самоил костадиновски – Kurir.mk

Пукано во таткото на исчезнатиот Самоил Костадиновски пред неговиот дом, се огласија од МВР

Ивона Петрова — Fri, 07 Jul 2023 08:31:13 +0000

Рано утринава е пукано кон таткото на исчезнатиот Самоил Костадиновски, внук на Виолета Бошковска, сопругата на Љубе Бошковски. Кон него пукало, засега непознато лице, кое неофицијално се движело со мотор. -Денеска во 08:38 часот во СВР Скопје е пријавено дека на подрачјето на Аеродром едно лице пукало и го повредило Љ.К. (57) пред неговиот дом. Повредениот бил пренесен во комплексот клиники „Мајка Тереза“ за укажување на лекарска помош. Полициски службеници излегле на местото на настанот и се преземаат мерки за расчистување на случајот, велат од МВР за Курир. Од исчезнатио Самоил веќе неколку месеци нема ни трага, ни глас.

Таткото на киднапираниот Самоил открива детали: Станува збор за цела машинерија, син ми имаше пари кога беше грабнат

Катерина Бојаџиева — Wed, 03 May 2023 08:14:51 +0000

Такаткото на киднапираниот Самоил за „Фокус“ раскажува дека пред да се случи киднапирањето Самоил продал џип во Бугарија за 76.000 евра. -Син ми се занимаваше со купување и продажба на стари возила. Ги купуваше, ги средуваше, па ги препродаваше. Снаа ми оди на работа, во тек на ден тој го чуваше детето, беше посветен на фамилијата. Пред да се случи киднапирањето, тој продаде џип во Бугарија за 76.000 евра. Знам дека од продажбата првин зеде 36.000 евра, а останатите 40.000 ги зеде една недела пред да биде киднапиран. Според моите претпоставки, киднаперите знаеле дека тој има пари во тој период, затоа и бил намамен да дојде на средба со нив-тврди таткото, раскажува Љупчо Костадиновски. Случајот силно одекна во јавноста, кога на 4-ти март семејството на Самоил, кој е внук на поранешниот министер за внатрешни работи Љубе Бошкоски, откри дека е киднапиран. За случајот Обвинителството води постапка против две лица на возраст од 25 и 29 години и тие се во притвор во затворот „Скопје” во Шутка. Љупчо Костадиновски тврди дека освен овие две лица, кои се уапсени за исчезнувањето на неговиот син, вмешана била поголема криминална група. Како што раскажува, според негови сознанија, станувало збор за голема машинерија меѓу кои има и вработени во МВР, за организирана група од околу 50 лица, кои продавале разна дрога по дискотеки во земјава.

Од исчезнатиот Самоил нема ни трага ни глас: Бремената сопруга очајно го чека, ќерка му плаче секој ден – истрагата тапка во место

Ивана Ефремовски — Sun, 09 Apr 2023 15:49:34 +0000

Мина повеќе од месец, но уште нема ни трага ни глас од 26-годишниот Самоил Костадиновски, внук на Љубе Бошкоски. Ниту паричната награда што неговото семејство ја понуди за информации не им донесе добра вест за Самоил. Неговата сопруга и татко му за Канал 5 раскажуваат оти надеж дека не му се случило најстрашното имаат, но незадоволни се од надлежните, чија истрага, како што велат, како да пропаѓа во жив песок. Сопругата на Самоил, која е бремена, низ солзи раскажува дека се моли и посакува тој за Велигден да си дојде дома, жив и здрав, а нејзината тригодишна ќерка, на прозорец го чека татко ѝ секој ден. „Само да го вратат, значи, побрзо да се врати дома. Што и да се случило, има решение за се. Малечката го бара секој ден, секој ден плаче... Јас на себе не можат да си објаснам дека го нема, или дека нешто се случило, а не на дете од три години да му објаснам. Значи, кои и да сте, да се врати здрав и жив, за се има решение, се може да се реши. И парична награда се нуди, само да дознаеме дека е жив. Месец дена живееме во агонија, ниту знаеме дека е жив, ниту пак имаме информации за него.“ Таткото на Самоил, Љупчо Костадиновски, кажа дека се сомнева оти некои од надлежните во институциите ги штитат виновниците, па додека, како што вели, истрагата е во „ќор-сокак“ бидејќи приведените се бранеле со молчење, неговиот друг син, сам се обидува да дознае што се случило со брат му. Според сознанијата на семејството, околу автомобилот со кој било извршено киднапирањето, што после три дена било запалено во атарот на селото Драчево, имало докази кои воделе до сторителите. „Мојот син отиде кај тоа возило таму, кај Три круши во село Драчево, каде што е запалено. Таму, во моментот имаше најдено траги на друго возило. Додека едното горело. Тој што го возел „волвото“ не бил сам, позади него имало уште едно возило, што одело да го земе, да го врати назад од местото на сторување на делото. Имаше траги оставено, бидејќи предходниот ден врнеше дожд, па имаше траги на тоа возило кое се движело, што го земало.“ Нови детални информации, за да не се наштети на истрагата, не откриваат ниту од Обвинителството, ниту од МВР. Од Обвинителството за Канал 5 кажуваат дека интензивно се работи на пронаоѓање на лицето, а потоа и испитување на евентуална кривична одговорност. „Од исчезнувањето на лицето до денес постојано се обезбедуваат докази и се вршат проверки и распити на лица кои со своите сознанија придонесуваат за расчистување на настанот. Врз основа на доказите обезбедени до овој момент, поведена е истрага против две лица за кои постои основано сомнение дека учествувале во дејствија на грабнување на лицето. По предлог на надлежниот јавен обвинител на осомничените им е определена мерка притвор.“....велат од Обвинителството. Засега не е познато дали приведените се единствените инволвирани во случајот со исчезнувањето на внукот на Љубе Бошкоски.

