ревизија – Kurir.mk

ДЗР: Извршена ревизија за Пописот во 2021

Тале Кристо — Wed, 21 Jun 2023 09:59:21 +0000

Државниот завод за ревизија (ДЗР) по извршената ревизија за Пописот во 2021 констатира недоследности во начинот на планирање на средствата, набавката на софтверска апликација за самопопишување, набавката на преносни компјутери / лаптоп и начинот на исплата на надоместоците. Државниот завод за ревизија изврши ревизија на усогласеност на тема „Попис на населението, домаќинствата и становите во Република Северна Македонија, 2021 година“, со цел да даде заклучок дали постапката на подготовка, организација, спроведување и објавување на податоците од пописот е спроведена во согласност со законската и подзаконската регулатива. -Опфатот и доказите кои се обезбедени по пат на спроведување на ревизорските техники и ревизорската методологија, даваат основа ревизорите да заклучат дека освен за состојби во однос на начинот на донесување на дел од подзаконските и интерните акти, периодот на извршување на претходното попишување на одделни категории на лица, бројот на учесниците во пописот во однос на планираниот број, начинот и висината на утврдување на дел од надоместоците, периодот за кој е донесен финансискиот план како и состојбите во однос на јавните набавки, постапката на подготовка, организација, спроведување и објавување на податоците од Пописот на населението, домаќинствата и становите во Република Северна Македонија, 2021 година е во согласност, во сите материјални аспекти со одредбите од Законот за попис на населението, домаќинствата и становите во Република Северна Македонија, 2021 година, подзаконските и интерните акти донесени за подготовка, организирање и спроведување на истиот, се наведува во соопштението од ДЗР. Државните ревизори со извршената ревизија констатирале состојби и отсуства во однос на правната рамка, односно утврдено е дека со извршените измени за одложување на спроведувањето на пописот за во септември 2021 година, краток е периодот за исполнување на подготвителните активности. Исто така, утврдено е и отсуство на пишана процедура со која јасно и прецизно ќе се дефинира целокупната постапка и потребна документација за пописот, како и донесувањето на дел од актите и нивна авторизација спротивно на одредбите на Законот за попис. Од ДЗР велат дека се утврдени состојби и во однос на подготовката и спроведувањето на пописот, кои влијаат на можноста од потврдување на точноста и целосноста на податоците за лицата кои во време на пописот се наоѓаат на служба на Армијата во земјата или во странство, или на издржување мерка притвор или казна затвор, на лицата во воспитно-поправните домови и на лица кои спаѓаат во категоријата на бездомници. -Со ревизијата утврдено е дека теренското попишување е спроведено со 505 инструктори и 4.482 попишувачи, број кој е помал во однос на планираниот, а воедно спроведено е попишување на лицата кои не биле попишани во просториите на комисиите за пописни реони, начин на попишување кој не е предвиден во Законот за попис, се наведува во соопштението од ДЗР. Во извештајот за работа на Советот за статистика за 2021 година, наведени се одредени проблеми при вршењето на пописот во однос на мал одзив на кандидати за попишувачи и инструктори, проблеми со апликативното решение на терен, проблеми со интернет конекцијата, хакерски напади, што предизвикало и прекин во попишувањето, за што е поднесена пријава до Министерство за внатрешни работи. -Во однос на софтверската апликација за самопопишување на лицата-државјани кои се на привремена работа или престој во странство, ревизорите утврдија одредени состојби и тоа: -во текот на 2019 година извршена е набавка на софтверска апликација за пописот, но не е набавена софтверска апликација за самопопишувањето; - самопопишувањето отпочна на 01.03.2021 година, а активностите за набавка на апликација отпочнале на 25.02.2021 година; - на ден 26.02.2021 година упатени се барањата за забрани и можности во однос на апликацијата до фирмата изработувач на апликацијата; -софтверската апликација е набавена без надоместок, за што Државниот завод за статистика се обврзал да го истакне името на давателот во апликацијата, со што врши негова промоција, односно станува збор за спонзорство, за кое не е побарано од Министерството за правда решение, со кое ќе се потврди јавниот интерес на ова спонзорство; - фирмата изработувач на апликацијата е управувана од