Штефан Кунц – Kurir.mk

Турската федерација ги демантира медиумите: Не му е врачен отказ на Кунц

Тале Кристо — Mon, 18 Sep 2023 18:48:17 +0000

Селекторот на турската фудбалска репрезентација, германскиот стратег Штефан Кунц, не добил отказ, објави вечерва Фудбалската федерација на Турција (ТФФ), демантирајќи ги медиумските написи. Турската новинска агенција „Демирорен“ (ДХА), објави во неделата дека ТФФ одлучил да ја раскине соработката со Кунц, откако Германецот ги критикувашe своите играчи по поразот во пријателскиот натпревар со Јапонија. Во соопштението на ТФФ се наведува дека извештаите кои кружат вo медиумите за разделба со Кунц не соодветствуваат со вистината. „Турската фудбалска федерација официјално го повика Штефан Кунц, чиј договор трае, на состанок со претседателот на ТФФ, Мехмет Бујукекши в среда на 20 септември“, се наведува во соопштението. Кунц беше назначен за турски селектор во септември 2021 година.

Кунц ќе ја напушти функцијата селектор на турската репрезентација

Ивана Ефремовски — Mon, 18 Sep 2023 07:13:26 +0000

Селекторот на турската репрезентација Штефан Кунц ќе ја напушти функцијата, објави новинарот Николо Шира. Според Шира, Турската фудбалска федерација веќе донела одлука за крај на соработката со 60-годишниот Германец, кој ја води репрезентацијата од септември 2021 година. На 8 септември Турција одигра нерешено со Ерменија (1:1) во квалификацискиот натпревар за ЕП 2024 година. На 12 септември, тимот загуби од Јапонија (2:4) во пријателски натпревар. Како главни кандидати за наследник на Кунц на селекторската позиција, во турските медиуми се појавија имињата на Јоаким Лев и Виченцо Монтела. (МИА)

Штефан Кунц и официјално нов селектор на Турција

Тале Кристо — Sun, 19 Sep 2021 18:09:41 +0000

Досегашниот предводник на германската фудбалска репрезентација до 21 година Штефан Кунц денеска официјално е назначен за нов селектор на Турција. Кунц (58) на турската клупа седнува на местото на Шенол Ѓунеш, кој претходно овој месец замина од должноста по поразот од 6-1 од Холандија во мундијалските квалификации. Поранешниот напаѓач на германската репрезентација, Кунц, дел од својата фудбалска кариера помина во Турција, настапувајќи за екипата на Бешикташ, а со селекцијата до 21 година на Германија освои две европски титули како тренер (2017, 2021). Турција во квалификациите за пласман на Светското првенство идната година во Катар е третопласирана во групата Г со 11 бодови, два помалку од Холандија и Норвешка, против која Кунц ќе дебитира на селекторската позиција на 8 октомври.

Германецот Кунц пред промоција во нов селектор на Турција

Ивана Ефремовски — Fri, 17 Sep 2021 15:34:54 +0000

Предводникот на германската фудбалска репрезентација до 21 година Штефан Кунц (58) е прв кандидат за наследник на Шенол Ѓунеш на селекторската клупа на Турција. Ѓунеш претходно овој месец доби отказ по серијата слаби резултати со турскиот национален тим, која кулминираше со поразот од 6-1 од Холандија во мундијалските квалификации. Германската фудбалска федерација (ДФБ) официјално соопшти денеска дека нема да му прави пречки на Кунц доколку ја прифати турската понуда. – Раководството на ДФБ едногласно одлучи да го ослободи Штефан Кунц од обврските кои произлегуваат од важечкиот договор доколку „постигне договор со Турската фудбалска федерација“. Од своја страна, ДФБ не сака да биде пречка во неговиот следен чекор во кариерата, се наведува во соопштението. (МИА)