серџо матарела – Kurir.mk

Зеленски на средба со Матарела

Ивона Петрова — Sat, 13 May 2023 12:04:47 +0000

Украинскиот претседател Володимир Зеленски денеска пристигна во Рим и се сретна со италијанскиот претседател Серџо Матарела, а се очекува да се сретне и со други италијански функционери и со папата Франциск, јави ДПА. Зеленски пристигна во палатата Квиринал, официјалната резиденција на Матарела во италијанскиот главен град, нешто по 12 часот (10:00 часот по Гринич), каде Матарела го пречека во дворот. По интонирањето на химните на двете држави, политичарите влегоа во зградата на приватен разговор. Се очекува Зеленски во текот на денот да се сретне и со премиерката Џорџа Мелони како и со папата Франциск. Патувањето во Италија е „важна посета за победата на Украина која доаѓа! напиша Зеленски на Твитер.

Средба Ковачевски – Матарела: Голема поддршка од Италија за натамошниот процес на евроинтеграциите на Северна Македонија во забрзана динамика

Ристе Здравков — Fri, 09 Sep 2022 16:52:38 +0000

Претседателот на Владата на Република Северна Македонија, Димитар Ковачевски, придружуван од заменичката на претседателот на Владата задолжена за добро владеење, Славица Грковска и од министерот за внатрешни работи, Оливер Спасовски, се сретна со претседателот на Италијанската Република, Серџо Матарела. На состанокот се потврдени искреното пријателство и добрите релации помеѓу двете земји, со активен дијалог во билатералните односи, како и од значење за демократскиот развој на нашата држава. На средбата е истакната јасната позиција на Италијанската Република дека проширувањето на ЕУ со земјите од Западен Балкан мора да продолжи, што се покажува неопходно и во рамки на глобалните, актуелни случувања. При тоа е нагласена улогата на нашата држава во регионот, како земја којашто ги решава предизвиците низ храбро лидерство, трпение и мудрости и е најавена голема поддршка од Италија и во натамошниот процес на европските интеграции на Северна Македонија, со цел забрзана динамика до полноправно членство во ЕУ. Премиерот Ковачевски се заблагодари за големата поддршка што ја дава Италија на Северна Македонија во трите децении од воспоставените дипломатски односи, во евроатлантските интеграции и посебно во рамки на процесот со којшто, по 17 години, конечно започнаа преговорите со ЕУ. Претседателот на Владата, Ковачевски, истакна дека нашата држава се постави стопроцентно и навремено на линија на политиките на ЕУ, во однос на војната во Украина, дека применува европски вредности и дека заслужува да биде дел од Европската Унија. На состанокот е разговарано и за други актуелни прашања, посебно околу справувањето со предизвиците за обезбедување енергија, со коишто се соочуваат Европа и светот. Во таа насока е изразена заедничка согласност дека е неопходно ЕУ тесно да соработува и со државите од Западен Балкан, коишто треба да бидат земени предвид при можните решенија. Премиер Ковачевски, на средбата, ја нагласи и важноста на соработката на Северна Македонија и Италија во областа на културата, одбраната – како две држави членки на НАТО, трговијата и инвестициите, а заедно со вицепремиерката Грковска и министерот Спасовски, беше оценета како значајна соработката во областа на борбата против корупцијата, превенцијата и владеењето на правото. При тоа е изразен интерес за нов импулс во економската соработка, посебно во делот на обновливите извори на енергија.

Пендаровски го пречека италијанскиот претседател Серџо Матарела

Магдалена Андонова — Fri, 09 Sep 2022 08:52:14 +0000

На церемонија со највисоки државни и воени почести претседателот Стево Пендаровски денеска го пречека претседателот на Италијанската Република Серџо Матарела, кој престојува во официјална посета на Република Северна Македонија. Претседателот Пендаровски и претседателот Матарела одржаа тет-а-тет средба, по што следуваше пленарен состанок на двете делегации. Во фокусот на разговорите се севкупните билатерални односи меѓу Северна Македонија и Италија, политиката на проширување на Европската Унија, сојузништвото во НАТО и безбедносните предизвици во регионот и во Европа. Претседателот Пендаровски, изразувајќи задоволство од традиционалниот интерес и континуираната јасна и безрезервна поддршка на Италија за македонските евроинтеграции, порача дека интегрирањето на Северна Македонија и на земјите од Западен Балкан во Европската Унија е во интерес на регионалната безбедност и просперитет. По завршувањето на пленарниот состанок на делегациите, предвидено е претседателот Пендаровски и претседателот Матарела да одржат заедничка прес-конференција во 10:45 часот.

