Роберто Азеведо – Kurir.mk

Генералниот директор на СТО ја напушта функцијата во крајот на август

Тале Кристо — Thu, 14 May 2020 18:59:02 +0000

Генералниот директор на Светската трговска организација (СТО), Бразилецот Роберто Азеведо, денеска објави дека ќе ја напушти функцијата на 30 август, една година пред истекот на неговиот втор мандат и додаде дека нема политички амбиции. „Тоа е лична, семејна одлука и убеден сум дека е најдобар во интерес на организацијата“, рече Азеведо на онлајн состанокот на членовите на СТО. Предвременото заминување на Бразилецот доаѓа во време кога светската економија доживува најголемо забавување од Големата депресија од 1930-те. Светската трговија е погодена од последиците на пандемијата на коронавирусот вирус и тоа драстично ги намали производството и трговијата. Без оглед на коронавирус-кризата, СТО со месеци минува низ својата длабока криза поврзанa со телото за решавање спорови меѓу членките.

Шефот на СТО предвреме заминува од функцијата

Ивона Петрова — Thu, 14 May 2020 06:07:11 +0000

Претседателот на Светската трговска организација (СТО), Роберто Азеведо, планира да ја напушти својата позиција пред да му заврши мандатот во 2021 година, пренесува германската агенција ДПА. 62-годишниот Бразилец го доставил овој план до владите членки на СТО, објави денеска Блумберг, повикувајќи се на четири лица запознаени со ова прашање. Азеведо е претседател на трговското тело со седиште во Жeнева од 2013 година. Тој во април рече дека СТО очекува светската трговија да падне за 13 до 32 проценти оваа година, како резултат на кризата со коронавирус. СТО се соочуваше со системски проблеми уште пред пандемијата на коронавирус, која ја уништи глобална трговија.

СТО: Коронавирусот значајно ќе влијае врз глобалната трговија

Ивона Петрова — Tue, 03 Mar 2020 07:01:12 +0000

Епидемијата на коронавирус значајно ќе влијае врз глобалната трговија, предупреди првиот човек на Светската трговска организација (СТО) Роберто Азеведо, предвидувајќи ги првите конкретни показатели во следните недели. „Последиците во глобалната економија веројатно ќе бидат значајни и ќе почнат да се покажуваат во трговските податоци во следните недели, рече Азаведо пред амбасадорите собрани на затворена средба во Женева. Меѓу темите бил и јунскиот состанок во Казахстан, на кој министрите од земјите членки на СТО, меѓу другото, ќе се обидат да постигнат договор за субвенционирање во земјоделието, интернет трговијата и рибарството. „Што се однесува до МЦ-12, се држиме до планот. Доколку ситуцијатата побара, ќе ги преземеме сите потребни мерки“, рече Азаведо. На средбата во Казахстан треба да присуствуваат неколку илјади лица, напоменуваат британските медиуми. Успешниот исход од јулскиот самит на СТО се смета за клучен за легитимитетот и релевантноста на оваа глобална организација, чиј систем на арбитража во трговските спорови во моментов е парализиран бидејќи САД го блокираше именувањето на двајца нови судии.

Светот е соочен со најлоша криза од 1947 година, тврди директорот на СТО

Ивона Петрова — Sat, 01 Dec 2018 08:43:21 +0000

Главниот директор на Светската трговска организација, Роберто Азеведо изјави дека слободната трговија во светот се соочува со „најлоша криза“ од 1947 година и дека сегашниот протекционистички бран е закана за слободната трговија. Азеведо сега е во Буенос Аирес каде што се одржува самитот Г-20, и во изјава за Би-Би-Си рече дека „ова е најлошата криза не за СТО туку за целиот мултилатерален трговски систем од Општиот договор за царини и трговија од 1947 година“. – Ова е момент кога некои темелни начела на организацијата се оспоруваат и се доведуваат во прашање. Мислам дека тоа е многу сериозно, изјави Азеведо. Според него, „начинот на комуникација“ меѓу Кина и САД мора да се префрли од „заканувачки и обвинувачки во оној за изнаоѓање решенија“. САД и СТО во моментот се во спор поради Телото за жалби што решава трговски спорови меѓу државите. САД блокира именување во тоа тело бидејќи ја преиспитува неговата улога, и тоа тело поради тоа едвај функционира. МИА