сертификати – Kurir.mk

Во Битола доделени 24 сертификати за лични асистенти на лица со попреченост

Магдалена Андонова — Mon, 04 Jul 2022 14:06:08 +0000

Градоначалникот на општина Битола, Тони Коњановски, денес им додели сертификати на 24 лица кои во претходниот период ги посетуваа обуките за лични асистенти на лица со попреченост. Сертифицираните лични асистенти, со завршувањето на обукте, се стекнаа со потребните знаења и квалификации за грижа за слепи лица и лица со тешка и најтешка телесна попреченост. Лицата пак, кои имаат потреба од лична асистенција, потребно е да контактираат со општинската организација на Црвениот крст, со цел да им се обезбеди потребната помош. Од 24 те сертифицирани лични асистенти, 10 веќе имаат склучено договори за работа и имаат корисници на услугата лична асистенција, што значи намалување на потешкотиите во секојдневието на лицата со попреченост од наведените категории. Обуките за лична асистенција на лицата со попреченост, се реализираат како дел од Програмата за социјална заштита на општина Битола во соработка со општинската организација на Црвениот крст, а Битола е еден од шесте градови во државата, кои на овој начин овозможуваат лична асистенција за лицата со попреченост.

Доделени сертификати за енергетска ефикасност на 32 објекти под надлежност на Град Скопје

Магдалена Андонова — Wed, 08 Jun 2022 10:13:41 +0000

На 32 јавни објекти што се под надлежност на Градот Скопје денеска им беа предадени енергетските контроли и сертификати кои претставуваат насока за преземање мерки за намалување на потрошувачката на енергија и за подобрување на енергетската ефикасност на објектите. Енергетската контрола на зградите и издавање на Сертификат за енергетска ефикасност е законска обврска која ја реализираат лиценцирани фирми. Енергетска контрола претставува систематизиранa постапка за утврдување на постојната потрошувачка на енергија, препознавање и квантификација на економски оправдани можности за заштеда на енергија во згради или група на згради, индустриски процеси или постројки, или во јавни или приватни услужни дејности и опфаќа подготовка на извештај за енергетската контрола. Сертификат за енергетска ефикасност (пасош), пак, е документ со кој се докажуваат карактеристиките на зградата во однос на потрошувачката на гориво. Кога зградата троши помалку енергија, таа е енергетски ефикасна и помалку ја загадува животната средина. Придобивките од овие процеси се од повеќе аспекти – покрај намалената емисија на штетни материи заради помала количина на потрошено гориво, се намалуваат и трошоците за енергија. Исто така, освен придобивките за жителите на Скопје, заради намалената потрошувачка на енергија и почистата животна средина, се намалува и потребата за купување на скапа енергија на ниво на Македонија. - Правилното планирање на енергетските политики во објектите кои се под надлежност на Град Скопје, претставува систематски пристап и единствен начин да се исполнат целите за енергетска ефикасност кои ги има поставено Градот, а со тоа да се подобрат и условите во објектите. Одлуките за целите за енергетска ефикасност ги засноваме на изработени енергетски контроли и сертификати за енергетските карактеристики на сите згради во надлежност на Град Скопје. Деталното познавање на процесите во самите објекти, преку изработката на енергетските контроли, и уште еден чекор понапред, подготвувањето на сертификати за енергетските карактеристики, овозможи планирањето во поглед на енергетската ефикасност да ги цели вистинските потреби на објектите и реално и систематски да се подобрат уловите за престој во јавните објекти и притоа да се постигне заштеда, како на енергија, така и од финансиска гледна точка, а воедно се постигнува и подобрување на стандардот на граѓаните и зголемување на употребата на енергија од обновливи извори, истакна секретарот на Град Скопје, Ѓоко Велковски при доделувањето на сертификатите. Градот Скопје, во рамките на Програмата за енергетска ефикасност на Град Скопје (2022-2024), изработи енергетски контроли и сертификати на 32 објекти кои се под надлежност на Град Скопје. Сертификатот треба да се постави на видно место во секој објект. Енергетски контроли и сертификати се изготвени за 23 средни училишта на Град Скопје, за шест објекти од културата, за бараките на Град Скопје, за Зоолошката градина и за објекти на Противпожарната бригада во Автокоманда.