Матарела, по оставката на Драги, го распушти Парламентот

Катерина Бојаџиева — Thu, 21 Jul 2022 17:55:53 +0000

Претседателот на Италија, Серџо Матарела денеска го распушти Парламентот по падот на коалициската влада на премиерот Марио Драги. Сè уште не е одреден датумот на парламентарните избори, но италијанскиот Устав предвидува тие да се одржат во рок од 70 дена од распуштањето на Парламентот. Матарела истакна дека се одлучил за вонредни парламентарни избори, осум месеци пред истекот на мандатот на актуелниот парламентарен состав, бидејќи недостигот на поддршка за Драги покажал дека не постои можност да се формира друга влада која ќе има поддршката од мнозинството пратеници. Драги утрово ја достави до Матарела оставката откако се распадна владејачката коалиција, што претставува сериозен удар за Италија, но и за Европа, во време на економска неизвесност предизвикана од пандемијата со Ковид-19 и руската инвазија врз Украина. Политичката криза ја погоди Италија, трета по големина економија во еврозоната, во време кога земјата се бори со висока инфлација. Како и многу други земји, Италија се соочува со зголемени цени од храна до комунални услуги, како резултат на руската инвазија врз Украина, а земјата исто така е погодена од долготрајна суша.

Италијанскиот претседател Матарела не ја прифати оставката на премиерот Драги

Ивана Ефремовски — Thu, 14 Jul 2022 18:54:50 +0000

Италијанскиот претседател Серџо Матарела не ја прифати понудената оставка на премиерот Марио Драги. Тој побара од Драги да се обрати во Парламентот за да ја процени актуелната политичка ситуација. Италијанскиот премиер Марио Драги претходно најави дека вечерва ќе поднесе оставка до италијанскиот претседател Матарела, откако неговата партија од владејачката коалиција не учествуваше на гласањето за доверба на Владата. -Условите веќе не се такви за да можам да продолжам да ги извршувам своите должности, истакна Драги. Во соопштението од неговиот кабинет се наведува дека „веќе нема коалиција на национално единство што ја поддржуваше оваа влада“. Претходно денеска, италијанскиот кабинет доби доверба во Парламентот. Сепак, гласањето беше бојкотирано од Движењето „Пет ѕвезди“ – една од формациите на владејачката коалиција. (МИА)

Матарела положи заклетва за нов мандат на претседател на Италија

Магдалена Андонова — Thu, 03 Feb 2022 15:32:30 +0000

Серџо Матарела (80) денеска положи заклетва пред двата дома на парламентот и го презеде вториот мандат како претседател на Италија. Реизборот на Матарела, кој првично не сакаше да се согласи на нов седумгодишен мандат, донесе привремен одмор од тензиите во широката владејачка коалиција во Италија, по една недела неуспешни напори за избор на претседател, објави Ројтерс. Матарела минатиот викенд изјави дека актуелната криза поради коронавирусот и тешките економски и социјални услови во Италија значат дека негова должност е да ја прифати одлуката на парламентот да биде реизбран. Матарела, кој е од Сицилија, ја доби довербата на Италијанците со своите тивки, мирни и умерени јавни настапи и начинот на кој ги решаваше политичките кризи и здравствените проблеми. Тој првпат ја презеде претседателската функција на 3 февруари 2015 година.

Матарела денеска ќе положи заклетва на својот втор претседателски мандат

Ивона Петрова — Thu, 03 Feb 2022 06:40:10 +0000

Серџо Матарела денеска ќе положи заклетва за својот втор мандат како претседател на Италија, по минатонеделните нерешени избори што резултираа со неговиот повторен избор на функцијата за која веќе не беше заинтересиран, јави ДПА. Предвидено е 80-годишниот претседател да одржи говор на попладневната церемонија во Домот на пратеници во Рим. Матарела во изминатиот период постојано ја отфрлаше можноста да прифати втор мандат, што во Италија трае седум години, но се премисли откако главните партии во Италија не успеаја да се договорат за негов наследник и немаше друг излез од ќорсокакот во кој се најдоа. По хаотичните кругови на пазарење, Матарела дозволи да биде убеден да се откаже од плановите за пензионирање и да прифати реизбор на гласањето на кое се изјаснуваа над 1.000 пратеници и регионални делегати. Италијанскиот претседател главно има церемонијални функции, но неговата позиција понекогаш добива голема моќ, особено во ситуации кога законодавците запаѓаат во криза, при распуштање на парламентот и се иницираат нови избори и при одобрување или неодобрување на назначување министри.

