сан марино – Kurir.mk

ЕВРОПА ЗАНЕМЕ – претставникот на Сан Марино јаваше механички бик на сцената, се бакнуваше со момче и перверзно го копираше овој победник (ВИДЕО)

Дарко Андоновски — Fri, 13 May 2022 10:11:07 +0000

Претставникот на Сан Марино, Акиле Лауро ја шокираше, а во ист момент и ја воодушеви публиката на Евровизија со својот провокативен настап. Поради шминката и провокативниот стајлинг некои од фановите на Евровизија пишуваат дека е „копија на Дамиано Давид“, фронтменот на групата „Манескин“, кои минатата година победија на Евровизија. Претставникот на Сан Марино кој за време на настапот никого не остави рамнодушен, се бакнуваше со гитаристот во уста. Меѓутоа, тоа не е се, во еден момент на сцената јаваше механички бик. Како изгледал настапот на претставникот на Сан Марино, погледнете во видеото во продолжение…

Мото ГП: Бањаја ја освои ГН на Сан Марино

Тале Кристо — Sun, 19 Sep 2021 15:02:25 +0000

Италијанецот Франческо Бањаја (Дукати) победи на трката од Светското првенство во мотоциклизам за Големата награда (ГН) на Сан Марино на патеката во Мисано во елитната класа во Мото ГП. За Бањаја ова е втора победа во серија, откако минатата недела Италијанецот триумфираше во Алканиз. Французинот Фабио Квартараро (Јамаха) мина втор низ целта во Мисано, а третото место го освои италијанскиот возач Енеа Бастијанини. Квартараро и натаму има голема предност во генералниот пласман и води со 234 бодови, пред Бањаја со 186. Следната трка во најсилната класа во Мото ГП ќе се вози на 3 октомври во Остин, Тексас.

„Оваа мала европска држава го победи коронавирусот бидејќи не е членка на ЕУ“

Ивана Ефремовски — Mon, 12 Jul 2021 13:47:15 +0000

Мала земја во Европа, со 34.000 жители, може да здивне откако вакцинираше над 70% од населението и се подготвува да прогласи крај на пандемијата. -Станува збор за Сан Марино, а победата над коронавирусот може да се припише на фактот дека земјата не е членка на ЕУ, затоа не мораше да ги следи строгите правила на регулаторните тела на Унијата, за кои вакцини може употреба, пишува „Раша Тудеј“. Според текстот, властите во Сан Марино решиле да ја набават и руската вакцина „спутник В“ и со тоа вакцинирале добар дел од населението. Сега, нивните експерти направија анализа што укажува на тоа дека сите оние кои примиле Спутник развиле многу малку несакани ефекти и добиле доволна количина антитела. Истражувањето го опфати периодот од 4 март до 8 април и во него учествуваа околу 2.500 лица, на возраст од 18 до 89 години. Исто така, е наведено дека вакцината покажала ефикасност од 91,6 проценти во различни возрасни групи, како и ефикасност од 100 проценти во случај на различни видови на коронавирус. Со тоа Сан Марино го премина прагот од 70% од целосно имунизираното население уште во мај. И бидејќи не е земја членка на ЕУ, властите во Сан Марино не мораа да ги земаат предвид строгите правила на ЕУ според кои Спутник V сè уште не е регистриран и одобрен. Исто така, покрај руската вакцина, Сан Марино ја користеше и вакцината на „Фајзер“. Со оглед на бројот на целосно вакцинирани, Сан Марино сега ги повлекува рестриктивните епидемиолошки мерки, додава РТ.

Сан Марино пред банкрот

Тале Кристо — Sun, 05 Jul 2020 16:01:14 +0000

На Република Сан Марино и се заканува опасност од банкрот поради економската криза која ја зафати по пандемијата на новиот коронавирус, а поради нејзиниот долг би можеле да ја загуби својата 1.300-годишна самостојност, пишува весникот „Ил фато Квотиџиано“. Република Сан Марино на почетокот од пандемијата не сакала, од економски причини, да воведе карантин, а откако се заразиле 1.200 граѓани од вкупно 33.000, тогаш властите биле принудени да воведат рестриктивни мерки. Уште пред пандемијата банкарскиот систем на Републиката се наоѓал во колапс, долговите на земјата се зголемиле на 360 милиони евра, а сега за да избегнат финансиско уништување, властите во Сан Марино бараат помош од официјален Рим и Банката на Италија. Република Сан Марино долги години беше даночен рај, идеално место за криење пари и прикривање траги на компании, чие богатство сопствениците не можеле да го докажат. – Милионите исчезнаа, „ги проголтаа банките“, тврди Џузепе Марија Морганти, советник на опозициската Демократска партија. Од 11 банки, шест банкротирале, загубите морала да ги надополни државата, а една банка е национализирана. Во последните пет години богатството на Републиката е двојно намалено, бруто домашниот производ пред пандемијата бил помал за 28 отсто, а поради Ковид-19 и карантинот се намалил за уште 12 процента. За да ја ублажи економската криза, Република Сан Марино испечатила државни обврзници „Титано“ во вредност од 500 милиони евра. Еден „титано“ вреди едно евро, но тоа не е доволно, бидејќи недостасуваат пари за исплата на пензии и за живот, пишува весникот. Дури се размислува и за воведување ДДВ, што би претставувало преседан во историјата на најмалата држава на светот. „Ил фато Квотиџиано“ наведува дека доколку не му се помогне на Сан Марино, би можел да „падне“ во раце на кинески или руски капитал, а потоа тие две земји би можеле да го користат за купување гласови во меѓународните институции, како што се ОН, ОБСЕ и слично. Во Сан Марино живеат околу 10.000 Италијанци, кои имаат двојно државјанство, па тоа е уште една причина што дел од италијанските политичари апелираат да се помогне, бидејќи ако банкротира Сан Марино тоа ќе биде трагедија и за Италија, тврди членот на Демократската партија Марко ди Мајо.

Сан Марино со намера да побара заем од ММФ од 300 милиони евра

Ристе Здравков — Fri, 07 Sep 2018 11:35:19 +0000

Сан Марино разгледува барање до Меѓународниот монетарен фонд за заем од 300 милиони евра за поддршка на работата на своите банки кои се оптоварени со долгови, јавија западни медиуми повикувајќи се на извори. Државата од 34.000 жители се уште не е опоравена од рецесијата предизвикана од големата финансиска криза пред 10 години, а нејзините банки се оптоварени со долгови од 1.7 милијарди евра. Тоа е 117 отсто од вкупниот БДП на Сан Марино за 2017 година од 1.45 милиајрди евра. Таму има шест банки што е „наследство“ од време кога тие биле дискретно место за пари на странци особено Италијанци. Централната банка на Сан Марино проценила дека 37 отст од долговите се во категоријата најлоши заеми. Покрај обраќање до ММФ, таа република планира и намалување на платите на вработените во јавниот сектор како рерформа на пензискиот систем.