роботи – Kurir.mk

Сан Франциско веројатно ќе ѝ дозволи на својата полиција да користи роботи кои убиваат

Тале Кристо — Fri, 02 Dec 2022 07:50:20 +0000

Градската управа на Сан Франциско во вторникот усвоила документ којшто веројатно би ѝ овозможил на полицијата да користи роботи оспособени да убиваат криминалци во исклучителни случаи – како терористички напади или масовни убиства, коишто често се случуваат во САД. – Употребата на роботи во потенцијално опасни по живот ситуации, е последно средство, изјави началникот на полицијата во Сан Франциско, Бил Скот. Конечната одлука на градските власти се очекува на 6 декември, но случајот веќе предизвика полемика и контроверзии. Противниците на предлогот стравуваат дека доколку биде усвоен, тој може да доведе до зголемување на полициската бруталност, и иднина како „во ’Терминатор‘ филмовите“.

Јужна Кореја: Работниците сѐ повеќе се заменуваат со роботи

Ивона Петрова — Tue, 14 Jun 2022 11:31:29 +0000

Во Јужна Кореја во јануари беше усвоен Закон за работни односи, со којшто им се дозволува на судовите да ги казнуваат директорите или високите менаџери на компании доколку работниците бидат повредени или убиени на работа. Новиот Закон предвидува и затворски казни, па ги принуди компаниите да вложуваат во роботи и да ги заменуваат луѓето со нив. – Низ нашата историја, секогаш наоѓавме начини да останеме во чекор. Автоматизацијата е следниот потфат во тој процес, изјави Ким Јонг-рае, извршен директор на компанијата „Спифокс“. Според бизнисмените, компаниите се движат кон намалување на луѓето работници и постои неподготвеност да влезат во проекти со висок ризик. Компаниите сега, поради новиот закон, бараат начин да имаат што помалку работници или воопшто да немаат човечки кадар во погоните. – Законот е огромен проблем во бизнисот. За наша среќа, веќе сме во процес на автоматизација, па бевме подготвени на новиот Закон, додаде Ким Хјо-џин, директорка на „Спифокс“ и ќерка на Јонг-рае. Законот првично беше претставен како голем чекор во борбата за правата на работниците, но компаниите, главно фабрики и градежни компании, не се согласуваат, тврдејќи дека префрлањето на одговорноста на водачите е неправедно и нејасно. Се наведува дека јужнокорејските фабрики имаат недоволно висок степен на безбедност, што според многумина, е сосем неразбирливо, бидејќи се работи за технолошки напредна земја.

И роботи ќе се справуваат со коронавирусот на ЗОИ

Ивона Петрова — Thu, 18 Nov 2021 09:49:59 +0000

Роботи ќе се користат во спречување и справување со можни корона-зарази во спортскиот центар „Вукесунг“ во Пекинг, Кина, каде што ќе се одржат натпреварите во хокеј на мраз за претстојните Зимски олимписки игри, јавува Кинеската медиумска групација (КМГ). Со прскање атомизирана магла на земјата, роботот за дезинфекција може да дезинфицира дури 36 квадратни метри за една минута. Батеријата може да издржи до пет часа. За помали површини, роботот дезинфицира со ултравиолетови зраци, за коишто се смета дека се поделотворни. Друг робот има уред за бесконтактна дезинфекција на рацете, а може и да препознава луѓе кои не носат маски и да ги предупредува.

