Шинѕо Абе – Kurir.mk

Јапонија: Почнува судскиот процес против атентаторот на премиерот Шинѕо Абе

Ивана Ефремовски — Fri, 13 Oct 2023 07:48:04 +0000

Во јапонскиот град Нара денеска со прелиминарно рочиште почнува судскиот процес против Тецуја Јамагами, атентаторот на поранешниот јапонски премиер Шинѕо Абе. Судењето на четириесетгодишниот Јамагами, кој е обвинет за убиството на шеесет и седумгодишниот Абе со рачно изработенa двоцефка на 8 јули минатата година, ќе биде затворено за јавноста и за медиумите. Процесот требаше да започне во јуни годинава, но беше одложен со цел да се зголемат безбедносните мерки, бидејќи на адресата на Окружниот суд во Нара пристигна сомнителна кутија, која мораше да ја прегледа полициската екипа за отстранување на експлозивни направи. Шинѕо Абе, веројатно најважната личност во повоената политика на Јапонија и личност со најдолг стаж на највисоката функција во историјата на земјата, беше застрелан на улица во градот Нара за време на говорот во кампањата што го одржа за да покаже поддршка за сопартискиот кандидат, локален кандидат за пратеник. Абе двапати беше шеф на државата, вкупно девет години. Тој се повлече од премиерската функција во 2020 година, но како лидер на досега најголемата фракција на владејачката Либерално-демократска партија, тој остана највлијателниот политичар во земјата до неговата смрт. (МИА)

Директорот на јапонската полиција поднесе оставка поради убиството на Абе

Тале Кристо — Thu, 25 Aug 2022 07:22:45 +0000

Директорот на јапонската Национална полициска агенција, Итару Накамура денеска поднесе оставка откако истрагата ги потврди „недостатоците“ во безбедносните планови, што резултираше со атентат врз поранешниот премиер Шинѕо Абе. – Имаше недостатоци во плановите за безбедност и процените на ризикот на кои тие се засноваа, а насоките од теренскиот командант беа недоволни. Коренот на овој проблем лежи во ограничувањата на сегашниот систем, кој постои со години, во кој локалната полиција сноси единствена одговорност за безбедност, истакна Итару. Според експертите безбедноста во западниот јапонски град Нара била несоодветна. – Телохранителите можеа да го спасат Абе, така што ќе го заштитат или ќе го повлечат за 2,5 секунди меѓу првиот истрел и вториот што беше фатален, изјавија безбедносни експерти кои ја прегледаа снимката. Јапонските власти, вклучително и премиерот Фумио Кишида, ги признаа безбедносните пропусти околу појавувањето на Абе на предизборниот митинг. Националната полициска агенција претходно објави дека формирале тим за да ги разгледа безбедносните и заштитните мерки и да развијат превентивни чекори.

Кишида: Пропустите на полицијата овозможија да се убие Абе

Катерина Бојаџиева — Thu, 14 Jul 2022 11:22:51 +0000

Јапонскиот премиер Фумио Кишида денеска оцени дека убиството на Шинѕо Абе се случило поради несоодветно полициско обезбедување. Абе, еден од највлијателните јапонски политичари, беше убиен минатиот петок во западна Јапонија, а фотографиите и видеата покажуваат дека напаѓачот успеал премногу да се доближи до поранешниот јапонски премиер. Осомничениот беше уапсен на лице место и задржан на сослушување, а според извештаите на полицијата и медиумите тој им рекол на истражителите дека е убеден оти Абе бил поврзан со религиозната група која му наштетила и оти затоа го убил.

Абе ќе биде одликуван со Висок орден хризантема

Катерина Бојаџиева — Mon, 11 Jul 2022 10:18:54 +0000

Јапонската Влада денеска одлучи да го одликува поранешниот премиер Шинѕо Абе, кој беше убиен во петокот, со Висок орден хризантема, највисоката почест во земјата. Според соопштението на Владата, Абе ќе биде четвртиот поранешен премиер што ќе ја добие наградата според повоениот Устав на Јапонија, по Шигеру Јошида, Еисаку Сато и Јасухиро Накасоне. Абе на 8 јули почина во болница откако беше застрелан за време на предизборен митинг во градот Нара од страна поранешниот припадник на јапонската морнарица, 41-годишниот Тецуја Јамагами.

