самит – Kurir.mk

На самитот во Вашингтон, САД и ЕУ ја потврдија заедничката посветеност на стабилноста на Западен Балкан

Тале Кристо — Sat, 21 Oct 2023 07:24:18 +0000

Во заедничката декларација на крајот од самитот ЕУ-САД, што се одржа синоќа во Вашингтон, беше потврдена заедничката заложба за стабилност на Западен Балкан и поддршка за европската перспектива на регионот, објави Радио Слободна Европа (РСЕ). „Сите партнери треба да продолжат со реформите потребни за напредок на нивниот европски пат“, се наведува во завршниот документ, објавен на крајот од средбата меѓу лидерите на ЕУ и американскиот претседател Џо Бајден. Посебен став во заедничката декларација се однесува на процесот на нормализација на односите меѓу Србија и Косово, наведува РСЕ. „Ја нагласуваме потребата Косово и Србија итно да ги деескалираат тензиите и брзо и безусловно да го спроведат договорот за нормализирање на нивните односи и враќање на дијалогот со поддршка на ЕУ“, се вели во декларацијата. Американскиот претседател Бајден ги пречека европските лидери Шарл Мишел и Урсула фон дер Лајен, а во фокусот на нивните разговори беа војните меѓу Израел и Хамас, како и Украина и Русија. Бајден истакна дека ЕУ и САД заеднички ги поддржуваат Израел и Украина. Фон дер Лајен еден ден претходно изјави дека постои реален ризик од поширок регионален конфликт поради војната меѓу Израел и Хамас. „Видовме дека арапските улици се полни со гнев низ целиот регион. Значи, ризикот од регионално прелевање е реален“, рече таа. Фон дер Лејен го опиша Иран како „покровител на Хамас“ и рече дека „тие само сакаат да го разгорат огнот на хаосот“, додека Русија, „воениот клиент на Иран“, внимателно го следи. Според неа, „Русија и Хамас се слични“. Ова е втор самит САД-ЕУ откако Бајден ја презеде функцијата.

Јордан: Самитот се откажа затоа што „војната не може да се запре“

Катерина Бојаџиева — Wed, 18 Oct 2023 07:36:58 +0000

Јордан го откажал планираниот самит со американскиот, палестинскиот и египетскиот претседател, Џо Бајден, Махмуд Абас и Абдел Фатах ел-Сиси и јорданскиот крал Абдула Втори бидејќи тоа „засега не би можело да ја запре војната“, обвинувајќи го Израел за извршување „масакри“. -По консултациите со нашите палестински и египетски браќа и по дискусијата со САД, решивме да не го одржуваме овој самит. Наша цел е од овој самит, доколку се одржи, да се произведе едно решение, а тоа е да се запре војната, да се почитува хуманоста кон Палестинците и да се достави помошта што ја заслужуваат, изјави јорданскиот министер за надворешни работи Ајман Ал-Сафади. Тој, исто така, како причина за неодржување на самитот, ја наведе експлозијата во болница во градот Газа, во која загинаа стотици луѓе. - Се воздржуваме од одржување на самитот, исто така, поради тековните израелски масакри врз палестинскиот народ во Појасот Газа, од кои последниот беше масакрот врз Баптистичката болница, кој беше шок за сите и не може да се толерира, вели тој. Хамас кој владее со Појасот, обвини за израелски воздушен напад, додека израелската војска вели дека експлозијата била предизвикана од ракета испукана од палестинската група Исламски џихад.

