Роберт Вељановски – Kurir.mk

Велјановски: Нова бетонизација на Карпош- коалицијата СДС, Левица и ГРОМ го изгласаа ДУП-от за Злокуќани со што се предвидува нови 8 згради, без јавни објекти

Катерина Бојаџиева — Thu, 30 Mar 2023 13:29:02 +0000

На денешната 28-ма Седница на Советот на Општина Карпош и официјално беше промовирана коалицијата помеѓу советничките групи на СДС, Левица и ГРОМ. На граѓаните на Карпош им ја честитаме оваа коалиција но и им упатуваме порака дека советничката група на ВМРО-ДПМНЕ и Коалицијата за „Обнова на Македонија“ нема да отстапи од принципиелната борба за хуман урбан развој на општина Карпош, истакна Роберт Велјановски, советник на ВМРО-ДПМНЕ во Совет на Општина Карпош. -Советничката група на ВМРО-ДПМНЕ и коалицијата за „Обнова на Македонија“ не го поддржа предлог ДУП-от ССЗ 01 блок 10 за Злокуќани, од причина што не само што не се решаваат проблемите на жителите на Злокуќани, туку напротив, проблемите се зголемуваат. Имено, се задоволуваат потреби на поединци и на бизнис заедницата, но не се обрнува внимание на оние жители што чекаат легализација со години и на кои не им се решава статусот. Во предложениот ДУП се вцртани 8 згради за А2 домување, но притоа не се предвидуваат јавни објекти - училиште и градинка за најмалите граѓани кои сега живеат на овој потег, а одат во градинка и на училиште во Бардовци или пак во Влае, но и за оние кои допрва треба да живеат по изградбата на овие објекти. Додека градоначалниците на ВМРО-ДПМНЕ градат градинки и училишта, бришат маркици во интерес на хуманото живеење во нивните општини, во општина Карпош се мисли само како да се изградат згради. За време на изборната кампања ветувавме дека ќе им ги решаваме проблемите на граѓаните, а не дека ќе им создаваме нови проблеми. Советничката група на ВМРО-ДПМНЕ и Коалицијата за „Обнова на Македонија“ нема да поддржи нехумана урбана бетонизација на општина Карпош, бетонизација која не е поткрепена со соодветна инфраструктура, додава Велјановски.

Велјановски: Јакимовски и СДС со правни преседани за да ги исполнат желбите на урбаната мафија

Ристе Здравков — Sat, 15 Oct 2022 12:34:38 +0000

Почитувањето на законите и грижата за интересот на граѓаните не може да биде претставувано како опструкција, ниту пак правното насилие, кршењето на законските норми и борбата за интересите на урбаната мафија во Карпош можат да ги прикажат Стевчо Јакимовски и СДС како жртви на опструкции во Советот на Општина Карпош, рече на прес-конференција советникот во општина Карпош од редовите на ВМРО-ДПМНЕ, Роберт Велјановски. -Денес самоволието, правните акробации и преседани на Стевчо Јакимовски и СДС добиваат нова форма и димензија. Откако Советниците на СДС и ГРОМ воопшто не се појавија на 5 седници на Советот, два пати го спречија продолжувањето на прекинатата седница, откако Градоначалникот и службите ги игнорираат записниците и Одлуките од седниците одржани и изгласани со мнозински број на советници на 3 седници денес истите решиле по налог на Градоначалникот да си изгласаат пазете: Заклучок за прекин на седница на Совет! Откако увидоа дека се препознаени криминалите во Деталниот урбанистички план за Млечен, си решиле со заклучок да ја прекинат и завршат седницата. Не се важни ужинките, не се важни програмите за училиштата, важно е само криминалниот ДУП да остане во живот. Ваков правен преседан досега се нема случено во Општина Карпош. Ваква тешка импровизација е целосно спротивна на Законот и Деловникот за работа на Советот. Седницата ја започнува претседателот на Советот, седницата ја завршува претседателот на Советот. Јавноста и нашите сограѓани се згрозени од ваквото однесување на Градоначалникот и СДС бидејќи знаат зошто се случуваат вакви циркузантски потези, бидејќи знаат дека за СДС и Стевчо Јакимовски интересите на урбаната мафија и ДУП-от што очајнички сакаат да го протнат или спасат се поважни од интересот на граѓаните, законите и работата на Советот. Јавноста исто така знае дека ниту една правна акробација, ниту еден правен преседан каков што е случај со денешниот заклучок нема да помине кај Советниците на ВМРО-ДПМНЕ и Коалицијата. Јавноста знае дека Советниците на ВМРО-ДПМНЕ и Коалицијата секогаш ќе бидат најверниот чувар на јавниот интерес и хуманата урбанизација на Карпош, истакна Велјановски. Бидејќи ќе бидеме обвинети за опструкција, ние ќе се спротивставиме на ова решение, но граѓаните треба да знаат дека ќе понудиме конструктивно решение коешто во рамките на Законот и рамките на Деловникот за работа на Советот, додаде тој.

