рохинџи – Kurir.mk

Во Малезија приведени 269 бегалци Рохинџи

Ивона Петрова — Tue, 09 Jun 2020 10:25:41 +0000

Малезиската крајбрежна стража вчера приведе 53 лица кои се обиделе да допливаат до брегот, а уште 216 лица се приведени од брод, на кој беше пронајдено и безживотно тело. Сите приведени се Рохинџи, но се уште не е познато колку долго биле на море и од каде допатувале. Тие се сместени во привремени притвор, а телото е предадено на полицијата. Стотици илјади етнички муслимани Рохинџи го напуштија Мјанмар поради воените акции и живеат во бегалските кампови во Бангладеш. Малезија, каде мнозинството се муслимани, е вообичаена дестинација за криумчарите кои им ветуваат на бегалците подобар живот во странство. Малезиската Национална работна група соопшти дека до мај притворени се 396 луѓе кои илегално се обиделе да влезат во земјата, заедно со 108 сопственици на чамци и 11 осомничени криумчари. Малезија во април врати брод што превезуваше околу 200 бегалци Рохинџи, во главно деца, поради пандемијата со Ковид-19. Во Малезија има околу два милиона работници мигранти со легален статус и над два милиона со илегален статус, како и околу 180.000 бегалци и азиланти, од кои 101.000 Рохинџи.

Од почетокот на годинава 11.000 Рохинџи протерани од Мјанмар

Ивона Петрова — Thu, 05 Jul 2018 06:17:09 +0000

Обединетите нации проценуваат дека во текот на годинава најмалку 11.000 Рохинџи биле протерани од Мјанмар во Бангладеш. Според високиот комесар за човекови права на ОН, Зеид Раад ал Хусеин, мјанмарската армија продолжува со убиства на припадници на муслиманското малцинство и ги уништува нивните домови. Се проценува дека во бегалските кампови во Бангладеш има над 700.000 Рохинџи, повеќето од нив протерани во втората половина на минатата година, кога по напад на герилска група врз мјанмарската армија отпочна кампања за протерување на Рохинџите. - Ниту еден бегалец не се вратил од Бангладеш во Мјанмар по стапувањето во сила на договорот, изјави Ал Хусеин. Мјанмар и Бангладеш постигнаа договор со кој бегалците Рохинџи требаше да се вратат во своите домови доколку докажат дека навистина потекнуваат од Мјанмар. МИА

Индонезиски рибари спасија 76 Рохинџи

Матеја Петровски — Fri, 20 Apr 2018 13:38:43 +0000

Индонезиски рибари спасија 76 Рохинџи од брод, кој се насукал недалеку од крајбрежјето на провинцијата Ацех, соопшти денеска индонезиската полиција. Засега не се знае колку долго патувале по морето. Неколку дена пред тоа, малезиските власти пресретнаа чамец со 56 лица, за кои се претпоставува дека се Рохинџи. Од минатата година, околу 700.000 Рохинџи, муслимани побегнаа од Мјанмар во соседен Бангладеш. (Миа)