Убиецот на Абе пукал со рачно изработен пиштол, се истражува дали дејствувал сам

Тале Кристо — Fri, 08 Jul 2022 14:26:28 +0000

Осомничениот за убиството на поранешниот јапонски премиер Шинѕо Абе, 41-годишниот Тецуја Јамагами признал дека пукал со рачно изработен пиштол, соопшти јапонската полиција на прес-конференција. Јамагами изјавил дека имал огорченост кон „конкретна организација“, а верувал оти Абе е дел од неа. Тој бил невработен и со воз стигнал до Нара, градот каде беше застрелан Абе додека држеше говор. Во неговиот дом пронајдено е и друго рачно изработено оружје, но и голем број експлозиви. Како резултат на тоа, евакуирани се луѓето што живеат во близина. Се истражува дали Јамагами дејствувал сам. За случајот е формирана работна група од 90 лица. Јапонскиот премиер Фумио Кишида изјави дека нема да отстапи пред насилството и ќе ја продолжи изборната кампања, со цел да обезбеди „слободни и фер избори“ за Долниот дом на Парламентот оваа недела, објави Кјодо.

Сочувство од челниците на ЕУ за смртта на јапонскиот премиер

Ивона Петрова — Fri, 08 Jul 2022 10:29:49 +0000

Јапонскиот премиер Шинѕо Абе беше застрелан рано изутринава за време на неговите предизборни активности. Челниците на ЕУ изразуваат сочувство. Шефот на ЕУ дипломатијата, Жозеп Борел, ја нарече веста трагична и остро го осуди убиството на шефот на јапонската влада. – Денеска Европската Унија изгуби пријател кој помогна да се продлабочат и зајакнат билатералните односи во сите области, работа која ќе продолжи со премиерот Кишида, изјави Борел. Тој го нарече Шинзо Абе „непоколеблив сојузник во потрагата по мир, демократија и владеење на правото“. Претседателот на Европскиот Совет, Шарл Мишел, преку Твитер порача дека никогаш нема да го разбере бруталното убиство на овој голем човек. Претседателката на Европската Комисија, Урсула фон дер Лајен, исто така на Твитер изрази сочувство нарекувајќи го Абе „прекрасен лик, голем демократ и шампион на мултилатералниот поредок на светот“.

Реакции по атентатот на Абе

Катерина Бојаџиева — Fri, 08 Jul 2022 09:40:15 +0000

Поранешниот премиер на Јапонија, Шинѕо Абе денеска му подлегна на повредите откако беше застрелан додека држеше говор за време на предизборна кампања во градот Нара, соопшти неговата Либерално демократска партија. Поранешен припадник на јапонската морнарица Тацуја Јамагами двапати пукаше во Абе. Јамагами веднаш е приведен. Абе не покажувал знаци на живот кога беше префрлен во болница. По веста за атентатот врз Абе светските лидери го осудија нападот. Британскиот премиер Борис Џонсон изјави дека е згрозен и тажен поради нападот врз Абе. Нападот го потресе и индискиот премиер Нарендра Моди, кој се огласи на Твитер. „Нашите мисли и молитви се со него, со неговото семејство и јапонскиот народ“, напиша Моди. Поранешниот американски претседател Доналд Трамп истакна оти станува збор за поразувачка вест. Поранешниот австралискиот премиер, Скот Морисон, кој беше на должност истиот период како и Абе, напиша дека тој е голем пријател на Австралија. „Тој е еден од најважните светски лидери од ерата по војната. Во овој тежок момент, нашите молитви се со него, со неговата сопруга Аки и со јапонскиот народ“, напиша Морисон. Претседателката на Тајван, Тцаи Инг-вен го осуди нападот на Абе преку Фејсбук истакнувајќи дека тој е нејзин добар пријател. Жалење изрази и мексиканскиот министер за надворешни работи, Марсело Ебрард, изразувајќи надеж дека Абе ќе закрепне. Премиерката на Нов Зеланд, Џасинда Ардерн била длабоко шокирана кога слушнала за пукањето. „Беше еден од првите водачи, кои ги запознав кога станав премиерка. Беше длабоко предан на својата улога, но и великодушен и љубезен. Моите мисли се со неговата сопруга и со јапонскиот народ. Ваквите случаи нè потресуваат сите нас до сржта“, напиша Ардерн. Ова е шок и за генералниот секретар на НАТО, Јенс Столтенберг. „Моите мисли се со него и со неговото семејство. НАТО стои со народот на нашиот близок партнер, Јапонија“, нагласи Столтенберг. Шефицата на Европската комисија, Урсула фон дер Лајен посака Абе да остане силен. Според претседателот на Европскиот совет, Шарл Мишел, Абе е „вистински пријател и бестрашен бранител на мултилатералниот поредок и демократските вредности“. Тој додаде дека ЕУ е со народот на Јапонија.

