Северен тек 2 – Kurir.mk

Москва: Северен тек 1 и 2 може да се поправат, но за тоа ќе бидат потребни време и пари

Тале Кристо — Sun, 02 Oct 2022 13:05:20 +0000

„Северен тек 1“ и „Северен тек 2“ технички можат да се поправат, но за тоа ќе бидат потребни многу време и пари, изјави рускиот вицепремиер Александар Новак. – Пред сè, Русија има намера да разјасни кој е виновен за саботажата на гасоводите, доколку за тоа имаат интерес САД, Украина и Полска, посочи тој. – Вакви инциденти досега немало. Секако дека има технички можности за обновување на инфраструктурата, но за тоа е потребно време и соодветни средства. Сигурен сум дека ќе се најдат соодветни можности, рече тој. – До денес, пред сè, потребно е да се открие кој го сторил тоа, а ние сме сигурни дека некои земји кои претходно го искажаа својот став, се заинтересирани за ова. Тогаш и САД и Украина и Полска рекоа дека „тие се ќе направат сè за таа инфраструктура да не работи“, така што, се разбира, тоа треба сериозно да се реши“, додаде Новак.

Престана истекувањето гас од „Северен тек 2“

Тале Кристо — Sat, 01 Oct 2022 18:50:07 +0000

Од гасоводот „Северен тек 2“ во Балтичкото Море се чини престана да истекува гас, соопштги данската енергетска агенција „Енергистирелсен“. Агенцијата на Твитер објави дека компанијата која управува со гасоводот „Северен тек 2“ ја информирала дека притисокот во гасоводот се чини дека е стабилизиран. „Ова укажува дека истекувањето на гас престанало“, објави агенцијата. -Или гасоводот е целосно празен или притисокот на гасот во гасоводот и водата надвор од него се во рамнотежа, изјави портпаролот на агенцијата Улрих Лисек. Портпаролот на гасниот гигант „Газпром“, кој е под контрола на Кремљ, вчера изјави дека по експлозијата што погоди два цевководи во Балтичкото Море, протекоа 800 милиони кубни метри природен гас , пренесе Тасс. Портпаролот Сергеј Купријанов преку видео врска на седницата на Обединетите нации изјави дека количеството ослободен гас е еднаква на тримесечната испорака за Данска. За потсетување, во понделникот рано утрината, околу 2 часот по локално време, на површината на Балтичкото Море меѓу Шведска и Полска, на околу 23 километри југоисточно од данскиот остров Борнхолм, почнаа да се појавуваат меурчиња. Тогаш беше објавено дека притисокот во гасоводот „Северен тек 2“ во текот на ноќта паднал од 105 на седум бари, што укажувало на истекување гас. Гасоводот „Северен тек 2“ е долг 1.230 километри и се протега од Русија преку Балтичкото Море до Германија. Требаше да транспортира милијарди кубни метри гас во Европа, а кога Русија ја нападна Украина, Германија одби да издаде употребна дозвола на операторот на гасоводот, па тој никогаш не беше пуштен во употреба.

Остин: Прерано е да се каже кој би можел да стои зад прекинот на гасоводот Северен тек

Ивона Петрова — Fri, 30 Sep 2022 05:44:41 +0000

Американскиот секретар за одбрана Лојд Остин изјави дека се уште е рано да се каже кој би можел да стои зад прекинот на гасоводот „Северен тек“. „Кога зборуваме за нападот – или оштетување на гасоводот, мислам дека во овој момент има многу шпекулации. Но, искрено, додека не се спроведе целосна истрага, никој нема да може со сигурност да каже што се случило“, рече Остин на прес-конференција на Хаваи. Тој додаде дека за инцидентот разговарал со својот дански колега во средата, кој му посочил дека ќе поминат неколку дена „пред да можат да го доведат вистинскиот тим за да се обидат да утврдат што е можно подобро што се случило“. „Сè додека не добиеме повеќе информации или не можеме да направиме дополнителна анализа, нема да шпекулираме кој е одговорен“, рече Остин. Европската унија ги истражува причините за истекувањето на гасоводите Северен тек 1 и 2 под Балтичкото Море со кои управува руски Газпром и се сомнева дека е извршена „саботажа“. Русија во четвртокот објави дека САД ќе имаат корист од прекинот на гасоводот Северен тек. ортпаролката на Министерството за надворешни работи, Марија Захарова, на брифинг изјави дека САД ќе можат да ја зголемат продажбата на течен природен гас (ЛНГ) доколку цевководите трајно се деактивираат. Захарова, исто така, повика истрагата на ЕУ да биде „објективна“.