Вељановски: Поднесено барање за одземање на мандатите на советниците од Карпош кои три пати последователно не дошле на седница

Ивона Петрова — Wed, 31 Aug 2022 12:09:24 +0000

Советничката група на ВМРО-ДПМНЕ во Советот на Општина Карпош денеска поднесе барање до претседателот на Советот на Општина Карпош, Бранко Ристов за отпочнување на процедура за одземање на мандатите на советниците кои што три пати последователно не дошле на седница на Советот. -Треба да се знае дека во Карпош времето на неработниците за граѓаните е завршено. Треба да знаат сите оние кои што не ги почитуваат позитивните законски прописи дека консенквенците за нивното работење односно неработење треба да се поднесе. Три пати не биле советници од повеќе советнички групи, но ние цврсто стоиме на ставот дека секој еден кој што ќе нема оправдание треба да го изгуби советничкиот мандат. И оној што следува потоа на листата да си дојде во Советот на Општина Карпош, изјави Роберт Вељановски, советник на ВМРО-ДПМНЕ во Совет на Општина Карпош. Цени дека до наредната седница целата оваа процедура ќе биде завршена. -И цениме дека ќе можеме да поднесеме точка на Дневниот ред за одземање на мандатите на оние кои што согласно членовите од Законот за локална самоуправа и членовите од Деловникот за работа на Советот на Општина Карпош. И дека на следната седница ќе им ги одземеме мандатите на оние кои што не работат од интересот, за интересот и во интересот на граѓаните на општина Карпош, вели Вељановски.

Велјановски: Дали градинката „Мајски цвет“ каде падна кровот е реконструирана од фирма миленик на ДУИ и дали тендери добивала и фирмата која доби тендер за машини за перење во Ѓорче Петров?

Катерина Бојаџиева — Tue, 14 Jun 2022 10:34:37 +0000

Пред само малку повеќе од година и полововина, целиот врв на Социјалдемократскиот сојуз направи најмалку 5 настани поврзани со Детската градинка Мајски цвет во Тафталиџе, истакна Роберт Велјановски, Советник од ВМРО-ДПМНЕ во Советот на општина Карпош. -За сликање се наредија тогашниот премиер Зоран Заев и тогашниот градоначалник Стефан Богоев, па потоа Богоев и тогашниот министер Мила Царовска, по неколку месеци Заев, Богоев и министерот Јагода Шахпаска, итн. Сите настани беа поткрепени со прес конференции и воспевања како и колку СДСМ квалитетно гради и колку многу се грижи за децата од предучилишна возраст. Тврдеа дека несигурната монтажна барака на Детската градинка Мајски цвет во Тафталиџе 2 ќе прерасне во супер сигурен објект за престој на децата во супер сигурна тврда градба. Исплатија милиони денари, пари на граѓаните на Карпош, и го постигнаа следниот резултат - плафонот во неколку простории на градинката, по неполна година и половина, се урна! Среќа во целата несреќа е што “во целосно новиот објект” оваа немила случка се случи за време на викенд, кога ниту едно дете не престојува во градинката. За несреќата во модуларната болница во Тетово виновен беше кабелот, за рушењето на таванот на градинката, веројатно, ќе го обвинат олукот. СДСМ никогаш нема да бара виновници онаму каде што се во прашање и каде што се засегнати нивните бизнис интереси. За нив, јавниот интерес и безбедноста на граѓаните, се апсолутно не важни. Оттука, поставуваме неколку прашања: 1. Ќе превземе ли некој одговорност за рушењето на таванот на градинката? 2. Дали покрај изведувачот на реконструкцијата, фирма миленик на ДУИ, тендер за изведба на санација на објектот Детска градинка Мајски цвет, во Тафталиџе 2 добила и фирмата миленик на СДСМ која во општина Ѓорче Петров продаваше машина за перење алишта за 20.000 евра? 3. Дали и колку други тендери им се дадени на овие две фирми од претходното раководство на општина Карпош?! 4. Вредат ли профитот и бизнис релациите на СДСМ и ДУИ повеќе од безбедноста на најмладите жители на општина Карпош?!, додаде Велјановски.