Почина поранешниот јапонски премиер: Беше застрелан додека држеше говор, па им подлегна на повредите

Ивана Ефремовски — Fri, 08 Jul 2022 09:26:27 +0000

Поранешниот премиер на Јапонија, Шинѕо Абе денеска им поодлегна на повредите откако беше застрелан додека држеше говор за време на предизборна кампања во градот Нара. Поранешен припадник на јапонската морнарица Тацуја Јамагами двапати пукаше во Абе. Јамагами веднаш е приведен. Абе не покажувал знаци на живот кога беше префрлен во болница. (МИА)

Кишида: Абе е во „сериозна состојба“

Ивона Петрова — Fri, 08 Jul 2022 06:39:08 +0000

Премиерот на Јапонија Фумио Кишида го осуди нападот врз поранешниот претседател на владата Шинѕо Абе. Кишида наведе дека Абе е во „сериозна состојба“ откако денеска беше застрелан на предизборен митинг во градот Нара – Мотивот за нападот сè уште не е познат, рече Кишида. По атентатот нападот врз Абе веднаш е уапсен 41-годишниот Тацуја Јамагами од Нара. Напаѓачот е поранешен припадник на јапонската морнарица. Според неофицијални информации, атентатот е извршен со рачно изработен пиштол. Врз Абе беа истрелани два куршума, а вториот куршум го погодил во грб. Тој бил префрлен во болница, но не покажувал знаци на живот. Абе е јапонски премиер со најдолг стаж. Тој беше премиер една година во 2006 година, а потоа од декември 2012 до септември 2020 година, кога се повлече од функцијата поради здравствени проблеми. Абе беше наследен од неговиот партиски сојузник Јошиде Суга, а подоцна од Кишида.

Во Абе пукаше поранешен припадник на јапонската морнарица

Катерина Бојаџиева — Fri, 08 Jul 2022 06:24:01 +0000

Поранешниот премиер на Јапонија, Шинѕо Абе е застрелан додека држеше говор за време на предизборна кампања во градот Нара. Напаѓачот е 41-годишниот Тацуја Јамагами од Нара, кој е уапсен по инцидентот. Според неофицијални информации, атентатот е извршен со рачно изработен пиштол. Фуџи ТВ објави дека Јамагами бил поранешен припадник на јапонската морнарица. Врз Абе беа истрелани два куршума, а вториот куршум го погодил во грб. Тој бил префрлен во болница, но не покажувал знаци на живот. Абе е јапонски премиер со најдолг стаж. Тој беше премиер една година во 2006 година, а потоа од декември 2012 до септември 2020 година, кога се повлече од функцијата поради здравствени проблеми. Абе беше наследен од неговиот партиски сојузник Јошиде Суга, а подоцна од Фумио Кишида.