роберт о’ брајан – Kurir.mk

Советник на Трамп прекина европска турнеја поради кибер нападите во САД

Ивона Петрова — Wed, 16 Dec 2020 06:39:32 +0000

Советникот за национална безбедност на претседателот на САД, Доналд Трамп, Роберт О’Брајан, ја прекина својата европска турнеја и итно замина за Вашингтон, поради кибер нападите од руски хакери против американските владини агенции, јавија американски медиуми повикувајќи се на висок извор во Белата куќа. О’Брајан има намера да одржи состанок со Советот за национална безбедност веднаш штом се врати. На 14 декември, американските власти потврдија дека најмалку две институции – Министерството за финансии и Националната администрација за телекомуникации и информации (НТИА) – биле цел на голем и добро подготвен кибер напад. Во исто време, беше пријавен упад во софтверот SolarWinds, што го користат голем број владини агенции. Според американската влада, хакерите се поврзани со руски владини агенции. За време на турнејата, Роберт О’Брајан успеа да ги посети Франција и Израел, но не оствари посети на Германија, Швајцарија и Велика Британија. Планира да го продолжи патувањето во Европа в сабота.

О’Брајан: САД се многу загрижени за состојбата на Навални

Ивона Петрова — Fri, 21 Aug 2020 06:44:12 +0000

Советникот за национална безбедност на Белата куќа, Роберт О’Брајан, изјави денеска дека американските власти се многу загрижени за состојбата со рускиот опозициски лидер Алексеј Навални, кој се наоѓа во одделот за интензивна нега во болницата во Омск. Во интервју за „Фокс њуз“, тој кажа дека е многу загрижувачко доколку Русија навистина стои зад ова и дека односот кон Русија во иднина ќе зависи токму од тоа. -Тој е многу храбар човек и нашите молби се со него и неговото семејство, рече О’Брајан.

Бела куќа: Советникот за национална безбедност на претседателот е позитивен на корона-тест

Ивана Ефремовски — Mon, 27 Jul 2020 15:35:20 +0000

Белата куќа потврди дека Роберт О’Брајан, советник за национална безбедност на американскиот претседател Доналд Трамп, е со позитивни резултати од тест за новиот коронавирус. О’Брајан, кој има клучна улога во администрацијата, се изолира и работи од безбедно место, објасни Белата куќа. Не постои ризик претседателот или потпретседателот да се заразат со коронавирусот, појаснија од Белата куќа. Претходно американски медиуми јавија дека советникот не оди на работа од минатата недела. Тој се заразил за време на семејна средба. Тој е изолиран во својот дом и работи главно преку телефон. (МИА)

О’Брајан: Трамп не добил усмен извештај за наводни руски парични награди за талибанците

Тале Кристо — Thu, 02 Jul 2020 10:36:17 +0000

Американскиот претседател Доналд Трамп не добил усмен извештај за наводните руски парични награди за талибанците за убиства на американските и други војници во Авганистан, кои се дел од воената коалиција предводена од САД, изјави советникот за национална безбедност на Трамп, Роберт О’Брајан. – До тоа не дојде затоа што една високо рангирана службеничка на ЦИА оцени дека разузнавачката информација што укажува на тоа е непроверена, рече О’Брајан, кој не прецизираше дали на Трамп му е предаден писмен извештај за тоа. О’Брајан изјави дека проценката на службенилката била точна, но, додаде, дека САД силно ќе одговорат доколку се потврди дека Русија навистина им исплаќала награди на талибанците за убиства на американски и други војници од коалицијата. Би-Би-Си наведува дека разузнавачките податоци за талибанските награди доаѓаат во време на интензивни напори на САД за постигнување мировен договор во Авганистан, а во 2019 година, кога, според тврдењата на неколку американски весници, требало да се спроведе наводниот руски план за напади, Трамп, исто така, се обидел да ги поправи односите со рускиот претседател Владимир Путин. Русија ги отфрли обвинувањата за награди, а талибанските власти соопштија дека движењето не склучило никакви договори со агентите на Москва.