село герман – Kurir.mk

ВАЖНА ИНФОРМАЦИЈА ЗА ВОЗАЧИТЕ: Доколку возите кон ова место, вратете се – патот e непрооден поради снежна покривка

Магдалена Андонова — Thu, 10 Mar 2022 17:58:16 +0000

Непрооден за сите видови моторни возила, поради снежна покривка, од 7 часот денеска е Регионалниот пат R-2248 од село Ранковце до село Герман, на потегот од село П’ клиште до село Герман,Општина Ранковце. Од АМСМ информираат дека сообраќајот на државните патишта се одвива непречено по наместа влажни коловози. Интензитетот на сообраќај на патните правци надвор од градските средини е умерен. На граничните премини, од македонска страна, нема подолги задржувања за влез и излез од државата. Се препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево. На патниот правец А2 Свети Николе – Миладиновци на 10 км пред Миладиновци, поради свлечиште и голем одрон, сообраќајот е пренасочен само на една коловозна лента во должина од 150 метри. На самото место е поставена соодветна сообраќајна сигнализација. На учесниците во сообраќајот им препорачуваме внимателно возење.

Село Герман отсечено четврти ден, се пробиваат последните осум километри од патот

Дарко Андоновски — Sat, 05 Feb 2022 10:30:21 +0000

Жителите на планинското село Герман во Ранковце четврти ден се без пристап до општината откако вечерта на 1-ви месецов наврна многу снег. Висината на снежната покривка изнесува околу седумдесет сантиметри. Надлежните од Јавното претпријатие Македонија пат информираат дека во текот на вчерашниот ден расчистено е до село П’клиште, а од раните утрински часови специјално возило е повторно на терен и се очекува, согласно временските услови, патот денеска конечно да биде пробиен. -Станува збор за специфична конфигурација на теренот, деновиве интензивно, и по десетина часа се работеше активно за расчистување на овој регионален пат, но соспите што ги навева силниот ветер наместа надминуваат и метар и половина, така што нашите вработени прават натчовечки напори за пробивање на патот и очекуваме, ако времето ни биде наклонето, патот да се расчисти. Години наназад наидуваме на ист проблем и свесни сме дека не можеме ништо против природата, така што, правиме се што е во наша моќ и работиме согласно состојбата на теренот, информираат од ЈП Македонија пат. Жителите информираат дека имаат потреба од набавка на лекови и намирници. Петнаесетте деца кои учат во основно училиште „Христијан Тодоровски – Карпош”, три дена следеа онлајн настава. -Во согласност со временските услови се прилагодивме и наставниот процес изминатите три дена за петнаесетте ученици од селото Герман се одвива онлајн. Тие се активно вклучени во наставата, со доделување наставни содржини, а дополнително, ќе се координираме и физички да се одржат часовите, изјави директорката на училиштето Христина Младеновска.

Село во Македонија втор ден отсечено поради превисока снежна покривка

Магдалена Андонова — Wed, 02 Feb 2022 13:17:32 +0000

Жителите од селото Герман, општина Ранковце, втор ден се отсечени поради високата снежна покривка и наносите од снег кои наместа изнесуваат и над еден метар. Дваесет и девет дечиња што посетуваат настава во училиштето втор ден не се на училиште, но властите веќе работат на расчистување на патниот правец. – Станува збор за планинско село, на 1400 метри надморска височина и снежната покривка е висока, околу седумдесетина сантиметри, додека наносите од снег некаде надминуваат и еден метар. Патот Ранковце-село Герман е регионален, во надлежност на Јавното претпријатие Македонија пат и специјализирани возила за расчистување веќе се на терен. Според моите сознанија речиси половина од патот е пробиен и до попладневните часови се очекува истиот да биде расчистен и да можат жителите непречено да функционираат, информира градоначалникот на Општина Ранковце, Борче Спасовски. Во општината нема формирано снежна покривка, рече Спасовски, бидејќи температурата на воздухот е околу пет степени и снегот што паѓаше вчера попладне и ноќеска, се стопил.