Северодоњецк – Kurir.mk

Украинските сили на нови позиции во Доњецк, се чека помош во оружје за контраофанзива на југот од земјата

Катерина Бојаџиева — Tue, 05 Jul 2022 06:24:56 +0000

По падот на регионот Луганск украинските вооружени сили се распоредени на нови одбранбени позиции во регионот на Доњецк, каде што продолжуваат да ги контролираат големите градови. Истовремено, тие планираат да започнат контраофанзива на југот на земјата. Гувернерот на Луганск, Серхи Хајдај, по повеќенеделната битка за Лисичанск, градот со чие заземање Русија ја презеде контролата врз Луганск, изјави дека битката им овозможила на украинските сили да воспостават позиции во Доњецк со цел „да ја отежнат ситуацијата за Русите таму“. Хајдај уште еднаш побара од сојузниците на Украина на Запад да испратат повеќе оружје, тврдејќи дека украинската армија ќе започне контраофанзива штом ќе има доволно оружје со долг дострел. „Руската тактика ќе биде иста. Прво со артилерија ќе пукаат на се, но тешко ќе освојуваат територија, изјави Хајдај. Олексиј Арестович, советник на украинскиот претседател Володимир Зеленски, рече дека Украина се надева дека ќе покрене контраофанзива на југот на земјата. Според него, заземањето на Лисичанск е последна победа на Русите на украинска територија. „Тоа беа градови со средна големина (Северодоњек и Лисичанск), а за нив им требаше време од 4 април до 4 јули, тоа се 90 дена. Толку многу загуби…”, рече Арестович. „Заземањето на градовите на исток значи дека 60 отсто од руските сили сега се концентрирани таму и ќе им биде тешко да ги пренасочат кон југ, а нема повеќе сили што можат да ги донесат од Русија. Тие платија висока цена за Северодонецк и Лисичанск“, рече советникот на Зеленски. Самиот претседател Зеленски синоќа изјави дека украинските сили продолжуваат да се борат и покрај повлекувањето од Лисичанск. „Нашите оружени сили одговараат, возвраќаат и го уништуваат офанзивниот потенцијал на окупаторите од ден на ден. Мораме да ги скршиме. Тоа ќе биде тешка задача која бара време и натчовечки напори, но немаме алтернативи“, рече Зеленски.

Ужас во Украина: Руските сили го зазедоа Северодоњецк, а во Лисичанск се водат улични борби

Ивана Ефремовски — Sat, 25 Jun 2022 16:59:02 +0000

Градоначалникот на Северодоњецк, Олександар Стрјук изјави дека градот од денеска е под целосна контрола на руската армија. Изминатите неколку недели се водеа тешки борби помеѓу украинската и руската војска за Северодоњецк. Украинските сили вчера добија наредба да се повлечат од Северодоњецк, поради подобра одбрана на соседниот град Лисичанск. Но, руските сили и сепаратистите денеска влегоа во Лисичанск и во градот се водат улични борби. Заземањето на Северодонецк и Лисичанск ќе им го отвори патот на Москва и на сепаратистите кон градовите Славјанск и Краматорск. Руските сили сакаат да го заземат целиот индустриски басен на Донбас. (МИА)

Британско МО: Русија сака да изврши дополнителен притисок врз Северодоњецк

Магдалена Андонова — Thu, 09 Jun 2022 08:17:01 +0000

Русија сака да го врати моментумот околу Изјум, со цел да изврши дополнителен притисок врз Северодоњецк, се наведува во најновиот разузнавачки извештај на британското Министерство за одбрана. Изјум се наоѓа на клучен пат кон регионот Донбас. Според британското Министерство, рускиот напредок во градот останува закочен од април, откако украинските сили „добро го искористија“ теренот во регионот за да го забават напредувањето на Русија. Како што пишува во извештајот, моментумот во Изјум ќе ѝ даде на Русија опција да напредува подлабоко во областа Доњецк. (МИА)

Зеленски: Судбината на Донбас се решава во битката за Северодоњецк

Ивона Петрова — Thu, 09 Jun 2022 05:55:23 +0000

Претседателот на Украина Володимир Зеленски оцени дека судбината на Донбас се решава во битката за Северодоњецк. Зеленски во видеообраќање рече дека битката за Северодоњецк е една од најтешките во војната со Русија. – Северодоњецк останува епицентарот на конфликтот во Донбас, нагласи Зеленски.

Хајдај: Малку се влоши ситуацијата во Северодоњецк

Ивана Ефремовски — Mon, 06 Jun 2022 09:59:53 +0000

Украинската позиција во Северодоњецк „малку се влоши“, соопшти регионалниот гувернер Сергеј Хајдај. Градот има стратешка важност во источниот регион Донбас. Во петокот имаше информации дека украинските сили повторно контролираат половина од градот, откако руските во еден момент имаа контрола над околу 80 отсто. -Најжестоките борби се во Северодоњецк. Сега има брзи борби. Нашите дефанзивци успеаја да спроведат контранапад, тие ослободија речиси половина од градот. Но, сега повторно ситуацијата малку се влоши за нас, изјави Хајдах утрово за национална телевизија. (МИА)

Убиен возач на новинари на Ројтерс, двајца повредени при гранатирање

Ивана Ефремовски — Fri, 03 Jun 2022 18:25:07 +0000

Двајца новинари на Ројтерс се повредени денеска при гранатирање кај Северодоњецк, источна Украина, а нивниот возач е убиен, потврди за Си-Ен-Ен портпаролот на британската агенција. Претходно извор од Ројтерс за агенцијата Тас изјавил дека двајца новинари на агенцијата биле повредени кога украинската војска го гранатирала патот и го погодила автомобилот во кој се наоѓале. – Мало парче шрапнел што го погоди Александар во ногата е отстрането и тој може да оди, а раката на Павел е скршена, рекол изворот, додавајќи дека и двајцата новинари се во болница во градот Рубежноје. Портпаролот на Ројтерс изјави за Си-Ен-Ен дека повредените новинари биле во возило обезбедено од проруски сепаратисти и дека ги управувало лице задолжено за проруските сили. – Ројтерс изразува длабоко сочувство до семејството на загинатиот возач, рече портпаролот. Во последните неколку дена Северодоњецк во областа Луганск е место на жестоко гранатирање во борбата меѓу украинските и руските сили за контрола над тој град. (МИА)

Руските сили го гранатираат Северодоњецк

Магдалена Андонова — Wed, 06 Apr 2022 13:53:01 +0000

Гувернерот на Луганск, Серхи Хајдаи на социјалните мрежи објави дека во град Северодоњецк е под напад на руските сили и оти горат десет облакодери. Тој додаде дека нема информации за жртвите. Северодоњецк е привремено седиште на регионалната власт на Луганск, откако истоимениот град е под контрола на проруските сепаратисти. Северодоњецк, кој пред војната имаше повеќе од 100.000 жители, е најисточен град под контрола на украинската армија. (МИА)

Руските сили го гранатираат Северодоњецк

Катерина Бојаџиева — Wed, 06 Apr 2022 13:32:18 +0000