Родриго Дутерте – Kurir.mk

Убиен новинарот кој известуваше за војната против дрогата на претседателот Дутерте

Катерина Бојаџиева — Thu, 09 Dec 2021 07:50:26 +0000

На истокот од Филипините е убиен новинарот Хесус Малабанан, кој како дописник на агенцијата Ројтрес, со своето известување многу му помогна на претседателот Родриго Дутерте во информирањето за кампањата за војната против дрогата во земјата, соопшти денеска филипинската полиција, јави ДПА. Полицијата прецизираше дека Малабанан (58) доцна синоќа бил застрелан во главата и дека бил прогласен за мртов при пристигнувањето во болницата во Калбајог Сити, град на 482 километри југоисточно од Манила. ДПА јавува дека новинарот бил известувач за еден весник на англиски јазик и телевизиска информативна мрежа во Манила, а работел и за агенцијата Ројтерс и придонел за нејзиното известување за војната против дрогата, за која добил Пулицерова награда во 2018 година. Малабанан гледал телевизија во мала маалска продавница во сопственост на неговото семејство во Калбајог Сити, кога бил застрелан во главата од неидентификуван вооружен маж кој побегнал на мотоцикл управуван од друг осомничен, се наведува во полицискиот извештај. Полицијата се уште не го идентификувала осомничениот или мотивот за убиството, но неговите колеги веќе изјавија дека Малабанан добивал смртни закани пред да биде убиен. -Џес многу му помогна на Ројтерс во приказните за војната со дрогата, за што освои Пулицер во 2018 година, изјави Мани Могато, пензиониран дописник на оваа новинска агенција, кој беше дел од тимот од Манила кој работеше на наградените извештаи. Националната унија на новинари на Филипините соопшти дека Малабанан е 22-от новинар кој е убиен во оваа југоисточна азиска земја откако Дутерте стана претседател во 2016 година. Филипините важат за една од најопасните земји во светот за новинарите, сметаат групите за слобода на печатот, вклучувајќи го и Комитетот за заштита на новинаритем чие седиште е во Њујорк.

„Да им влеземе дома на луѓето и да ги вакцинираме додека спијат“ – шокантна изјава на претседателот на Филипини

Ивана Ефремовски — Tue, 12 Oct 2021 14:00:29 +0000

Луѓето кои сe уште не сакаат да се вакцинираат против коронавирус треба да се вакцинираат додека спијат, оцени денеска претседателот на Филипини, Родриго Дутерте. -Знам дека многумина се уште не сакаат да се вакцинираат и тие се проблем. Значи, ајде да влеземе во нивните куќи и да ги вакцинираме додека спијат. Крај на приказната, Дутерте предложи во телевизиско обраќање, велејќи дека тој ќе ја води акцијата. Тој посочи дека покрај имунизацијата, важно е да се носат маски и да се одржува дистанца, бидејќи само тие мерки можат да го спречат ширењето на коронавирусот во земјата. Скоро 50 милиони дози на вакцини против коронавирус од различни производители се дадени на Филипини досега. Повеќе од 23 милиони луѓе се целосно имунизирани, а властите се надеваат дека ќе имунизираат до 70 милиони од 111,5 милиони жители до крајот на годината. Дутерте претходно повика на донесување закон со кој ќе се дозволат затворски казни за оние што го прекршуваат карантинот. Тој, исто така, рече дека учесниците во масовните настани треба да одат во затвор. На почетокот на јуни, Дутерте рече дека оние кои се свесни дека се позитивни на ковид, но ги прекршуваат мерките, заразуваат други и предизвикуваат смрт, ќе бидат обвинети за убиство. Досега, 2,67 милиони луѓе се заразени со коронавирусот на Филипини, од кои околу 39,600 починале. (МИА)

Филипинскиот претседател најави повлекување од политиката

Ивона Петрова — Sat, 02 Oct 2021 09:44:16 +0000

Филипинскиот претседател Родриго Дутерте денеска изјави дека нема намера да се кандидира за потпретседател на земјата на изборите во 2022 година и дека ќе се повлече од политиката, што потенцијално ќе го отвори патот за неговата ќерка да се кандидира за највисокото место во земјата, пренесуваат француските меидуми. -Преовладувачко е чувството меѓу Филипинците дека не сум квалификуван и би било кршење на Уставот доколку го заобиколам законот, духот на Уставот, доколку се кандидирам за потпретседател, рече Дутерте. „Денеска го објавувам своето повлекување од политиката“, додаде актуелниот филипински претседател.

