руска федерација – Kurir.mk

Русија соопшти дека спречила украински напад врз нуклеарната централа Запорожје со дронови камикази

Ивана Ефремовски — Sun, 25 Sep 2022 14:12:39 +0000

Вооружените сили на Руската Федерација спречиле обидите на Вооружените сили на Украина (АСУ) да ја нападнат нуклеарната централа Запорожје со беспилотни летала, соопшти денеска портпаролот на руското Министерство за одбрана, генерал-полковник Игор Конашенков. -Беа спречени обиди на вооружените сили на Украина да ја нападнат територијата на нуклеарната централа со осум дронови камикази. Сите украински беспилотни летала беа соборени надвор од територијата на нуклеарната централа, рече Конашенков. Како што пренесе БТА, тој го истакна фактот дека ситуацијата со радијација во областа на нуклеарната централа Запорожје е во рамките на нормите. Засега нема коментар од украинската страна за руските тврдења. Двете земји редовно меѓусебно се обвинуваат за гранатирање на најголемата нуклеарна централа во Европа. Лоцирана во делумно окупираната од Русија област Запорожје во југоисточна Украина, централата беше заземен од руската армија во март. Украинските вооружени сили во последните 24 часа собориле осум беспилотни летала камикази, испорачани на Русија од Иран, изјави во меѓувреме украински претставник. Тврдењата на двете страни во конфликтот не се независно проверени. (МИА)

Украдено знамето на Русија од конзулатот во Битола

Магдалена Андонова — Wed, 15 Jun 2022 17:08:22 +0000

На 14.06.2022 во 16.50 часот во СВР Битола, вработена во Конзулатот на Руската Федерација во Битола пријавила дека било одземено знамето на Руската Федерација, кое било закачено на зградата на конзулатот на улица „Маршал Тито“. Се преземаат мерки за расчистување на случајот.

НАТО ги отфрла сугестиите на Путин за заканата од Алијансата во источна Европа

Предраг Кукиќ — Wed, 22 Aug 2018 19:55:42 +0000

НАТО денеска ги отфрли сугестиите на рускиот претседател Владимир Путин дека силите на Алијансата во источна Европа претставуваат закана по Русија. - Акциите на НАТО се одбранбени, пропорционални и целосно во согласност со нашите меѓународни обврски. НАТО распореди 4.000 војници во источниот дел на Алијансата - со цел да обесхрабри можна агресија. Наспроти тоа, Русија има војска во Украина, Грузија и Молдавија спротивно на желбите на нивните влади, изјави портпаролката на НАТО Оана Лунгеску. Претседателот на Русија денеска изјави дека НАТО ја придвижува својата воена инфраструктура поблиску до руските граници, поради што Москва како одговор на тоа треба да ја зајакне сопствената инфраструктура. (МИА)

„Ле Монд“: Русија работи на поделба на Косово

Предраг Кукиќ — Thu, 16 Aug 2018 11:42:44 +0000

Влијателниот француски дневен весник „Ле Монд“ во текст посветен на присуството на рускиот претседател Владимир Путин на свадба на австриската министерка за надворешни работи, Карин Кнајсл, на 18 август, цитира европски дипломат кој тврди дека Русија работи на размена на територии со Косово. Според дипломатот, Кремљ е „многу активен“ околу „експлозивниот“ план на размена на територии со Косово. - Мариа Захарова, портапролката на руската дипломатија, беше неодамна во Белград. Таа јавно го поддржа српскиот сојузник во рамките на овој процес. Русија има интерес оваа размена да се конкретизира бидејќи се надева дека дополнително ќе ги подели Европејците и смета дека таква промена на граници ќе и служи во аргументацијата за Крим пред Западот, истакнува неименуваниот европски дипломат за „Ле Монд“. Понатаму, весникот додава дека Захарова „може да смета на помошта на Виена, влијателна на Балканот“. „Ле Монд“ оценува дека со враќањето на власт на партијата ФПО (екстремна десница, коалициска партија), која ја номинираше Кнајсл како министерката, позициите кон Балканот станале „двосмислени“ и покрај признавањето на независноста на Косово затоа што лидерот на ФПО и австриски вице канцелар, Хајнз Кристијан Штрахе, изјави дека Косово и натаму е дел од Србија и ја поддржа независност за Република Српска. Путин е поканет на свадбата на Кнајсл в сабота и се очекува да присуствува пред да замине на средба со канцеларката Ангела Меркел во Германија, пишува францускиот весник. Повеќе истражувања покажаа дека Владата на Путин одржува врски со неколку партии од екстремната десница во Европа. - Овој пат ќе може да забележиме дека Путин има и лични врски со некои од членовите, наведува „Ле Монд“. (МИА)

