рсбсп – Kurir.mk

Дејан Андоновиќ – портпарол на РСБСП: Сообраќајот се шири многу побрзо отколку свеста за безбедноста (ВИДЕО)

Ивана Ефремовски — Fri, 12 May 2023 10:58:30 +0000

Јавната свест за безбедноста во сообраќајот е на повисоко ниво, но сепак потребно е многу повеќе, порача портпаролот на Републички совет за безбедност во сообраќајот во сообраќајот на патиштата РСБСП, Дејан Андоновиќ, појаснувајќи дека сообраќајот се шири многу побрзо, отколку културата и свеста за последиците од невнимателноста. -Јавната свест за безбедноста во сообраќајот е на повисоко ниво, но сепак потребно е многу повеќе, порача портпаролот на Републички совет за безбедност во сообраќајот на патиштата РСБСП, Дејан Андоновиќ, појаснувајќи дека сообраќајот се шири многу побрзо, отколку културата и свеста за последиците од невнимателноста. Во пресрет на дефилето насловено „Јас внимавам и безбедно возам“ кое ќе се одржува утре со почеток од 11 часот, Андоновиќ во изјава за МИА посочува дека намалениот број на жртви во сообраќајот алудира на тоа дека свеста е се поголема, но оценува дека тоа не е доволно. -Свеста се подига, имаме намалување на бројот на жртви во сообраќајни несреќи, но тоа не е доволно се разбира секој загубен живот е голема загуба за семејството и неговите најблиски така да, на вашето прашање колкава е сообраќајната култура, таа се подига, јавната свест е поголема, но тоа не е доволно, појаснува портпаролот на РСБСП. Додава дека интересот за учество се зголемува, што според него е добар показател, бидејќи ваквите настани ја нагласуваат потребата од почитување на сообраќајните знаци и правила. -Се зголемува интересот, годинава најмалку 100 велосипеди и најмалку 30 мотори ќе учествуваат тоа е најмалку, тоа е појдовна точка, се разбира ќе ни се приклучат и останатите граѓани, бидејќи нема некакви закажувања, туку кој сака ете да искористам да испратам еден апел до граѓаните да дојдат, тие што се со велоиспеди кои сакаат да возат некоја од рутите, вели Андоновиќ. Информира дека РСБСП организира повеќе кампањи во текот на годината, а партнери на утрешната иницијатива се компанијата ОКТА, Министерството за внатрешни работи, Факултетот за безбедност од Скопје и Црвениот крст. Поддршка за настанот даваат и здруженијата на велосипедисти и мотоциклисти „Мото клуб Безбедност“, „Прв до врв“ и „Здружението за друмски и планински велосипедизам“. -Правиме кампањи низ целата година во зависност од календарот на активностите значи имаме летна кампања, зимска кампања доаѓаат сега матурантите ќе имаме кампања за нив и нивните родители да не им ги даваат возилата, истакна тој. Дефилето ќе започне 11 часот со поаѓање на велосипедистите од велосипедската патека на кејот кај хотел Холидеј Ин и на мотоциклистите во 11:30 часот од фонтаната „Лотусов цвет“ во Градскиот парк . Двете групи ќе се сретнат на платото пред Спортскиот центар „Јане Сандански“. -Во 12 часот ќе биде централната своевидна прослава на дефилето таму ќе се обрати министерот за внатрешни работи и претседателот на Републичкиот совет за безбедност во сообраќајот на патиштата. Крајната цел е заеднички да упатиме порака граѓаните да ги потсетиме да возат безбедно, да ги почитуваат правилата и прописите пропишаната сообраќајна сигнализација, но и да имаат сообраќајна култура, бидејќи кога сето ова ќе го имаме ќе имаме и нула жртви во сообраќајот, порачува Андоновиќ. На глобално ниво, сообраќајните несреќи се водечка причина за смрт кај младите луѓе и главна причина за смрт кај оние на возраст од 15 до 29 години. Како што е наведено на официјалниот сајт на Светската здравствена организација, приближно 1,3 милиони луѓе годишно умираат на патиштата во светот, а меѓу 20 и 50 милиони се здобиваат со нефатални повреди. Извештајот за глобалниот статус за безбедноста на патиштата е широка проценка на состојбата со безбедноста на патиштата во 178 земји, а резултатите покажуваат дека повредите во сообраќајот на патиштата остануваат важен јавно здравствен проблем, особено за земјите со низок и среден приход. -Пешаците, велосипедистите и мотоциклистите сочинуваат речиси половина од загинатите на патиштата, што ја нагласува потребата на овие учесници во сообраќајот да им се посвети поголемо внимание во програмите за безбедност на патиштата. Резултатите сугерираат дека во многу земји законите за безбедност на патиштата треба да се направат посеопфатни додека спроведувањето треба да се зајакне, се наведува во препораката од СЗО – изјави Андоновиќ.