лице кое во периодот од 25.05.2019 до 23.09.2020 година бил член на Советот за статистика, како и -апликацијата за самопопишување не е евидентирана во деловните книги на Државниот завод за статистика. -Формирано е стручно тело чие формирање не е уредено во Законот за попис, а воедно и преклопување на надлежности на неколку работни групи, во кои истовремено членуваат исти вработени, се наведува во соопштението од ДЗР. Во однос на исплатените надоместоци за учесниците во пописот, како што посочуваат од ДЗР, исплатени се надоместоци во износ од 191.405 илјади денари, односно околу 3,1 милион евра, врз основа на правилник во кој се утврдени критериуми и број на бодови за секој критериум одделно, додека вредноста на бодовите е уредена со акт донесен од страна на директорот, без негово парафирање. -Во март 2021 година, донесен е финансискиот план за пописот во износ од 522.751 илјади, односно околу 8,5 милиони евра, од кои над 40 отсто од средствата се реализирани во текот на 2019 и 2020 година, без усвоен финансиски план за попис, велат од ДЗР. За реализација на Пописот потрошени се средства во износ од 479.111 илјади денари, односно околу 7,9 милиони евра, во кои најголемо учество од над 49 отсто се расходите за набавка на лаптопи и 40 проценти за надоместоци за учесниците во спроведување на пописните активности. За потребите на пописот, склучени и реализирани се договори за јавни набавки во износ од 237.905 илјади денари односно 3,9 милиони евра. -Спроведена е постапка за јавна набавка за набавка на 5.650 лаптопи и со единствениот понудувач склучен е договор во износ од 199.498 илјади денари, односно околу 3,2 милиони евра, за кој со ревизијата констатирано е: - пролонгирање на утврдениот рок на испорака на лаптопите и наместо испораката во целост била сукцесивна извршена во период од 05.11.2020 до 18.12.2020 година; - со анекс кон договорот извршена е измена на начинот на плаќање на лаптопите, односно наместо 22% од средствата да се платат во 2020 година, а преостанатите во 2021 година, извршено е целосно плаќање во декември 2020 година; - квантитативен и квалитативен прием на лаптопите, наместо да се изврши од страна на работна група согласно договорот, утврдено е дека документите за примопредавањето на лаптопите се потпишани од страна на раководителот на субјектот; - постапката е спроведена по одобрување од страна на н надлежните органи, но за техничката спецификација за лаптопите, не е добиено мислење од Националниот совет за информатичка и компјутерска технологија при Владата; - склучени се 3 анекси на договорот во вкупен износ од 30.255 илјади денари, односно околу 500 илјади евра, без спроведување на постапка за јавна набавка и - доставена е банкарска гаранција за периодот на основниот договор, а во однос на анексите, само за третиот анекс, се наведува во соопштението од ДЗР. Во извештајот е констатирано дека за услуги за медиумска кампања, спроведени се две постапки за јавни набавки во вкупен износ од 7.315 илјади денари, односно околу 120 илјади евра, што е повеќе за 40 отсто од планираните средства. Држабните ревизори утврдиле дека техничките спецификации не содржат количина и вредност по одделни позиции, а финансиските понуди содржат една позиција, додека една постапка е спроведена со преговарање без објавување на оглас, иако Бирото за јавни набавки нема дадено позитивно мислење. Исто така, како што е посочено во извештајот, набавени се средства за заштита од КОВИД 19 во износ од 1.220 илјади денари односно околу 20 илјади евра, без да се спроведе постапка за јавна набавка. Државниот завод за статистика, во периодот од 05.09.2021 до 30.09.2021 година го спроведе деветтиот по ред попис на населението, домаќинствата и становите во Република Северна Македонија, 2021 година, со состојба на 04 септември 2021 година, во 24:00 часот. Резултатите од пописот се објавени на 30.03.2022 година, шест месеци по завршувањето на теренските активности, согласно кои Република Северна Македонија има 1.836.713 резидентно население, 598.632 домаќинства и 839.174 станови. -Имајќи предвид дека вообичаено е попис да се спроведува на секои 10 години, како и дека активностите на истиот се регулираат со посебен закон за попис, дадени се препораки кои се во функција на подобрување и создавање на ефикасен систем на планирање, спроведување, следење и реализација на јавните набавки на стоки и услуги, се наведува во соопштението од ДЗР.