Русија најавува контрамерки против САД поради санкциите

Предраг Кукиќ — Thu, 16 Aug 2018 11:03:17 +0000

Русија работи на изнаоѓање на реципрочен одговор на САД, кои воведоа санкции кон една руска компанија бидејќи им помагала на Северна Кореја, изјави денеска рускиот заменик министер за надворешни работи Сергеј Рјабков. САД воведоа санкции за компанијата „Профинет Пте Лтд“ и нејзиниот генерален директор Василиј Александрович Колчанов, тврдејќи дека фирмата пружала пристанишни услуги за најмалку шест бродови кои пловеле под знамето на Северна Кореја. Американските санкции кон Северна Кореја опфаќаат финансиски рестрикции, забрана за трговија со оружје, забрана за извоз на ракетно гориво, како и увоз на јаглен, железо, олово, морска храна и некои други производи. (МИА)

„Новости“: Москва подготвена да го поддржи осамостојувањето на Република Српска

Предраг Кукиќ — Tue, 14 Aug 2018 08:57:44 +0000

Москва е подготвена да ја поддржи Република Српска во иницирањето на прашањето за осамостојување од Босна и Херцеговина, пред се во контекст на преговорите за конечното решение за Косово, кои се очекува да бидат интензивирани во текот на септември, тврди белградскиот весник „Вечерње новости“. Според весникот, ваквата порака на претседателот на Република Српска, Милорад Додик би требало да му ја пренесе рускиот министер за надворешни работи Сергеј Лавров за време на посетите на Сараево и Бања Лука на 16 и 17 септември. „Вечерње новости“ тврди дека Москва преку неофицијални канали веќе „им испратила сигнали“ на Белград и на Бања Лука дека со „големо внимение го прифатила цврстиот став“ на Додик, дека ако Косово стане членка на ОН и Република Српска „ќе тргне по патот на осамостојувањето“. Лавров ќе допатува во БиХ само еден ден по средбата на претседателите на Русија и Србија, Владимир Путин и Александар Вучиќ, најавена за 15 септемрви во Москва, наведува белградскиот весник. Според „Новости“, решавањето на косовското прашање се очекува да биде централна тема на разговрите Путин - Вучиќ. (МИА)

Захарова: Русија ќе прифати секакво решение за Косово, прифатливо за Србите

Предраг Кукиќ — Mon, 13 Aug 2018 09:08:35 +0000

Русија ќе го прифати секое решение за Косово, кое ќе биде прифатливо за српскиот народ, изјави портпаролката на руското Министерство за надворешни работи, Марија Захарова. - Она што ќе биде прифатливо за српскиот народ околу ова прашање, тоа со почит ќе биде прифатено од наша страна. Но, прашањето е -дали ова е корисно и што ќе биде корисно за народот во Србија, изјави Захарова за РТС, одговарајќи на прашањето за ставот на Русија околу поделбата на Косово. На прашањето дали претседателите на Русија и на САД, Владимир Путин и Доналд Трамп разговарале за Косово, Захарова одговори дека по последната нивна средба била објавена таква инфромација, која, според неа, е лажна вест. - Тоа се лажни вести, типични лажни вести, изјави Захарова. Таа нагласи дека ставот на Русија во однос на косовското прашање е доследен. - Тој став се гради од три компоненти - меѓународно правна основа за тоа што се случува на Косово, почитувањето на суверенитетот на Србија и независноста на српското заканодавство и разбирањето на интересите на Србија како држава и на народот, истакна Захарова. (МИА)