„ЈАС ВНИМАВАМ И БЕЗБЕДНО ВОЗАМ“ – дефиле на велосипедисти и мотоциклисти за поголема безбедност во сообраќајот

Ивана Ефремовски — Mon, 08 May 2023 12:33:35 +0000

Со цел подигнување на свеста за поголема безбедност на велосипедистите и мотоциклистите во сообраќајот, на 13 мај 2023 година ќе се одржи дефиле на кое ќе учествуваат преку 100 велосипедисти и над 30 мотоциклисти. Дефилето ќе започне во 11.00 часот со поаѓањето на велосипедистите од платото под мостот „Близнак“, на кејот на реката Вардар во населбата Аеродром, а мотоциклистите ќе стартуваат од фонтаната во Градскиот парк во 11.30 часот и двете групи ќе се сретнат на плоштадот „Македонија“. Сите кои сакаат да дадат личен придонес за подигнување на свеста за безбедност на велосипедистите и мотоциклистите во сообраќајот, можат да се приклучат на ова свечено дефиле со велосипед или мотоцикл. Дефилето кое ќе се одржи под мотото „ЈАС ВНИМАВАМ И БЕЗБЕДНО ВОЗАМ“ е во организација на Републичкиот совет за безбедност на сообраќајот на патиштата, а партнери се компанијата ОКТА, Министерството за внатрешни работи, Факултетот за безбедност од Скопје и Црвениот крст. Поддршка за настанот даваат и здруженијата на велосипедисти и мотоциклисти „Мото клуб Безбедност“, „Прв до врв“ и „Здружението за друмски и планински велосипедизам“. Целта на дефилето е зголемување на сообраќајната култура на велосипедистите и мотоциклистите и подигање на свеста за користење на заштитна опрема при вклучување во сообраќајот. На учесниците кои први ќе пристигнат на почетните позиции, ќе им бидат доделени стартни пакети од страна на РСБСП. Како дополнителна поддршка на настанот, а во рамки на својата кампања за подигнување на свеста за безбедност во сообраќајот „ЈАС ВНИМАВАМ“, компанијата ОКТА ќе обезбеди велосипедски ѕвончиња, безбедносни велосипедски светла и заштитни кациги за учесниците во дефилето.

РСБСП: Користете сигурносни појаси

Катерина Бојаџиева — Tue, 21 Mar 2023 08:58:19 +0000

Сигурносниот појас е склоп од ремени со сигурносно копче, уред за приспособување и приклучоци кои што можат да се врзат во возило на моторен погон и е проектиран да го намали ризикот од повреди на лицето што го носи во случај на судир или на ненадејно забавување, со ограничување на подвижноста на телото на лицето кое го носи. Не само возачот, туку и секој патник во возилото треба да користи сигурносен појас. Придобивки од користењето на сигурносен појас се: • овозможува заштита при нагло запирање на возилото или во случај на сообраќајна незгода, • ја намалува веројатноста за смрт или сериозна повреда при сообраќајна незгода, • спречува исфрлање на патниците од возилото во случај на сообраќајна незгода или превртување на возилото, • комбинираното делување на сигурносниот појас и воздушното перниче ја зголемува безбедноста на патниците. Сигурносните појаси се сметаат за ефективни доколку се правилно прицврстени во возилото и доколку правилно се користат. Затоа РСБСП препорачува: • возачот, веднаш штом седне во возилото, да го стави сигурносниот појас, • возачот да им укаже на сите патници во возилото да ги користат сигурносните појаси на секое седиште каде што се вградени, • возачот да не започне со возење доколку патниците не ги стават заштитните појаси, • сигурносниот појас секогаш да биде регулиран на соодветна висина, да се постави така што дијагоналниот ремен да не го допира вратот и правилно да преминува преку рамото, • секогаш да се користи сигурносен појас, без оглед дали возилото е опремено со воздушни перничиња. РСБСП апелира: Возачот штом ќе седне во возилото да го стави сигурносниот појас. Ништо не е поважно од безбедноста! Затоа и на возачите и на патниците им препорачуваме да користат сигурносен појас и да придонесат за поголема безбедност во сообраќајот! ВОЗИ ОДГОВОРНО! СТАВИ ПОЈАС!

„НЕ УПРАВУВАЈТЕ ВОЗИЛО ПОД ДЕЈСТВО НА АЛКОХОЛ“!

