Румен Радев – Kurir.mk

Радев: Овие европски, а не бугарски барања јасно кажуваат дека РСМ мора да го измени својот Устав

Ристе Здравков — Wed, 13 Sep 2023 08:44:20 +0000

Бугарскиот претседател Румен Радев на прашање за европската перспектива на Македонија, во интервју за грчката агенција АНА-МПА вели дека решението за проблемите во односите со РС Македонија лежи во имплементацијата на Копенхашките критериуми за членство и во почитувањето на човековите права. Според него, повеќе не треба да се зборува за „бугарско вето“, бидејќи има јасен заклучок на Европскиот совет од јули годинава и договорена преговарачка рамка. „Овие европски, а не бугарски барања јасно кажуваат дека РСМ мора да го измени својот Устав за да им даде можност на Бугарите да имаат уставна заштита и еднакви права со тоа што ќе бидат вклучени во уставот на еднаква основа со другите државотворни нации во оваа земја“, вели Радев. Тој повика на искоренување на јазикот на омразата и насилството врз Бугарите кои живеат во Македонија, како и на „почитување и заштита на бугарското културно и историско наследство“. Изрази и надеж дека што поскоро државниот врв „ќе ги прифати европските принципи и вредности за подобра иднина на граѓаните на РСМ, како и за создавање подобра перспектива за сите на Балканот“.

Радев со честитка до Пендаровски, а со провокација за Македонците: На Илинден зборува за заедничкото историско и културно минато

Ивана Ефремовски — Wed, 02 Aug 2023 15:03:16 +0000

Претседателот на Бугарија, Румен Радев упатил честитка до македонскиот претседател Стево Пендаровски по повод државниот празник Илинден - Ден на Републиката, информираат од неговиот кабинет, а информацијата ја пренесоа бугарските медиуми. Во честитката бугарскиот претседател посочува дека оваа година се навршуваат 120 години од Илинденско-преображенското востание - „голем и значаен настан од заедничкото историско и културно минато на Бугарија и Република Северна Македонија“. -Целта и саможртвата на хероите на востанието е еден од мостовите низ времето кој ги поврзува двете држави и нивните граѓани, посочува Радев во текстот. „Одразот на идеалите за слобода, еднаквост и братство на нашите предци денеска ги препознаваме во фундаменталните права на Европската Унија, кон која искрено посакуваме да се приклучите. Убеден сум дека заедно можеме и треба да ги решиме отворените прашања во билатералните односи што го очекуваат нашите граѓани и е заради нашата заедничка иднина во Европа, пишува Радев во честитката. Во текстот тој посочува дека постигнатите договори меѓу двете земји за заедничко одбележување на празниците од заедничката историја претставуваат одлична можност за зближување.

ВИДЕО: Вака се брани држава, Зеленски распали по Румен Радев во Софија

Ристе Здравков — Thu, 06 Jul 2023 16:06:22 +0000

Не дај боже да ви дојде војна, па да нема кој да ви помогне, му одговори Зеленски на Радев, кој го одби за муниција. На денешната заедничка пресконференција при посетата на Зеленски во Софија беше потпишана декларација за воена поддршка од Бугарија за Украина. Но, Радев вели дека нема да се користат резервите на бугарската армија: – Оваа декларација е важен чекор во развојот на нашите односи, но јас не прифаќам предавање муниција, особено од резервите на бугарската армија. Јас како претседател, како и вие, имам заложба дека одбранбените капацитети на Бугарија не треба да се намалуваат бидејќи безбедносното опкружување е алармантно и во нашиот регион, за сите нас е уште посериозно што конфликтот се шири и добива нови димензии – истакна и Радев и додаде дека непријателствата стануваат сè пожестоки, а сè повеќе луѓе умираат, вклучително и Бугари од заедницата во Украина. Зеленски одговори: – Господинот претседател рече дека не поддржува да ни се даде муниција за да не ослабне вашата армија или да не го поддржувате зајакнувањето на Украина. Вашата армија, што и да имате, нема да биде доволна да се борите ако Русија дојде овде… Ваше право е да не поддржувате помош за Украина. Добро е да им давате на луѓето за да се бранат да не ви дојде војната. Не дај боже да стане трагедија и да ви дојде војната, што ќе правите тогаш ако никој не ви помогне? Украинскиот претседател реагираше и на тоа што Радев за војната во Украина го искористи зборот конфликт. – Ова не е конфликт, туку војна, војна за уништување на Украина, да се убиваат Украинци, а не други земји и фала му на бога – рече Зеленски.