ДОНЕСЕНА Е ОДЛУКА: Се укинува изолацијата – не ви треба сертификат, потврда или тест за влез во Македонија

Ивана Ефремовски — Tue, 19 Apr 2022 18:35:55 +0000

Владата на денешната седница донесе одлука да ги прифати препораките на Комисијата за заразни болести и предлогот на Главниот координативен штаб, со која престанува да важи обврската на домашните и странските државјани кои влегуваат во Македонија, на граничниот премин задолжително да приложат сертификат за извршена вакцинација, сертификат за прележан КОВИД-19 во последните 180 дена, медицинска потврда за негативен ПЦР тест направен 72 часа пред влезот во Македонија или негативен брз антиген тест направен 48 часа пред влезот во земјата.

Како што информира владината прес-служба, на денешната седница Владата донела и одлука да биде укината и мерката домашна изолација/карантин во времетраење од седум дена за лицата кои при влез на граничните премини нема да приложат еден од досега предвидените сертификати или потврди.

ОФИЦИЈАЛНО: Децата нема да носат маски во училиште, нема да се бараат сертификати на отворен дел од угостителски објекти

Ивана Ефремовски — Fri, 25 Mar 2022 17:20:43 +0000

Главниот координативен кризен штаб за справување со КОВИД-19 (ГККШ) на денешната седница одлучи да ја прифати препораката на Комисијата за заразни болести и на Владата да ѝ предложи измена на одлуката со која учениците во основните училишта да посетуваат настава без маски, освен ако ученикот по сопствена волја не бара да носи заштитна маска. За наставниците и останатите вработени во училиштата останува препораката за носење маски. ГККШ донесе заклучок до Владата да ја достави и препораката за физичко присуство на наставата на факултетите, со силен апел за вакцинација и на студентите и на образовниот кадар. На оваа своја седница ГККШ одлучи да ѝ предложи на Владата да ја измени одлуката за максимална исполнетост на капацитетите во затворен простор од досегашните 50% да се зголеми на 75% со задолжително носење заштитни маски и почитување на останатите протоколи за заштита од ковид. На денешната седница е прифатен и заклучокот на Комисијата за заразни болести Владата да го укине делот од протоколот за угостителските објекти со кои се бара сертификат за вакцинација за отворените простори на локалите, додека за затворените делови останува обврската за задолжително поседување сертификат за вакцинација или за прележаност од КОВИД-19.

Се укинуваат сертификатите за влез во трговските центри, бремените жени се враќаат на работа