Ивана Ефремовски — Wed, 28 Dec 2022 08:38:52 +0000

РСБСП со апел до граѓаните пред новогодишните празници. -Бидете внимателни за време на Новогодишните празници. -Почитувајте ги правилата и прописите во сообраќајот. -Не управувајте возило под дејство на алкохол! -ВОЗЕТЕ ОДГОВОРНО И ПАТУВАЈТЕ БЕЗБЕДНО! „Возењето под дејство на алкохол е опасно и може да предизвика материјална штета, но и повреди и загуба на човечки животи. Не дозволувајте непромислена грешка во сообраќајот да го наруши вашето и спокојството на другите. Уживајте во празничното расположение, прославувајте одговорно и возете безбедно. СРЕЌНИ, ВЕСЕЛИ И БЕЗБЕДНИ ПРАЗНИЦИ“ - апелираат од РСБСП.

НЕ КОРИСТИ МОБИЛЕН ТЕЛЕФОН ДОДЕКА ВОЗИШ: Секој повик може да почека!

Катерина Бојаџиева — Mon, 28 Nov 2022 09:13:26 +0000

Многумина не можат да го замислат своето секојдневие без употреба на мобилен телефон, најчесто заради олеснета комуникација, функционалност, поефективно извршување на работните обврски и слично. И навистина, никој не може да ја оспори потребата од користење мобилен телефон. Но, развојот на технологијата и зголемувањето на нејзината достапност за употреба на секое место и во секоја ситуација, не значи дека имате право да го правите тоа секогаш и секаде. Во многу ситуации користењето на мобилен телефон е ризично и опасно, особено кога возите, но и кога пешачите. Во сообраќајот, мобилниот телефон како причина за одвлечено внимание на возачот се јавува во 20 до 25% од сите сообраќајни незгоди. Со развојот на технологијата, во наредните години се очекува оваа состојба дополнително да се влошува. Одвлеченото внимание е причина за голем број загинати и повредени лица во сообраќајни незгоди, за многу несреќни животни приказни испишани на патиштата и на улиците, за тажни човечки судбини. Оттука и прашањето: Вреди ли? Статистиката на светско ниво покажува дека 45% од возачите го користат мобилниот телефон додека возат, а според истражувањата на РСБСП во Република Северна Македонија 63% од возачите користеле мобилен телефон додека возат. Универзитетска студија во САД, проценува дека употребата на мобилни телефони за време на возењето резултира со околу 2.600 смртни случаи и 330.000 сериозни повреди годишно, а пак истражувањата на СЗО покажуваат дека употребата на мобилен телефон ја зголемува опасноста од сообраќајна незгода за 4 до 9 пати. Се поставуваат прашањата: • Колку важен разговор не може да „почека“ да застанете на првото безбедно место на кое може да се запре возилото и да разговарате? • Дали бегајќи од метежот, гужвата и опкружувањето со секакви луѓе, свесно ги оставате телефонските разговори за моментите кога ќе бидете сами зад воланот? • Дали сте свесни за ризикот и опасноста на која ги изложувате вашиот и животите на вашите најблиски и на другите учесници во сообраќајот, со тоа што не можете да се воздржите од користење на мобилниот телефон кога сте зад воланот? • Дали знаете дека пишувањето порака додека возите е еднакво на возење со затворени очи цели 6 секунди за кои возило со брзина од 60 km/h поминува 100 метри? КОРИСТЕЊЕТО НА МОБИЛЕН ТЕЛЕФОН ДОДЕКА ВОЗИТЕ Е ОПАСНО И РИЗИЧНО! Употребата на мобилен телефон додека се управува со моторно возило е ризично, опасно, но и спротивно на Законот за безбедност на сообраќајот на патиштата. Возач кој зборува или пишува на мобилен телефон додека вози, се санкционира со 40 евра во денарска противвредност. Но, и покрај тоа, голем број возачи користат мобилен телефон додека управуваат возило и на тој начин го прекршуваат Законот и ја загрозуваат безбедноста во сообраќајот. Не постои разговор на мобилниот телефон чија важност може да се спореди со пристигнувањето на посакуваната дестинација безбедно и со добро здравје. Затоа, не користи мобилен телефон додека возиш! Секој повик може да почека! РСБСП апелира: Кога возите оставете го мобилниот телефон настрана. Животот, здравјето и безбедноста нека ви бидат секогаш на прво место.

