координаторот на пратеничката група на СДСМ Јован Митревски. Пратениците на ВМРО-ДПМНЕ, објавија дека во собраниската сала пратеници од власта речиси и да нема. -Маричиќ дојди во Собрание да ги слушнеш аргументите на опозицијата. Во 21:45 нема никој од вашите пратеници, нема никој од вашата Владата. Пратениците на ВМРО-ДПМНЕ и коалицијата се во сала, но нема со кој да дебатираме. Очигледно на пратениците од СДС им проработе срамот од дебаклите на Таче, па избегаа од седницата за реконструкција на Владата, објави на Фејсбук пратеникот Бране Петрушевски. -Во 22 часот вака владиното мнозинство избира Влада, министри и заменици министри. Безмалку ниту еден пратеник. Зјаат празни столчиња од "стабилното и проширено" мнозинство. Слаба ви е "Пазар 3" коалицијата, малку ќе ви трае, напиша пратеникот Бојан Стојаноски. Координаторот на пратеничката група на ВМРО - ДПМНЕ Никола Мицевски порача дека Собранието е единственото место каде треба да се спротивстават аргументите. - Во салата има три пратеници од СДСМ, од партијата од која доаѓа вицепремиерот. Контрадикторни сте. Од една страна обвинувате за блокада од опозицијата, а од друга страна вие пред 10 дена на една национална телевизија рековте дека Собранието работи и сме донеле 374 закони, 140 одлуки, 20 ратификации. Работиме или не. Не сум јас крив што вие пуштивте празна апликација за разрешување на луѓе за кои пред една година зборувавте дека оваа е Владата и со овие луѓе прогресот ќе дојде, рече меѓу другото Мицевски. Седницата почна пред четири дена, а треба да се заокружи расправата по првата точка - предлогот за разрешување членови на Владата, на досегашните министри за здравство Беким Сали, за информатичко општество и администрација Адмирим Алити и министерот без ресор задолжен за дијаспора Џемаил Чупи. Тие се кадри на Алтернатива која ја напушти владината коалиција и ќе бидат заменети со министри од Алијанса за Албанците, новиот коалициски партнер во Владата.

Почна седницата за реконструкција на Владата

Ивона Петрова — Mon, 13 Feb 2023 15:35:08 +0000

Собранието попладнево ја започна седницата за реконструкција на Владата. На дневен ред на 104. седница се Предлогот за разрешување на членови на Владата, Предлогот за избор на членови на Владата, Предлогот за разрешување на заменици на министри и Предлогот за именување на заменици на министри. Дневниот ред на седницата е усвоен со 64 гласа „за“, од 115 присутни пратеници. Против и воздржани немаше. Премиерот Димитар Ковачевски ја користи деловничката можност да се обрати пред пратениците, потенцирајќи ја потребата за стабилност и за врвните интереси на државата. Ковачевски на почетокот на седницата изрази сочувство за загубите на човечките животи во земјотресите во Турција и Сирија. Координаторот на пратеничката група на ВМРО-ДПМНЕ, Никола Мицевски во процедурална забелешка рече дека врз основа на член 221 од Деловникот, на дневниот ред разрешувањето на министрите требале да бидат поединечно, најавувајќи дека пратениците од опозицијата активно ќе дискутираат на седницата. Со реконструкцијата во Владата на премиерот Димитар Ковачевски влегува Алијансата за Албанците, а неа ја напушта Алтернатива. Претпладнево на седница на Собранието беа констатирани оставките на сега веќе поранешните министрите за правда Никола Тупанчевски и за животна средина и просторно планирање Насер Нуредини, а во рамки на 104. седница останува да бидат разрешени тројцата министри од Алтернатива - за здравство Беким Сали, за информатичко општество и администрација Адмирим Алити и Џемаил Чупи, министер без ресор задолжен за дијаспора, кои најавија дека нема да присуствуваат на заседанието. Нови министри ќе бидат Кренар Лога за правда, Фатмир Меџити за здравство, Азир Алиу за информатичко општество и администрација, сите тројца од редовите на АА, како и на Каја Шукова од СДСМ за животна средина и просторно планирање.

Закажана седница на Собранието за реконструкција на Владата- ќе се менуваат четворица министри и пет заменици министри

