сеха лига – Kurir.mk

Васил Гогов од Вардар ја има најатрактивната одбрана во СЕХА лигата

Бошко Тасиќ — Fri, 05 May 2023 04:53:37 +0000

Членот на Вардар 1961, Васил Гогов е креатор на најатрактивната одбрана во четвертфиналните пресметки во СЕХА лигата. Гогов имаше двојна интервенција на пресметката против Војводина во Скопје, а истата беше доволно за да ја освои позицијата број еден на најновата Топ листа. Вицешампионското место пак е резервирано за голманот на Еурофарм Пелистер, Урбан Лесјак кој беше во елемент во дуелот со Татран Прешов.

Вардар 1961 и Еурофарм Пелистер не добија дозвола за настап во Русија на Ф4

Бошко Тасиќ — Sat, 15 Apr 2023 04:27:09 +0000

Раководството на регионалната СЕХА лига објави дека планираните четвртфинални дуели меѓу екипите од дивизиите „Југ“ и „Исток“ нема да се играат. Екипите на Вардар, Еурофарм Пелистер и Партизан, како и победникот од хрватскиот двомеч меѓу Загреб и Нексе, добија забрани од националните олимписки комитети да патуваат во Русија и Белорусија. Вардар требаше да се сретне со белорускиот првак Мешков Брест, а Еурофарм Пелистер со рускиот шампион Чеховски Медведи. По оваа одлука, потврдено е дека на завршниот турнир во Санкт Петербург од 6 до 8 јуни ќе играат екипите на Мешков Брест, СКА Минск, Чеховски Медведи и Пермски Медведи. Дополнително, од раководството на „југот“, треба да објават дали ќе има завршница меѓу најдобрите четири екипи од оваа дивизија.

Вардар избори нов пласман во завршниот фајнал-фор на СЕХА лигата

Бошко Тасиќ — Tue, 11 Apr 2023 19:33:14 +0000

Македонскиот ракометен шампион Вардар со победа во Нови Сад го потврди пласманот на завршниот фајнал фор во СЕХА лигата. Црвено – црните во реваншот од четвртфиналето ја совладаа Војводина со 32-26 и ќе се борат за 6. Рекордна титула во ова натпреварување.

Дека српскиот шампион нема шанси барем со победа да се прости од регионалната лига по убедливиот пораз во Скопје беше потврдено дури во второто полувреме откако Вардар дозволи во првиот дел Војводина да го диктира темпото и да го реши првиот дел со предност од 16-11.

Домашниот тим се бореше успешно некаде до 35-тата минута кога гостите од Скопје полека се стабилизираа и го свртеа резултатот во своја корист и до крајот користејќи ги грешките на неискусниот противник дојдоа до сигурна победа.

Одличен меч одигра Гоце Георгиевски кој постигна 10 погодоци пред Чувара со 7 и 6 на Талески.Вардар во полуфиналето на Фајнал – фор турнирот ќе игра со победникот од дуелот Нексе Загреб додека Еурофарм Пелистер кој го елиминира Татран Прешов го очекува подобриот од пресметката Партизан Веспрем.

Јовиќ: Заслуживме да играме на завршниот турнир во СЕХА лигата

Бошко Тасиќ — Tue, 11 Apr 2023 04:29:06 +0000

Составот на Еурофарм Пелистер го реши Татран Прешов и на втората битка во СЕХА лигата и со вкупни 73-55 се пласираше на завршниот турнир во ова натпреварување. Битолчани беа поубедливи во реваншот каде славеа со десет гола разлика (36-26), резултат на кој му се израдува тренерот, Александар Јовиќ. -Нашите добри настапи ни помогнаа да оствариме две победи над Татран Прешов. Заслуживме да обезбедиме место на завршниот турнир, -порача Јовиќ. Своето задоволство од прикажаното на теренот го искажа и Петар Атанасијевиќ кој беше автор на четири гола од шест обиди. -Дадовме се од себе, тоа е причината поради која добивме уште еден меч против квалитетен тим како Татран, -истакна нашиот репрезентативец.

Вардар на чекор до Ф4 во СЕХА лигата

Тале Кристо — Thu, 06 Apr 2023 18:19:42 +0000

Македонскиот првак Вардар 1961 е пред пласман на фајналфор турнирот во регионалната СЕХА лига, откако вечерва на домашен терен ја совлада Војводина со 38-25 и со убедлива предност ќе патува на четвртфиналниот реванш во Нови Сад. Вардар 1961 немаше проблеми да го совлада противникот кој допатува во Скопје со подмладен состав и веќе на полувреме обезбеди двоцифрена предност (22-11). Најефикасен во редовите на македонскиот состав беше Јан Чувура со десет голови, додека Куни Моралес постигна два помалку. Младиот Васил Гогов запиша 12 одбрани на голот на Вардар 1961. Пред пласман на завршниот Ф4 турнир во регионалната СЕХА лига се и ракометарите на битолски Еурофарм Пелистер, кои претходно оваа недела во првиот натпревар од четвртфиналето пред своите гледачи го совладаа Татран Прешов со 37-29.