Кабинетот на Рама ја објави агендата на Самитот на Берлинскиот процес

Тале Кристо — Sun, 15 Oct 2023 11:24:49 +0000

Самитот на Берлинскиот процес, кој се одржува за првпат во регионот, поточно утре во Тирана, ќе ги собере сите лидери на балканските земји, земјите - членки на Европската унија и највисоките претставници на ЕУ. Прес-службата на албанскиот премиер Еди Рама, ја објави целосната агенда на овој Самит, прв во регионот на Западен Балкан, во земја која не е членка на ЕУ. -Во 11 часот ќе биде пречекот за лидерите, а по половина час, во 11:30 часот е отворањето. Во 12:00 часот започнува работната сесија „Интеграција на регионот на заедничкиот европски пазар и подобрување на конвергенцијата со ЕУ“, а во 13:30 фамилијарна фотографија. Во 15:30 започнува втората работна сесија за поддршка на зелената и дигиталната транзиција во Западен Балкан, наведуваат под кабинетот на Рама. Додаваат дека во 16:45 часот во Тирана свечено ќе биде отворен колеџот на Европа, со присуство на реткорката Федерика Могерини. -Во 17:30 часот ќе биде потпишан регионалниот договор за меѓусебно признавање на професионалната квалификација, 17:45 часот е заедничката прес-конференција, а во 18:30 инаугурација на реконструираниот објект „пирамидата“, наведуваат под кабинетот на Рама. Попладнево во Тирана ќе допатува претседателката на Европската комисија Урсула фон дер Лајен, која, како што е најавено ќе оствари средба со шефот на државата Бајрам Бегај. Според медиумите, на самитот нема да присуствува италијанската премиерка Џорџа Мелони, како и српскиот претседател Александар Вучиќ, но е потврдено присуството на премиерката Ана Брнабиќ. Како што информираа надлежните, за безбедноста ќе бидат ангажирани над 1600 полициски службеници и 400 гардисти. Почнувајќи од вечер во 20 часот до утре во 20 часот, воведен посебен сообрајќаен режим.

Самитот за сината економија 2023: Пионер во областа на одржливост на слатководни води на Балканот

Тале Кристо — Thu, 21 Sep 2023 13:17:46 +0000

„Водата е најскапоцен ресурс на нашата планета и лулка на животот на Земјата. Водата е крвотокот на нашите земји и мотор на нашата економија“, оваа порака беше испратена на Самитот за сина економија 2023, кој се одржа во хотелот „Панорамика“ во Скопје, организиран од Prime Blue Institute во партнерство со PrimePoint Partners и Централно-европската иницијатива (ЦЕИ). Овој настан ги обединува експертите, меѓународните финансиски институции, банките, приватниот сектор и претставниците на регионалните комори, како и креаторите на политики, за да се осврнат на критичните прашања во зачувувањето на слатките води и одржливиот економски развој на Балканот. Самитот има цел да ја поттикне соработката, да размени знаење и да ги идентификува можностите за партнерство за одржливи иницијативи за слатководни води. Teмите се усогласени со агендата за сина економија на ЕУ, зелениот договор на ЕУ и агендата на ОН 2030. На отворањето на настанот учествуваа истакнати личности, меѓу кои Зоран Мартиновски, претседавач на Самитот и претседател на PrimeBlue Insitute, Дејвид Гир, амбасадор на ЕУ, Ами Ларсон Џаин, амбасадор на Шведска, Каја Шукова, министерка за животна средина и просторно планирање. Тие ја истакнаа важноста на регионалната соработка и меѓународните партнерства во одржливоста и валоризацијата на слатководните води. Меѓу другите говорници се и Вирџинијус Синкевичиус, еврокомесар за животна средина, рибарство и поморство од Комисијата на ЕУ, Бјорн Габриел, претставник на ЕИБ во земјата, Патриша Цејсенс, поранешна министерка на Белгија и други значајни личности. Агендата на самитот опфаќа широк спектар на критични прашања за одржливост, со фокус на екосистемите на езерата и иницијативите насочени кон обезбедување одржлив економски раст на градовите на езера. Во рамките на дискусиите ќе бидат обработени теми за глобалните водечки иницијативи во сината економија, можностите за зелени и сини финансии, најдобрите практики во валоризирање на секторите на сината економија, како што се одржливиот туризам и земјоделството, како и еколошката општинска инфраструктура. Самитот на сината економија 2023 година е клучен настан, кој ги поттикнува соработката и иновативното размислување за да се ослободи целосниот потенцијал на сината економија во регионот на Балканот. Тоа е чекор кон градење на просперитетна иднина, каде што нашите езера напредуваат, заедниците покрај езерата се развиваат и водните ресурси се зачувани за генерациите што доаѓаат. Prime Blue Institute e организација посветена на промовирање одржливост во езерските градови и секторите на слатководна сина економија.

