Роџер Федерер – Kurir.mk

Вимблдон организира специјална церемонија за Федерер

Ивона Петрова — Mon, 03 Jul 2023 19:47:08 +0000

Поранешниот швајцарски тенисер Роџер Федерер утре ќе се појави на централниот терен на Вимблдон на специјална церемонија на која организаторите ќе му оддадат почит за сите успеси кои ги постигна во својата кариера на лондонскиот грен – слем турнир. Федерер осум пати го освојуваше Вимблдон, што е рекорд во поединечна машка конкуренција. „Роџер утре ќе биде со нас и ќе имаме можност да му оддадеме почит за сè што направи тука“, изјави претседателката на Ол Ингланд клуб, Сели Болтон. На церемонијата беше поканета и американската тенисерка Серена Вилијамс, но таа го откажа патувањето, бидејќи е бремена. Серена Вилијамс седум пати триумфираше на Вимблдон, а професионалната кариера ја заврши минатата година.

Федерер конечно одговори на прашањето: Дали Новак е најдобар на сите времиња?

Ивона Петрова — Wed, 21 Jun 2023 17:29:58 +0000

Поранешниот швајцарски тенисер Роџер Федерер доби специјална награда на турнирот во Хале, каде 10 пати беше шампион. Специјална церемонија за Федерер беше одржана по мечот меѓу Данило Медведев и Ласло Жиере, а Швајцарецот беше поздравен со овации. По церемонијата, Федерер беше прашан дали српскиот тенисер Новак Ѓоковиќ е ГОАТ (најдобриот тенисер на сите времиња). -Тешко е да се одреди. Тоа е дебата во која нема јасен одговор. Еднаш прашав пријател: „Што е потешко, да го освоиш Вимблдон на 17 години како Борис Бекер или да го освоиш Ролан Гарос на 36 години како Новак?“ Не знам“, рече Федерер. Тој накратко го коментираше најголемиот успех на Новак и рекордната 23. Гренд слем титула на Ролан Гарос. „Неверојатно. Она што го постигна е нешто огромно“, изјави Федерер.

Откриена неубавата страна во карактерот на Федерер: Роџер секогаш важеше за вреден тенисер, но…

Ивана Ефремовски — Wed, 15 Feb 2023 15:01:51 +0000

Поранешниот тенисер Марк Росет откри нешто интересно за славниот колега Роџер Федерер. Роџер секогаш важеше за вреден тенисер, но... -Се сеќавам на првиот пат кога тренирав со него. Тој беше нов швајцарски талент, но беше толку мрзлив, рече тој. Продолжи во истиот ритам. -Обично кога сте млади на турнир сте малку под стрес, сакате да играте добро, многу сте нервозни. Момчето излезе на теренот како за ништо да не му е грижа. Роџер секогаш важеше за голем работник и човек кој напорно тренира. Очигледно тоа дојде со возраста.

Федерер: Во мојата кариера дадов и повеќе отколку што можев

Катерина Бојаџиева — Tue, 27 Dec 2022 10:02:45 +0000

Швајцарскиот тенисер Роџер Федерер се осврна на своето неодамнешно пензионирање. -Дефинитивно дадов сè во текот на мојата кариера, па дури и повеќе отколку што можев. Уживав и научив што е напорна работа и посветеност. Не знам уште колку би можел да дадам, би можел да се обидам. Се чувствував како да сум доволно возрасен за да ставам крај на ова и се чувствувам навистина добро поради тоа, рече Федерер на подкаст на „АТП радио“. На 15 септември Федерер објави дека ќе се пензионира. На 24 септември Швајцарецот во пар со Рафаел Надал загуби од Американците Френсис Тиафо и Џек Сок – 4:6, 7:6 (7:2), 11:9. Тоа беше неговиот последен професионален натпревар. Севкупно, Федерер има 103 титули на турнирите под покровителство на АТП. Тој помина рекордни 237 недели по ред на врвот на светската ранг-листа.

Федерер: Засега се плашам да играм други спортови поради моите колена

Ивана Ефремовски — Sun, 20 Nov 2022 12:33:36 +0000

Швајцарскиот тенисер Роџер Федерер раскажа како го поминува времето по завршувањето на кариерата. -Сè уште се плашам да играм други спортови. Со колената сум така-така. Значи, ова треба да се почека. Подоцна ќе можам повеќе да патувам. Планирам времето да го поминувам со семејството повеќе од порано. Ги планираме празниците и сакам тие да бидат забавни и различни. Би сакал да ги однесам децата во Африка. Сакам да патувам и да се релаксирам, бидејќи животот за време на турнирите ми беше многу стресен, изјави Федерер. Швајцарецот заедно со Новак Ѓоковиќ и Рафаел Надал ги одбележаа последните петнаесетина години во светскиот тенис. (МИА)

Во Базел одбиваат да именуваат улица по Роџер Федерер

Дарко Андоновски — Thu, 27 Oct 2022 11:29:25 +0000

Базел, родниот град на 20-кратниот грен слем шампион Роџер Федерер, одби да именува улица по тенисерот, изјави топографот на швајцарскиот град Пол Хафнер за „Ројтерс“. – Политиката на Базел е дека само мртвите луѓе можат да добијат плоштад или улица именувана по нив на овој начин, истакна Хафнер. Во Базел веќе има трамвај кој го носи името на Федерер, а во тек се преговори за изградба на зграда во негова чест. Четириесет и едногодишниот Федерер ја заврши кариерата оваа година откако на крајот на септември играше на Лејвер купот во Лондон. Швајцарецот има 20 победи на Грен слем, 111 победи на АТП турнирите, два олимписки медали – златен во двојки и сребрен во сингл. Беше прв светски рекет 310 недели.

