руска армија – Kurir.mk

Путин им понидил на платениците на „Вагнер“ да и се приклучат на руската војска

Дарко Андоновски — Fri, 14 Jul 2023 05:32:34 +0000

Рускиот претседател Владимир Путин во интервју за рускиот весник „Комерсант“, доцна синоќа, кажа дека на платениците од групата „Вагнер“ им понудил можност да продолжат да служат во редовната руска армија. Путин кажа дека понудата ја дал на состанокот со борците и нивниот основач Евгениј Пригожин кон крајот на минатиот месец, пет дена откако „Вагнер“ го почна неуспешниот бунт против руската воена хиерархија. Бунтот заврши со тоа што Москва им понуди можност на борците на Пригожин да се префрлат во соседна Белорусија. Тој, исто така, кажа дека сега рускиот Парламент и владата треба да разговараат за правната рамка за приватните армии. „Вагнер не постои“, изјави Путин за весникот. „Не постои закон за приватни воени организации. Тој едноставно не постои“, рече рускиот претседател во интервјуот за „Комерсант“, пренесен од британските медиуми.

Руската армија неутрализира три дронови во регионот на Москва

Тале Кристо — Wed, 21 Jun 2023 08:49:52 +0000

Русија соопшти дека неутрализирала три беспилотни летала во регионот на Москва, од кои два во близина на воена база и за нападот ја обвини Украина. - Денеска е спречен обид на режимот во Киев да изврши терористички напад со три беспилотни летала на локации во московскиот регион, соопшти руското Министерство за одбрана, додавајќи дека сите беспилотни летала се неутрализирани со системот за електронско војување, изгубиле контрола и се урнале. Претходно гувернерот на Московската област Андреј Воробјов изјави дека два дрона се урнале рано утринава додека се приближувале до магацините на воената база лоцирана во селото Калининец, во областа Наро-Фоминск, на околу 50 километри југозападно од Москва. Пронајдени се остатоците, нема штета или жртви, изјави Воробјов и ги повика жителите на смиреност. Московската област, лоцирана на повеќе од 500 километри од украинската граница ретко е цел на напади со беспилотни, иако таквите напади се зголемени на други места во Русија. На почетокот на мај, два дронови беа соборени над Кремљ во напад за кој Русите ја обвинија Украина. Во изминатите месеци, беспилотни летала гаѓаа и воени бази или енергетската инфраструктура во Русија.

Руската армија потврди дека извршила напади врз украински енергетски капацитети

Тале Кристо — Mon, 31 Oct 2022 17:55:03 +0000

Руското Министерство за одбрана денеска ги потврди ракетните напади врз енергетски капацитети на Украина, како и врз воени инсталации, извршени со прецизни проектили истрелани од авиони-бомбардери и од воени бродови. „Утврдените цели на нападите беа постигнати. Сите целни објекти беа погодени“, реферираше портпаролот на Министерството за одбрана, Игор Конашенков. Низ Украина и изутринава беа активирани алармите за воздушни напади, поради десетина ракетни напади извршени во повеќе региони. Според Киев, украинските противвоздушни сили успеале да соборат поголем дел од ракетите, а бил употребен и германскиот систем „ИРИС-Т“ што демонстрирал стопроцентна успешност во уништувањето на предвидените цели. Украина уште еднаш побара испорака дополнителни такви противракетни системи. Цел на руските напади биле и хидроцентралите, важни за одржувањето на системот за снабдување со електрична енергија. Поради нападите имало прекин во испораките струја, а проблеми имало и во водоснабдувањето на главниот град. Според Конашенков, руските трупи успеале да одбијат низа поединечни напади на украинските сили во регионите Луганск и Херсон. Во регионите Доњецк и Херсон биле уништени четири складишта за муниција и неколку беспилотни летала, информација што не е потврдена од независни извори. Неколку седмици руските сили ракетираат цели во Украина, со напади во раните утрински часови кога има раздвиженост низ населените места. Во нападите беа регистрирани загинати и ранети. Нема информации за жртви во денешните ракетирања.

Руската армија бара војници преку оглас

Тале Кристо — Sat, 18 Jun 2022 09:01:07 +0000

Од почетокот на руската инвазија на Украина, руската војска објави илјадници слободни работни места, од противтенковски бомбардери до возачи и снајперисти. Списоците, за кои првпат извести рускиот сервис на Би-Би-Си, почнаа да се објавуваат или ажурираат на секои неколку дена. На огласот за вработување објавен на само неколку стотици километри од Украина се вели: “Тестирајте ги вашите граници! Не, заборавете на вашите ограничувања, дали сте подготвени да се надминувате себеси секој ден?” Напорите за регрутирање беа особено видливи во Санкт Петербург. На почетокот на овој месец, модел на надувување на насмеан униформиран офицер им мавташе на минувачите и ги канеше во канцеларијата за регрутирање за да дознаат повеќе за придобивките од служењето во професионалната армија.