Велјановски: Заложбите на Јакимовски за бетонизација на Карпош се личен интерес на него и неколку бизнисмени, ВМРО-ДПМНЕ нема да поддржи некој да профитира на грбот на граѓаните

Дарко Андоновски — Wed, 08 Jun 2022 12:32:00 +0000

ВМРО-ДПМНЕ не е пријател на градежната мафија и никогаш нема да биде сојузник на бизнисмени кои сакаат да профитираат на грбот на народот и на животната средина, ова денеска преку прес-конференција го истакна Роберт Велјановски од ВМРО-ДПМНЕ. -Денешната прес-конференција на Градоначалникот Стевчо Јакимовски е реакција на црвстите заложби на Советничката група на ВМРО-ДПМНЕ и коалицијата, по ниедна цена да не се дозволи понатамошна бетонизација на Карпош на штета на зелениот простор во општината. Несогласувањата на оваа тема се од првиот ден од преземањето на функцијата градоначалник на Општина Карпош. Господинот Стевчо Јакимовски наместо да се сврти кон граѓаните, нивните потреби и барања за почист Карпош, со повеќе зелени површини и содржини за рекреација, тој одбра да продолжи по стапките на Стефан Богоев. Советниците на ВМРО-ДПМНЕ не одобрија неколку обиди на Јакимовски за вцртување на згради на различни локации низ Карпош, кои освен за интересот на бизнисот не му служат никому. Јакимовски и покрај нашите бројни апели за прекин на бетонизацијата продолжува со намерите да штанца градежни дозволи, истакна Велјановски. Тој додава дека Јакимовски и денес сакаше да помине нов ДУП со 7 нови згради во Злокуќани, како и претходните негови обиди за усвојување на ДУП-ови со нови згради, така и за овој Советничката група на ВМРО-ДПМНЕ и коалицијата не даде поддршка на планот и на денешната седница истиот не беше усвоен. -Принципиелните заложби на ВМРО-ДПМНЕ пред изборите и ветувањата пред граѓаните се нашата единствена водилка и приоритети кон кои ние се стремиме. Жал ни е што во овие наши заложби градоначалникот не се препозна, ниту пак ни се придружи. Разликата е јасна. Од една страна ние со заложбата за хумана урбанизација и зелен Карпош, од друга страна Јакимовски со неговите заложби за продолжување на бетонизација, потенцираше Велјановски.

Вељановски: Бараме бришење на маркиците за изградба на висококатницa во Карпош, доколку не се постапи на следната седница ќе предложиме привремена суспензија на ДУП

Магдалена Андонова — Thu, 02 Jun 2022 13:12:22 +0000

Почитувани граѓани на Карпош, Советничката група на ВМРО-ДПМНЕ и коалицијата во општина Карпош со крајна загриженост ја прими изјавата на градоначалникот на општина Карпош, г-динот Стевчо Јакимовски за можна изградба на 28-катница на територијата на општина Карпош, изјави денеска за медиумите, Роберт Вељановски, советник на ВМРО-ДПМНЕ во Совет на општина Карпош. Тој истакна дека согласно со нивните заложби, а во насока за хумано урбано живеење во Карпош и борба против урбаната мафија бараат од градоначалникот на општина Карпош веќе на следната, најавена седница која треба да се одржи на 8 јуни да предложи точка на Дневниот ред со овој ДУП, за Советот на општината да може да расправа за носење на Предлог-одлука за бришење на градежната маркичка за предметната висококатница или поништување на ДУП-от во целина. - Доколку, почитуваниот градоначалник не предложи таква точка на Дневен ред, Советничката група на ВМРО-ДПМНЕ и коалицијата, на Седницата на 8 јуни, на Советот на општина Карпош ќе му предложи точка на Дневен ред со која привремено ќе бараме суспензија на предметниот ДУП, со што и формално-правно ќе постигнеме забрана за издавање на градежна дозволи за објектот за колективно домување (висококатница). За оваа иницијатива, Советничката група на ВМРО-ДПМНЕ и коалицијата бара поддршка и од останатите советнички групи во Советот на општина Карпош, додаде Вељановски.