Ивона Петрова — Wed, 09 Mar 2022 06:38:50 +0000

Укинување на мерката за задолжително поседување КОВИД-19 сертификат за влез во трговски центри/молови, сертификатот за прележан КОВИД-19 наместо 45 да трае 180 дена и укинување на одлуката со која бремените жени се ослободуваат од работа и работни обврски со физичко присуство на работното место, се предлозите на Главниот координативен кризен штаб за справување со последиците од КОВИД-19 кои дојдоа како препораки на Комисијата за заразни болести, а ги прифати Владата вчера на седница. Согласно предлозите, Владата донесе одлука да се укине мерката за задолжително поседување КОВИД-19 сертификат за влез во трговски центри/молови, за кои останува како задолжително носењето заштитни маски, додека обврска за задолжително поседување на КОВИД-19 сертификат останува за влез во угостителските објекти каде што се служи храна/пијалак, кои се во состав на трговски центри/молови, соопшти владината прес- служба. Владата го прифати и предлогот траењето на сертификатот за прележана болест од КОВИД-19, наместо досегашните 45 дена, да трае 180 дена, односно шест месеци, сметано од датумот на позитивен ПЦР тест. Врз основа на препораката на Комисијата за заразни болести Владата донесе одлука за укинување на одлуката со која бремените жени се ослободуваат од работа и работни обврски со физичко присуство на работното место. Со оваа одлука е прифатена и препораката бремените жени да се вакцинираат. Во врска со оваа точка, Владата донесе одлука да се укине барањето за задолжителен КОВИД-19 сертификат за излез од територијата на Република Северна Македонија. Во меѓувреме, продолжува намалувањето на активните ковид случаи во државата чиј број, според вчера објавениот извештај на Институтот за јавно здравје, изнесува 2248, од кои најголем број 1291 се во Скопје. Во неделниот извештај на Институтот за периодот од 28 февруари до 6 март минатата недела се регистрирани за една третина помалку заразени, починати и хоспитализирани од КОВИД-19. Регистрирани сe 2.504 нови позитивни ковид случаи, што е за 32,3 отсто помалку во однос на претходната недела. Процентот на позитивност се движи од 9,4 отсто до 18,4 отсто, просечно 14 отсто. Тестирани се 17.416 материјали во лабораториите во кои се спроведува молекуларно тестирање и антигенско тестирање за присуство на SARS-CoV-2, со намалување од 9,4 отсто во однос на минатата недела. Најголем дел од регистрираните случаи се од Скопје (n=1.418; 56,6 отсто), а највисока неделна инциденца е регистрирана во Кавадарци – 389,4/100.000, Скопје – 312,7/100.000 и Демир Капија – 308,6/100.000. Регистрирани се заболени лица во сите возрасни групи. Најзастапена е возрасната група над 60 години (n=705, 28,2 отсто). Најмал број е регистриран кај децата на возраст до девет години (n=103; 4,1 отсто). Во однос на претходната недела, се забележи намалување на бројот на заболени кај сите возрасни групи, а најзабележително од 46,9 отсто кај децата на возраст до девет години. Согласно новиот алгоритам за оздравување во текот на минатата недела со статус „оздравени“ се стекнале 3.511 лица во хоспитализирани услови или на домашно лекување. Во текот на минатата недела вкупно се пријавени 372 реинфекции, со намалување за 31,5 отсто во однос на претходната седмица. Пријавени се 44 смртни случаи во 17 градови во текот на изминатата недела, за 35,3 отсто помалку во однос на претходните седум дена. Најголем дел од нив се од Скопје (17). Во однос на возраста, најголем број (n=42; 95,5 отсто) од починатите се над 60 години. Хоспитализирани се 216 лица (35,9 отсто помалку во споредба со претходна недела), од нив 150 се на кислородна поддршка (41,2 отсто помалку во споредба со претходна недела), а 8 на инвазивна/неинвазивна механичка вентилација (11,1 отсто помалку во споредба со претходна недела). Заклучно со 05.03.2022, вакцинирани се вкупно 871.082 лица со барем една доза на вакцина против Ковид-19. Комплетно вакцинирани (со две дози) се вкупно 850.803 лица, а со трета доза се вакцинирани 144.391 лица. Според вчера објавениот извештај на Институтот за јавно здравје, регистрирани се нови 340 случаи со КОВИД-19 од 2557 направени тестови, двајца починати и 526 оздравени пациенти. Преку Регистарот на умрени лица со дијагноза КОВИД-19 од „Мој термин“ пријавени се уште девет починати. Вкупниот број на КОВИД-дијагностицирани лица во нашата земја од почетокот на епидемијата достигна 300 106 од направени 1 910 601 тестирања. Оздравени се вкупно 288 761 пациенти, а 9097 починале.