ЕК: Протекувањето на гасот во „Северен тек“ е чин на саботажа

Ивона Петрова — Wed, 28 Sep 2022 05:46:21 +0000

Шефицата на Европската комисија, Урсула фон дер Лајен, синоќа изјави дека протекувањето на гасоводот во гасоводот „Северен тек“ во Балтичко Море е „чин на саботажа“. „ Со данската премиерка Мете Фредериксен разговарав за чинот на саботажа на „Северен тек“, напиша Фон дер Лајен на Твитер. „Најважно е да се истражат инцидентите и целосно да се расветлат настаните и нивните причини. Секое намерно нарушување на активната енергетска инфраструктура во Европа е неприфатливо и ќе резултира со најсилен можен одговор“, напиша Фон дер Лајен на Твитер.

Пад на притисокот во гасоводот Северен тек 2

Тале Кристо — Mon, 26 Sep 2022 15:37:06 +0000

Притисокот во гасоводот Северен тек 2 остро паднал во текот на изминатата ноќ, потврди во понеделникот портпаролот на компанијата оператор „Nord Stream 2 AG“, наведувајќи како можна причина истекување на гасот. Властите во Германија, Данска, Шведска, Финска и Русија веднаш биле известени, изјавил портпаролот Улрих Лисек од седиштето на компанијата кое сѐ уште не е префрлено од Швајцарија во Германија иако е таму регистрирано според германското законодавство, Ноќта кон понеделникот притисокот во делот од гасоводот кој минува низ подморјето паднал од 105 на само 7 бари. Во германското министерство за економија соопштија дека не ја знаат причината и оти вршат проверки дали тоа се случило во германските територијални води. „Во моментов сме во контакт со регулаторите за да ја разјасниме ситуацијата. Сѐ уште не е јасна причина, ниту точните факти. Истовремено Поморската управа на Данска објави дека е забележано истекување на гас во близина на островот Борнхолм, од кој југоисточно минува гасоводот. Според данската служба, „тоа може да биде опасно за пловидбата“. Компанијата која управува со гасоводот тврди дека гасот не истекува во Лубмин, на северот од Германија. „Некаде сигурно постои дупка, само никој не знае каде. Да истекува во Лодмбин, ќе слушнавте“, изјави портпаролот на „Nord Stream 2 AG. Рускиот гасен гигант „Газпром“ одговори дека прашањето за инцидентот треба да биде проследен до операторот, кој пред судот во Швајцарија побара заштита од доверителите. Судот неодамна му го продолжи рокот за реструктуирање на финансиите. Инцидентот се случува откако неодамна рускиот претседател Владимир Путин порача дека енергетската криза во Европа предизвикана со минимизирање на капацитетите на гасоводот Северен тек 1, може да се надмине со ставањето во функција на гасоводот Северен тек 2, кој е исполнет со гас и подготвен за експлоатација во секое време. Кон средината на август потпретседателот на германскиот парламент Волфганг Кубицки, изјави дека Германија би требало да го стави во функција гасоводот Северен тек 2 за да се подготви за зимата, истакнувајќи дека приоритет на владата би требало да биде стабилното снабдување со гас. Гасоводот Северен тек 2 преку два цевковода требаше да ги удвои испораките на гасот од Русија во Германија за дополнителни 55 милијарди кубни мети гас годишно. Градењето на овој систем кој е дизајниран и за испораки на водород, траеше три години и заврши на 10-ти септември 2021 и исполнет е со технички гас. Северен тек 2 требаше да ги удвои испораките на рускиот гас во Германија, на вкупно 110 милијарди кубни метри гас годишно. Руски „Газпром“, германските „Wintershall Dea“ и „Uniper“, австриски ОMV, француски „Engie“ и британски „Shell“ го потпишаа договорот за градење уште кон средината на 2015 година. „Газпром“ е сопственик на 51 отсто од уделите во проектот. Тоа го предизвика стравот на Украина дека ќе губи милијарди евра годишни од транзитот на рускиот гас преку нејзината територија, а покрај тоа Полска и другите земји стравуваа дека Германија поскапо ќе им го продава гасот. Вашингтон предупредуваше дека преку него Русија ќе го користи за политичко влијание во Европа, но Берлин тогаш рече дека САД сакаат да го промовираат на континентот својот поскап течен гас од шкрилци. Откако гасоводот беше довршен, Германија го суспендираше издавањето дозвола по доаѓањето во Вашингтон на власт на претседателот Џо Бајден, и бараше конзорциумот со седиште во Швајцарија да биде префрлено во Германија што беше и сторено. Годинава Берлин го суспендираше ставањето во функција, поради у=војната во Украина. Во меѓувреме „Газпром’ ја продаде сопственоста над филијалата „Gazprom Germania“којашто управува со важно складиште за гас, а се занимава и со трговија. Германија ја национализираше со образложени дека сака да го осигури снабдувањето со гас.

