Роберт Редфилд – Kurir.mk

Редфилд: Ќе ги вакцинираме Американците до јули 2021 година

Магдалена Андонова — Thu, 24 Sep 2020 07:45:15 +0000

Директорот на американскиот Центар за контрола и превенција на болести, Роберт Редфилд, изјави дека повеќето Американци можат да бидат вакцинирани против коронавирус најдоцна до јули 2021 година. Обраќајќи се пред Комитетот за здравство, образование, труд и пензии на Сенатот на САД, Редфилд рече дека очекува вакцинациите против Ковид-19 да се изведуваат со месеци, пренесуваат британските медиуми. Тој додаде дека очекува на крајот од март или април да бидат достапни околу 700 милиони дози од вакцината, што според него е доволно за да се вакцинираат 350 милиони луѓе. -Мислам дека ќе ни треба време до април, мај, јуни и евентуално јули за целосно да ги вакцинираме сите американски граѓани, рече Редфилд. Се уште нема вакцина против коронавирусот, но неколку можни се во завршна фаза на тестирање. (МИА)

Директорот на Американскиот центар за контрола и превенција на болести смета дека маските можеби се подобра заштита од вакцина

Ивона Петрова — Thu, 17 Sep 2020 06:21:24 +0000

Носењето заштитни маски може да обезбеди подобра заштита од Ковид-19 отколку вакцините, смета директорот на Американскиот центар за контрола и превенција на болести, Роберт Редфилд. – Можеби би отишол дотаму да кажам дека оваа маска ќе ми гарантира поголема заштита од коронавирусот отколку ако би биле вакцинирани против Ковид, бидејќи имуногеноста би била 70 проценти, и ако не добијам имунолошка реакција, вакцината нема да ме заштити. Оваа маска ќе ме заштити, нагласи Редфилд во Сенатот, пренесе Си-Ен-Ен. Тој додаде дека американските граѓани се уште не носат маски на ниво што ефикасно би ја ставило епидемијата под контрола. – Затоа и понатаму ќе барам од Американците да преземат одговорност, особено оние на возраст меѓу 18 и 25 години, бидејќи гледаме дека епидемијата продолжува, рече Редфилд.

Роберт Редфилд: Ова може да биде најлошата есен што сме ја виделе поради Ковид-19 (ВИДЕО)

Магдалена Андонова — Thu, 13 Aug 2020 11:35:08 +0000

Директорот на Националниот центар за контрола и спречување заразни болести, д-р Роберт Редфилд, изјави дека САД се во војна против коронавирусот и апелираше до Американците заедно да одат во војна против таа болест. – Барам едноставна работа од вас: носете маски, држете физичко растојание, мијте ги рацете и бидете мудри на јавни места. Не барам индивидуални Американци да го сторат тоа, но апелирам до сите нас да се однесуваат така…Ова е една од оние интервенции кога 95 отсто до 99 отсто од луѓето треба да го сторат тоа за да функционира, нагласи д-р Редфилд, јави Си-Ен-Ен. Директорот Редфилд ги повика Американците да се подготват за „тешка есен каква што не сме виделе“ и да планираат да се вакцинираат против сезонскиот грип. – Искористете го значајниот подвиг на американската наука и примете ја сезонската вакцина против грип, затоа што тоа ќе ги заштити вашите деца, рече д-р Редфилд, додавајќи дека тој е умерено оптимист дека американската вакцина против коронавирусот ќе биде достапна на почетокот на следната година. (МИА)