Катерина Бојаџиева — Sat, 11 Feb 2023 14:52:16 +0000

Во Собранието за во понеделник во 15 часот е закажана 104. седница на која ќе се одлучува за Предлогот за реконструкција на Владата што го испрати премиерот Димитар Ковачевски. Предлогот за реконструкција на владиниот кабинет е за четворица министри и пет заменици министри, а следуваше по преговорите за приклучување на Алијансата за Албанците (АА) во владиното мнозинство. Прва точка на дневниот ред на 104. седница е предлогот за разрешување на министрите за здравство Беким Сали, за информатичко општество и администрација, Адмирим Алити, како и на Џемаил Чупи, од функцијата министер без ресор за дијаспора, тројцата кадри од актуелниот коалициски партнер Алтерантива. Како следна точка е изборот на предложените нови министри, Кренар Лога, за министер за правда, Фатмир Меџити за здравство, Азир Алиу за информатичко општество и администрација, сите тројца од редовите на АА, како и на Каја Шукова од СДСМ за министер за животна средина и просторно планирање. Лога ќе го замени Никола Тупанчевски од СДСМ, Меџити треба да биде на местото на Беким Сали од Алтернатива, а Алиу на местото на Адмирим Алити, исто така од Алтернатива. Шукова, пак, доаѓа на местото на досегашниот министер во животна средина Насер Нуредини од ДУИ. Со реконструкцијата се опфатени замениците министри во ресорите одбрана, правда, земјоделство, образование и здравство. На 104. собраниска седница, според дневниот ред, треба да бидат разрешени Башким Хасани од функцијата заменик министер за одбрана, Абдулќушур Абедини од заменик министер за земјоделство и Лулзим Алиу од заменик образование. Ќе се гласа за новите предлози за заменици министри, за одбрана за каде е предложен Тирон Јајага, за земјоделство за Вјолца Бериша, кадри на АА, за правда - Викторија Аврамовска-Мадиќ од СДСМ, за здравство Маја Манолева, како и за образование и наука - Агим Нихиу од ДУИ. Коалицискиот партнер во власта Алтернатива, кој раководи со министерствата за здравство и за информатичко општество и администрација, а има кадри и во пониските ешалони на власта, за утре најави седница на Претседателството на која ќе одлучува за натамошното делување. Од СДСМ денеска порачаа дека Алтернатива е добредојдена и, како што рече пратеникот и портпарол Дарко Каевски, „нашата врата е отворена за некаква наредна соработка, не само кон оваа, туку и кон сите политички партии или пратеници што и мислат добро на државата и коишто ќе застанат зад европскиот пат на државата како наша стратешка заложба“. Каевски на прес-конференција рече дека на партијата на Африм Гаши и била понудена опција за продолжување на соработката и дека СДСМ јавно соопштил оти има намера соработката да продолжи. -Дадовме простор и предлог-решенија со својот кадровски потенцијал да дадат придонес во коалицијата, но, за жал, не дадоа свој предлог, со што де факто одлучија да ја прекинат соработката до овој момент. Партијата е добродојдена и нашата врата е отворена за некаква наредна соработка, но не само кон Алтернатива туку и кон сите политички партии или пратеници што и мислат добро на државата и коишто ќе застанат зад европскиот пат на државата како наша стратешка заложба, рече Каевски.

Ковачевски ги отфрли информациите за реконструкција на Владата

Ивона Петрова — Thu, 10 Nov 2022 10:16:56 +0000

Владата во моментов функционира со мнозинство од 64 пратеници и тоа беше потврдено на изборот на новиот министер за локална самоуправа. Се што се пишува за реконтрукција на Владата е во доменот на шпекулациите во овој момент, изјави денеска премиерот Димитар Ковачевски. Ковачевски одговараше на новинарско прашање за медиумските написи за реконструкција на Владата до Нова година и за смена на министерот за здравство Беким Сали со кадар на Алијансата за Албанците. -Јас не сум ги видел утрово натписите за кои што зборувате. Во моментов, Владата функционира со мнозинство од 64 пратеници и тоа беше потврдено на изборот на новиот министер за локална самоуправа. Јас не сум имал разговори како премиер бидејќи премиерот предлага министри во Владата во однос на реконструкција на Владата така што се тоа што се пишува е во рамките на шпекулации во овој момент, рече Ковачевски. Премиерот заедно со Сали беа на настан во Градската општа болница „8 Септември“ на кој беше отворен нов дијагностички центар.

Мицотакис ќе направи промени во Владата

Ивона Петрова — Mon, 04 Jan 2021 08:50:27 +0000

Грчкиот премиер Кирјакос Мицотакис, реши да направи промени во Владата и точно напладне и официјално ќе биде соопштена реконструкцијата, јави дописничката на МИА од Атина. Според информациите во грчките медиуми, промени ќе има на неколку министерски позиции, можно е да биде одреден и нов портпарол на Владата, а актуелниот Стелиос Пецас да замине во некое од министерствата. Веројатно непроменети ќе останат министрите за надворешни работи, за образование, за цивилна заштита.

Заев ги избрал новите министри, утре ќе ги предложи во парламентот

Предраг Кукиќ — Sat, 22 Jun 2019 07:46:11 +0000

Премиерот Зоран Заев утре ќе го достави предлогот за реконструкција на Владата, кој треба да биде усвоен на собраниска седница во наредната седмица. Од СДСМ и од Владата велат дека Заев во строга тајност ги држи одлуките во однос на кадровските решенија дури и од свои блиски соработници. Но, според упатените, покрај извесните промени во земјоделство, култура, екологија, се очекува промена во транспорт и врски, како и во уште еден ресор. -Одлуките се донесени и во недела попладне ќе ги доставам до Собранието материјалите за сите промени што ќе се случат во Владата – изјави вчера Заев, најавувајќи дека паралелно се работи и на вториот бран промени со кој треба да бидат опфатени директори и членови на управни и надзорни одбори во јавните претпријатија.

Заев: Имињата на новите министри во недела попладне ќе ги доставам до Собранието

Предраг Кукиќ — Fri, 21 Jun 2019 13:08:24 +0000

Премиерот Зоран Заев изјави дека имињата на новите министри во Собранието ќе бидат доставени во недела попладне. Тој не ги потврди или пак не ги одби информациите за новиот министер за култура, Хисни Исмаили, како избран од партија на Африм Гаши, Алтернатива. Алсат, од друга страна дознава дека ДУИ ќе го предложи Насер Нуредини за министер за екологија и Садула Дураку за министер на Министерството за политички систем.

Заев: До петок ќе ги доставам предлозите за реконструкција на Владата во Собрание

Предраг Кукиќ — Wed, 19 Jun 2019 10:54:21 +0000

Планирам до петок да ги доставам предлозите за реконструкција на Владата зошто Парламентот на почетокот на идната недела планира седница. Ако тоа се случи во понеделник или вторник следната недела веднаш по изгласувањето на реконструкцијата продолжуваме со промената на директорските места и да ги завршиме кадровските промени, најави денеска премиерот Зоран Заев. -Верувам дека до крајот на месецот СДСМ ќе ги донесе одлуките за избор на потпретседателите на партијата и мал дел на претседатели на општински организации кои останаа неизбрани, рече Заев во одговор на прашање на денешната прес-конференција.