Матарела повторно избран за претседател на Италија

Ивона Петрова — Sun, 30 Jan 2022 08:32:25 +0000

Италијанскиот претседател Серџо Матарела синоќа беше избран за неговиот втор претседателски мандат. Во осмиот круг на гласање, меѓу повеќе од 1.000 пратеници и регионални делегати во Претставничкиот дом, Матарела освои 505 гласови потребни за избор. Гласањето следеше откако партиските лидери побараа од Матарела да остане на таа функција, бидејќи по неколкудневно неуспешно гласање во парламентот, Италија не можеше да добие нов претседател. Лидерите на партиите му се заблагодарија на 80-годишниот Матарела што се согласи да остане на функцијата по седум круга гласање. Серџо Матарела претходно ја отфрли можноста да остане на функцијата, но бидејќи беше загрозена политичката стабилност на земјата, тој се предомисли по апелот на парламентарните лидери.

Италијанскиот претседател ги почнува консултациите за формирање нова италијанска Влада

Ивона Петрова — Wed, 27 Jan 2021 06:43:56 +0000

Италијанскиот претседател Серџо Матарела денеска ќе ги почне консултациите со лидерите на политичките партии за надминување на политичката криза во земјата, откако премиерот Џузепе Конте вчера поднесе оставка. Според изјава од кабинетот на претседателот, од Конте било побарано да остане на функцијата со технички капацитет додека не завршат преговорите, јавуваат британските медиуми. Конте минатата недела го изгуби апсолутното мнозинство во Горниот дом на парламентот, Сенатот, откако пратениците од коалицијата „Италија Вива“, предводена од поранешниот премиер Матео Ренци, поднесоа оставки, незадоволни од владината резолуција за кризата со коронавирусот и од економската рецесија. Неуспешни беа напорите на Конте да ги доведе центристичките и независните сенатори во коалицијата за пополнување на празнината што ја остави Ренци, не оставајќи му на премиерот друг избор освен оставка и официјално отворање на владина криза што ќе му даде повеќе време да постигне договор. Доколку Матарела смета дека Конте би можел да ја добие потребната поддршка за формирање нова влада, ќе му даде рок од неколку дена да се обиде да формира нов кабинет. Меѓутоа, доколку не успее, Матарела ќе мора да излезе со алтернативен кандидат за кого смета дека е способен да формира коалиција што ќе функционира. Во случај сите опции да паднат во вода, ќе мора да се распишат предвремени избори, две години пред крајниот рок.

Матарела: Слободата не значи дека можеме слободно да заразиме други

Магдалена Андонова — Fri, 31 Jul 2020 13:46:50 +0000

Италијанскиот претседател Серџо Матарела денеска изјави дека опасноста од Ковид-19 не поминала и ги потсети оние кои бараат поголема слобода дека Италија имаше 800 мртви во еден ден пред само четири месеци, пишува весникот „Ил Фато Котидиано“. Матарела зборуваше на традиционалната церемонија „Вентаљо“, кога им се даваат признанија на истакнати новинари кои известуваат од Парламентот. – Светот на информации исто така беше погоден од пандемијата, но потврди дека е во состојба да биде во служба на граѓаните. Тие ја докажаа нивната способност да бидат спротивни на фабриката за лажни информации. Професионалните и објективните информации беа признаени од граѓаните, рече Матарела. Тој ја истакна важноста за почитување на мерките за заштита и истакна „дека слободата не значи дека можеме слободно да ги заразиме другите“, и оти како нација Италијанците не можат да заборават што претрпеле за време на пандемијата поради почитувањето на жртвите и ограничувањата што ги издржале сите Италијанци, кои денес ни овозможуваат да гледаме кон иднината и да продолжиме понатаму“. Тој оцени дека таму каде што не можеле или не сакале да воведат мерки што ги вовела Италија за време на пандемијата на коронавирусот, денес заразата предизвикува драматични последици. Матарела им се заблагодари на сите земји кои и помогнаа на Италија и истакна дека „никој не е во состојба да се одбрани од заразата“. – Само обединети и заедно можеме да го надминеме овој предизвик, рече италијанскиот претседател. (MИА)