Вељановски: Поради заканата од милионски суми на штета по евентуален изгубен судски спор советничката група ВМРО-ДПМНЕ ја поддржува точката за носење на ДУП за градска четврт З 04, блок 5 во Општина Карпош

Тале Кристо — Thu, 03 Mar 2022 10:12:04 +0000

Синоќа во 20:49 минути, градоначалникот на Општина Карпош, Стевче Јакимовски за утрово во 9:00 закажа вонредна седница на Советот на Општина Карпош со една точка на дневен ред, носење на ДУП за градска четврт З 04, блок 5 Општина Карпош. Ценејќи ја сериозноста на ситуацијата и заканата од милионски суми на штета по евентуалниот судски изгубен спор за Општина Карпош, советничката група на ВМРО-ДПМНЕ и коалицијата во Советот на Општина Карпош ќе ја поддржи точката од предложениот дневен ред. Непријатноста во која што сме доведени за толку важно прашање да одлучуваме на вонредна седница веројатно е настаната поради неодговорното владеење на претходниот градоначалник од редовите на СДСМ. Од за нас неразбирливи причини, актуелниот градоначалник ова не го посочува. Затоа советничката група на ВМРО-ДПМНЕ и коалицијата бара од соодветните органи и институции да покренат истрага во која ќе утврдат одговорност на сите инволвирани во овој случај. Интегрален текст на Роберт Вељановски, советник на ВМРО-ДПМНЕ во Совет на општина Карпош

Вељановски до Филипче: Денес, пред да тргнете на викенд со омилениот ви премиер, извадете ја кацигата, погледнете ја реалноста и поднесете оставка

Дарко Андоновски — Sat, 17 Apr 2021 11:44:40 +0000

ВМРО-ДПМНЕ денеска пред Министерство за здравство одржа протест под мотото „Здравје, а не провизија – Оставка на Филипче, за спас од неспособноста која убива“. На протестот актерот Роберт Вељановски истакна дека ова е гласно спротивставување против неправдите, штетите и трагедиите кои ненародната власт предводена од СДСМ ги прави врз граѓаните на Република Македонија и протест против хаосот во здравството, но и против сеопштиот хаос кој владее во Република Македонија. Она што требаше да го направат, резултира не само со губење на човечки животи, туку и со разорување на македонската економија. Цели стопански гранки зависат од имунизацијата. Угостителите, туристичките работници, конфекциите не работат. Не работат ни македонските театри, македонските музичари се на работ на егзистенцијален колапс, индустријата за организирање настани е пред дефинитивен банкрот. И го повика министерот за здравство Венко Филипче да си поднесе оставка. -Наместо да се развозувате со премиерот и свитата на вашите скапи мотори, да отворате и затворате хотели на една ноќ, додека обичниот народ не може да преживее од први до први, доблесно е барем еднаш да го повлечете вистинскиот потег. Денес, пред да тргнете на викенд со омилениот ви премиер, извадете ја кацигата, погледнете ја реалноста и поднесете оставка, рече Вељановски. Уште колку страдања е подготвен министерот Филипче, продолжи тој да им испорача на македонските граѓани за да разберат дека одамна ја промашиле работата за која што се платени. На Македонија и беше потребен министер за здравство кој уште со првите најави за разорноста на пандемијата ќе организираше брзо, стручно, ефтино и прецизно тестирање, министер кој требаше да обезбеди дополнителни функционални болнички капацитети, министер кој требаше да обезбеди дневни болници за болните од КОВИД-19, министер кој требаше да организира сигурни извори за набавка на лекови и суплементи кои помагаат во борбата со опасниот вирус и на крајот, да обезбеди доволно капацитети во кои би се згрижувале останатите пациенти, со хронични или акутни дијагнози, кои не се заразени со КОВИД 19, но имаат нужна потреба од болничко лекување, истакна Вељановски. Министерот Филипче требаше да обезбеди стратегија и да набави доволен број на вакцини за имунизација на населението, посочи од протестот Вељановски. -Наместо она што беше нужно потребно, повеќе од 13 месеци добиваме само лаги, инцидентни решенија, крај на јануари – средина на февруари, лаги, ветувања, па не во февруари, ама сигурно во првата недела од март, па лаги, избрзани решенија на необмислени прес конференции, лаги, па ретерирања, па не март, април, па повторно лаги, па најава за вакцини, па лаги, па подарок вакцини, па лаги, па почеток на општа имунизација, со замислете, 5000 вакцини, па пак лаги. За волја на вистината, единствено добивме лаги, менување на ставови и одлуки, најновата, на 15 април, бидејќи нели имаме вакцини за имунизација на целото население, не ни требаа вакцини од Институтот Торлак од Србија, а утре дента на 16 април праќате тим да преговара во Белград, за да договори стратешко партнерство со Институтот Торлак. Срамно и недостоинствено. Судбината на Македонија и на нејзините граѓани е во рацете на луѓе кои носат одлуки согласно дневна агенда и инспирација. Срам за цела држава, достоинство нула, рече Вељановски. За 13 месеци, 4388 наши сограѓани починаа од последиците на ковид-19.Од нив, 1024-ца, се лица кои починале во последните 30 дена, од 16 март до 16 април. Ова се поразителни факти, посочи Вељановски. На крајот од својот говор Вељановски рече дека пратеничката група на ВМРО-ДПМНЕ по скратена постапка ќе поднесе Предлог Закон за дополнување на Законот за здравствена заштита со кој на сите граѓани кои користеле услуги за лекување од КОВИД 19 во приватните болници, државата ќе им се овозможи враќање на разликата во цената помеѓу државното и приватното здравство.

