Сашо Василевски – Kurir.mk

Мукоски, Василевски, Димовски, Арнаудов и Трачуловски добија амнестија

Ивана Ефремовски — Fri, 28 Dec 2018 10:50:59 +0000

Пратениците Крсто Мукоски, Сашо Василевски, Љупчо Димовски, Љубен Арнаудов и Јохан Тарчуловски се помеѓу првите обвинети што добија амнестија за крвавиот четврток на 27 април минатата година, пишуваат дел од медиумите. Покрај петте пратеници, амнестија е одобрена и за вработените во кабинетот на поранешниот претседател на Собранието, Елена Божиновска и Иван Цветановски, како и за обвинетиот Захарије Симовски, браќата Стефан и Михаил Младеновски, Митре Питроповски и Илија Славевски. По барањата за амнестија одлучувал Кривичен совет. Други одлуки се очекуваат во текот на утрешниот ден. Од Јавното обвинителство информираа дека пристигнале 66 барања за амнестија, од кои за 12 биле дадени позитивни мислења. Обвинетите на кои ќе им биде одбиено барањето за амнестија имаат рок од 3 дена за жалба по издавање на решението. Од 33 обвинети за 27 април, барање за амнестија не поднесоа само Митко Чавков, Душко Лазаров, Игор Југ, Јане Ченто и Игор Дурловски.

Пратеникот Сашо Василевски излегува од домашен притвор

Катерина Бојаџиева — Tue, 16 Oct 2018 11:28:44 +0000

Пратеникот на ВМРО-ДПМНЕ Сашо Василевски, кој е обвинет за настаните во Собранието на 27 април минатата година, излегува од куќен притвор откако Кривичниот совет на Основниот суд Скопје 1 ја прифати понудената гаранција во недвижен имот. - Кривичниот совет на одделението за Организиран криминал и корупција при Основниот суд Скопје 1 – Скопје, постапувајќи по предлог на одбраната С.В., обвинет во предметот КОК бр. 40/18 поврзан со настаните од 27.04.2017 година во Собранието на Р.М., по претходно дадено позитивно мислење од надлежното обвинителство,донесе решение со кое ја уважи понудената гаранција во недвижен имот и ја укина мерката куќен притвор, а заради обезбедување присуство во текот на постапката му определи мерки за претпазливост и тоа Обврска на обвинетиот повремено да се јавува на овластено службено лице во судот во Охрид и привремено одземање на патната исправа како и забрана за издавање нова, соопшти Кривичниот суд. Со пуштањето од домашен притвор, Василевски ќе може да присуствува на пленарните седници во Собранието каде во тек е расправата за измени на Уставот. Во куќен притвор и натаму се пратениците Крсто Мукоски и Љубен Арнаудов, кои исто така имаат поднесено барање за укинување на оваа мерка.

„Лидер“ открива скандал во МЕПСО: Сам на себе си дал тендер, ќе снабдува со интернет за 3,5 милиони

Ивона Петрова — Fri, 14 Sep 2018 08:50:44 +0000

Претседателот на управниот одбор, му дал тендер на членот на надзорниот одбор. Компанијата која ја води претседателот на надзорниот одбор на МЕПСО, кој одобрува доделување на тендери, добила тендер од МЕПСО за вклучување на интернет, покажуваат документите до кои стигна Економски Лидер. Директорот на МЕПСО Сашо Василевски, кој во исто време е претседател на управниот одбор доделил тендер од 3,5 милиони денари (56,000 евра) на фирмата НЕОТЕЛ каде што директор е членот на надзорниот одбор на МЕПСО Трајче Черепналковски, пишува Лидер. Се работи за конфликт на интереси од највисок размер, ако се има предвид дека компанијата доделува огромна сума на лице кое е во нејзините управувачки органи. Излегува дека Черепналковски сам на себе си одобрил тендер, затоа што работата на надзорниот одбор е токму да ги следи и одобрува ваквите активности.

Листа на лленови на управен и надзорен одбор на МЕПСО, извор: www.mepso.com.mk

Тендерот е за вклучување на интернет во главната зграда на МЕПСО и се работи за исклучително скапа услуга, затоа што само за една зграда компанијата ќе троши 28.000 евра годишно или нешто над 2000 евра месечно за индтернет со 1 GB брзина. На документот се гледа дека се потпишани двајцата функционери на МЕПСО, едниот како претставник на давателот на услугата а другиот како претставник на државната компанија која е барател на услугата.