Комисијата препорача влез во моловите без сертификат, фокус на вакцинацијата

Ивона Петрова — Thu, 03 Mar 2022 06:38:43 +0000

За да се подигне имунитетот на популацијата, што би било основа и за натамошно релаксирање на мерките, почнува кампања за вакцинирање на луѓето од ризичните групи. Комисијата за заразни болести вчера информираше дека ним ќе им бидат закажани термини доколку не се целосно вакцинарани или немаат примено засилувачка (бустер) доза. Ризичните групи граѓани – лицата над 65 години со коморбидитети или помлади од 65 со повеќе коморбидитети, со СМС-порака ќе бидат известени дека во одреден термин треба да го посетат пунктот за да бидат вакцинирани. Според податоците добиени од „Мој термин“, во ризична група спаѓаат 260 000 граѓани. Половината од нив, како што информираше вчера Комисијата, или примиле една доза или не примиле ниту една, а другата половина, односно 130 000, немаат примено бустер доза. Од Комисијата за заразни болести вчера соопштија дека фокусот ќе биде на вакцинирање на ризичните групи зашто основа за релаксирање на мерките е, пред сѐ, вакцинацијата, која кај нас е на многу ниско ниво – целосно е вакцинирано 41 процент од населението. Серолошката анализа на 920 примероци покажала дека има солиден имунитет врз основа на вакцинација, според првичните податоци од истражувањето за имунитетот на населението што го спроведе Комисијата. – Над 85 отсто од вакцинираните индивидуи имаат некаков имунитет кон КОВИД-19. Не можеме да зборуваме за ефикасноста, но можеме да го детектираме дека постои. Од тие 920, околу 170 индивидуи беа невакцинирани и кај нив се сретнува над 70 проценти серопозитивност, односно и таму имаме солиден просек на имунитет, информираше вчера д-р Александар Петличковски, претседател на Комисијата за заразни болести. Параметрите од скринингот и колку тие реално би можеле да бидат применети за олабавување на рестрикциите, рече тој на прес-конференција, ќе ги разгледуваат на следниот состанок на Комисијата. На вчерашниот состанок Комисијата препорача укинување на сертификатите кои се задолжителни за влез во моловите, односно онаму каде што не е задолжително носење маски. – Донесовме еден заклучок, а тоа е да се препорача укинување на сертификатите задолжителни за присуство на моловите, односно каде не е задолжително носење маски. Ова е еден чекор во насока на олеснување на рестрикциите, но секако за следниот развој ќе бидеме многу внимателни, бидејќи не сакаме со нагло отфрлање на сите мерки да постигнеме неочекувани резултати, рече Петличковски. На состанокот вчера не било дискутирано за укинување на мерката носење заштитни маски во училиштата. Според портпаролот на Комсијата, д-р Злате Мехмедовиќ, скринингот во училиштата покажал дека состојбата е стабилна и би имало потреба од нов скрининг доколку се укине мерката. –Скринингот покажа дека 0,8 проценти е трансмисијата помеѓу оние ученици коишто се избрани по случаен избор. Не е направен скрининг без маски во училиште. Ако се случи укинување на маските, тогаш би требало да направиме веројатно нов скрининг и да се следи ситуацијата каква би била трансмисија на вирусот доколку имаме такви нови околности, рече Мехмедовиќ. Препораката на Комисијата за заразни болести од претходниот состанок – да биде продолжена важноста на сертификатот за прележаност на КОВИД-19 од 45 на 180 дена, не била разгледувана на вчерашната седница на Владата. Владиниот портпарол Муамет Хоџа на прес-конференција рече дека на седницата не се расправало за тоа бидејќи препораките и предлозите од Комисијата за заразни болести треба прво да се разгледаат на Оперативниот кризен главен штаб кој треба да заседава во наредните денови. Во вчерашната КОВИД-статистика беа регистрирани 457 новозаразени од 2730 тестови, од нив 74 се реинфекции. Починаа шест лица во последните 24 часа, а 447 се оздравени. Активни случи во земјава има 3252, од кои 1773 се во Скопје. Над сто активни случаи имаат Битола – 177, Прилеп – 153, Куманово – 143, Велес – 136 и Кавадарци – 128.