НАРЕДБАТА ДАДЕНА: Руската армија ќе напаѓа од сите страни во Украина

Тале Кристо — Sat, 26 Feb 2022 16:49:02 +0000

На руската војска и е наредено да ја прошири својата офанзива во Украина „во сите правци“ откако Киев одби да одржи разговори во главниот град на Белорусија, Минск, се наведува во денешното соопштение на Министерството за одбрана. -Откако украинската страна го отфрли преговарачкиот процес, денеска сите единици добија наредба да ја прошират офанзивата во сите правци, во согласност со плановите на операцијата-се наведува во соопштението на портпаролот на руската армија, Игор Конашенков. Сајтот „Киев Индипендент“ предмалку јави дека во главниот град, како и во неколку други градови низ земјата, е прогласена воздушна опасност.

Руската армија ќе добие повеќе од 70 борбени авиони Су-57

Тале Кристо — Fri, 15 Oct 2021 06:34:40 +0000

Повеќе од 70 борбени авиони од петтата генерација Су-57 ќе бидат испорачани на руската војска до 2027 година, вклучително и неколку авиони оваа година, соопшти руската државна технолошка корпорација Ростек. Ростек коментираше статија во американското списание Нешнал Интерест (National Interest), во која се тврди дека е малку веројатно дека Су-57 ќе биде оперативен пред 2027 година, објави агенцијата ТАСС. „Руските авиони од петтата генерација прават Западот да не се чувствува удобно. Су-57 и новиот руски ловец често стануваат цел на лажни вести. Станува збор за неточни факти кои немаат никаква врска со реалноста. Авионот веќе се произведува и испорачува. До 2027 година ќе бидат испорачани повеќе од 70 авиони, а неколку веќе оваа година“, се наведува во соопштението на Ростек. Руската новинска агенција додава дека руската воздушна флота ќе добие 22 авиони Су-57 до 2024 година, а тој број ќе се зголеми на 76 до 2028 година.

Пентагон смеат дека руската армија може да биде поразена ако нападне на Балтикот или Балканот

Дарко Андоновски — Sat, 16 Mar 2019 11:23:48 +0000

Пентагон смета дека руската армија ќе биде поразена во случај на напад врз Балтикот или Балканот, пишува руското издание „Военое обозрение“. Генерал Кертис Скапарати, кој ја предводи Европската команда на САД во извештајот до Конгресот, вели дека влијанието на Русија на Балканот постојано се зголемува во изминатите месеци. Генералот истакна дека е загрижен за руската програма за модернизација на војската. Во исто време, тој верува дека силите на САД и НАТО на источната граница на Европа значително ја надминуваат руската армија, а таа може брзо да биде поразена ако Москва преземе агресивен напад врз балтички или балкански региони. Шефот на Европската команда пред Конгресот изјави дека е повеќе загрижен за „вмешувањето на Русија на Балканот”. Загрижен сум за Балканот и за зајакнувањето на штетното влијание на Русија во изминатата година, вели Скапароти. Всушност, според генералот, руските „кампањи за дезинформации и поддршка за маргинални, анти-владини и анти-нато групи во некои балкански земји” се интензивираат во изминатите шест до осум месеци. Според американскиот генерал, руската влада се обидува да ја искористи таквата тактика за да ја одврати Црна Гора од пристапувањето во НАТО или да го спречи тоа, но обидот е неуспешен. Истите чекори Русија, исто така, ги превзема во Северна Македонија која наскоро ќе се приклучи на НАТО. Високиот воен претставник објасни дека стабилноста на Балканот е секогаш под закана. Но, интервенцијата на Русија може да доведе до фактот дека „луѓето ќе изгубат надеж“ желбата за членство во НАТО ќе се намали.

Руската армија собори дрон во Сирија

Ивона Петрова — Tue, 31 Jul 2018 05:44:02 +0000

Руската армија соопшти дека соборила еден дрон, кој ја нападнал воздухопловната база Хмејмим во Сирија. Дронот бил управуван од сириските бунтовници и бил лансиран од територија под нивна контрола. Беспилотното летало било соборено на безбедна оддалеченост од базата Хмејмим.

Руската армија подготвена за соработка со САД

Катерина Бојаџиева — Wed, 18 Jul 2018 07:52:49 +0000

Руското Министерство за одбрана соопшти дека е подготвено да ги спроведе мерките за зајакнување на меѓународната безбедност, договорени на средбата на претседателите на Русија и САД, Владимир Путин и Доналд Трамп во понеделникот во Хелсинки. - Руската армија е подготвена да ги интензивира контактите со своите американски колеги, преку Генералштабот и останатите достапни канали за комуникациуа, изјави портпаролот на Министерството за одбрана на Русија, Игор Конашенков. Тој нагласи дека Вооружените сили на Русија се подготвени за разговори за продолжување на Договорот за намалување на стратешкото оружје, како и за соработка во Сирија и за други прашања од сферата на безбедноста. По средбата со Трамп во Хелсинки, Путин изјави дека Русија и САД сметаат оти е неопходно да работат заедно по голем број прашања, вклучително и на контролата на вооружувањето. Путин и Трамп на средбата се договориле и да соработуваат околу кризата во Сирија, но досега не се соопштени детали за оваа соработка.