самка ибраимовски – Kurir.mk

Ибраимовски: Властите го рушат угледот на ромските политички партии, по рамазанските пости ќе организираме протест

Ивана Ефремовски — Sat, 08 Apr 2023 14:06:23 +0000

По повод Меѓународниот ден на Ромите - 8 Април, Партијата за целосна еманципација на Ромите (ПЦЕР) одржа прес-конференција во Тетово.

Претседателот на партија Самка Ибраимовски порача дека властите направиле грешка во начинот на одбележување на Меѓународниот ден на Ромите.

-Да им порачам на власта, на премиерот, на претседателот на државата дека традицијата од 30 години од осамостојување на Македонија вчера го рушија тој углед на ромските политички партии во РСМ, каде секоја година имавме покана од претседателот на државата и премиерот на разговор во делот на проблемите на ромската заедница. Ги собраа невладините организации, кои на грбот на ромскиот народ заработија голем износ пари и поединци кои ги викнаа на прослава. Јас сум разочаран. Не дека ќе постигнавме којзнае што, ќе се видиме со претседалот и премиерот, рече Ибраимовски.

Грешката, како што рече, што ја направија ќе има големи последици.

-По рамазанските пости ќе организираме протести, во смисла на дискриминација на Ромите, политички и во секој поглед, се уште е присутна, истакна Ибраимовски.

По повод Меѓународниот ден на Ромите, Ибраимовски потсети на првиот партиски претседател Фаик Абди и неговиот придонес за унапредување на состојбите кај ромската заедница. (МИА)

Самка Ибраимовски најави оставка од функцијата заменик-директор на „Македонија пат“, не биле исполнети ветувањата кон ПЦЕР

Ивона Петрова — Sun, 26 Dec 2021 16:06:18 +0000

Претседателот на Партијата за целосна еманципација на Ромите (ПЦЕР), Самка Ибраимовски денеска најави оставка од функцијата заменик-директор на Јавното Претпријатие за одржување и заштита на магистралните и регионалните патишта „Македонија пат”, образложувајќи ја ваквата одлука со тврдењето дека како партија не им биле остварени ветувањата за нивно учество во извршната власт. Оваа одлука е донесена по денешниот состанок на Централното претседателство на ПЦЕР што се одржа во Тетово. – Утре ќе ја депонирам мојата оставка од причини што не се исполнети ветувањата кои требаа да се исполнат кон нашата политичка партија. Втората одлука е сите едногласно по барање на повеќе ромски политички партии утре да имаме лидерска средба со сите ромски партии – да се донесе ромска платформа каде што ќе настапуваме заеднички на следните парламентарни избори. И тоа беше усвоено едногласно. Трета работа остануваме во коалиција со СДСМ се до средбата со новиот мандатар Ковачевски, да видиме кои се неговите мислења во делот на нашата коалиција, односно дали ќе има парче колач од она што е ветено да се даде на ПЦЕР, истакна Ибраимовски по состанокот. Според Ибраимовски, ПЦЕР како една од најстарите коалициски партнери на СДСМ од осамостојувањето на земјата, сега од новиот мандатар Ковачевски ќе бара поинакво учеството во институциите. – Требаше да бидам генерален директор на „Македонија пат”, не се исполни тоа ветување и нормално е да се повлечам и да оставам простор некој од членовите на СДСМ да ја преземе таа функција, бидејќи не успеавме на некој начин и политичката ситуација која беше во државата, беа локалните избори, кога требаше да настане таа промена, дојдоа локални избори се одолговлечи времето и јас одлучив да ја депонирам оставката и да останеме во коалиција се до разговор со новиот мандатар Ковачевски, потенцира Ибраимовски. Првиот човек на ПЦЕР рече дека Ромите во државата се околу 100 до 120 илјади и очекува во пописот да бидат 7 проценти од вкупното население. – Јас и минатиот попис не го признав, така и сега ако биде процентот ист, нормално дека нема да го прифатам 100 процентно, бидејќи ние ја знаеме бројката на Ромите во Северна Македонија и се што ќе биде под овој сегашен процент ќе биде негативно оценето. Нашите проценки се дека има 100-120 илјади Роми, сега има 2,66 проценти, но по наше треба бидеме над 7 отсто., рече Ибраимовски. На Конгресот на ПЦЕР во 2019 Самка Ибраимовски доби нов мандат да ја води партијата четири години.

