Роберт Хабек – Kurir.mk

Хабек: Првата задача на новиот германски министер за одбрана ќе биде носење одлука за тенкови за Украина

Тале Кристо — Tue, 17 Jan 2023 09:19:52 +0000

Првата точка од распоредот на следниот германски министер за одбрана ќе биде дали да испорача напредни борбени тенкови во Украина, изјави денеска германскиот министер за економија Роберт Хабек. – Кога ќе биде назначен нов министер за одбрана, тоа ќе биде првото прашање за кое треба да донесе конкретна одлука, изјави Хабек за германското национално радио „Дојчландфунк“ на маргините на Светскиот економски форум во Давос, Швајцарија. Германската министерка за одбрана Кристин Ламбрехт вчера поднесе оставка, во време кога владата во Берлин е под зголемен притисок да дозволи испраќање борбени тенкови во Украина. Германската влада се соочува со обновени апели да испрати тенкови Леопард 2, кои Украина ги смета за клучни ако сака да ја победи Русија или барем да одобри нивна испорака од други земји, како што е Полска. Варшава е јасна за својата намера да снабдува борбени тенкови, но бара дозвола од Германија како земја на производство. Германскиот канцелар Олаф Шолц вчера најави дека брзо ќе дејствува за да ја замени Ламбрехт, а Франкфуртер алгемајне цајтунг, повикувајќи се на владини извори, објави дека нејзиниот наследник ќе биде именуван денеска.

Германски министер поддржува заедничките набавки со цел намалување на цената на гасот во ЕУ

Ивона Петрова — Tue, 25 Oct 2022 09:01:02 +0000

Германскиот министер за економија Роберт Хабек денеска изјави дека „најефикасниот начин“ за намалување на цената на гасот во Европската унија е преку заеднички набавки. – Европа има голема пазарна моќ. Ако на големите играчи им се дозволи да соработуваат, да формираат куповни базени, тогаш пазарната моќ на Европа ќе има влијание, рече тој при пристигнувањето на состанокот на министрите за енергетика на ЕУ во Луксембург.

Дополнително, „динамичното ограничување на цената“ за да се спречат краткорочните „шпекулативни скокови“ на берзите ќе има смисла, рече Хабек. Лидерите на ЕУ минатата недела го поддржаа предлогот на Европската комисија за правна основа врз која компаниите што купуваат гас во ЕУ би можеле да ја соберат нивната побарувачка, како и ограничување на екстремните флуктуации на цената на гасот. Хабек во вторникот истакна дека напредокот постигнат во последните денови за изнаоѓање заеднички став веќе довел до пониска големопродажна цена на гасот.

Германија нема да ги затвори преостанатите нуклеарни централи

Ивана Ефремовски — Tue, 27 Sep 2022 18:06:09 +0000

Германскиот министер за економија и енергија Роберт Хабек денеска изјави дека во земјата ќе продолжи да работат две од нејзините три преостанати нуклеарни централи до април следната година за да се спречи потенцијалниот недостиг на електрична енергија во наредните месеци. Хабек привремено го откажува долгогодишниот план на Германија за затворање на преостанатите нуклеарни централи до крајот на годината. Министерот рече дека двата реактори, Исар 2 во Баварија и Некарвестхајм северно од Штутгарт, ќе работат до средината на април. Претходно овој месец, локални функционери изјавија дека Германија ќе се придржува до својот план за затворање на преостанатите нуклеарни централи оваа година, но ќе ја задржи опцијата за рестартирање на две од нив во случај на недостиг на електрична енергија. (МИА)

Хабек: Нема да ја продолжиме работата на нуклеарните централи во Германија

Тале Кристо — Sun, 21 Aug 2022 15:53:03 +0000

Германскиот министер за економија Роберт Хабек ја отфрли идејата за продолжување на работата на трите преостанати германски нуклеарни централи за да се заштеди на гас, истакнувајќи оти на тој начин би се заштедило не повеќе од два отсто. – Таа заштеда не е доволно голема за да се рестартира дебатата за нуклеарната енергија за која има консензус … Ако се земе предвид колку би се заштеди, тоа би била погрешна одлука, истакна Хабек. Тој додаде дека евентуално би ја прифатил идејата за продолжување на работата на нуклеарната централа во Баварија, доколку тоа се покаже неопходно за стабилност и снабдување со електрична енергија за зимата. Нуклеарните централи во Германија треба да бидат затворени до крајот на годината, во согласност со Законот усвоен од владата на канцеларката Ангела Меркел по катастрофата во јапонската нуклеарна централа Фукушима во 2011 година.

Германскиот вицеканцелар позитивен на коронавирус

Ивона Петрова — Thu, 14 Jul 2022 06:57:27 +0000

По враќањето од посетата на Чешка и Австрија, германскиот вицеканцелар и министер за економија Роберт Хабек е позитивен на тест за Ковид-19. Прво брзиот, а потоа и ПЦР тестот бил позитивен, соопшти неговиот Кабинет во Берлин. Хабек се вратил во Берлин од Виена со симптоми на настинка. Тој веднаш се изолирал и ги откажал сите настани на кои требало лично да присуствува.