Федерер: Во иднина повеќе играчи ќе освојат пет или повеќе слемови

Ивона Петрова — Tue, 27 Sep 2022 07:09:51 +0000

Дваесеткратниот грен слем шампион Роџер Федерер верува дека во иднина некој тенисер ќе може да го повтори или подобри неговото достигнување на големите турнири. – Сега терените се побавни. Темпото во салите не е исто како порано. Тогаш топката се одбиваше со молскавична брзина – како од дрво. Затоа, верувам дека во иднина многу повеќе тенисери ќе освојат пет или повеќеГрен слема. Сигурен сум дека ќе има тенисери со повеќе од 20 Грен слем титули во следните неколку години. Но, не сакам да издвојам некој конкретно, го цитира Федерер Тенис Мејџорс. Федерер викендот на Лејвер купот го одиграа својот последен меч во богатата кариера и е еден од тројцата (заедно со Новаќ Ѓоковиќ и Рафаел Надал) најдобри тенисери на светот во последните петнаесетина години.

Ѓоковиќ за разделбата со Федерер: Лично најмногу ме трогна моментот кога неговите деца излегоа на теренот и ги видов како плачат

Ивона Петрова — Sun, 25 Sep 2022 08:55:11 +0000

Новак Ѓоковиќ го коментираше збогувањето со Роџер Федерер. Вчера Швајцарецот го одигра последниот натпревар во кариерата. – Мислам дека сите ќе се согласат дека тоа беше еден од најубавите моменти што сме ги доживеале. Сите знаевме дека тоа ќе биде емотивно збогување со Роџер. И на крајот сите подлегнавме на овие емоции. Чувствата беа измешани. Тажно е што еден од најголемите спортисти во историјата заминува. Но, од друга страна, беше одлично да се види дека е среќен. Тоа беше еден од најубавите моменти што сум ги доживеал. Мене лично најмногу ме трогна моментот кога неговите деца излегоа на теренот и ги видов како плачат. Тоа беше прекрасен момент. И беше прекрасно да се видат родителите на Роџер, Мирка, децата и сите кои одиграа толку важна улога во неговата кариера, изјави Ѓоковиќ. На Лејвер купот Ѓоковиќ победи на два меча во еден ден и придонесе за победата на Европа против Светот со 8:4.

Федерер вечерва се збогува со тенисот

Ивона Петрова — Fri, 23 Sep 2022 11:02:16 +0000

Швајцарскиот тенисер Роџер Федерер вечерва на егзибицискиот Лејвер куп во Лондон ќе стави точка на професионалната кариера и својот последен натперавр ќе го одигра во двојки со големиот ривал Рафаел Надал. Федерер и Надал ќе настапат во Тимот на Европа против Тимот на Светот, чија двојка ја сочинуваат американските тенисери Џек Сок и Френсис Тијафо, а дуелот започнува во 21:30 часот. –Не сакав целиот турнир да биде посветен на мене, ниту, пак, премногу да се појавувам. Затоа го прашав тренерот Бјорн Борг дали може да настапам само во двојки во петок вечер. Да го одиграм поседниот натпревар заедно со Рафа за мене апсолутно е остварување на сонот, изјави Федерер. Легендарниот швајцарски тенисер во кариерата освои 103 трофеи, од кои 20 грен – слем титули.

Федерер потврди настап со Надал на збогување со тенисот

Тале Кристо — Thu, 22 Sep 2022 14:24:19 +0000

Еден од најдобрите тенисери на сите времиња Роџер Федерер утре на Лејвер купот ќе го одигра последниот натпревар во својата блескава кариера и тоа во двојки со својот голем ривал Рафаел Надал, соопштија денеска организаторите во Лондон. Федерер и Надал ќе настапат заедно против американските тенисери Џек Сок и Франческо Тиафо со што Швајцарецот ќе стави крај на својата професионална кариера на 41-годишна возраст. Освојувачот на 20 грен – слем титули го замоли селекторот на тимот на Европа, Бјорн Борг, да го пријави за настап само во двојки во дуелот против остатокот на светот. Во тимот на Европа, покрај Федерер и Надал, се и Новак Ѓоковиќ, Стефан Циципас, Енди Мареј и Каспер Руд, додека Матео Беретини има статус на резерва.