Манила го продоложи воениот договор со САД, се откажа од зближувањето со Кина

Ивона Петрова — Thu, 04 Jun 2020 06:21:31 +0000

Иако филипинскиот претседател Родриго Дутерте го критикуваше воениот договор со САД како „неправеден“, филипинската влада одлучи да се откаже од нов сојуз со Кина и да го продолжи долгогодишниот воен договор со Соединетите држави, јави „Њујорк Тајмс. Филипинскиот министер за надворешни работи Теодоро Локсин синоќа изјави дека преку дипломатски канали го информирал Вашингтон за одлуката на владата во Манила, а во соопштнието на американската Амбасада во Манила се наведува дека Белата куќа го поздравува пресвртот и дека „придонесува кон долгорочната воена соработка меѓу двете земји“. САД, исто така, се надеваат дека набрзо ќе ја продолжат тесната соработка со Филипините во областа на безбедноста и одбраната. Аналитичарите овој пресврт го толкуваат како знак дека соседите на Кина се повеќе се загрижени за нејзиното воено зајакнување и дека Филипините, Виетнам и Малезија, три земји со нерешени територијални проблеми со Пекинг, ја делат таа загриженост во Јужното Кинеско Море. Според „Њујорк Тајмс“, политичките аналитичари сметаат дека промената во политичкиот тек на Манила е стратешка победа за САД, ако се земе предвид дека Филипините се единствениот американски сојузник во Јужното Кинеско Море, што се наоѓа на виталната поморска трговска маршрута. Со оглед на тоа што Пекинг минатата година соопшти дека ги полага историските права за контрола на виетнамските и малезиските води во Јужното Кинеско Море, Манила можеше да заклучи дека нејзиното доближување до Пекинг нема и користи во заштитата на националните интереси “, изјави Тејлор Фравел, директор на програмата и професор по безбедносни студии на престижниот Бостонски универзитет МИТ.

Манила е во карантин

Ивона Петрова — Fri, 13 Mar 2020 06:35:14 +0000

Филипинскиот претседател Родриго Дутерте нареди прекин на домашниот сообраќај во областа на Манила во следните 30 денови и одобри карантин во регионот за спречување на ширењето на новиот коронавирус. Тој забрани и големи митинзи во главниот град, ја прекина работата на многу владини агенции и ја продолжи суспензијата на наставата за уште еден месец. Во телевизиско обраќање, Дутерте предупреди дека оние кои ги кршат правилата или одбиваат да ги применуваат, ќе завршат во затвор. На Филипините досега се потврдени 52 случаи на заболени од Ковид-19, а две лица починаа.

Дутерте: Уапсете ме или обесете

Ивана Ефремовски — Fri, 20 Dec 2019 12:33:12 +0000

Филипинскиот претседател Родриго Дутерте му порача на Меѓународниот кривичен суд во Хаг да донесе одлука за негово апсење или бесење поради наводните убиства во неговата борба против дрогата. Неговите забелешки се најново спротивставување на судот во Хаг, кој се очекува да донесе одлука дали ќе спроведе истрага за илјадници смртни случаи за време на „борбата против дрогата“, кога, според активистите, се извршени злосторства против човештвото. -Не ме плашете со тоа дека ќе ме уапсите. Никогаш нема да си дозволам да одговорам пред белци. Никогаш, никогаш, никогаш нема да одговорам на ниту едно ваше прашање. Тоа е глупост за мене. Им одговарам единствено на Филипинците и тие ќе судат, изјави Дутерте. Тој додаде и дека доколку му биде изречена казна со бесење за она што го направил, тоа ќе претставува негово задоволство. Групи за заштита на човековите права соопштија дека борбата на Дутерте предизвикала систематски убиства и нивно прикривање од страна на полицијата. Полицијата ги демантираше таквите тврдења и соопшти дека околу 7.000 убиени лица биле вооружени нарко дилери кои се спротивставувале на апсење. (МИА)