Вељановски: Платата за 5.000 вработени од културата доцни 16 дена, додека се фрлаат милионски суми за тендери

Дарко Андоновски — Sat, 29 Aug 2020 11:43:04 +0000

Веќе не постои никаков изговор. Платата доцни 16-ти ден. Законски (иако е општо познат факт дека во “нашата земја” одамна никој не е загрижен за законот) платите на вработените во културата мора да бидат исплатени најдоцна до 15-ти во месецот!, ова го истакна Роберт Вељановски од ВМРО-ДПМНЕ. -Во услови кога се фрлаат милионски суми во евра за разноразни тендери од кои, за жал и како општо познат факт, се полнат приватни џебови, скандалозно е државата да доцни со плата на околу 5000 вработени во македонската култура. Или можеби им пречи придавката “македонска” пред култура?! Можеби е несоодветна исплата на плати од државниот буџет на “македонските” културни работници?! Или пак, што е повеќе од веројатно, потпишаниот нов колективен договор во културата не е ништо друго освен предизборна измама со која се “купуваа” гласови од културните работници?! Ударот врз културните работници е удар врз културата, а со тоа, и удар врз општеството. Некој здушно работи културните работници наместо со култура и критика на општеството, општествените текови и општественото живеење да се занимаваат со борба за обезбедување на гола егзистенција, вели Вељановски. Тој додава дека се разбира, секогаш кога сакаш да ја угушиш критичката мисла, удри по културата!!! Веројатно, оваа реченица во целост ја отсликува моменталната состојба во државата. Власта, која во овој безумен налет на самобендисаност и аздисаност руши се пред себе и го ограбува својот народ, има потреба да ја замолчи авангардата и авангардната мисла. -Незадоволството од доцнењето на јулската плата е огромно. Дури и кај најголемите поддржувачи на оваа ненародна власт, иако, мора да се признае, дека сега засега синдикалните лидери мошне успешно и со божемен цврст отпор и став ги држат на “кратко јаже”! Бидејќи се надевам дека во буџетот на оваа “наша земја” остана некоја трошка средства, која не е потрошена на тендери ( да речеме, на софтвер од 15 милиони евра за он лине настава, иако еден македонски универзитет сличен софтвер изработува за 300 000 евра), најитно исплатете ги платите во културата!, рече Вељановски.

Вељановски: Вработените во Универзална не зеле плата 2 месеца затоа што директорот си вработил сопартијци

Ивана Ефремовски — Wed, 22 Apr 2020 14:33:15 +0000

„Вработените во Универзална не зеле плата 2 месеца, затоа што копитото од директор вработил 2-ца свои сопартијци без дозвола од Министерството за финансии. Од таму платите им ги враќаат, затоа што не им се совпаѓа пресметката“. Ова го пишува актерот Роберт Вељановски на својот Фејсбук профил. Еве што пишува тој: Директорчето тера инает, не праќа нови пресметки без овие двајца и ги условува сите за да добие согласност за вработување на сопартијците од Министерство за финансии! @CityofSkopje, фраерчиња навлечени на “И тебе сам сит кафано”, кои се гадат од “Бисер балкански” која не е IN за нивните скудни мозочиња, си тераат концерти на отворено на алтернативци за да им доделат 14 500 денари. Сите овие концерти се опслужени од луѓето на Универзална кои не зеле плата. Барем заштитна опрема поделете им! Тоа е сѐ што треба да знаете за културата во Македонија за време на корона пантемијата!!!