Сметководителите ќе исчезнат, ќе бидат заменети со роботи

Дарко Андоновски — Wed, 18 Aug 2021 11:38:28 +0000

Новите технологии наскоро ќе ги заменат специјалистите кои вршат „монотона работа“ со документи, на пример – сметководителите, смета директорот за дигитални производи на групацијата „Веон“, Џорџ Хелд. Од практична гледна точка, постојат професии – како келнер во ресторан за кои не е потребно посебно знаење… Тука е и тн. „среден ешалон“ – на пр., сметководителите, кои работат „прилично монотона работа“, а потоа има и креативни луѓе… – Да ги научиш и заменуваш луѓето од „најниските професии“ со робот е речиси невозможно. Поставување маса, уредувањето на приборот за јадење и чашите – од гледна точка на вештачката интелигенција – е многу тешко да се направи. Луѓето со креативни професии кои ја создаваат иднината исто така нема да бидат заменети со роботи. Но, сметководителите, на пр., многу брзо ќе бидат потиснати од роботи и ќе треба да се преквалификуваат во некоја од пониските или покреативните професии, вели Хелд. Тој истакна и дека покрај развојот на технологијата, човештвото воопшто, нема да ја загуби својата работа. – Никогаш нема да дојде до тоа – човештвото да нема што да прави. Луѓето секогаш ќе работат нешто, само што ќе се занимаваат со сѐ повеќе и понови технологии, истакнува технолошкиот стручњак.

Проценка: До 2025 роботите ќе згаснат 85 милиони работни места

Ивона Петрова — Wed, 21 Oct 2020 07:22:03 +0000

Роботите ќе доведат до згаснување на 85 милиони работни места во средните и големите компании во наредните пет години, бидејќи пандемијата со коронавирусот ќе ги забрза промените на пазарот на трудот и ќе ја зголеми нееднаквоста, оценува во извештајот Светскиот економски форум (WEF). Како што пренесува Ројтерс, истражувањето спроведено во 300 компании во светот покажало дека во четири од пет управи се забразуваат плановите за дигитализација на работата во примена на нови технологии. -Ковид-19 го забрзува доаѓањето на иднината во работењето, изјавил директорот на WEF, Садиј Захиди. Работниците за да ја задржат работата ќе мораат во наредните пет години да учат нови вештини, бидејќи до 2025 година работата подеднакво ќе биде поделена меѓу луѓето и машините, се наведува во студијата. Општо, се проценува дека создавањето работни места забавува, а затворањето се забрзува, бидејќи компаниите ширум светот сè повеќе ја користат технологијата наместо луѓе. Добрата вест е дека 97 милиони нови работни места ќе бидат отворени во некои области и дека човекот ќе ја задржи својата компаративна предност на нивоата на управување и донесување одлуки, на пр. во областа на зелената економија или вештачката интелигенција.

Јапонија ќе соработува со НАСА, целта им е да населат роботи и луѓе на месечината

Тале Кристо — Fri, 10 Jul 2020 20:42:06 +0000

Јапонија и НАСА се договорија за соработка и истражување на површината на месечината, а целта им е да населат луѓе и роботи. Управителот на НАСА, Џим Бриденстин и јапонскиот министер за образование, култура, спорт и технологија Коичи Хагиуда, потпишаа декларација за време на виртуелен состанок. -„Ова е огромен чекор кон слетување на Јапонците на месечината“, соопшти министерот Хагиуда. Според декларацијата, две страни планираат за време на соработна на Меѓународната вселенска станица и во програмата на НАСА „АРТЕМИС“ која предвидува да пресели луѓе на месечината. -„ Денешното потпишување на декларацијата има намера да продолжи со успешна соработка меѓу Јапонија и САД а и во вселената“, рече управителот на НАСА, Џим Бриденстин.

Аеродром Хитроу во Лондон: Роботи ќе паркираат 270 автомобили на паркинг за 170

Предраг Кукиќ — Mon, 18 Feb 2019 11:30:29 +0000

Еден од лондонските аеродроми наскоро ќе добие роботи за паркирање, оспособени сами да ги постават автомобилите на слободните места. Принципот е таков што роботот Стен застанува пред возилото, го крева со лостови над земјата и го преместува на она паркинг-место кое претходно не е зафатено. На тој начин, возачот излегува пред паркирањето, а вратата потоа не треба да се отвора. Така, паркингот на аеродромот Хитроу, на кој претходно имало 170 места, сега ќе може да собере 270 автомобили. Дополнително, роботите имаат информации за летовите и слетувањата, па „знаат“ кога навреме да ги подготват автомобилите за патниците кои пристигнуваат.