Филипинскиот претседател со нови навреди кон католичките епископи

Ивона Петрова — Thu, 06 Dec 2018 07:00:52 +0000

Филипинскиот претседател Родриго Дутерте повторно упати напади и навреди кон католичките епископи во својата земја, велејќи дека тие треба да бидат убиени бидејќи нема никаква корист од нив. Дутерте, кој често пати ја критикувал Католичката црква и нејзините лидери на Филипините, изјави дека иако верува во Господ, тој смета дека епископите се „глупаци“. – Јас сум голем верник. Но нашите епископи треба да се убијат. Нема корист од нив, тие се глупаци. Се што знаат да прават е да критикуваат, истакна филипинскиот претседател. Филипините се најголемата азиска држава со мнозинство католичко население. Дутерте често ги напаѓа свештениците поради наводни тврдења за корупција и сексуални злоупотреби, на кои и самиот бил жртва како ученик. МИА

Дутерте за католичките бискупи: „Сите треба да бидат убиени“

Предраг Кукиќ — Wed, 05 Dec 2018 18:29:13 +0000

Филипинскиот претседател Родриго Дутерте денеска повторно го „впери прстот“ кон римокатоличките бискупи нагласувајќи дека се бескорисни и поради тоа треба да бидат убиени. Дутерте ја криткуваше Католичката црква на Филипини, но тврди дека верува во Бога, но и дека бискупите се будали. – Не би успеал во животот без Господ. Но, вашите бискупи, убијте ги. Бескорисни се, тоа се будали. Знаат само да критикуваат, рече Дутерте. Филипинскиот претседател додаде дека неговиот Бог има „здрав разум“ во однос на „глупавниот“ Бог на католичките бискупи. – Никогаш не сум рекол дека сум атеист, објасни Дутерте. – Да бидеш претседател е дар од Господ. Дутерте (73) ги критикуваше бискупите и свештениците заради корупција и сексуално злоставување и вели дека и самиот бил жртва додека бил ученик во градот Давао.

Претседател бара цела земја да се откаже од верата: „Наместо во црква, молете се дома“

Ивона Петрова — Tue, 27 Nov 2018 10:37:19 +0000

Во вербална војна која ја води со Католичката црква, филипинскиот претседател Родриго Дутерте сака граѓаните да се одречат од верата, велејќи дека црковните учења се неразумни, а свештениците корумпирани. -Изградете капела во своите куќи, па таму молете се. Не мора да одите во црква и да им плаќате на овие идиоти, изјавил Детерте, а неговиот говор е пренесен од „ABS-CBN“. Дутерте е познат по нападите на Бог. -Што знаат тие за светот денес. Како луѓето пред 3.000 години можеа да предвидат што денес ќе се случува, прашува во својот говор одржан во неделата тој. Филипинскиот претседател и летово предизвика низа констроверзии, кога го нарече Бог со погрдни имиња, а истакна и дека ќе поднесе оставка ако некој му докаже дека Бог постои.

Дутерте жали што го нарекол Обама „курвин син“’

Ристе Здравков — Mon, 03 Sep 2018 09:21:41 +0000

Председателот на Филипини Родриго Дутерте ја почна посетата на Израел со говор пред филипински работници во Ерусалим, во кој им се извини за она што го рече за поранешниот американски претседател Барак Обама, но ја бранеше неодамнешната „шега за силување“. Тој синоќа допатува во Израел во посета која многумина ја осудија, меѓу другото, и поради неговото споредување со Хитлер, коментираат израелските медиуми. - Мора да се има почит. Не само да се расфрлува со прашања и изјави. Жал ми е што ги изговорив тие зборови, рекол Дутерте синоќа, а неговите зборови ги пренел еден новинар од Манила. Претседателот на Филипини исто така рекол дека Обама му простил но остана нејасно зошто избра во Израел да зборува за тоа како го навредил поранешниот американски претседател. Тој исто така ги спомнал и своите неодамнешни изјави дека ќе има многу силувања „ако има многу убави жени“, велејќи им на насобраните дека се шегувал, но оти ја користел слободата на говорот во демократијата. Во Израел работат околу 30.000 Филипинци и Дутерте рече дека тоа е единствена земја на Блискиот исток во која се почитуваат човековите права.