Саит Саити – Kurir.mk

Пендаровски се сретна со Саит Саити, генерален секретар на Црвениот крст

Магдалена Андонова — Thu, 02 Jun 2022 13:19:30 +0000

Претседателот Стево Пендаровски денеска го прими Саит Саити, генерален секретар на Црвениот крст на Република Северна Македонија, со кого разговараше за тековните активности на Црвениот крст, вклучувајќи ја волонтерската работа, како и соработката со Кабинетот на претседателот. -Генералниот секретар Саити посочи дека волонтерските активности на Црвениот крст во последната деценија бележат позитивен развој и информираше дека во изминативе две години Црвениот крст во однос на волонтерската работа се фокусираше за поддршка на ранливите групи на граѓани кои беа најтешко погодени со пандемијата на КОВИД-19, се наведува во соопштението од Кабинетот на Пендаровски. Шефот на државата истакна дека Црвениот крст, како една од најголемите и најзначајните волонтерски организации, успешно ја промовира волонтерската работа нудејќи им можност на сите заинтересирани граѓани да бидат дел од активности корисни за заедницата. Претседателот даде поддршка за ангажманот на волонтерите во работата на Црвениот крст и изрази благодарност за нивната пожртвуваност, одговорност и посветеност во извршувањето на нивните ангажмани и хуманитарни активности.

Средба на Мизрахи со генералниот секретар на Црвен Крст

Ивона Петрова — Mon, 03 Feb 2020 10:53:51 +0000

Министерката за труд и социјална политика Рашела Мизрахи денеска имаше работна средба со генералниот секретар на Црвениот крст, Саит Саити, на која, како што информираат од МТСП, се потврдила партнерската соработка воспоставена децении наназад во интерес на создавање услуги за најранливите категории на граѓани и на повозрасните лица. -Црвениот крст е партнер на МТСП во заштитата и поддршката на бездомните лица. Изминатите неколку години Министерството и Црвениот крст отворија пунктови во повеќе градови во државата, во периодот од годината кога се прогласува ладен бран. Министерството за труд и социјална политика обезбедува финансиски средства за поддршка на бездомните лица во текот на овој период од годината, информираат од МТСП. Министерството за труд и социјална политика и Црвениот крст успешно соработуваат во обезбедувањето поддршка за повозрасната популација во Дневните центри за стари лица, како и поддршка во обезбедување дневни услуги за лица со интелектуална попреченост. На средбата било потенцирано дека заедничката успешна сработка ќе продолжи и во иднина со цел поддршка и помош на најранливите граѓани на нашето општество.

„Твоето незнаење чини живот“: Пендаровски оствари средба со генералниот секретар на Црвениот крст

Ивана Ефремовски — Mon, 29 Jul 2019 14:03:21 +0000

Претседателот Стево Пендаровски, денеска прими делегација на Црвениот крст на Република Македонија, предводена од генералниот секретар, Саит Саити. На средбата беа претставени тековните активности на Црвениот крст, вклучувајќи ја актуелната кампања „Твоето незнаење чини живот“, која се однесува на давање прва помош при сообраќајни несреќи, и со која ќе бидат опфатени околу 8.000 возачи низ целата држава. Претседателот Пендаровски го истакна исклучителното значење на работата на Црвениот крст, како организација која е посветена на заштита на животот и здравјето на луѓето, особено во случај на несреќи и катастрофи. Генералниот секретар Саити го запозна претседателот Пендаровски и со активностите на Црвениот крст на Република Македонија за одбележување на 75-годишнината од неговото постоење, во 2020 година.