Хабек: Можен е целосен прекин на испораките на гас за Германија преку Северен тек

Катерина Бојаџиева — Fri, 24 Jun 2022 08:19:34 +0000

Германскиот министер за економија Роберт Хабек денеска изјави дека на неговата земја и се заканува недостиг на гас доколку испораките од Русија останат на сегашното ниско ниво, а доколку до зима и ги нема доволно, тогаш одредени индустрии ќе мора да бидат затворени, пренесе магазинот „Шпигел“. -Компаниите би морале да го прекинат производството, да отпуштат работници, синџирите на снабдување би пропаднале, луѓето би се задолжиле за да ги платат сметките за греење, тие луѓе би станале посиромашни, рече Хабек, пренесуваат британските медиуми. Германскиот министер за економија смета дека е можно Русија целосно да престане да испорачува гас преку Северен тек и повторно го искажа ставот дека „не верува во техничките проблеми што Кремљ ги наведе како причина за намалената испорака на гас“, посочувајќи дека станува збор за политичка мерка.

Хабек: Се распаѓа единството во ЕУ по однос санкциите кон Русија

Катерина Бојаџиева — Mon, 30 May 2022 06:05:29 +0000

Германскиот министер за економија Роберт Хабек синоќа изрази загриженост поради неединството на Европската унија пред самитот на кој ќе се разговара за руското ембарго за нафта и планот за ставање крај на зависноста од руската енергија. Лидерите на ЕУ ќе се состанат денеска и утре за да разговараат за новиот пакет санкции против Русија, што предвидува ембарго на руската нафта и програма насочена кон забрзување на прекинот на зависноста од фосилните горива, вклучително и од рускиот гас. Амбасадорите на земјите-членки на ЕУ на синоќешниот состанокот во Брисел не успеаја да постигнат консензус за воведување на шестиот пакет санкции против Руската Федерација. Нов обид за постигнување договор за засилување на притисоците врз Русија е закажан за денеска, непосредно пред специјалниот самит на лидерите на ЕУ. „По почетокот на рускиот напад врз Украина, видовме што може да се случи ако Европа биде обединета. Се надеваме дека единството ќе се покаже на утрешниот самит, иако тоа веќе почна да се распаѓа“, рече Хабек на прес-конференција. Тој ја повика Германија на самитот да настапи единствено, не да се воздржува од гласање поради разликите во ставовите во рамки на германската владејачка коалиција. Слично единствто Хабек побара и од земјите-членки на ЕУ. „Европа е се уште огромна економска област со неверојатна економска моќ. Кога е обединета, може да ја искористи таа моќ“, рече Хабек на отворањето на саем во Хановер.

Хабек: Преку штедење до намалување на енергетската зависност од руските горива

Тале Кристо — Fri, 15 Apr 2022 08:08:38 +0000

Германија треба да почне да штеди енергија за да стане понезависна од руските фосилни горива, изјави германскиот министер за економија, Роберт Хабек, во мигови кога најсилната европска економија бара начини да го намали увозот на гас и нафта од Русија заради воената интервенција на Москва во Украина. Со зголемувањето бројот цивилни жртви во Украина, Германија е под се посилен притисок да го прекине увозот на руски гас и нафта, активност што се посочува како основен извор на приходи за Москва и начин за обезбедување средства за водење војна. Хабек вели дека Германија би можела да стане помалку зависна ако граѓаните ја намалат потрошувачката на енергија, со предлози да користат возови или велосипеди наместо да возат автомобили секогаш кога е можно. -Секој километар што не е извозен е придонес кон намалување на зависноста од руските енергетски извори. Со тоа ја штитиме и климата, рече Хабек во интервју за германски медиум. Тој истакна дека постои можност за десетпроцентно намалување на индивидуалната потрошувачка на енергија, а тука можат да придонесат и самите работодавци на начин што ќе им дадат можност на вработените да работат од дома кога има услови за тоа. -Секаде каде што е можно, може да се работи повторно од дома еден или два дена во неделата – првично на доброволна основа, рече германскиот министер за еконимија.

Хабек: Путин направи лоша проценка со својата агресорска војна во Украина

Катерина Бојаџиева — Fri, 08 Apr 2022 17:10:19 +0000

Рускиот претседател Владимир Путин „целосно погрешно ја пресмета“ својата агресорска војна против Украина, изјави денеска германскиот министер за економија Роберт Хабек. -Тој ја потцени способноста на украинскиот народ да се спротивстави, па дури и неговото херојство, рече Хабек во Берлин. „Тој не очекуваше дека луѓето нема да го сакаат ниту за свој ослободител“, додаде германскиот министер. Политичарот од Зелената партија кажа дека Путин, исто така, потцени колку може да бидат одлучни Европа, Западот и трансатлантската заедница кон неговиот потег.

Хабек: И покрај ѕверствата во Украина, Германија нема да воведе инстант ембарго на руската енергија

Катерина Бојаџиева — Mon, 04 Apr 2022 13:02:43 +0000

Берлин нема да воведува инстант ембарго на руската енергија, и покрај ѕверствата во Украина, изјави германскиот министер за економија Роберт Хабек, јави Би-Би-Си. Според него, најголемата економија во Европската унија работи на прекинување на руската енергија. – Работиме кон ембарго, со мерки што секој ден го погодуваат Путин. На добар пат сме и неделава ќе имаме уште поголем напредок на тој пат, појасни Хабек. Како што додаде, се работи на независност од руските гас, јаглен, нафта. Хабек тврди дека пред руската инвазија на Украина, 35 отсто од германската нафта доаѓала од Русија. Сега, таа изнесува околу 25 отсто. По инвазијата, зависноста на Германија од рускиот гас се намалила од 55 на 40 отсто. Поради цивилните убиства во Буча и на други места низ Украина, нови санкции против Русија ќе бидат одредени оваа недела, најави германскиот министер.