Роберт Мугабе – Kurir.mk

Мугабе почина денес- веднаш е прогласен за национален херој

Катерина Бојаџиева — Fri, 06 Sep 2019 18:15:41 +0000

Поранешниот претседател на Зимбабве, Роберт Мугабе, кој почина денеска на 96-годишна возраст, е прогласен за „национален херој“, објави шефот на државата Емерсон Мнангагва. Тој го наследи Мугабе на чело на земјата, откако армијата излезе на улиците и по протестите на граѓаните во ноември 2017 година. – Зану-ПФ, партија на власт од 1980 година, се состана и му додели статус – заслужен национален херој, рече Емерсон Мнангагва во телевизиското обраќање. Тој додаде дека земјата ќе биде во жалост се до погребот на Мугабе, чиј датум се уште не е објавен. Мугабе почина во болницата во Сингапур, каде што се лекуваше од април. На власт беше 37 години.

Почина поранешниот претседател на Зимбабве

Ивана Ефремовски — Fri, 06 Sep 2019 06:28:21 +0000

Долгогодишниот претседател на Зимбабве Роберт Мугабе почина на 95 години, две години откако беше симнат од власта со државен удар. Тој починал по долго боледување и од април се лекуваше во Сингапур. Мугабе победи на првите избори откако Зимбабве се здоби со независност, станувајќи премиер во 1980 година, а седум години подоцна ја укина оваа функција и стана претседател. Во првите години на власт, тој го отвори здравството и образованието за црното мнозинство во земјата, но неговата контроверзна реформа на земјиштето доведе до економски колапс и последните години од неговото владеење беа обележани со тиранија, корупција и злоупотреби. Тој беше затворен во 1964 година на повеќе од една деценија и уште додека беше во затвор беше избран за претседател на Африканската национална унија на Зимбабве, воена организација која се бореше против белото малцинство во тогашната Родезија, која во 1980 година беше преименувана во Зимбабве. Мугабе беше соборен од власта во ноември 2017, откако го смени својот долгогодишен сојузник, потпретседателот Мнангагва.

Први избори во Зимбабве по смената на Роберт Мугабе

Ивона Петрова — Mon, 30 Jul 2018 06:10:28 +0000

Во африканската држава Зимбабве денеска се одржуваат првите парламентарни и претседателски избори по смената од власт на долгогодишниот претседател на земјата Роберт Мугабе. Околу 5,3 милиони граѓани имаат право на глас, а со одлука на Уставниот суд, граѓаните што живеат во странство овојпат нема да можат да гласаат. За трката за претседател учествуваат вкупно 23 кандидати. Мугабе (94) беше главно не се јавуваше во политичкиот живот од ноември минатата година, кога беше принуден да се повлече од функцијата. Но, вчера тој одржа прес конференција на која го обвини неговиот наследник Емерсон Мнангагва дека ја заробил државата и ги повика граѓаните да гласаат за неговиот најсериозен противкандидат Нелсон Чамиса. Се смета дека повикот на Мугабе може да има ефект, особено во некои од изолираните делови на земјата каде што граѓаните се уште мислат дека тој е претседател. Мнангагва вети дека изборите ќе бидат фер и првпат во изминатите 16 години повика странски набљудувачи на денот на гласањето. Тој изрази надеж дека по изборите ќе може да дојде до укинување на меѓународните санкции кон Зимбабве, кои беа воведени поради крешењето на демократијата во 37-годишното владеење на Мугабе, како и поради насилното протерување и преземање на имотите на преостанатите бели земјоделци во државата. МИА