Самка Ибраимовски избран за заменик директор на Македонија пат

Катерина Бојаџиева — Tue, 18 May 2021 18:38:49 +0000

Владата ќе му предложи на Собранието за заменик на директорот на Агенцијата за администрација да го именува Агрон Сефери, а на Управниот одбор на Јавното претпријатие за одржување и заштита на магистралните и регионалните патишта – Скопје, му препорача за вршител на должност заменик на директорот, да биде реизбран Самка Ибраимоски.

Коалициониот партнер на Заев незадоволен: Тоа што го имавме го губиме

Тале Кристо — Thu, 20 Aug 2020 11:59:50 +0000

Претседателот на ПЦЕР, пак, Самка Ибраимовски и коалициски партнер на СДСМ рече дека со составот на новата влада неговата партија ќе го изгуби и тоа што го имаше. – Тоа што го имавме го губиме – министерот без ресор за имплементација и стратегија на Ромите. Каде што беше појдовна точка не добивме доволен број гласови. Според принципот на новата влада, ако влезе женско, треба да влезе женско од листата зашто во членот на Изборниот законик треба да влезе 11-тата, а не деветиот, Козаров. Не знам која комбинација би се направила за јас да станам пратеник или Козаров, изјави Ибраимовски по состанокот во СДСМ.

Самка Ибраимоски: Од што почина мојот роднина во затворот во Шутка?

Дарко Андоновски — Thu, 16 Apr 2020 14:55:11 +0000

Пратеникот на ПЦЕР, Самка Ибраимоски бара јавно да се обелоденат причините за смртта на затвореникот кој почина во затворот Шуто Оризари, Сенад Исламовиќ. Станува збор за млад Ром кој имал само 23 години и бил татко на две малолетни деца. -Ова не е првпат да умре млад Ром во затворите во земјава и затоа барам јавно да се каже која е причината за смртта. Исламовиќ е дел од мојата фамилија во Гостивар. Решив да се ангажирам како пратеник да се дознае вистината за смртта на Исламовиќ Сенад од Гостивар, вели Ибраимоски.

На Ибраимовски не му пречи кога се тепаат и навредуваат Ромите во Македонија, но кога него нема да му дадат 300 евра, станува бунтовен

Ивана Ефремовски — Fri, 05 Jul 2019 15:19:27 +0000

Пратеникот од владејачкото мнозинство Самка Ибраимовски, во отворено писмо до јавноста се обраќа до собранискиот спикер Талат Џафери и до Претседателството на Собранието. Во писмото тој реагира што Собранието не му доделило 300 евра за да оди на службен пат. Не би било воопшто спорно ако Ибраимовски и во земјава ги брани правата на Ромите и се грижи за нив, па да сака во Европа да дискутира на тие теми. Но, овој политичар кој е во коалиција со Заев, воопшто не се грижи за Ромите. Така, кога генералниот секретар на Владата, Рашковски, ги навреди, тој не застана во нивна одбрана. Кога неговите сограѓани Роми се тепани, тој смета дека тоа не е негова грижа и воопшто не застанува во нивна одбрана. Но, еве, денес, застана во одбрана на правата на еден Ром, односно, на самиот себеси. Имаше време и подетално да образложи зошто е лут што не му дале 300 евра. Неговата реакција ви ја пренесуваме во целост: -Jас како пратеник во Собранието уште пред 30 дена добив покана за настан кој ќе се одржи во Мерсин, Турција по повод средба и соработка помеѓу пратениците Роми од регионот. Најпрво требаше да одржам средба со градоначалникот на Мерсин, г-дин Вахап Шеќер, со хрватскиот пратеник, г-дин Вељко Кајтази, како и со група пратеници во Парламентот на Турција, во делот на проблематиката за Ромите во Европа и надвор од неа. Јас како пратеник требаше да говорам заедно со Џемал Бекле, пратеник во Собранието на Турција, Вељко Кајтази – пратеник во Собранието на Хрватска на сесијата наречена: „Итноста од политичка поддршка на Ромите и мејнстрим медиумите со цел борба против антициганизмот“ (дискриминација врз Ромите од секаков вид). Не ми се дозволи да патувам иако организаторот обезбеди хотелско сместување и храна. Собранието на Република Северна Македонија требаше да обезбеди само авионска карта која чини околу 290 евра. Го прашувам претседателството на Собранието на Република Северна Македонија, дали Собранието нема 300 евра да плати за авионска карта за службено патување, или и во ова поле има дискриминација, или пак, е празна касата. Му благодарам на Претседателството на Собранието и ги прашувам како ќе одат во Соединетите Американски Држави ако немаат пари. Доколку дознаам како пратеник дека поради тоа што сум Ром не ми дозволуваат да патувам или сум дискриминиран, тогаш нема ни потреба да бидам во тоа Собрание“, порачува Ибраимовски.