Владата денеска не расправала за препораката за продолжување на важноста на сертификатите за прележаност од КОВИД-19

Ивана Ефремовски — Wed, 02 Mar 2022 14:53:07 +0000

Препораката за продолжување на важноста на сертификатите за прележаност од КОВИД-19 не е разгледана на денешната владина седница. Владиниот портпарол Мухамед Хоџа на прес-конференцијата во Владата информира дека за ова не е дискутирано на денешната седница затоа што првично препораките од Комисијата за заразни болести треба да бидат разгледани на Главниот оперативен кризен штаб. -На денешната седница не се расправаше за ова бидејќи препораките и предлозите од Комисијата за заразни болести треба прво да се разгледаат на Оперативниот кризен главен штаб кој треба да заседава наредниве денови, изјави Хоџа, одговарајќи на новинарски прашања. Комисијата за заразни болести препорачува важноста на сетификатот за прележаност да биде продолжена од сегашните 45 на 180 дена. (МИА)

Израел ги укина ковид сертификатите

Ивона Петрова — Thu, 17 Feb 2022 13:34:33 +0000

Израел целосно ги укина ковид сертификатите, што е продолжение на трендот на укинување на мерките против Ковид-19, со оглед на тоа што бројот на новозаразени се намалува изминатите денови. Ковид сертификатите со кои се докажува дека некое лице е вакцинирано, прележало Ковид-19 или има негативен тест, веќе се делумно укинати во Израел од 4 февруари. Оттогаш, тие останаа во сила само за некои јавни места, како што се ноќните клубови и спортските сали. Омикрон, многу позаразен сој на коронавирусот, го достигна својот врв во Израел кон крајот на јануари, кога дневно имаше и до 85.000 нови инфекции. После тоа, тој број почна да опаѓа и вчера имаше 21.000 заразени. – Бранот помина, изјави израелскиот премиер Нафтали Бенет на почетокот на дебатата за пандемијата со здравствените власти. Во истото обраќање тој ја информира јавноста дека целосно се укинуваат ковид сертификатите. Бенет наведе и дека родителите сепак ќе мора да ги тестираат своите деца двапати неделно и оти ќе мора да се покаже негативен тест при посета на домовите за стари лица.

Мехмедовиќ: Во моментов не може да стане збор за укинување на сертификатите за прележан Ковид-19

Ивана Ефремовски — Tue, 15 Feb 2022 15:03:02 +0000

Во моментот кога ќе има релаксирање на епидемиолошката состојба, кога нема да имаме толку високи бројки ќе може да разговараме и за поинакви мерки кои ќе бидат аплицирани, меѓутоа сега во моментов не може да стане збор за укинување на сертификатите за прележан Ковид-19, истакна денеска портпаролот на Комисијата за заразни болести, Злате Мехмедовиќ. Посочи дека сертификатите не се во насока на тоа да се спречи трансмисијата, туку да се спречи пренесувањето на вирусот на тие кои немаат имунитет. -Денеска сертификат искрено не можете да добиете доколку немате прележано болест, односно според тоа што го препорачавме од минатиот пат. Сега сертификатот ќе важи 180 дена, шест месеци, вакцините имаат неограничена важност. Тие кои не можат да докажат дека ја прележале болеста и на тој начин стекнале имунитет или се вакцинирале и на тој начин стекнале имунитет практично ќе бидат заштитени од тоа да не може да влегуваат во простории кои се од висок ризик за заразување со вирусот. И тоа е интенцијата во моментов на сертификатите, да не ги оставиме да бидат на таа страна тие кои немаат имунитет, додаде Мехмедовиќ, одговарајќи на новинарски прашања по заедничката прес-конференција со претседателот на Комисијата, Александар Петличковски.

Белгија размислува за укинување на ковид сертификатите

Тале Кристо — Tue, 15 Feb 2022 10:53:21 +0000

Владината коалициска партија на Социјалистите во Белгија најави дека сака укинување на ковид сертификатот за внатрешна употреба, јави дописничката на МИА од Брисел. Ова утрово во интервју за радиото БЕЛ РТЛ го изјави претседателот на Социјалистичката партија, Пол Мањет. Моментално во Белгија за влез во угостителски објекти, културни настани и други локали е потребен ковид пас, што потврдува дека лицето е или целосно вакцинирано или прележало Ковид-19 во последните четири месеци. Мањет порача дека од март Белгија треба да го укине овој сертификат. Бројни епидемиолози и научници одамна предупредуваат дека сертификатот не спречува ширење на инфекцијата, бидејќи таа најмногу се пренесува на места каде не е потребен овој сертификат, како што се училиштата и работните места.