Митева: Во општина Гази Баба ревизијата изразила неповолно мислење за објективноста на финансиските извештаи за 2019 година

Тале Кристо — Sun, 21 Nov 2021 12:17:15 +0000

Во Општина Гази Баба се утврдени нерегуларности во ревизорскиот извештај за 2019 година. Станува збор за ревизија направена во период од 14.01.2021 до 23.04.2021 година, истакна на денешната прес-конференција Марија Митева, портпарол на ВМРО-ДПМНЕ. Во продолжение интегрален текст и видео од прес конференцијата на Митева: Ревизијата во конечниот извештај изразила неповолно мислење за реалноста и објективноста на финансиските извештаи за 2019 година и имаат дадено мислење со резерва за реалноста и објективноста на прикажаните состојби во финансиските извештаи и со тоа е констатирано дека не се почитуваат законите и прописите. Во ревизорскиот извештај е наведено дека во Општина Гази Баба исплатата на прекувремени часови на вработените се врши врз основа на налог за прекувремена работа и решение на градоначалникот за секое лице поединечно. Односно, во периодот од јануари до септември 2021 година на двајца службеници биле издавани наредби за вршење на работа преку полно работно време (прекувремена) работа и тоа првиот службеник 312 часа и вториот службеник 304 часа. Ова постапување на претходниот градоначалник на СДСМ е спротивно на членот 117 став 2 од Законот за работните односи во кој јасно е утврдено дека прекувремената работа може да трае најмногу 190 часа годишно. Согласно информациите, се работи за двајца службеници, за кои ревизијата утврдила дека потребата од прекувремена работа не била пријавена во државниот испекторат на трудот што е спротивно на член 117 од Законот за работни односи. Мислење со резерва или модифицирано мислење во ревизорски извештај се изразува кога ревизорот не се согласува или не е сигурен со една или повеќе ставки во финансиските извештаи, кои се значајни но не и суштински за разбирање на извештаите. Односно, ревизорот доаѓа до заклучок дека погрешните прикажувања, посебно или како целина, се материјални но не преовладуваат до степен кој има влијание врз состојбата изразена во финансиските извештаи во целина и кога ревизорот не е во можност да обезбеди ревизорски докази за да создаде мислење и можните ефекти од ваквата неможност врз финансиските извештаи се материјални. Ова е само еден од многуте примери како се злоупотребувале јавните функции од страна на СДСМ. Заради ваквото раководење со локалната самоуправа, СДСМ ги изгуби изборите. Градоначалниците на ВМРО-ДПМНЕ во својот мандат ќе ја покажат вистинската страна на способната и квалитетната администрација составена од компетентни луѓе кои ќе одговораат на потребите на граѓаните, рече Митева.

УЕФА и ФИФА со ревизија на финансиското работење на ФФМ поврзано со проектите од развојните и инвестициските програми

Тале Кристо — Tue, 26 Oct 2021 15:29:55 +0000

Скопје, 26 октомври 2021 (МИА) – На барање на Фудбалската федерација на Македонија изминатиот период претставници на ФИФА и УЕФА вршеа ревизија на финансиското работење на федерацијата, поврзано со проектите и активностите од користењето на средства од програмите „FIFA Forward“ за 2020 на ФИФА и „HatTrick 3 и 4“- инвестициски програми на УЕФА, соопшти ФФМ. Во однос на користењето на средствата од програмата Forward за 2020 година на ФИФА, Фудбалската федерација на Македонија доби највисока оценка. Наведено е дека средствата од развојните фондови на ФИФА, Фудбалската федерација на Македонија ги користи исклучиво наменски, односно по пропишаната процедура која вклучува детален опис на проектите, документација, процес на одобрување, имплементација и известување за проектите. Претставници на УЕФА, оваа седмица на барање на ФФМ, вршат ревизија на трошоците и искористувањето на средствата од „HatTrick 3 и 4“- инвестициски програми на УЕФА. Преку оваа програма на УЕФА, ФФМ инвестира во подобрување на инфраструктурата на стадионите во државата, отворање на нови терени или реконструкција на постоечките со природна или вештачка трева, поставување рефлекторско осветлување итн. -Со оглед на тоа дека се работи за строго наменски средства, ФФМ има обврска, а токму тоа и го прави, да ги извести надлежните во УЕФА за вложувањето на средствата за проектите реализирани преку програмата на УЕФА. ФФМ како и досега ќе продолжи да ја обезбедува комплетноста и веродостојноста на своето финансиско работење за своите надлежни институции и останува отворена за сите прашања во однос на својата усогласеност со УЕФА и ФИФА, вклучително за распределбата и текот на финансиските средства за проектите од програмите на УЕФА и ФИФА, стои во информацијата на „Куѓата на фудбалот“.

