салвадор – Kurir.mk

Силен земјотрес го погоди Салвадор

Ивона Петрова — Fri, 04 Nov 2022 06:43:40 +0000

Земјотрес со интензитет од 5,5 степени според Рихтеровата скала го погоди брегот на Салвадор, соопшти Европско-медитеранскиот сеизмолошки центар. Претседателот на Салвадор, Најиб Букеле на Твитер објави дека земјотресот е со магнитуда од 5,9 степени. Засега нема информации за повредени лица и материјална штета.

Биткоинот стана официјална валута во Салвадор

Ивона Петрова — Tue, 07 Sep 2021 11:25:54 +0000

Пркосејќи на предупредувањата на големите економии и финансиски регулатори, но и несогласувањето на мнозинството население на таа централноамериканска земја, Салвадор стана првата земја во светот во која биткоинот се користи како официјална валута, што аналитичарите веруваат дека може да влијае на позицијата на криптовалутите во глобалниот финансиски систем, објави Радио Слободна Европа. Салвадор од денеска е првата земја која го прифати биткоинот како легално средство за плаќање, со планови за користење вулканска геотермална енергија за напојување на „рударењето“ на дигиталната валута, пишува лондонски „Тајмс“. Биткоинот, заедно со американскиот долар, усвоен во Салвадор во 2001 година и ќе продолжи да се користи како „референтна валута“, станува официјална валута на најмалата централноамериканска држава и според законот мора да се прифати како плаќање кога ќе се понуди, освен ако добавувачите или примателите немаат технологија за извршување трансакции. Нема да подлежи на данок на капитална добивка, па дури може да се искористи и за плаќање даночни придонеси. Владата формираше фонд од 150 милиони долари во Развојната банка на Салвадор, кој ќе се користи за претворање на биткоинот во американска валута. Сепак, додава „Тајмс“, 70 проценти од населението не користи банки. Исто така, за користење биткоин е неопходен пристап до Интернет, а само 45 проценти од земјата е поврзана. Повеќето жители на Ел Салвадор не се согласуваат со владината одлука за усвојување на биткоинот како легално средство за плаќање, а многумина не знаат како да ја користат дигиталната валута и се недоверливи кон овој проект, покажа истражувањето на Централноамериканскиот универзитет Анкетата, исто така, покажа дека повеќето испитаници сметаат дека главните корисници на употреба на биткоин ќе бидат богатите, странските инвеститори, владата и бизнис лидерите.

Во Салвадор биткоинот ќе стане официјално средство за плаќање

Дарко Андоновски — Sun, 06 Jun 2021 08:41:32 +0000

Претседателот на централноамериканската држава Салвадор, Наџиб Букеле (39) преку видео порака на конференцијата за биткоини во Мајами објави дека следната недела ќе предложи закон според кој биткоинот ќе стане законско средство за плаќање во таа земја. Тој смета дека овој потег може да му помогне на Салвадор да оди напред. – Следната недела ќе испратам закон до Конгресот за да го официјализира биткоинот како средство за плаќање во Салвадор. Ова за краток временски рок ќе создаде нови работни места и финансиска помош за илјадници луѓе во зоната надвор од официјалната економија , а среднорочно и долгорочно се надеваме дека оваа мала одлука ќе ни помогне да го турнеме човештвото барем малку во вистинската насока, рече Букеле. Американскиот долар е официјална валута во Салвадор, а една четвртина од населението на земјата живее во САД – само минатата година тие испратиле дома повеќе од шест милијарди долари.

