самос – Kurir.mk

Спасувачка акција по превртен чамец во близина на грчкиот остров Самос

Тале Кристо — Mon, 31 Oct 2022 16:49:36 +0000

Четири лица се спасени, а во тек е акција на крајбрежната служба на Грција во морскиот дел јужно од грчкиот остров Самос за пронаоѓање на уште осум мигранти, откако се превртел чамецот со кој се пренесувале, јави дописничката на МИА од Атина. Акцијата, според крајбрежната служба, започнала откако биле информирани од рибарски чамец дека пронашла две лица во конкретниот морски дел. Двајцата спасени биле пренесени во општата болница на Самос, а изјавиле дека во чамецот што се превртил имало уште десет лица. Дополнително, бродот на Фронтекс пронашол и спасил уште двајца мигранти кои исто така ќе бидат пренесени во болница. Во потрагата што е во тек, вклучени се три патролни бродови на крајбрежната служба, еден брод и еден авион на Фронтекс, хеликоптер Супер пума на военото воздухопловство, како и бродови што се наоѓаат во близина.

Се урна хеликоптер во близина на грчки остров

Ивана Ефремовски — Wed, 13 Jul 2022 16:33:33 +0000

Хеликоптер, кој веројатно учествувал во гаснење на пожарот на грчкиот остров Самос, попладнево се урна во море, јави дописничката на МИА од Атина. Според првичните информации станува збор за изнајмен хеликоптер од типот Ми-8 со тројца или четворица членови на екипажот. Веќе е започната спасувачка акција за пронаоѓање на членовите на екипажот. (МИА)

Две лица загинаа по пад на мал авион во близина на грчкиот остров Самос

Ивана Ефремовски — Mon, 13 Sep 2021 19:55:12 +0000

Безживотни тела на две лица биле принајдени и извлечени од грчката крајбрежна служба по падот на мал авион од типот „Цесна 172“ во морскиот дел во близина на грчкиот остров Самос, јави дописничката на МИА од Атина. Според првичните информации од Грција станува збор за приватен израелски авион, кој полетал од Израел, а над островот му се загубила трагата. (МИА)

Гомен шумски пожар на грчкиот остров Самос

Тале Кристо — Fri, 16 Jul 2021 08:02:39 +0000

Голем шумски пожар е активен од вчера на грчкиот остров Самос, а противпожарните сили се зајакнуваат со пожарникари и возила од Атина, јави дописничката на МИА од Атина. Според локалните медиуми, по битката со огнените јазици во текот на ноќта, ситуацијата денеска е подобра, а активни се три жаришта. Интервенираат 85 пожарникари со седум пешадиски тима, 17 возила, пет авиони (четири канадери и Бериев), шест хеликоптери, а од Атина, со брод, на островот пристигнуваат 52 пожарникари со 22 возила. Вчера, превентивно беа евакуирани два хотели и три куќи, а доцна синоќа до жителите на пет села беше испратена и порака од Секретаријатот за цивилна заштита преку бројот за итни случаи 112.

По превртен брод во близина на грчкиот остров Самос, излвлечено безживотно тело на едно дете, спасени се 25 мигранти

Магдалена Андонова — Mon, 09 Nov 2020 10:18:12 +0000

Крајбрежната служба на Грција во текот на вчерашниот ден интервенирала за спасување на мигранти, чиј брод се превртел во близина на грчкиот остров Самос, а било извлечено безживотното тело на едно дете, јави дописничката на МИА од Атина. Биле спасени вкупно 25 мигранти, а дел од нив успеале сами да стигнат на копно. Денеска, биле уапсени две лица, меѓу кои и криумчарот кој воедно и управувал со чамецот. (МИА)

Повторно пожар и инциденти во прифатниот центар за бегалци и мигранти на грчкиот остров Самос

Тале Кристо — Mon, 27 Apr 2020 13:18:16 +0000

По вчерашните пожари и инциденти во прифатниот центар за бегалци и мигранти на Самос, министерот за миграција и азил на Грција, Нотис Митаракис, утре ќе го посети грчкиот остров, објавија локалните медиуми. Во прифатниот центар за бегалци и мигранти, утрово повторно имаше пожар и инциденти, а изгореле неколку контејнери за сместување, додека, пак, според државната телевизија ЕРТ, досега, уапсени се 29 лица, јави дописничката на МИА од Атина. Митаракис, во интервју за грчката телевизија Алфа, истакна дека по синоќешните инциденти во кои изгореа многу шатори, дел од бегалците и мигрантите, времено се наоѓаат на импровизиран фудбалски терен. Според ЕРТ, на конкретниот простор има околу 2.000 бегалци и мигранти.

Пожари и изгорени шатори пред прифатниот центар за бегалци и мигранти на грчкиот остров Самос

Тале Кристо — Mon, 27 Apr 2020 08:47:33 +0000

Целосно изгореа дел од шаторите во околината на прифатниот центар за бегалци и мигранти на грчкиот остров Самос во пожарите што од непознати причини избувнаа синоќа и во текот на ноќта, објавија локалните медиуми. Во првиот пожар, според невладината организација „Доктори без граници“, изгореле шатори и околу 100 лица останале на улица, а кусо подоцна избиле уште најмалку два пожари исто така во околината на прифатниот центар, јави дописничката на МИА од Атина. Од „Доктори без граници“, преку социјалните мрежи соопштија дека им помагаат на бегалците и мигрантите и одново, во текот на ноќта биле поставени шатори. Информативниот портал „Самос24“ кусо пред полноќ објави дека се евакуирани дел од бегалците и мигрантит, а според локалните медиуми од островите, дел од барателите на азил ноќта ја поминале на импровизиран фудбалски терен. Во прифатниот центар, освен Противпожарната служба, која интервенирала во гаснењето на пожарот, големо било присуството и на полицијата. Причините за пожарите засега не се познати, ниту пак дали има повредени бегалци и мигранти. Во прифатниот центар за регистрација на бегалци и мигранти на Самос, со капацитет да прими 648 лица, сместени се над 6800 баратели на азил.

Пожар во бегалски камп на Самос, властите ги евакуираат мигрантите

Ивона Петрова — Tue, 15 Oct 2019 07:05:21 +0000

Грчките власти евакуираат преполн прифатен центар на егејскиот остров Самос, каде избувна голем пожар по судир меѓу мигранти сместени во кампот. Полицијата соопшти дека во пожарот во кампот Вати нема повредени. Објектот е предвиден за неколку стотици луѓе, а во него живеат повеќе од 4.000 мигранти. Причината за пожарот кој избувнал по судири меѓу мигранти од Авганистан и Сирија се уште не е непозната. Во судирите се повредени најмалку три лица. Минатиот месец на Лезбос беше убиен еден барател на азил.

Пронајдени 13 мигранти, меѓу кои и мртва жена на грчкиот остров Самос

Ивона Петрова — Fri, 06 Sep 2019 08:41:41 +0000

Крајбрежната служба на Грција, кусо по полноќ, пронајде 13 мигранти на плажа на грчкиот остров Самос, меѓу кои и мртва 65-годишна жена, објавија грчките медиуми. Грчката новинска агенција АНА-МПА, повикувајќи се на сведоштва на мигрантите, пишува дека жената починала за време на патувањето од турското крајбрежје кон Самос. Според истите информации, грчката крајбрежна служба спровела акција за пронаоѓање на криумчар, кој наводно од чамецот се фрлил во морето за да избега. Како што јави дописничката на МИА од Атина, на грчкиот остров Самос, според официјалните информации од грчката Влада, заклучно со 4 септември 2019, има 4.989 бегалци и мигранти. МИА