Мерки против мајмуните пред Самитот на Г20 во Индија

Тале Кристо — Wed, 30 Aug 2023 16:02:21 +0000

Во пресрет на Самитот на лидерите на Г20 што ќе се одржи во Индија од 9 до 10 септември, во главниот град Њу Делхи се преземени одредени мерки за да се држат мајмуните подалеку од посетителите и местата што ќе се користат за време на Самитот. Според извештајот на Би-Би-Си, локалните власти направиле планови да ги спречат мајмуните да им наштетат на посетителите и локациите за време на Самитот на Г20. Една од мерките, како што наведуваат, е да се направат мајмуни од картон во природна големина со цел да се исплашат. Надлежните рекоа дека картоните ќе бидат закачени на места каде често се гледаат мајмуни, како и во хотели каде ќе престојуваат делегатите кои ќе присуствуваат на Самитот. Официјалните лица рекоа дека меѓу 30 и 40 обучени луѓе кои можат да ги имитираат звуците на ленгурите, исто така ќе бидат распоредени за да ги исплашат мајмуните.

Саудиска Арабија и други земји даваат мировен преглед на Самитот за војна во Украина

Тале Кристо — Sun, 06 Aug 2023 16:32:31 +0000

Саудиска Арабија и неколку други земји ги предложија контурите на потенцијалниот мировен план за војната во Украина на Самитот што се одржува викендов во Џеда, изјавија за ДПА дипломати кои се во тек со денешните разговори. Официјални лица од околу 40 земји, вклучувајќи ги Украина, САД, земјите од Европската унија и Кина се состанаа во крајбрежниот град Џеда, а Русија не беше поканета да присуствува. Саудиска Арабија, која го организираше и беше домаќин на состанокот, рече дека целта е да се најде „политички и дипломатски начин“ за ставање крај на војната против Украина. Саудиска Арабија, која одржува добри врски и со Русија и со Украина, не откри кои земји учествуваат на состанокот. Извори за ДПА изјавиле дека саудиските домаќини ја информирале Русија за напредокот на разговорите, но не дале дополнителни детали. Претставниците на некои земји денеска одржаа билатерални состаноци на маргините на разговорите. Според изворите, американскиот советник за национална безбедност Џејк Саливан се состанал со шефот на канцеларијата на украинскиот претседател, Андриј Јермак. Можните контури на мировниот план се повик за прекин на огнот на сите фронтови и мировни преговори со посредство на Обединетите нации меѓу Русија и Украина, посочија дипломатите, но не кажаа кои земји освен Саудиска Арабија ја поддржале идејата, јави ДПА. Планот, според изворите, ќе се заснова на зачувување на територијалниот интегритет на Украина и исто така повикува на размена на воени заробеници. Јавна потврда за предлогот нема.

На средбата на лидерите од Медитеранот договорен фонд за инвестиции

Катерина Бојаџиева — Mon, 24 Jul 2023 06:16:17 +0000

На Самитот на лидерите од Медитеранот, одржан синоќа во Рим, беа утврдени насоки за формирање фонд за финансирање инвестициски проекти и гранична контрола, со цел подобро регулирање на миграциските текови. На почетокот на Конференцијата за развој и миграција, на која се собраа лидерите на околу 20 земји, италијанската премиерка Џорџа Мелони рече дека сака да промовира нов начин на соработка меѓу земјите на имиграција и земјите на емиграција, по примерот на договорот што Европската Унија го потпиша со Тунис со цел да се спречи доаѓањето на мигрантите на стариот континент. Премиерката најави создавање фонд каде ќе се собираат парите на донаторска конференција, чиј датум не е утврден. Оваа иницијатива веќе е поддржана од Обединетите Арапски Емирати со околу 100 милиони евра. На самитот не беа усвоени други конкретни мерки, но тоа е „почеток на долг процес“, додаде Мелони. На средбата, покрај лидерите на Медитеранот, беа и претседателката на Европската комисија, Урсула фон дер Лајен и претседателот на Европскиот совет, Шарл Мишел, како и претставници на ОН и меѓународните финансиски институции.

Премиерот Ковачевски предводи владина делегација на Самитот на НАТО во Вилнус, Литванија