Врела „ШЛАКАНИЦА“ од Зеленски за Румен Радев: Не дај Боже да стане трагедија и да ви дојде војната, што ќе правите тогаш ако никој не ви помогне?

Ристе Здравков — Thu, 06 Jul 2023 14:06:10 +0000

Бугарскиот претседател Румен Радев му кажа на својот украински колега Володимир Зеленски кој е во посета на Софија дека во првите часови ја осудил руската агресија во Украина. „Сакам да ја изразам нашата солидарност со народот на Украина и со жртвите на оваа сурова војна, која сè уште беснее во моментот. Во првите месеци Бугарија им подаде рака на илјадници граѓани на Украина, а многу од нив продолжуваат да бидат под заштита на бугарската држава.“ рече шефот на бугарската држава. Тој ја истакна и декларацијата за воена поддршка од Бугарија за Украина, потпишана денеска. „Оваа декларација е важен чекор во развојот на нашите односи, но јас не прифаќам предавање на муниција, особено од резервите на бугарската армија. Јас како претседател, како и вие, имам заложба дека одбранбените капацитети на Бугарија не треба да се намалуваат, бидејќи безбедносното опкружување е алармантно и во нашиот регион, за сите нас е уште посериозно што конфликтот се шири и добива нови димензии“, истакна и Радев и додаде дека непријателствата стануваат се пожестоки, а се повеќе луѓе умираат, вклучително и Бугари од заедницата во Украина. „Овој конфликт нема воено решение и се повеќе оружје тешко води до ова мирно решение, кое не се постигнува. Во овој поглед, важно е да се обрне внимание на конзистентните напори за деескалација и барање мирни решенија. со дипломатски средства, многу се надевам дека побрзо ќе видиме мирно решение, се надевам дека тоа ќе се случи во светло на длабоките културни врски меѓу нашите народи“, истакна Ремен Радев, пренесе бнр.бг. Тој ја отвори иницијативата на претседателот Зеленски за „Формула за мир“, која е во 10 точки. Украинскиот претседател, пак, уште еднаш се заблагодари за поканата да ја посети Бугарија и за поддршката што Бугарија им ја дава на илјадниците украински бегалци, кои побараа поддршка и засолниште во Бугарија. „Ова не е конфликт, туку војна, војна за уништување на Украина, да се убиваат Украинци, а не други земји и фала му на Бога“, истакна тој. „Ако ова е конфликт, тогаш земјата нема да ја остават милиони луѓе. Ние мора да ги поставиме точките, инаку некој друг ќе ги постави. Ние го имаме ова право бидејќи војната е на наша територија, така што знаеме дека ова е војна, а не конфликт“, изјави украинскиот претседател Володимир Зеленски. „Господинот претседател рече дека не поддржува да ни се даде муниција за да не ослабне вашата армија или да не го поддржувате зајакнувањето на Украина. Вашата армија, што и да имате, нема да биде доволна да се борите ако Русија дојде овде … Ваше право е да не поддржувате помош за Украина. Добро е да им давате на луѓето за да се бранат да не ви дојде војната. Не дај Боже да стане трагедија и да ви дојде војната, што ќе правите тогаш ако никој не ви помогне?“, го праша Румен Радев. Володимир Зеленски изрази уверување дека неговата земја ќе стане членка на ЕУ: „Украина и Европа имаат заеднички вредности. Русија сака да ги уништи НАТО, ЕУ, Европа. Ова се нивните цели. Дали разбирате? Ова не е конфликт, Господине претседателе! Путин не води само војна против нас, Русија сака да не уништи, а ние само сакаме да живееме“.