Првата тропска бура годинава во Салвадор зеде седум жртви

Дарко Андоновски — Mon, 01 Jun 2020 07:09:09 +0000

Првото годинашно тропско невреме, што го доби името Аманда, вчера поплави делови од Централна Америка, а во поплавите загинаа најмалку седум лица, соопштија властите на Ел Салвадор. Осумгодишно дете е една од жртвите, а градоначалникот на Сан Салвадор, Ернесто Мајсон, соопшти дека во невремето се уништени 50 куќи, додека стотици лица биле евакуирани поради прелевање на реките, пренесуваат американските медиуми. Претседателот на земјата, Наџиб Букеле, прогласи 15-дневна вонредна состојба за да и помогне на земјата да се справи со силните дождови што почнаа пред два дена, додека министерот за внатрешни работи Марио Дуран изјави дека земјата е во критична состојба. Тропската бура Аманда утринава имаше налети на ветрот од 65 километри на час, но набрзо ослабе и се претвори во тропска депресија со налети на ветрот од 55 километри на час, но подоцна во Гватемала, во текот на попладневните часови повторно имаше налети од 75 километри на час. Метеоролозите предвидуваат дека бурата се очекува да ослабне во текот на ноќта. Невремето се очекува да донесе дожд од 25 до 38 сантиметри на метар квадратен во Ел Салвадор, јужна Гватемала, западен Хондурас и југоисточно Мексико, додека помалку дождови се очекуваат во делови од Никарагва и Белизе.

Силен земјотрес го стресе Салвадор

Ивона Петрова — Wed, 31 Jul 2019 07:45:47 +0000

Земјотрес од 5,9 по Рихтеровата скала ги погоди брегот на Салвадор. Потресот е регистриран на 46 км јужно од градот Нуева Сан Салвадор. Не е издадно предупредување за цунами. Засега нема информации за жртви или материјална штета.

Тажната слика се уште главна вест во светот- еве што ќе се случи со таткото и ќерката кои заедно се удавија во обид да ја поминат реката

Дарко Андоновски — Fri, 28 Jun 2019 07:18:14 +0000

Телата на таткото и ќерката кои се удавија во реката Рио Гранде во обид да стигнат до територијата на САД, ќе бидат вратени во нивната држава, Салвадор, каде што ќе бидат погребани. Како што пренесува Си-Ен-Ен, фотографијата на која се Оскар Алберт Мартинес и 23-месечната Енџи Валери Мартинес во прегратка со лицата во матна вода го потресе светот и претставува сурова реалност на мигрантската криза и ризикот што луѓето го преземаат за да стигнат до јужно американската граница. Телата се предадени на сопругата и мајка Танија Авалос во Мексико, оттаму се префрлени во Монтереј од каде со авион треба да бидат однесени во Сан Салвадор. Семејството на трагично загинатите татко и ќерка побара од властите да гарантираат приватност за време на префрлувањето на телата во нивната држава.

Во Салвадор уапсени повеќе од 400 криминалци

Ристе Здравков — Wed, 29 Aug 2018 07:49:38 +0000

Полицијата во Салвадор уапсила повеќе од 400 членови на криминалната банда Мара Салватруча, во една од најголемите акции во борбата против криминалот во земјата. Бандата е позната и како МС-13, а некои од уапсените се осомничени за трговија со дрога, изнуди и нарачување убиства на полициски функционери. Директорот на Националната цивилна полиција Хаурад Кото изјави дека целта на акцијата биле апсења и разбивање на широката финансиска и логистичка криминална мрежа.

Серија земјотреси го погодија Салвадор

Дарко Андоновски — Mon, 07 May 2018 06:07:45 +0000

Серија земјотреси го погодија вчера јужниот дел на Салвадор, а властите соопштија дека се оштетени десетици куќи. Засега нема податоци за евентуално настрадани или посериозно повредени лица. Американскиот геолошки институт соопшти дека најмалку четири земјотреси со јачина од над 4,3 степени според Рихтеровата скала го погодиле регионот, почнувајќи од вчера изутрина по локално време. Три потреси биле со јачина од 5,2 до 5,6 степени по Рихтер. Најмалку 75 куќи се оштетени, а три се целосно уништени, соопшти Агенцијата за цивилна одбрана.