Ангеловска-Бежоска: Најверојатно ќе направиме умерена нагорна ревизија на инфлацијата

Ивона Петрова — Tue, 19 Oct 2021 09:40:32 +0000

Гувернерката на Народната банка Анита Ангеловска-Бежоска најавува умерена нагорна ревизија на проектираната инфлација од 2,2 проценти. Во изјава за медиумите, Ангеловска-Бежоска рече дека со оглед на движењето на цените на храната и на енергенсите, најверојатно ќе биде направена умерена нагорна ревизија на инфлацијата со следните макроекономски проекции. – Со априлскиот циклус на проекции проектиравме стапка на инфлација од 2,2 проценти, но судејќи ги најновите остварувања кај инфлацијата, како и проекциите, особено за движењето на цените на храната и енергијата, најверојатно ќе направиме умерена нагорна ревизија на инфлацијата. Тоа ќе биде направено со новиот цикулс на макроекономски проекции кој е во фаза на финализација, изјави Ангеловска-Бежоска по настанот посветен на проектот за зголемување на употребата и достапноста на официјалните статистички податоци во Република Северна Македонија. Инфлацијата, како што додаде, засега се очекува да остане во умерени рамки, како што предвидува и Меѓународниот монетарен фонд. Во однос на стабилноста на денарот, гувернерката повтори дека оптимална стратегија е стратегијата на одржување на стабилен девизен курс, а причината за тоа, како што рече, е структурата на домашната економија. – За да може оваа стратегија да се одржува стабилно од клучно значење е нивото на девизни резерви. Нивото на девизни резерви согласно сите меѓународни стандарди се одржува на високо солидно ниво, оцени Ангеловска-Бежовска.

Mицкocки за 27 април: Ќe има peвизиja на тој и на cитe пoлитички диктиpaни пpecyди по пaдoт на 3aeв

Тале Кристо — Sat, 13 Feb 2021 12:31:36 +0000

Имаме заробено обвинителство каде се диктираат обвиненија, и тоа не само за 27.април туку и за други обвиненија кои што служат за политички прогон – вака лидерот на ВМРО-ДПМНЕ ја коментираше вчерашната одлука на Апелациониот суд во Скопје да ја потврди затворската казна за учесниците во 27.април, односно да ја намали за само една година. Мицкоски најави ревизија на судските процеси по промената на власта, но не на начин на кој тоа сега го прави СДСМ, туку таквата ревизија би ја правеле колеги на „заробените обвинители и судии“ како што вели претседателот на ВМРО-ДПМНЕ. – Имаме судство кое функционира по диктат, односно, како владетелот – во случајот Зоран Заев и СДСМ ќе им издиктираат такви пресуди се носат. Ако сето ова го сумираме и го анализираме, тогаш доаѓаме до заклучокот дека сме хибриден режим, заклучува Мицкоски. – Следната влада на ВМРО-ДПМНЕ, сите овие издиктирани обвиненија, сите овие нарачани судски пресуди ќе ги ревидира и врз основа на таа ревизија, која што ќе ја прават колеги судии и обвинители но кои што биле чесни и не потклекнале на диктатите и нарачките на Зоран Заев и оваа власт ќе бидат практично предмет на постапка. Сите оние судии кои ги прифатиле овие диктати и судски нарачани пресуди ќе бидат соодветно, согласно законите и Уставот санкционирани – констатира Христијан Мицкоски.

