штипски регион – Kurir.mk

Ситуацијата во штипскиот регион критична, секој втор тестиран е позитивен на коронавирус

Магдалена Андонова — Tue, 01 Feb 2022 13:03:45 +0000

Во штипскиот регион бројката на активни случаи со коронавирусот е над 200. Директорката на Центарот за јавно здравје во Штип, Марија Димитрова за МИА вели дека бројката на активни случаи не е висока во споредба со одредени градови во земјава. Но, нивните анализи покажуваат дека изминатите три до четири дена 50 отсто од тестирани се позитивни на вирусот. Во штипскиот пункт дневно се тестираат околу 40 граѓани, според ова секој втор тестиран е позитивен на коронавирсот. Податоците покажуваат дека најголем број од заразените се над 60 години, а имаат спорадични случаи од помладата популација. Портпаролот на Клиничка болница во Штип, Марина Шуманска во здравствениот билтен информира дека во Инфективното одделение хоспитализирани се 50 пациенти, а на Кожното одделение со полесна клиничка слика се шестмина пациенти. Во дневната амбуланта прегледани се 34, а едно лице од Свети Николе на возраст од 59 години ја загуби битката со вирусот.

Во штипскиот регион најголема излезност има во Пробиштип

Магдалена Андонова — Wed, 15 Jul 2020 16:51:53 +0000

Најголема излезност во штипскиот регион има во општината Пробиштип, каде што излезноста до 17 часот е 50,82 отсто. Претседателот на Општинската изборна комисија во Пробиштип информира дека на 42 те гласачки места гласале 6.336 гласачи. Штип како најголема општина бележи излезност од 44,36 отсто. Претседателката на ОИК-Штип, Сенка Андреева за МИА појаснува дека на веб страницата на ДИК се појавуваат бројките на гласачите со посебниот избирачки список, па затоа вкупниот број на гласачи изнесува 41.813. -До 17 часот имаме 18.548 гласачи кои го оствариле своето право на глас, нема проблеми, избирачките одбори се со сите здравствени протоколи, вели Андреева. Во Свети Николе до 17 часот гласале 45,53 отсто од вкупниот број на избирачи или на гласачките места излегле 6.634 граѓани. Во малата рурална општина Карбинци се гласа ан 16 избирачки места, таму до сега гласале 1.479 граѓани со право на глас или во проценти 46,42. Изборната единица 3 е рекордер во излезноста до 17 часот на овие предвремени парламентарни избори, излезноста е 43,96 отсто. Право на глас во оваа изборна единица имаат 278.511 граѓани, а досега гласале 122.433 граѓани. (МИА)

Во штипскиот регион гласањето се одвива мирно

Магдалена Андонова — Wed, 15 Jul 2020 13:29:49 +0000

Во Штип на 80-те избирачки места излезноста е 32,76 отсто. Претседателката на ОИК-Штип, Сенка Андреева информира дека гласањето на изборите се одвива без проблеми. – До Општинската изборна комисија не се стигнати никакви преставки, жалби и поплаки, ниту од граѓани, ниту од независни набљудувачи, вели Андреева. Во текот на попладневните часови на избирачките места може да се забележи дека излезноста е помала, но од ОИК велат дека гласачите вообичаено се очекуваат да пристигнуваат во попладневните часови. Инаку здарвствените протоколи се почитуваат од страна на избирачките одбори, не дозволуваат граѓаните да влезат без маски и мора да држат дистанца. Најголема излезност во Брегалничкиот регион бележи Пробиштип, каде што до 13 часот на гласање излегле 33,6 од вкупниот број на гласачи. (МИА)

Во штипскиот регион се поставуваат гнезда за царскиот орел

Дарко Андоновски — Thu, 19 Apr 2018 13:08:29 +0000

Почна поставувањето на 10 платформи за гнездење на царскиот орел, во близина на штипските села Судиќ и Трогерци. Портпаролот на МЕПСО, Никола Стојанов вели дека гнездата се поставуваат на трасата на 400 киловолнтиот далековод, кој го поврзува македонскиот со српскиот електропреносен систем. - Оваа акција е дел од проектите, кои се спроведуваат од 2012 година па досега. Во пет наврати се поставени 50 платформи за гнездење на царскиот орел. Интенцијата на менаџментот на МЕПСО е да дава поддршка на проекти, коишто помагаат во делот на заштита на заштита на животната средина, флората и фауната и за подобрување на општествените корисни практики, вели Стојанов. Емануел Лисичанец од еколошкото друштво „Аквила“-Кавдарци истакна дека царскиот орел е степска птица, а оваа птица која е заштитена се наоѓа на црвената листа на Европа во видовите на изумирање. - Со ова акција се надеваме дека ќе се зголеми популацијата на царскиот орел или барем ќе остане стабилна. Во Македонија има околу 30 активни гнездечки двојки и може да се рече дека сме лидер на Балканот во царските орли, по големина на територијата, каде што тие се наоѓаат, посочи Лисичанец. Тој истакна дека поставувањето на гнездата во овчеполскиот регион има ефект, бидејќи веќе се заземени шест гнезда, а тоа значи 10 отсто од поставените платформи. Според Лисичанец, тоа е голем успех, бидејќи на птиците како што вели, им е потребно време за да заземат нова територија или да се формира нова двојка. Платформите за царскиот орел се поставуваат од страна на електромонтерите на МЕПСО, а во соработка со еколошкото друштво „Аквила“.