Таткото на киднапираниот Самоил: Нудиме парична награда за било каква информација, не изгубив точак, туку синот! (ВИДЕО)

Дарко Андоновски — Wed, 22 Mar 2023 08:36:21 +0000

Таткото на исчезнатиот Самоил Костадиновски, внук на политичарот Љубе Бошковски, нуди парична награда за информација во врска со исчезнувањето на неговиот син. Вели немаат буквално никаква вест ниту од Обвинителството, ниту пак од неговите пријатели. „Не изгубив точак, туку дете, и по 20 дена не знаеме каде е, што се случило со него, зошто?“, изјавил за А1он, таткото на исчезнатиот Самоил, Љупчо Костадиновски. Љупчо е брат на Виолета, сопругата на Љубе Бошкоски. Полицијата уапси две лица во врска со грабнувањето, но иако поминаа 20 дена се уште нема никаква информација каде е Самоил.

Семејството на киднапираниот Самоил со порака до киднаперите!

Дарко Андоновски — Wed, 15 Mar 2023 15:43:52 +0000

Каде и да е Самоил, што и да се случило, ве молиме ослободете го. Пуштете го да си дојде дома, ние дење и ноќе сме будни, го чекаме да се врати – со овие зборови, во име на целото семејство, им се обраќа на киднаперите Виолета Бошкоска, тетка на киднапираниот Самоил Костадиновски, од кого нема никаква трага дванаесет дена. За „Фокус” Бошкоска вели дека целото семејство живее во агонија. И мајката на Самоил, која живеела во Бугарија, по настанот се вратила во Македонија и на сите им преостанувало да чекаат и да се надеваат дека тој жив и здрав ќе се врати. -Многу боли кога знаеш дека некој од твоите го нема, а ти си немоќен! Постојано плачам, дење и ноќе сме будни, чекаме да се појави на вратата, да дојде… Денес ангажиравме адвокат да влезе во списите, да види што се случува, така да сме барем во контакт со истрагата. Но сепак, сметам дека се направија големи пропусти во истрагата, се дозволи киднаперите да го запалат автомобилот – вели Бошкоска. И сопругата на 26-годишниот Самоил, Орхидеја, вчера излезе пред камери да апелира за помош во неговото пронаоѓање. Кажа дека имало шпекулации дека имал проблем, но тие дома ништо не знаеле. Живеел здрав живот, не пиел алкохол, не користел наркотици. Околу тоа дека бил киднапиран, потврди Обвинителството, кое води постапка против двајца за кривично дело грабнување. Со одлука на Кривичниот совет при Основниот кривичен суд Скопје, на двајцата осомничени им е определена мерка притвор во траење од 30 дена. Бошкоска вели дека таа не ги знаела, но Самоил ги познавал двете осомничени лица кои сега се во притвор. Сивиот опел во кој киднаперите го возеле момчето, е запален и целосно изгорен. Што се случило со него, се уште не се знае.

Киднаперите го запалиле возилото со кое го возеле Самоил, „Опелот“ е најден во Драчево

Ивана Ефремовски — Tue, 14 Mar 2023 20:26:15 +0000

Киднаперите го запалиле „опелот“, со кој што го возеле внукот на Љубе Бошкоски, Самоил. Ова во изјава за Канал 5 го истакна сопругата на Самоил, Орхидеја. Таа вели дека имаат сознанија оти возилото со кое бил грабнат, по три дена било пронајдено запалено во Драчево, но очекуваат институциите да им објаснат што точно се случило. „Не загрижува неажурноста на надлежните да се пронајде мојот сопруг. Меѓудругото колата со која е извршено киднапирањето после три дена е пронајдена запалена во атарот на селото Драчево. Се што беше направено досега не доведе до пронаоѓање на Самоил. Шпекулирање имаше дека имал проблем, но дома ништо не кажал… Молам да ни се помогне да се пронајде, се молиме дека е жив, кој и да го видел, секоја информација ни е добредојдена, изјави Орхидеја Костадиновски за Канал 5.