Бајден воведе санкции за „Северен тек 2“

Катерина Бојаџиева — Wed, 23 Feb 2022 20:35:30 +0000

Американскиот претседател Џо Бајден официјално воведе санкции за компанијата „Северен тек 2“ АГ, која е регистрирана во Швајцарија и е филијала на рускиот гасен гигант „Газпром“. „Овој потег е нов чекор во нашиот првичен пакет санкции што ги воведуваме како одговор на потезите на Русија во Украина. Јасно кажав дека нема да се двоумиме да повлечеме дополнителни потези доколку Русија продолжи да ја ескалира ситуацијата“, рече Бајден во соопштение. Американскиот претседател повторно ја поздрави одлуката на германскиот канцелар Олаф Шолц да го блокира проектот на гасоводот.

Германија го запре Северен тек 2

Ивона Петрова — Tue, 22 Feb 2022 11:31:19 +0000

Поради ситуацијата со Украина и Русија, германската Влада го запира процесот на одобрување на Северен тек 2, изјавил денеска германскиот канцелар Олаф Шолц, пренесува Тагесшпигел. Во објавеното соопштение е наведено дека Германија не може да даде зелено светло за гасовод поради моменталната состојба. Шолц објасни дека барал од Министерството за економија да ги преземе неопходните административни чекори за гасоводот да не биде сертифициран. -Без овој сертификат, Северен тек 2 не може да почне да работи, вели Шолц. Рускиот претседател Владимир Путин претодно објави дека земјата ќе продолжи да ги снабдува светските пазари со гас. Овие негови зборови беа објавени во моменти кога САД и европските земји најавија објавување на нови санкции кон Русија.

Сијарто: Се надеваме дека одлуката за Северен тек 2 не е политичка

Тале Кристо — Thu, 20 Jan 2022 08:15:56 +0000

Одлуката за сертифицирање на „Северен тек 2“ треба да се заснова на правилата на ЕУ и професионален пристап, а не на политички проценки, изјави унгарскиот министер за надворешни работи Петер Сијарто. „Има многу јасни европски правила кои треба да се спроведат. Проблемот, според мене, е што одлуката во овој случај ќе биде донесена врз основа на политички, а не на професионални размислувања. Со ‘Северен тек 2’, проблемот е ист како и со ‘Спутник В’ – се разгледува од политичка гледна точка. Уште еднаш нагласувам: за нас како мала европска земја без сопствен извор на енергија, ова никогаш не било политичко прашање, туку прашање на енергетска безбедност, рече Сијарто во интервју за агенцијата ТАСС. Тој изрази надеж дека „германските и европските власти ќе одлучат за ова прашање врз основа на професионалноста и важечките правила“. Изградбата на гасоводот „Северен тек 2“ беше целосно завршена на 10 септември 2021 година. За да може гасоводот да биде пуштен во употреба, „Северен тек 2“ треба да биде регистриран како независен транспортен оператор. На 16 ноември 2021 година, германската Федерална агенција за мрежа ја суспендираше сертификацијата поради организациски и правни проблеми. Регулаторот наведе дека процесот ќе продолжи кога компанијата, со седиште во швајцарскиот град Цуг, ќе ги пренесе основните средства поврзани со германскиот сегмент на германската подружница.