Радев: Бугарија не поставува нови услови за С. Македонија, туку инсистира да се исполнат обврските

Ристе Здравков — Fri, 30 Jun 2023 08:33:18 +0000

„Бугарија не поставува нови услови за европската интеграција на Република Северна Македонија, но инсистира на исполнување на веќе преземените обврски од неа во преговарачката рамка усвоена минатата година“. Ова го истакнал претседателот на нашиот источен сосед, Румен Радев на синоќешната промоција на книгата „Борбата на македонските Бугари за права и самостојност. 68 случаи од периодот 1944-1994 година“. Според бугарските медиуми, вака тој одговори на пораките кои доаѓаат од Скопје дека вклучувањето на Бугарите во Уставот е последниот бугарски услов. Потсетил дека сите услови биле ставени во преговарачката рамка што минатата година ја усвои Советот, а која укажа на промени во учебниците по историја, суспендирање на говорот на омраза и заедничките прослави. -Ако ја погледнеме модерната историја, по 1989 година, големата грешка на Бугарија е што не го покрена прашањето за Бугарите во Македонија, нивната состојба и права, рекол претседателот. Според Радев, тогаш Бугарите во земјава не постоеле во агендата на бугарската надворешна политика. -Ако ги погледнеме документите, ги нема во Декларацијата за добрососедство и пријателство од 1999 година, ги нема во Договорот за добрососедство, пријателство и соработка од 2017 година, ги нема во Националната рамковна позиција од 2019 година. Бугарија наметна сосема оправдано вето за почеток на преговорите за членство на крајот на 2020 година, Бугарите во Република Северна Македонија (РСМ) и нивните права исто така не беа дел од причините, изјавил шефот на бугарската држава. Тој додал дека, во исто време, расте притисокот врз Бугарија да ги отвори вратите за почеток на преговорите. -Речиси секој ден имав повици од европски лидери, од лидери на европски институции, од државници преку океанот да ги отворам вратите и да го укинеме ветото што е можно поскоро, информирал Радев.

Радев: Новата Влада ја турка Бугарија поблиску до војната

Тале Кристо — Fri, 23 Jun 2023 07:11:34 +0000

Претседателот на Бугарија, Румен Радев пред денешната посета на Австрија се осврна на несогласувањата со извршната власт, истакнувајќи дека новата Влада ја турка земјата поблиску до војната. - Не сметам дека е соодветно политичарите со скромна изборна поддршка да зборуваат и да преземаат толку тешки обврски во име на Бугарија. Некои политичари на оваа војна гледаат како да се во театар и удобно се сместиле во публиката и се во заблуда дека ќе останат само гледачи. Во интерес на цела Европа е веднаш да ги прекине непријателствата и да ги бара сите можни начини за обновување на дијалогот и мировните преговори, наместо да се поттикнува конфликтот со ново оружје, истакна Радев. Тој пред три дена изјави дека би било грешка Бугарија да се приклучи на договорот за обезбедување ракети на Украина. Во мај, земјите од ЕУ го финализираа договорот за испраќање на Киев еден милион гранати од 155 милиметри, како и проектили, до крајот на март следната година. Радев денеска ги повика новата влада и Министерството за одбрана да се грижат „повеќе за бугарската армија, а не за странските“ вооружени сили. На Самитот на НАТО во Вилнус, Радев требаше да ја предводи бугарската делегација, но Владата пред два дена одлучи делегацијата да биде предводена од премиерот. - Надворешната политика е заедничка одговорност на институциите и едностраното наметнување на ставовите на извршната власт не води до одржливо решение, изјави Радев коментирајќи ја одлуката премиерот Николај Денков да ја предводи бугарската делегација на Самитот на НАТО. Тој додаде дека и според Законот за одбрана и вооружени сили, како и според Уставот претседателот е врховен командант и во време на војна и во мир.