ЕМОТИВНИ СВЕДОШТВА: Се огласија таткото и сопругата на киднапираниот Самоил Костадиновски (ВИДЕО)

Ивана Ефремовски — Mon, 13 Mar 2023 17:46:17 +0000

Таткото и сопругата на киднапираниот Самоил Костадиновски со емотивни сведоштва се огласија за Канал 5 телевизија. По момчето кое е внук на Љубе Бошковски, се трага веќе 10 дена. Две лица се во притвор, но од Самоил ниту трага, ниту глас. Неговата сопруга низ солзи вели дека се моли да го пронајдат жив и дека живее во страв како ќе ги расте децата без татко. Таа и Самоил веќе имаат едно дете, а сега е бремена и со второто. Велат дека ниту пиел, ниту користел дрога. Бил спортист кој освојувал награди. За причината за киднапирањето немаат информација, но таткото изјави сомнеж дека во прашање се пари. Основното јавно обвинителство Скопје донесе Наредба за спроведување истражна постапка против две лица за кои постои основано сомнение дека извршиле дејствија на кривично дело – Грабнување од член 141 став 1 во врска со член 22 од Кривичниот законик. Тие на 3 март заедно учествувале во дејствија на грабнување на едно лице во Кисела Вода. Осомничените, на возраст од 30 и 25 години, претходно по предлог на Обвинителството, а со решение на Судот беа задржани во краткотраен притвор во траење од два пати по 48 часа со цел обезбедување докази. Бидејќи постојат околности што укажуваат на опасност од бегство, особени околности кои го оправдуваат стравот дека осомничените ќе се обидат да ги скријат или уништат трагите на кривичното дело, ќе влијаат врз сведоците или ќе го повторат делото, јавниот обвинител до судијата на претходна постапка од Основниот кривичен суд Скопје сега достави предлог за определување мерка притвор за двајцата осомничени. Во прилогот на КАНАЛ 5, слушнете ги нивните сведоштва:

Уапсените за грабнувањето на внукот на Бошкоски остануваат во притвор, еве што велат од обвинителство

Ивана Ефремовски — Mon, 13 Mar 2023 14:38:27 +0000

Основното јавно обвинителство Скопје донесе Наредба за спроведување истражна постапка против две лица за кои постои основано сомнение дека извршиле дејствија на кривично дело – Грабнување од член 141 став 1 во врска со член 22 од Кривичниот законик. Тие на 3 март заедно учествувале во дејствија на грабнување на едно лице во Кисела Вода. Осомничените, на возраст од 30 и 25 години, претходно по предлог на Обвинителството, а со решение на Судот беа задржани во краткотраен притвор во траење од два пати по 48 часа со цел обезбедување докази. Бидејќи постојат околности што укажуваат на опасност од бегство, особени околности кои го оправдуваат стравот дека осомничените ќе се обидат да ги скријат или уништат трагите на кривичното дело, ќе влијаат врз сведоците или ќе го повторат делото, јавниот обвинител до судијата на претходна постапка од Основниот кривичен суд Скопје сега достави предлог за определување мерка притвор за двајцата осомничени. Станува збор за случајот со грабнување на Самоил Костадиновски, кој за исчезнат беше пријавен од неговиот брат. Тој е внук на Виолета, сопруга на Љубе Бошкоски.

СЕ ОДМОТУВА КЛОПЧЕТО – овие две лица знаат многу повеќе од сите нас за киднапирањето на внукот на Бошкоски, се бара веднаш да бидат притворени!

Дарко Андоновски — Thu, 09 Mar 2023 18:10:52 +0000

Две лица се приведени и за нив се бара притвор како осомничени дека учествувале во грабнувањето на Самоил Костадиновски, внук на Љубе Бошкоски, дознава „Макфакс“. Извори од Кривичен суд, додаваат дека осомничените се изведени пред судија, кој ќе треба да одлучи дали ќе им определи 48-часовен притвор како што побарал обвинителот кој го води случајот. Истрагата за грабнувањето на Костадиновски ја води МВР во координација со скопското Обвинителство. Лицето беше пријавено за исчезнато, а потоа започнаа и шпекулации дека е киднапиран. Гласините и информациите допреа до Обвинителството, со што се потврдува дека грабнување имало. Изминатите денови се појавија и информации дека Костадиновски е грабнат од криминална група од Албанија и Турција – но ова остана непотврдено од институциите. Шпекулациите беа дека се работи за нерасчистени односи кои тој ги имал со тие лица. Костадиновски за исчезнат беше пријавен од неговиот брат. Потоа, беа земени снимки од безбедносни камери, информации од очевидци, а беа сослушани и лица од кои беше можно да се добијат повеќе информации. 26-годишното момче, Самоил Костадинов е внук од брат на Виолета, сопруга на Љубе Бошкоски. Таа за неколку медиуми веќе има изјавено дека е потресена од целото случување. Ниту таа, ниту семејството, немаат детали информации што се случило со скопјанецот, освен раскажувањата од негови пријатели.