ВОЗЕТЕ ОДГОВОРНО: Минатата година 116 лица го загубија животот во сообраќајни несреќи во Македонија

Ивана Ефремовски — Sun, 20 Nov 2022 09:06:18 +0000

Секоја година, третата недела од ноември, се одбележува Светскиот ден на сеќавање на жртвите од сообраќајни незгоди. Овој ден е посветен на милионите загинати или повредени во сообраќајни несреќи на светските патишта и на членовите на нивните семејства, како и на сите оние кои се соочуваат со физички или психички последици од сообраќајни незгоди. Овој ден се одбележува од 1993 год., а во 2005 година ООН го прогласи за светски ден кој се одбележува секогаш во недела во третата седмица од месецот ноември. Многу релевантни институции и организации од целиот свет работат напорно на подигнување на свеста кај учесниците во сообраќајот за последиците од сообраќајните незгоди со цел да се намали бројот на загинати и повредени. Во Република Македонија, минатата година, 116 лица го загубија животот во сообраќајни незгоди. Жртвите и повредите на патиштата се ненадејни и трауматски настани чие влијание е долготрајно. Годишно, во светот, околу 1,3 милиони луѓе го губат животот во сообраќајни незгоди, а околу 50 милиони лица се здобиваат со повреди. Покрај ова, последиците од ваквите незгоди дополнително директно влијаат врз животите на уште најмалку четворица од околината на секоја жртва во сообраќајна незгода. Оттаму, овој ден има за цел да ја потсети јавноста на лицата кои настрадале во сообраќајни незгоди, да им се даде помен на истите, но и да се допре до свеста на сите учесници во сообраќајот со цел тие да размислат за сопствената одговорност, како и за последиците од сообраќајните незгоди. Затоа РСБСП упатува апел: „Да ја поттикнеме свеста на учесниците во сообраќајот за почитување на правилата и прописите во сообраќајот, а со тоа и за намалување на сообраќајните незгоди, со што ќе се намали и бројот на загинати и повредени лица! СТОП ЗА СМРТТА НА ПАТИШТАТА!“

РСБСП: Подгответе се за безбедно возење во зимски услови

Ивона Петрова — Tue, 15 Nov 2022 09:54:14 +0000

Републичкиот совет за безбедност на сообраќајот на патиштата ги потсетува возачите на обврската да се носи зимска опрема во периодот од 15 ноември до 15 март следната година и апелираат да бидат внимателни, да се придржуваат до советите за управување со возилото во зимски услови, да ги следат информациите за временските услови на патиштата, како и патната сигнализација заради осигурување на поголема безбедност во сообраќајот. -Овој период од годината се карактеризира со влажни коловози и намалени температури на воздухот, што неповолно влијае на безбедното одвивање на сообраќајот. Ова може да резултира со намалена видливост, продолжување на сопирачкиот пат на возилото, деконцентрација на возачите и слично. Истражувањата покажуваат дека ефектите од лошите временски услови врз видливоста може да го зголемат времето на реакција на возачите за 13 до 75 проценти, зголемувајќи ја веројатноста за сообраќајна несреќа. Утврдено е дека густата магла предизвикува најголеми проблеми при што на возачите им треба 75 отсто повеќе време за да забележат опасност, како и дека обилниот дожд ги забавува реакциите на возачите за 30 проценти, а снегот за 34 проценти, велат од РСБСП. Покрај задолжителната зимска опрема, потребно е да се направи и зимска проверка на возилото односно да направат проверка на антифризот, на маслото во моторот, на течноста за бришачите на ветробранското стакло, на акумулаторот и притисокот на пневматиците, како и да обезбедат течност или спреј за одмрзнување на стакло, брави итн. Од РСБСП советуваат брзината да се прилагоди според условите на патот, да се почитува растојанието меѓу возилата, да се избегнува нагло сопирање на возилото, а да се избегнува и нагло намалување или зголемување на брзината на возилото. -Почитувањето на овие совети, како и на законската обврска за носење на зимска опрема и проверка на возилото, придонесуваат за побезбедно учество во сообраќајот при неповолните временски услови во овој период и за намалување на бројот на сообраќајни незгоди, велат од Советот и апалираат возачите да внимаваат на влажните коловози.

Европска недела на мобилност: Возете велосипед! Бидете внимателни и одговорни велосипедисти!