Радев: Уставот е темелот на државното уредување и со неговата измена треба исклучително внимателно да се пристапува

Катерина Бојаџиева — Tue, 20 Jun 2023 09:50:53 +0000

Уставот е темелот на државното уредување и општествените односи, а интервенцијата во овој темел и неговата промена мора да се направат крајно внимателно, за да се гарантира одржливост на општествено-политичките процеси, изјави денеска бугарскиот претседател Румен Радев по отворањето на тридневниот форум „Зелена недела 2023“, посветен на зелената транзиција во земјите од Централна и Источна Европа и енергетското поврзување, зеленото финансирање и иновациите. -Многу се надевам дека Уставот нема да се искористи како параван за да се сокријат интимните сцени меѓу некои партии во Собранието од погледот на нашата јавност. Или како огномет да го одвлече вниманието од важните проблеми на општеството, кои не се во фокусот, или да биде лек за нашиот правосуден систем веќе преземен од лични партиски интереси, додаде шефот на бугарската држава. Според него, многу е чудно како парламент, растргнат од противречности, со ниска јавна доверба и многу низок легитимитет, ќе работи на овие уставни измени.

Се подготвува ли импичмент за бугарскиот претседател Радев?

Тале Кристо — Sun, 11 Jun 2023 07:25:24 +0000

По формирањето нова влада во Бугарија, засилено се шпекулира и со можноста за отповикување на претседателот Румен Радев. Таквата можност ја анализира весникот „Франкфуртер алгемајне цајтунг“. Новата бугарска влада би можела да отпочне постапка за отповикување на претседателот Румен Радев поради запрената испорака на оружје за Украина, пишува весникот Франкфуртер алгемајне цајтунг. Неопходното двотретинско мнозинство во парламентот за тој потег веќе постои, а потоа во рок од еден месец ќе треба да се изјасни и Уставниот суд на Бугарија. Доколку Судот пресуди дека претседателот го прекршил Уставот или извршил велепредавство, тој ќе биде отповикан. Иницијативата доаѓа од поранешниот шеф на бугарската тајна служба Атанас Атанасов, кој предводи една мала прозападна партија во новата владина коалиција. Тој укажува на заклучок на парламентот од ноември 2022 година, во кој, со големо мнозинство, беше одобрена испорака на оружје за Украина. Но, одлуката имаше една специфика: парламентарното мнозинство кое ја донесе одлуката, не беше владино мнозинство. Во моментот на гласањето немаше избрана мнозинска влада, туку техничка, која ја именуваше претседателот Румен Радев. Тој е поранешен воен пилот од времето на Варшавскиот пакт, кој со својата реторика, меѓу другото и во спорот со Северна Македонија, постојано покажува колку времето на Советскиот Сојуз и бугарскиот комунизам го обликувале неговото размислување. Радев одлучно се изјаснува против воена помош за Украина. Проблеми за путинофилите Атанас Атанасов сега наведува, доколку се докаже, дека претседателот ѝ наредил на техничката влада да не ѝ ја испорачува воената помош на Украина, а со тоа се ставил над парламентот, што е повод за отповикување. Во таа насока, прво треба да се формира парламентарна истражна комисија која треба да провери дали биле спроведени одлуките на парламентот. Иако останува отворено дали ќе дојде до отповикување на Претседателот, самата дебата на таа тема покажува дека на поддржувачите на Путин и другите пријатели на Кремљ нема да им биде лесно во Бугарија во претстојниот период. Двете најголеми партии, ГЕРБ и Промената продолжува на поранешните премиер Бојко Борисов и Кирил Петков, отворено се залагаат за испорака на оружје за Украина. Путинофилијата не е исчезната од бугарската политичка сцена, но партиите кои ја поддржуваат Русија сега се во опозиција. Колку ќе опстане владата? За Украина тоа не е споредно прашање. Бугарија е мала земја, но фабриките за муниција во земјата се многу важни. Во времето на Варшавскиот пакт, производството на оружје во Бугарија беше меѓу водечките во т. н. Источен блок. Фактот што сѐ уште се произведува муниција од советски тип е особено интересно за украинската армија. Тоа го знае и Москва, на која може да ѝ се припишат повеќе напади и пожари врз производството последниве години. Повеќе бугарски фабрики за оружје уште во 2022 година го зголемија производството и вработија дополнителен персонал. Тоа што претседателот Радев го критикуваше формирањето на новата влада и сакаше тоа да го спречи, не изненадува никого со оглед на позадината. Единственото прашање е колку ќе опстане коалицијата. Затоа што меѓу партиите на Борисов и Петков, иако на иста надворешнополитичка линија, сепак постои длабок раздор на внатрешнополитички план. Локалните избори наесен, кога ќе се борат едни против други за власта на локално ниво, ќе биде првата голема проба за коалицијата. (Дојче веле)