Ревизија на мерките на ЕУ за реформи во владеењето на правото на Западен Балкан

Тале Кристо — Wed, 06 Jan 2021 15:45:53 +0000

Европскиот ревизорски суд почна процена на ефикасноста на мерките на ЕУ за поддршка на владеењето на правото во земјите од Западен Балкан. Европскиот ревизорски суд соопшти и дека за реформите во областа на правосудството за земјите од Западен Балкан се издвоени околу 700 милиони евра во изминатите седум година, што е 16 проценти од вкупната билатерална помош на ЕУ за регионот. Во соопштението испратено од седиштето на Европскиот ревизорски суд во Луксембург, се наведува дека владеењето на правото е основна европска вредност и еден од основните критериуми за членство во Европска Унија. – Целта на ревизијата, што започна, е да се утврди колку овие мерки биле ефикасни во зајакнувањето на владеењето на правото на Западен Балкан. Ревизорите посебно ќе испитуваат дали поддршката од ЕУ за владеење на правото е добро осмислена, употребена за решавање на идетификуваните клучни проблеми и дали довела до конкретни и одржливи подобрување, во согласност со стандардите на ЕУ, се посочува во соопштението. Резултатите од истрагата ќе бидат познати кон крајот на годината.

Професорката Котлар со лекција до Заев, комисијата нема мандат да ги менува учебниците!

Тале Кристо — Tue, 01 Dec 2020 19:01:15 +0000

Универзитетската професрока Наташа Котлар во вечерашното гостување во емисијата Само вистина на Канал 5, коментирајќи го интервјуто на премиерот Зоран Заев за бугарската национална агенција вели дека има големи научни книги кои што Заев требало да ги прочита, но доколку не знае да ги протолкува Котлар смета дека тој има голем број на советници од Институтот за национална историја кои што требало по вешто да го информираат за историските факти и да го оспособат пред да даде изјава. Штом има огромна научна продукција тоа значи дека треба да се чита, но кога се чита треба да се разбере она што го читаме што е напишано. Ако господинот премиер не може тоа да прочита и протолкува знам дека има советници кои што се од Институтот за национална историја и кои што сигурно своите докторати ги имале на таа тема и можеле по вешто можеле да го информираат и оспособат за да даде соодветна изјава, вели таа. Според Котлар, мешовитата комисија нема мандат да врши ревизија на учебниците бидејќи со самото тоа влегува во авторските и интелектуалните права односно како што рече пред таа да стане професор поминала низ рецесија, низ научен филтер и докажувања и никој нема право од членовите на комисијата да интервенира во научните трудови. Во договорот се вели дека ќе се формира една мултидисциплинарна комисија, која не е ни риба, не е ни девојка, не е академска бидејќи академските и научните разговори се на сосема подруг начин тие одат на конференција и разговараат за методологијата како нештото се третира или како треба да се третира. Но, не може еден научник од Германија да му каже на овој од Франција како да работи и создава своја методологија во работата која што му е научна. Тие може да разговараат, ниту може да понудат нешто напишано како декрет и да им дадат на политичарите. Пак ќе се вратам, политичарите мора да прочитаат, да разберат и да знаат што зборуваат. Другиот дел има ревизија на учебниците нешто така се провлекува во договорот. Ова комисија нема мандат тоа нешто да го прави бидејќи влегува во авторските и интелектуалните права на творците, а тоа го имате во членот 9 од договорот. Како може мојот колега кој што е таму член или претседател во таа комисија да интервенира во моите авторски и интелектуални права бидејќи јас за да станам научен кадар или професори сме поминале низ рецензија, низ докажувања, низ еден научен филтер и оддеднаш некоја мешовита комисија која му одговара на Министерството за надворешни работи треба да го ревидира она што е научно напишано. Мртва работа, значи комисијата треа да си седне и да си прочита што треба дa работи една академска или пак друга комисија, рече Котлар.