Ристе Здравков — Mon, 10 Jul 2023 13:02:28 +0000

Претседателот на Владата на Република Македонија, Димитар Ковачевски, на 11 и 12 јули 2023 година ќе учествува и ќе ја предводи делегацијата на Република Македонија на Самитот на НАТО Алијансата, што се одржува во Вилнус, Литванија. Во состав на владината делегација се министерот за надворешни работи, Бујар Османи и министерката за одбрана, Славјанка Петровска. На 11 и 12 јули претседателот на Владата, Димитар Ковачевски ќе учествува на состаноците на шефови на држави и Влади членки на Северноатлантскиот совет, и поканетите шефови на држави и Влади на партнерски земји Австралија, Грузија, Јапонија, Република Кореја, Нов Зеланд како и претседателите на Европскиот совет и Европската комисија. На Самитот е предвидено да учествува и претседателот на Украина Володимир Зеленски. На Самитот на НАТО во престолнината на Литванија, Вилнус ќе се говори за ургентните безбедносни предизвици. Во фокус на состаноците на лидерите на Северноатлантскиот совет предвидено е да биде зајакнувањето на поддршката за Украина и зајакнувањето на врската на НАТО со Украина преку формирање на Советот НАТО-Украина. Лидерите ќе говорат за унапредување на одбранбените капацитети, споделување на обврските за снабдување со ресурси, како и нови одбранбени регионални планови и зајакнување на партнерствата. Во рамки на учеството на Самитот на НАТО, предвидено е претседателот на Владата, Ковачевски да оствари билатерални средби со премиерката на Естонија Каја Калас и премиерот на Грција Киријакос Мицотакис. Во програмата се предвидени и неформални состаноци на министрите за одбрана и надворешни работи на кои ќе учествуваат и министерот за надворешни работи Бујар Османи и министерката за одбрана Славјанка Петровска. На Самитот на НАТО премиерот Ковачевски ќе биде придружуван од сопругата Елена Ковачевска, која ќе има свои активности во рамки на програмата за сопружници во организација на Првата дама на Литванија, Дијана Науседа. Сопругата на претседателот на Владата, Елена Ковачевска ќе го посети Центарот за деца и жени бегалци од војната во Украина, каде ќе се сретне со Првата дама на Украина, Олена Зеленска. Во рамки на посетата, Ковачевска ќе присуствува и на настани посветени на литванската култура и уметност.

Самит на 100 нации за борба против смртните случаи во сообраќајни несреќи

Тале Кристо — Mon, 26 Jun 2023 19:37:44 +0000

Шефовите на националните агенции за безбедност на патиштата од околу сто земји ќе се состанат неделава во Стокхолм на инаугуративниот глобален Самит за безбедност на патиштата, чија цел е да се справи со злото од смртни случаи и повреди во сообраќајни несреќи ширум светот. Самитот, што ќе се одржува два дена почнувајќи на 28 јуни, ќе поттикне активности за исполнување на глобалната цел за намалување бројот на смртни случаи и повредени во сообраќајки за половина до 2030 година. Оваа цел е поставена во Декадата на Обединетите нации за акција за безбедност на патиштата 2021-30. Се проценува дека сообраќајните несреќи убиваат повеќе од 1,3 милиони луѓе секоја година, со девет од десет смртни случаи во земјите со низок и среден приход. Според СЗО, сообраќајните несреќи остануваат водечка причина за смрт кај децата и младите на возраст од пет до 29 години во светот.

“AI Tech Summit”- Прв меѓународен високо-технолошки самит за вештачка интелигенција во Скопје

Ристе Здравков — Mon, 12 Jun 2023 10:00:08 +0000

За прв пат во Скопје, од 29-ти до 30-ти септември 2023 година во салата на Националната Опера и Балет, ќе се одржи водечки меѓународен високо-технолошки самит. Темата на самитот е истражувањето на моќта на вештачката интелигенција и новите технологии. Светски реномирани експерти за вештачка интелигенција од водечките светски комании како Microsoft, Google, Spotify, BBC, Boston Consulting Group, Wipro, Universal Robots и други, ќе бидат дел од говорниците и панелисти на првото издание на „AI Tech Summit“ во Скопје. Главни теми кои ќе ги опфати самитот се: Иднината на работата во ера на Вештачка интелигенција, етичките и правните норми и нивна примена, користењето на вештачката интелигенција во индустриите, како и соработката и ко-еволуција на вештачката интелигенција со луѓето за унапредување на човештвото. "AI Tech Summit“ e во организација на TBM Group, водечка европска компанија за организација на светски реномирани конференции. За повеќе информации и билети, посетете ја веб страната www.techsummit.ai Следете го "AI Tech Summit" на социјалните медиуми и поврзете се со светски познати експерти. Билетите се ограничени. Не пропуштајте ја шансата да ја обликувате иднината. Бидете дел од револуцијата на вештачката интелигенција.