Шолц: Доколку Русија ја нападе Украина, Германија може да го прекине проектот „Северен тек 2“

Тале Кристо — Wed, 19 Jan 2022 10:37:59 +0000

Британските медиуми ја пренесуваат изјавата на германскиот канцелар Олаф Шолц дека неговата земја би можела да размисли за запирање на гасоводот „Северен тек 2“ доколку Русија ја нападне Украина, откако се зголеми притисок врз неговата влада да заземе поостар став кон Кремљ. Шолц во Берлин се состана со генералниот секретар на НАТО, Јенс Столтенберг, за да разговараат за следните чекори во однос на украинската криза, откако разговорите меѓу Русија и западните земји за распоредување руски војници долж украинската граница минатата недела завршија без напредок. Шолц претходно изјави дека Германија е отворена за санкции во случај на руски напад врз Украина со сè што е на масата, што ќе вклучи и запирање на гасоводот „Северен тек 2“ од Русија до Германија, што има за цел да донесе повеќе руски гас во Западна Европа. Некои набљудувачи велат дека Шолц испраќа измешани сигнали споменувајќи го гасоводот, што е веќе изграден, но сè уште не е лиценциран, а е приватен комерцијален проект што не треба да се издвојува за санкции. Неговите социјалдемократи, најголемиот партнер во тричлената коалициска влада, историски се поблиску до Русија од другите германски партии, а Берлин е под притисок да најде начин да ја пополни својата енергетска празнина бидејќи се повлекува од производството на јаглен и нуклеарна енергија, со што земјата станува позелена. Противниците на „Северен тек 2“, вклучувајќи ги и Украина и САД, наведиваат дека тоа ќе ја направи Европа премногу зависна од Русија во снабдувањето со гас. Одговарајќи на прашањето за „Северен тек 2“, Шолц на новинарите и кажа дека „е јасно е дека цената ќе биде висока и дека за се ќе треба да се разговара доколку има воена интервенција во Украина“. Судбината на проектот на крајот би можела да биде надвор од рацете на Германија, бидејќи е предмет на регулаторно одобрување во рацете на Европската унија. Високиот претставник на ЕУ за надворешна политика и безбедност, Жозеп Борел, минатата недела изјави дека пуштањето во употреба на гасоводот зависи од секој потенцијален конфликт меѓу Русија и Украина.

САД воведоа санкции за компанија вклучена во изградбата на Северен тек 2

Ивона Петрова — Tue, 23 Nov 2021 07:11:03 +0000

САД воведоа санкции за компанијата Трансадриа, која е вклучена во проектот за гасоводот Северен тек 2, и нејзин брод, соопшти американскиот државен секретар Ентони Блинкен. Стејт департментот поднесе извештај до Конгресот во кој се наведува дека се воведени санкции против два брода и Трансадриа, рече Блинкен, без да даде детали за другиот брод. – Додека администрацијата продолжува да се спротивставува на гасоводот Северен тек 2, вклучително и преку санкции, ние продолжуваме да работиме со Германија и другите сојузници и партнери за да го намалиме ризикот од гасоводот за Украина, како и за членките на НАТО и ЕУ во првите редови. Ќе одговориме на штетните руски активности, вклучително и во енергетската сфера, рече Блинкен. Вашингтон се противи на гасоводот од 11 милијарди долари, кој ќе и овозможи на Москва да ја заобиколи Украина и да извезува гас директно во Германија. Најсилните критичари на проектот се Украина, Полска и балтичките земји на ЕУ, кои велат дека Европа ќе стане позависна од Владимир Путин, додека некои европски влади велат дека проектот е клучен за обезбедување стабилно снабдување со гас, особено во време на пораст на цените на енергенсите.