Сашо Василевски, директор и претседател на управниот одбор на МЕПСО и Трајче Черепналковски, член на надзорниот одбор на компанијата

Ваквите активности порано беа санкционирани од анти-корупциската комисија, но, затоа што по доаѓањето на власта на СДСМ оваа институција не функционира, се остава простор за вакви коруптивни зделки во кои има конфликт на интереси. Прилози: Договор помеѓу МЕПСО и НЕОТЕЛ вреден 3,5 милиони денари – линк

Пратеникот Василевски на денешното рочиште: „Не ни можам да направам акт на тероризам“

Катерина Бојаџиева — Fri, 24 Aug 2018 19:35:13 +0000

Пратеникот на ВМРО-ДПМНЕ Сашо Василевски кој е еден од обвинетите за терористичко загрозување на уставниот поредок на Република Македонија, на денешното трето рочиште го изнесе својот воведен говор во кој со факти ги нападна бледите и неосновани позиции во обвинението од страна на Основното јавно обвинителство. Тој изјави дека „не ни може да изврши акт на тероризам“, а за што е обвинет. -Со мојот адвокат Сашо Новаковски се знаеме 47 години. Пред да одлучи да ме брани се договоривме прво да ги погледне доказите и да ги согледа фактите.Меѓу другото пред него и пред целото мое семејство се заколнав дека ништо не сум договарал, дека не сум имал некаква умисла.за настаните кои се случија. Жал ми е за повредите, меѓу тие луѓе има многу мои пријатели, меѓутоа јас сум доктор со стотици признанија, благодарници и дипломи и илјадници и илјадници пациенти на кои сум им помагал. Јас не можам да извршам акт на тероризам, рече Василевски. Тој за тврдењата на Обвинителството позиционирани во обвинителниот акт изјави дека ја ставаат Македонија во друштво на ретките земји во кои има стотици политички притвореници и во кои пратеници се стават во притвор: „Вакво обвинение со кое се обвинуваме за тероризам го има само во Македонија и Венецуела“, рече познатиот доктор од Охрид, татко на три деца и пратеник во втор мандат кој меѓу сограѓаните е познат како исклучително културен, благ и чесен човек со одличен углед.

Пратениците Мукоски и Василевски остануваат во домашен притвор

Ивана Ефремовски — Wed, 28 Mar 2018 10:55:50 +0000

По определениот 30-дневен притвор на поранешниот министер за внатрешни работи Митко Чавков и на уште четири лица обвинети за настаните во Собранието на 27 април минатата година, Кривичниот суд го одби барањето на Обвинителството иста мерка да им се изрече и на пратениците Крсто Мукоски и Сашо Василевски. Судот им ја продолжи мерката куќен притвор. На пратениците Љупчо Димовски, Јохан Тарчуловски и на уште две лица им се продолжени мерките за претпазливост. - За С.В. и К.М опфатени со предлогот на Обвинителството, предлогот се одбива како неоснован, а се продолжува мерката „куќен притвор“ определена со решение на Врховен суд на РМ. од 26.03.2018 година, за Љ.Д., Ј.Т., Е.Д.Б. и И.Д., предлогот на Обвинителство се одбива како неоснован, а се продолжуваат мерките за претпазливост определени со решение на Врховен суд на РМ. од 26.03.2018 година, се наведува во соопштението од Судот. За преостанатите лица опфатени со обвинителниот акт, предлогот делумно се уважува и се продолжуваат мерките притвор и мерките куќен притвор, претходно определени со решение на Апелацискиот суд Скопје. Претходно, Кривичниот совет на одделението за организиран криминал и корупција при Основниот суд Скопје 1, постапувајќи по предлог на Основното јавно обвинителство за гонење на организиран криминал и корупција, им определи 30 дена притвор на Чавков, М.П., Д.Л. О.П. и Г.Ѓ, поради постоење на основано сомнение дека сториле кривично дело „терористичко загрозување на уставниот поредок и безбедноста“ од член 313 од КЗ. Против овие решенија странките имаат право на жалба во рок од 24 часа по приемот на решенијата до Апелацискиот суд Скопје. (МИА)

Пратеникот Сашо Василевски останува во притвор, се разгледуваат жалбите на Димовски и Мукоски

Катерина Бојаџиева — Thu, 22 Feb 2018 14:56:06 +0000

Пратеникот Сашо Василевски, началникот во МВР Душко Лазаров, шефот на обезбедување на Трајко Велјаноски, Горан Ѓошевски и началникот на посебните и специјалните единици Митко Пешов, остануваат во притвор, откако Апелациониот суд ги потврди одлуките на Кривичниот суд. Апелациски денеска треба да ги разгледува жалбите и на пратениците Љупчо Димовски и Крсто Мукоски. Апелацискиот суд Скопје вчера им ја преиначи мерката притвор во домашен притвор на пратеникот Љубен Арнаудов и на организаторите на протестите за „Заедничка Македонија“ Борис Дамовски и Богдан Илиевски, осомничени за насилствата во Собранието од 27 април минатата година. Куќен притвор и одземање на пасошот Апелациски им определи и на Јане Ченто, Иван Цветановски кој работел во кабинетот на претседателот на Собранието Трајко Велјановски и на Оливер Радулов од УБК.