седум лица – Kurir.mk

Поднесен обвинителен акт против седум лица за злоупотреба на службена положба и овластување

Тале Кристо — Thu, 31 Dec 2020 11:50:06 +0000

Основното јавно обвинителство за гонење на организиран криминал и корупција до Основниот кривичен суд – Скопје, поднесе Oбвинителен акт против седум лица за сторено кривично дело – Злоупотреба на службена положба и овластување, бидејќи овозможиле правното лице Друштво за спортски активности Тениски Клуб Љуботен ДОО Тетово, да се стекне со право на сопственост на државно градежно земјиште со површина од 4.410 квадратни метри. По спроведената истражна постапка, предметниот обвинител утврди дека во временскиот период од август 2011 година до декември 2012 година, обвинетите З.Т. како претседател на Тениско спортско здружение Љуботен – Тетово и Ц. Н. како управител во правното лице Друштво за спортски активности Тениски Клуб Љуботен ДОО Тетово, со умисла ги потикнале обвинетите А. Н., како лице кое врши работи од јавен интерес и службените лица Џ. А., И. К., К. И. и И. Р. со искористување и неизвршување на нивната службена положба и овластување, да прибават значителна имотна корист за правното лице Друштво за спортски активности Тениски Клуб Љуботен ДОО Тетово, а на штета на средствата на државата – сопственост на градежно земјиште, во вредост од 22.050.000 денари. – Обвинетите З. Т., А. Н, К. И., И. К. и Џ. А. овозможиле, правното лице, противправно да се стекне со право на сопственост на непостоечки објект со површина од 122 квадратни метри, а се со цел исполнување на условите од член 23 од Законот за постапување со бесправно изградени објекти и член 20 од Законот за приватизација и закуп на градежно земјиште во државна сопственост, со кои се пропишува стекнувањето на право на сопственост на објект и ексклузивно правно на откуп на земјиште, како и негова приватизација. Обвинетиот Ц.Н. со намера правното лице да се стекне со право на сопственост на градежно земјиште во државна сопственост во површина од 4.410 квадратни метри, спротивно на член 14 став 3 и член 20 од Законот за приватизација и закуп на градежно земјиште во државна сопственост, иако градежната парцела не била дефинирана со урбанистички план, ниту правното лице градежното земјиште го користело по основ на стекнато право на сопственост на објект со правна основа, спротивно на законските услови, поднел Барање за купување на градежно земјиште сопственост на Р. Македонија. Кон Барањето поднел Извод од план изготвен и потпишан од обвинетиот Џ.А. во кој бил внесен невистинит податок, по што обвинетиот И.Р. како службено лице излегол на лице место и по извршениот увид, искористувајќи ја својата службена положба и овластување, во Записник внел невистинит податок дека извршил премер и идентификација катастарската парцела и по увидот во ДУП и ЛУПД, констатирал дека истата се вклопува во намената. Врз основа на ова Министерство за финасии, Сектор за управна постапка, Подрачно одделение за првостепена управна постапка Тетово, донело правосилно Решение за приватизација на градежно земјиште, се вели во соопштението од ОЈО. Со дејствијата опишани во обвинителниот акт обвинетите овозможиле, противправно, правното лице Друштво за спортски активности Тениски Клуб Љуботен ДОО Тетово, да се стекне со право на сопственост на градежно земјиште со површина од 4.410 квадратни метри, откупувајќи го по цена од 43 денари за 1 квадратен метар односно вкупно за 188.307 денари, а на штета на средствата на државата.

Британија: Уапсени седум лица на танкер поради закани кон екипажот

Тале Кристо — Mon, 26 Oct 2020 07:00:15 +0000

Британските безбедносни сили презедоа контрола врз танкерот „Нејв Андромеда“ кој пловел низ Ла Манш, при што се уапсени седум осомничени лица кои им се заканувале на членовите на екипажот. Британската полиција соопшти дека членовите на екипажот на танкерот пријавиле дека седум лица вербално ги нападнале. Операцијата е спроведена во соработка со крајбрежната стража и пограничната полиција. Портпарол на полицијата потврди дека во инцидентот, кој се случил во близина на островот Вајт, нема повредени. Уапсените наводно биле нигериски државјани. Припадниците на крајбрежната стража пристигнале со два хеликоптера на местото кадешто се наоѓа танкерот, а британските власти забраниле пристап во радиус од околу пет километри. Регистриран сопственик на танкерот е либиската „Фолегандрос шипинг корпорејшн“, а со пловилото управува грчката компанија „Навиос танкерс менаџмент инкорпорејтед“. Танкерот требал да пристигне во пристаништето во Саутемптон, а испловил од Лагос, во Нигерија, на 6 октомври.

Предложени парични казни за седум лица во Скопје

Дарко Андоновски — Wed, 29 Jul 2020 07:40:51 +0000

Против седум лица Основното јавно обвинителство Скопје поведе постапка за кривично дело – Непостапување според здравствените прописи за време на епидемија од член 206 став 1 од Кривичниот законик. Обвинетите, спротивно на Одлуката за забрана и посебен режим за движење, за време на важечки полициски час, без дозвола се движеле на различни локации во градот. Јавен обвинител до Основниот кривичен суд Скопје поднесе предлози за издавање казнени налози со кои за обвинетите предложи парични казни од по 100 дневни глоби при што висината на една дневна глоба да биде одредена на 20 евра во денарска противвредност.

Казнени налози за седум лица од Битола за непочитување здравствени прописи во епидемија

Тале Кристо — Tue, 26 May 2020 15:26:55 +0000

Основното јавно обвинителство – Битола денеска до Основниот суд во Битола поднесе пет предлози за издавање казнени налози против седум лица. Во текот на вчерашното деноноќие лицата биле затекнати во движење без поседување на соодветни дозволи. – Со своите дејствија седуммината обвинети сториле кривично дело -Непостапување според здравствените прописи за време на епидемија предвидено и казниво по член 206 став 1 од Кривичниот законик. Обвинителството му предложи на судот сторителите да ги огласи за виновни и да им изрече парични казни во висина од по 100 дневни глоби, а секоја дневна глоба да биде во износ од 20 евра во денарска противвредност., соопштија од ОЈО.

Велешкото обвинителство побара парични казни за седум лица

Дарко Андоновски — Thu, 09 Apr 2020 12:32:47 +0000

За седум Велешани Јавното обвинителство предложи казнени налози по 800 евра за секого од нив. Тие се движеле пеш или со возило. Како што соопштија од ЈО, обвинетите во одделни кривично правни настани го сториле кривичното дело – Непостапување според здравствени прописи за време на епидемија. Тие не ги почитувале мерките и одлуките за забрана на движење на населението.

Најмалку седум лица беа убиени при протестите во Хаити, Владата одлучи да не го поскапува горивото

Дарко Андоновски — Sun, 08 Jul 2018 08:35:06 +0000

Најмалку седум лица беа убиени при протестите против покачувањето на цените на горивото, што беа одржани во Порт о Пренс во Хаити. Демонстрантите опожаруваа автомобили, кршеа продавници и палеа автомобилски пневматици. При протестите, демонстрантите го нападнаа и хотелот „Бест вестерн премиер“. Владата одлучи да ја суспендира одлуката за покачувањето на цените на горивото. Премиерот на Хаити Џек Ги Лафонтан, претходно наведе дека е неопходно да се зголемат цените на горивото со цел да се усогласи буџетот и не даваше никакви знаци дека ќе се откаже од тоа, но неговата Влада ја повлече одлуката откако во главниот град на Хаити избија протести.