Дарко Андоновски — Fri, 16 Sep 2022 08:23:14 +0000

Републичкиот совет за безбедност на сообраќајот на патиштата (РСБСП) со повеќе активности се приклучува во кампањата „Европска недела на мобилност“, која Европската комисија веќе две децении ја спроведува секоја година во третата седмица од септември. Целта на кампањата е формирање на здрави животни навики, чиста животна средина, побезбеден сообраќај и поддршка на алтернативни форми на мобилност затоа што возењето велосипед е здрава навика која позитивно влијае на здравјето на луѓето, ја заштитува околината и ја намалува емисијата на гасови. Секојдневно користење на велосипед е неспоредливо поевтин начин на урбана мобилност од кое било друго превозно средство со бесплатно место за паркирање, велосипедот претставува доминантно превозно средство на кратко растојание до 5 километри во урбана средина од аспект на побрзо и побезбедно пристигнување до целта, а секој велосипед повеќе значи моторно возило помалку, што значи и намалување на сообраќајниот метеж и побезбеден сообраќај, велат од РСБСП. Велосипедскиот сообраќај се промовира бидејќи е еколошки најодржлива форма на сообраќај, троши малку енергија, не бара многу простор за движење и за паркирање, зашто е најевтин начин на урбана мобилност и придонесува за унапредување на здравјето. Освен пешачењето, велосипедот е средство за транспорт со кое може директно да се пристапи до целта на патувањето, има мала потрошувачка на енергија, не загадува, придонесува за одржување на здравјето на луѓето, овозможува заштеда на простор (велосипедот бара релативно малку простор за движење и мирување) Велосипедот е рамноправно превозно средство во сообраќајот на патиштата. Велосипедистите треба да се движат по означени велосипедски патеки, а каде што нема такви треба да се движат од десната страна, покрај работ, на коловозот. РСБСП укажува на здравствените, еколошките, економските, социјалните и други придобивки од возењето велосипед и апелира: „Возете велосипед! Бидете внимателни и одговорни велосипедисти!“

Совети од РСБСП за безбедно лето 2022

Магдалена Андонова — Wed, 10 Aug 2022 08:19:24 +0000

Републичкиот совет за безбедност на сообраќајот на патиштата во рамки на летната кампања „За безбедно лето 2022“, до возачите упатува апел за безбедно учество во сообраќајот и советува: - почитувајте ги правилата и прописите во сообраќајот, - возете со пропишаната брзина и не престигнувајте непрописно други учесници во сообраќајот, - правете почести паузи, - за време на паузите излезете од возилото, раздвижете се, напијте се кафе, вода или безалкохолни пијалоци, - ако се чувствувате уморни застанете и ако имате потреба од поголем одмор без разлика кое време од денот е - отспијте одреден временски период за да можете потоа безбедно да го продолжите патувањето, - бидете информирани за временската прогноза, - бидете особено внимателни кога температурите се над 30о С, - погрижете се разликата во температурите во моторното возило и во надворешни услови да не биде поголема од 7 степени за да нема несакани последици по здравјето при излегувањето од моторното возило, - доколку ви сметаат сончевите зраци кои често ги изморуваат очите, користете очила за сонце, - бидете особено внимателни доколку возите за време на викенд кога е зголемена густината на сообраќајот, како и кога возите ноќе кога е намалена видливоста на патиштата, - препорачуваме мобилниот телефон да се користи за време на паузите, а не додека го управувате моторното возило, - користете сигурносен појас, - ако патувате на подолги релации и преминувате граничните премини, без оглед на тоа колку време сте чекале, не ја зголемувајте брзината над препорачаната, возете одморени и прават соодветни паузи со це да стигнете безбедно на посакуваната дестинација.

РСБСП со апел: Возачите да не возат кога се уморни и под дејство на алкохол

Ивона Петрова — Tue, 26 Jul 2022 08:28:21 +0000

Републичкиот совет за безбедност на сообраќајот на патиштата (РСБСП) преку соопштение апелира сите учесници во сообраќајот да ги почитуваат правилата и прописите, возачите да не возат кога се уморни, да не возат кога се под дејство на алкохол и да не ја пречекоруваат препорачаната брзина. Возачите кога се упатуваат на подолги патувања, како што се посочува, треба да ја проверат техничката исправност на возилото, да го планираат времето за патување, да прават почести паузи за одмор надвор од моторното возило и да консумираат повеќе безалкохолни пијалоци. Во рамки на кампањата „Безбедно лето 2022“ се реализираат летна кампања под мотото „Вози одморен“ и кампања „Носи кацига“ наменета за возачите на мотоцикли, велосипеди и електрични тротинети, со цел подобрување на безбедноста на сообраќајот на патиштата, и кај македонските и кај странските учесници во сообраќајот, преку едукација и подигање на свеста кај возачите за почитување на сообраќајните правила и прописи, со акцент на подигањето на свеста за влијанието на високите летни температури, заморот, неприлагодената брзина и конзумирањето алкохол врз способноста за управување со моторно возило. Возете одморени, возете безбедно, додаваат од РСБСП.