Што се случи таа вечер во Шутка? – Пратеникот Ибраимовски побара одговори од МВР за инцидентот

Предраг Кукиќ — Fri, 01 Feb 2019 13:15:15 +0000

Пратеникот од Партијата за целосна еманципација на Ромите, Самка Ибраимовски денеска на прес-конференција изрази жалење за инцидентот што се случи деновиве во Шуто Оризари и побара од МВР да даде одговор што навистина се случило, а притворените Роми да бидат пуштени од притвор и да се бранат од слобода или да се стават во домашен притвор. -Бараме од Внатрешната контрола на МВР да утврди што навистина се случило таа вечер во Општина Шуто Оризари и што луѓето, кои се познати како ненасилни и мирољубиви, ги натера на неконтролирано однесување, што на крај заврши за жал, и со примена на сила врз, во тој момент за нив, наводни грабнувачи на деца, рече Ибраимовски. Со цел да не се случи ескалирање на ситуацијата, а по следење на заканите на ФБ, тој побара од МВР да распореди мобилна полициска станица во Шуто Оризари со 24-часовна активност, формирање на полициско одделение и создавање услови за отворање полициска станица во општината, која вели брои околу 30.000 жители. Според него, ако во општината имало мобилна полициска станица до овој инцидент воопшто не би дошло. Кажа и дека дента пред да се случи настанот, група граѓани од Општина Шуто Оризари дошле кај него да се пожалат дека деновиве низ општината се движат сомнителни возила со затемнети стакла и без регистарски табличкки, што кај нив создава загриженост и стравување за нивните деца. Побарале од него да се заложи кај МВР да интервенира или да распореди мобилна полиција. Тој порача дека овој случај не смее да ги наруши односите меѓу Ромите и Албанците кои живеат во општината и апелираше на воздржаност од двете страни.

Самка Ибраимоски во игра за кандидат за претседател

Предраг Кукиќ — Fri, 01 Feb 2019 10:42:11 +0000

Партијата за целосна еманципација на Ромите (ПЦЕР) на пратеникот Самка Ибраимоски, која е дел од владејачката коалиција планира сама да трча на претседателските избори, пренесува Плусинфо. Како што пишува Плусинфо ваков заклучок бил донесен на синоќешниот партиски состанок бидејќи такви барања имало од членовите на партијата, граѓаните Роми, како и од невладините организации од дијаспората. Писмени барање за Ромите да излезат со свој кандидат за претседател пристигнале од иселениците во Франција, Германија, Белгија и други земји.

Самка Ибраимовски преку „Фејсбук“ им нуди вработување на Ромите во Германија (ФОТО)

Предраг Кукиќ — Mon, 10 Dec 2018 20:36:38 +0000

Самка Ибраимовски, пратеник од ПЦЕР во македонското собрание и коалициски партнер на СДСМ на своите гласачи им наоѓа работа во Германија. на неговиот фејсбук профил тој ги повикува сите ѕидари, тесари, градежни работници да го контактираат на мобилниот телефон за работа во Германија. Коментарите на социјалните мрежи се движат во насока дека претставникот на Ромите во македонскиот парламент е Агенција за вработување или за странски инвестиции. -Дојде #ЗаЖивот и за Ромите – ама во Германија. Се прашувам дали е Самка Биро за Вработување или Агенција за Странски Инвестиции?, се вели во еден коментар. -А бре што дочека народот, дојде живот за ромите во Германија. Самка, биро за вработување, ама во Германија, напиша друг.

„Еуроњуз“ се исмева со Самка Ибраимовски, кој гледаше фудбал за време интерпелацијата на Владата (ФОТО)

Ивана Ефремовски — Thu, 12 Apr 2018 14:45:38 +0000

Европскиот информативен медиум „Еуроњуз“ се исмева со македонските пратеници кои за време на гласањето на недоверба за владата. Насловот на веб страната на „Еуроњуз“ гласи „Пратениците гледаа фудбал додека владата се справуваше со гласање недоверба. Во понатамошниот дел од веста, Еуроњуз пишува: -Ова е моментот кога пратениците во ПЈР Македонија беа фотографирани како гледаат Лига на шампионите во парламентот. Овој настан се случи за време на продолжената седница на која опозициска партија побара гласање за недоверба на владата. Поранешниот министер Самка Ибраимоски и пратениците од Демократската унија за интеграција беа видени како го натпреварот на Реал Мадрид против Јувентус. Меѓудругото Еуроњус го контактирало Самка Ибраимоски за коментар, но не пишува дали тој бил достапен или не и дали воопшто дал некој понатамошен коментар.