Роботи што носат храна, кажуваат шеги и танцуваат со гостите

Предраг Кукиќ — Wed, 30 Jan 2019 10:48:29 +0000

Во кафулето Енџој во унгарскиот главен град Будимпешта, персоналот го сочинуваат роботи, кои служат храна, кажуваат шеги и танцуваат со гостите. Роботизираните келнери одат по обележани патеки, за да не си пречат меѓусебно со гостите. А, други пак, служат за забава, како на пример, „рецепционерката” од јапонско производство, Пепер. „Таа“ е една од главните атракции на угостителскиот објект, оти разговара со посетителите, а доколку посакаат, може и да танцува со нив. Сопственикот Тибор Чишмадија смета дека вештачката интелигенција не претставува закана за работните места на луѓето. – Всушност, ние вработивме двапати повеќе луѓе отколку порано, бидејќи за 16 или 20 роботи да работат од 9 до 21 часот, мора да имате стручни лица во позадина, нагласи тој.

До 2025 роботите ќе извршуваат повеќе од работите наместо луѓето

Ристе Здравков — Mon, 17 Sep 2018 07:07:58 +0000

Најдоцна до 2025 година, роботите ќе извршуваат 52 проценти од постоечките работи, речиси двојно повеќе од денес, објави денеска Светскиот економски форум (СЕФ). Истражувањето е засновано на анкета во која биле вклучени директори за персонал и други високо рангирани лидери на голем број компании од целиот свет, со глобален удел на БДП од 70 проценти. Според нивната проценка, „машините до 2025 година ќе извршуваат повеќе од половина од постојните задачи на работното место, а денес се 29 проценти", се вели во извештајот на СЕФ „Иднината на работните места 2018", објавен денеска. Паралелно, луѓето би можеле да добијат „нови улоги", кои ќе бараат преквалификација за да продолжат со „сеизмички промени" во работата со машините и компјутерските програми, проценуваат СЕФ. Брзи промени на машините и алгоритмите, компјутерски процеси насочени кон решавање проблеми, може да креираат 133 милиони нови улоги кои ќе заменат 75 милиони изгледно згаснати во распон од денес до 2022 година, рпедвидуваат во ВЕФ Седиштето на таа организација е во близина на Женева и е позната како организатор на економскиот форум во Давос.

Во Женева почнува седумдневен собир посветен на „роботи убијци“

Ристе Здравков — Tue, 28 Aug 2018 09:39:24 +0000

Голем број експерти денеска во Женева ќе разговараат за така наречените роботи убијци односно автономните футуристички оружени системи кои би можеле да завојуваат без интервенција од човекот. За време на седумдневниот собир, втор од таков вид, во седиштето на Обединети нации во Женева, ќе разговараат за можните начини за регулација на оружените системи. За сега, целосно автономни и компјутерски контролирани оружени системи не постојат, а поединечни групи експерти оценуваат дека владите и армиите генерално треба да спречат развивање на таков вид оружје, бидејќи според нив постојат „ужасни“ сценарија за тоа што нивното постоење може да предизвика. Организацијата за човекови права „Амнести интернешнел“ (АИ) денеска апелираше до сите земји да работат на забрана на такво оружје. „Роботите убијци“ повеќе не се само научна фантастика, изјави истражувачот на вештачката интелигенција на АИ, Раша Абдул Рахим. Претседавачот со собирот Амандип Гил изјави дека постојат три табори земји: Еден кој сака формална и правна забрана на автономно оружје, друг кој се залагаат за политички, необврзувачки договор и трет кој не сака никакви промени. Добитничката на Нобелова награда за мир 1997 година, Џоди Вилијамс инсистира на „разумна контрола од страна на човекот“ за употребата на автономните оружени системи. - Постојат многу разлики помеѓу владите, до сега 26 (земји) побараа целосна забрана, посочи Вилијамс, која е домаќинка на собирот во Женева. Собирот во Женева функционира по принцип на консензус, што значи дека само една земја може да го осуети планот за производство на таков вид оружје.