Познати термините за натпреварите на Вардар и Еурофарм Пелистер во СЕХА

Бошко Тасиќ — Sat, 01 Apr 2023 11:28:35 +0000

Следната недела Вардар и Еурофарм Пелистер ќе ги одиграат своите први натпревари во СЕХА лигата, сега се познати и точните термини. Прво ќе играат битолчани против Татран Прешов на 4-ти април од 18:00 часот на домашен терен. Вардар исто така дома два дена подоцна ќе игра против Војводина во истиот термин од 18:00 часот. Во реваншот Пелистер против Татран ќе игра на 10-ти април од 16:00 часот, еден ден подоцна Вардар ќе и гостува на Војводина од 16:30 часот.

Ф4 во СЕХА лигата се сели во Русија, домаќин Санкт Петербург

Бошко Тасиќ — Sat, 18 Mar 2023 17:02:34 +0000

Во пресрет на завршницата од групната фаза во дивизијата Југ во СЕХА лигата, раководството на регионалното натпреварување објави дека овосезонскиот завршен турнир ќе се одржи во Русија, поточно во Санкт Петербург од 6 до 8 јуни. На него ќе учествуваат четирите најдобри екипи по завршувањето на четвртфиналната фаза меѓу најдобрите тимови од дивизијата Исток и Југ. Што се однесува до Истокот, во кој учествуваат руски и белоруски тимови, во плеј-офот се пласираа Чеховски Медведи , Мешков Брест СКА Минск и Перм Медведи. Во групната фаза на дивизијата Југ остануваат уште два натпревари во групата Б меѓу Татран и Партизан на 21 и 27 март. После тоа ќе бидат објавени двојките за плеј-офот. Веспрем и Загреб стартуваат од нокаут-фазата со оглед дека се финалисти од минатата сезона. Распоредот од плеј-офот во дивизијата Југ. Во периодот од 21 до 22 април ќе се одиграат реванш натпреварите од четвртфиналето:Победниците од оваа фаза учествуваат на Ф4 турнирот кој од 6 до 8 јуни ќе се одржи во „Сибур Арената“ во Санкт Петербург.

СЕХА Лига: Победа на Еурофарм Пелистер против Нексе

Ивана Ефремовски — Tue, 14 Mar 2023 19:07:39 +0000

Ракометарите на Еурофарм Пелистер вечерва го совладаа традиционално незгодниот хрватски противник Нексе со 27:23, полувреме 14:11. Битолчани средбата ја почнаа под притисок на посакуваниот резултат, но и дополнително мотивирани од новиот стручен штаб предводен од тандемот Јовиќ - Шундовски кои успешно го водеа тимот до победа со која го освоија второто место во групата. Инаку натпреварот се одигра со две различни полувремиња. Во првото Еурофарм Пелистер имаше тесно водство изразено со предност од три голови, а во второто, во периодот од 41 до 48 минута битолскиот претставник во СЕХА лигата водеше со 6-7 и осум голови разлика (20:14, 23:16, 25:17), но на крајот сепак благодарение на одбранетиот пенал на Кизиќ, домашните победија со 27:23, доволна разлика за второ место во групата. Пред околу 1.500 гледачи, најефикасен во двата тима беше домашниот играч Васиљев со шест постигнати голови. Освојувањето на второто место во А-групата, значи избегнување во четвртфиналето на фаворитот ППД Загреб. (МИА)

Вардар и Еурофарм Пелистер добија термини за дуелите во СЕХА лигата

Бошко Тасиќ — Tue, 14 Feb 2023 05:49:25 +0000

Челниците на регионалната СЕХА-лига ги одредија термините за натпреварите на Вардар и Еурофарм Пелистер кои се играат во рамки на четвртата рунда од оваа натпреварување. Вардар 1961 ќе гостува кај Партизан во Белград на „Бањица“, а дуелот е закажан на 28 февруари со почеток од 18:00 часот. Еурофарм Пелистер, пак, ќе биде домаќин на Војводина. Натпреварот во салата „Боро Чурлевски“ е закажан на 2 март од 18:00 часот. Вардар е лидер во групата во СЕХА, додека Еурофарм Пелистер има два порази на две гостински средби.

СЕХА: Пораз за Еурофарм Пелистер на гостувањето кај Нексе

Ивана Ефремовски — Thu, 02 Feb 2023 18:59:12 +0000

Ракометарите на Еурофарм Пелистер во второто коло од ракометната СЕХА лига, втор пат се поразени, вечерва од Нексе во Нашице со 29:25 (15:12).

Традиционално незгодниот хрватски тим за битолчани и овој пат излезе поуспешен во меѓусебниот дуел, освојувајќи лесни бодови и победа која не беше доведена во прашање во нити еден момент од натпреварот.

Првото полувреме заврши со предност на домаќините од 15:12, во вториот дел тимот на Еурофарм Пелистер почна уште послабо, бидејќи Нексе резултатската предност ја зголеми на 7 голови, односно 23:16. Мала надеж за македонскиот претставник се појави во 52 минута кога резултатот на семафорот беше 24:22, но заради грешки во одбраната и на клупата кои судиите ги казнија со двојни изклучувања, на крајот, очекувано, домаќините славеа со 29:25.

Најефикасен во домашниот тим беше Срешен со 6 постигнати голови, а во битолскиот тим статистички најефикасен беше Радовиќ со 5 голови, најголем дел од нив постигнати од линијата од 7 метри.

Натпреварите од ракометата СЕХА лига продолжуваат на 2 март кога во Битола ќе гостува ракометниот клуб Војводина, а групната фаза ќе заврши на 14 март со реванш дуел меѓу Еурофарм Пелистер и Нексе. (МИА)