Бугарија има двотретинско мнозинство за смена на Румен Радев

Ристе Здравков — Thu, 08 Jun 2023 13:45:17 +0000

Двотретинско мнозинство за импичмент врз актуелниот бугарски претседател во Бугарија веќе постои, а оваа иницијатива потекнува од поранешниот шеф на бугарската тајна служба Атанас Атанасов, пренесува ДојчеВеле. Според информациите кои ги објави „Франкфуртер алгемајне цајтунг“ постапката би можела да биде покрената поради фактот што претседателот Румен Радев ја запре испораката на оружје за Украина која беше одобрена лани во ноември. Прашањето дали оваа одлука може биде спорна лежи во фактот дека испораката на оружје била изгласана со мнозинство, но во време кога Бугарија имаше техничка, а не стандардна влада. Радев бил воен пилот во времето на Варшавскиот пакт и според некои аналитичари е под влијание на размислувањата од времето на комунизмот во Бугарија. Како аргумент за тоа се наведува дека тој повеќе пати досега се изјасни против воената помош за Украина.

Бугарија: Како Радев завладea со секторот „Безбедност“?

Ивана Ефремовски — Wed, 31 May 2023 08:04:25 +0000

(Анализа на Емилија Милчева за Дојче веле на бугарски јазик) Можно ли е влада избрана од парламентот во уставно парламентарна земја да ги задржи на своите позиции шефовите на специјалните служби назначени од еден човек? Со оглед на нестабилната бугарска демократија и војната во Украина која ја шири нестабилноста низ светот, тоа би било еднакво на политичко самоубиство. Поранешниот премиер Иван Костов предупреди дека овие служби се опасни бидејќи немаат врска со повеќепартискиот политички систем. Затоа нивната смена е меѓу темите за кои се разговараше на четири и полчасовниот состанок на Националниот совет на „Продолжуваме со променита“ (ПП) – во контекст на оддалечувањето на Бугарија од ЕУ и НАТО и опасноста од про-руските сили во бугарскиот парламент во наредните година или две. Дискусиите од партискиот форум станаа јавни откако ги сподели пратеникот на ПП Радостин Василев, кој ја снимал средбата. „Без промена во службите, ќе ве обвинуваат и бламираат секаде“, го цитира Борисов копретседателот на ПП, Кирил Петков. Лидерот на ГЕРБ тоа најдобро го знае – тој е свесен за можностите на службите и нивните информативни врски. Тој го смени шефот на Државната агенција за национална безбедност (ДАНС) Петко Сертов на осмиот ден од полагањето заклетва на неговата прва влада – официјално беше објавено дека одлуката била договорена меѓу Борисов и претседателот Георги Прванов. Безбедносниот сектор во Бугарија веќе две години го контролира претседателот Румен Радев преку назначувањата од неговите управни одделенија. Да, тоа е политичарот со највисок рејтинг досега, и да – тоа е оној кој со само една крената тупаница се приклучи во уништувањето на моделот ГЕРБ, и за две години успеа да го замени со свој. Целата претседателска војска Резултатот е што шефовите на контраразузнавачките, надворешноразузнавачките служби, војската, НСО, агенцијата за прислушување и следење се во рацете на претседателот Румен Радев, а промените стигнаа и до нивните заменици. И се почесто неговиот советник Пламен Узунов се гледа како шета низ ходниците на МВР како кадровски офицер на секторот. Актуелниот привремен кабинет на Радев пред еден месец повторно го именуваше претседателот на ДАНС, Пламен Тончев, на функцијата, кого претходниот привремен премиер Стефан Јанев го повлече од Ќустендил, каде што раководеше со локалната дирекција. Службената влада му го продолжи мандатот до октомври 2027 година на Бисер Борисов како шеф на Државната агенција за технички операции (ДАТО). Ова е службата која се занимава со прислушување и следење. Во јуни 2021 година беше разрешен тогашниот шеф на ДАР (Државната агенција за разузнавање) Атанас Атанасов со образложение дека не му ги дал потребните информации