Германија: СЗО да ја забрза ревизијата на своето управување со пандемијата

Магдалена Андонова — Fri, 17 Jul 2020 08:20:33 +0000

Германскиот министер за здравство Јенс Спан ја повика Светската здравствена организација (СЗО) да ја забрза својата ревизија на управувањето со пандемијата на новиот коронавирус, што претставува знак дека Европа зазема построг став кон ова тело на ОН. Германија моментно претседава со ЕУ, а досега имаше заштитнички став кон СЗО, која е под жестоки критики од Вашингтон, кој најави повлекување од организацијата поради отстапки кон Кина. Сега се чини дека Берлин зазема поизразен став. – Кога станува збор за повторна проценка на работата на СЗО за време на кризата, имав можност да разговарам во вторникот во Париз со директорот Тедрос Аданом Гебрејесус, како и пред две недели во Женева. И во двата разговора јасно го охрабрив да основа независна експертска комисија и да го забрза почетокот на нивната работа, истакна Спан. СЗО минатата недела објави дека ќе формира независна комисија за проценка на управувањето со пандемијата и одговорите на владите на коронавирусот. Гебрејесус истакна дека комисијата во ноември ќе го достави својот прв извештај до министрите за здравство, а конечниот ќе биде подготвен во мај следната година. Спан нагласи дека извештајот е важен сега, додека пандемијата сè уште се шири низ светот, бидејќи „веќе можат да се извлечат заклучоци“. Европските земји сметаат дека ревизијата треба да биде придружена со реструктуирање на организацијата, за што веќе се дискутирало во ОН, како и во Г7. (MИА)

Цукерберг најави ревизија на правилата на Фејсбук

Тале Кристо — Sat, 06 Jun 2020 10:16:02 +0000

Извршниот директор на Фејсбук, Марк Цукерберг изјави дека ги ревидира правилата за содржината на оваа социјална мрежа, соочен со силни негативни реакции од голем број на луѓе, поради пост на американскиот претседател Доналд Трамп во кој им се заканува на демонстрантите против полициско насилство врз расна основа. Тој најави дека Фејсбук се обидува да ја подобри политиката за содржини на социјалните мрежи. – Знам дека многумина од вас мислат дека минатата недела требаше на некој начин да ги означиме постовите на претседателот, напиша Закерберг во пост, осврнувајќи се на неговата претходна одлука да не се отстрани пост на Трамп, кој содржи фраза „кога ќе започне грабежот, почнува и пукањето“.

Мицкоски бара итно делување на ЈО, одговорност на Заев за злоупотреба и ревизија на работата на врховните судии

Ивона Петрова — Wed, 26 Feb 2020 08:38:28 +0000

Лидерот на ВМРО-ДПМНЕ од вчерашниот масовен протест порача дека од институциите бараат покренување на истрага за злоупотреба на службената должност од страна на Зоран Заев кој се меша во обвинителски и судски постапки, и одлуки на Врховниот суд. -И тоа истрага од тим на обвинители кои нема да ги одбере Рускоска, поточно Зоран Заев, туку обвинители во кои ќе има доверба експертската јавност како гаранција за непристрасност и независност. Мора да има обвинение по кое Зоран Заев ќе одговара за злоупотреба на службена должност и попречување на правдата и понижување на државата. Второ, согласно Уставот, Врховниот суд на Република Македонија е највисок суд во државата и го обезбедува единството во примената на законите од страна на судовите. Кога врвот во судството не ви чини, тогаш надоле е труло. Кога во врвот слушаме дека се диктирале одлуки од премиерот значи дека правдата целосно затаила. Затоа бараме итна и неодложна ревизија на работата на Врховните судии без исклучок и ревизија на нивните одлуки, истакна тој. Мицкоски посочи дека таму каде ќе бидат утврдени неправилности потребно е оставки и одговорност пред законите. Оставки! -Трето, итна реформа на Советот за реформи во правосудството што ќе подразбира времено суспендирање на секаква негова активност поради контаминираноста на неговата работа и барање на меѓународна експертска помош во реализирање на реформите. Очекуваме реакција, и тоа брза, одлучна реакција, а доколку ја нема, народот е тука и веќе добро знае што треба да направи и каков громогласен одговор следи на 12-ти април за помалку од 50 дена од овој ден денешен, од овој масовен протест од овде. Затоа во оваа држава под власт на правдоубиецот Заев ниту една работа не е на прав пат, но по вакви злодела, по вакви неправди и брутални грабежи, треба да знаат и тој и таквите како него, и тој и тие кои слугуваат, како и сите други кои ќе се огрешат, прав е патот само до Идризово. Прав е патот само до Идризово. А, одговорност ќе има, ви велам ќе има без оглед на името и презимето, и кој е и од каде доаѓа, порача тој.