на претседателот Радев. Атанасов изјави дека главната причина за неговата смена е „долгата рака на Кремљ и донекаде координираните дејствија со познат бизнисмен со многу обвинувања, кои можеби се заедно со Кремљ“. Координирано со партнерските служби Репликите од снимката кои предизвикаа големи главоболки на ПП и нејзините лидери Кирил Петков и Асен Василев - заедно со нивната лоша кадровска политика, се поврзани и со специјалните служби. Станува збор за тоа дека имињата на идните шефови на службите се „синхронизирани со амбасадите“. Следува прашање и одговор до Василев дека „ДАНС, НСО, главен секретар на МВР - тоа се наши луѓе што ги поставува амбасадата“. Асен Василев за Нова ТВ објасни дека стои зад секој збор што го кажува на снимката и дека координацијата со партнерските служби е во ред, бидејќи Бугарија е членка на ЕУ и НАТО. Од снимката е јасно дека ПП планира да донесе надворешни консултанти кои ќе помогнат да се „изградат“ службите и да се исчисти „рускиот имот во нив“. Сосема веројатно сценарио, бидејќи не сме сами во ова, туку сме со надворешни партнери, вели Асен Василев. Поддршката од партнерските служби е несомнено неопходна со оглед на недостигот на доверба во бугарските, и е една од неименуваните јавни пречки за пристапувањето на Бугарија во Шенген. Со оглед на агресивната руска пропаганда, сепак, тестираниот хибрид е веќе пуштен во употреба - еве ви доказ дека Бугарија е лакеј и важните одлуки се носат во странски амбасади. ВМРО и „Преродба“, за кои со задоволство би гласала (со сопствено признание) руската амбасадорка Елеонора Митрофанова, веќе поднеле пријави до обвинителството - за кривично дело против републиката сторено со „синхронизацијата“. Позиционирање во локалната власт „Рудигејт“, како што сега ја нарекуваат аферата со снимката, ги откри и амбициите на претседателот да се позиционира во локалната власт. Асен Василев сликовито го опиша процесот со зборовите: „Бидејќи Радев под едната рака го има Гешев, под другата Копринков (Николај Копринков, советник на претседателот, б.а.). И со едната рака ги поткупува, со другата им се заканува. И тоа во моментот им се случува апсолутно на сите градоначалници на ГЕРБ (ГЕРБ има монопол во локалната власт, б.а.). И наместо да имаме ГЕРБ 25 отсто, ќе имаме ГЕРБ 15 отсто и про-Кремљ партија на Радев со локалните градоначалници“. Како Радев го фати под рака Гешев - нели кренатата тупаница беше и против него, а тој не го потпиша и указот за неговиот избор. Не го потпиша, но го објасни со тоа што немало конкурс и конкуренција, бидејќи кандидатурата на Иван Гешев била единствена - иако бројот на кандидати не зависел од Гешев. Претседателот досега не се изјасни за снимката и за спомнувањето на неговото име во неа. Иван Костов предупреди дека руски интерес е да нема редовна влада во Бугарија и затоа руските специјални служби се обидуваат да го разбијат политичкиот систем, а Радев „некако им служи“. Потврда може да се најде во позициите кои претседателот ги искажува за неутралност кон војната во Украина и недавањето воена помош и слично. Тешко може да се заборави дека за неговиот избор како претседателски кандидат на БСП е осомничен поранешниот жител на КГБ во Бугарија, ген. Леонид Решетников. Во интервјуто со починатиот новинар Георги Коритаров за програмата „Слободна зона“ во 2016 година, Решетников призна дека новоизбраниот претседател Радев може „да одигра значителна улога“ во излегувањето на Бугарија од ЕУ и НАТО. Денес веќе се гледаат и помагачите во овој процес - партијата „Преродба“. Дали е можно владата што избира парламентот во уставно парламентарна земја да ги задржи шефовите на специјалните служби кои ги именувал човек назначен за претседател според профил одреден од Москва? Во име на националниот суверенитет и безбедност, итно треба да бидат сменети. Фото: ДВ