Швајцарскиот парламент за пропаѓањето и преземањето на банката „Креди Свис“ ќе ги истражува владата, централната банка и регулаторот

Катерина Бојаџиева — Thu, 18 May 2023 13:42:01 +0000

Посебна комисија на швајцарскиот Парламент ќе го испита пропаѓањето на банката „Креди Свис“ и договорот според кој пропаднатата банка ја презеде конкурентот УБС, соопшти канцеларијата на Горниот дом на парламентот. Одлуката е продолжение на поддршката од две парламентарни поткомисии за продлабочување на истрагите за активностите на владата, Централната банка и регулаторите на финансискиот пазар пред итната финансиска помош за Креди Свис. Посебна комисија ќе биде формирана само петти пат во поновата швајцарска историја. Првата е основана во 1961 година за да го испита процесот на пуштање во употреба на борбените авиони „Мираж“, забележуваат британските медиуми. „Со оглед на размерите на настанот, канцеларијата констатира дека формирањето собраниска комисија е оправдано“ Мандатот на истрагата и членовите на комисијата ќе го определат двата дома на парламентот на седниците што почнуваат на 30 мај, се додава во денешното соопштение. „Со оглед на размерите на тие настани и нивните финансиски последици, канцеларијата заклучува дека формирањето собраниска комисија е оправдано. Канцеларијата се залага за широка дефиниција на истражниот мандат... и расветлување на настаните од изминатите години кои доведоа до итно спојување“, се додава во соопштението. Според договорот за спас на банката, склучен од владата во текот на март, УБС се согласи да го купи Креди Свис за три милијарди швајцарски франци во акции и да преземе до пет милијарди франци очекувани загуби од затворањето на дел од бизнисот. Тоа е прв случај на спасување на една глобална банка од финансиската криза во 2008 година, забележуваат британските медиуми. Пријавата на регулаторот во САД покажа дека УБС побрза да го купи Креди Свис во договорот што не го посакуваше. Тие, исто така, посочија дека преземањето за нив може да значи и загуби од десетици милијарди долари. Примената на законите за вонредни состојби заради полесно преземање под раководство на државата би можела да заземе видно место во дискусиите на собраниската комисија. Преземањето на проблематичната банка од страна на УБС беше поддржано од владата со 200 милијарди швајцарски франци (225 милијарди долари), бидејќи имаше за цел да спречи колапс на Креди Свис што би предизвикало поширока криза во глобалниот финансиски систем. Преземањето на Креди Свис од страна на УБС предизвика многу критики во јавноста, особено за заобиколувањето на парламентот, кој минатиот месец не даде поддршка за договорот. Потегот на парламентот беше во голема мера симболичен и преземањето треба да се спроведе, а УБС очекува да го заврши во наредните недели. Меѓутоа, сослушувањата на комисијата би можеле да дадат нови сознанија за самиот процес што резултираше со „најскапиот“ спас на банките од глобалната финансиска криза во 2008 година, забележуваат британските медиуми.

Швајцарскиот парламент ќе расправа за укинување на статусот на ФИФА како непрофитна организација

Тале Кристо — Thu, 24 Nov 2022 19:15:30 +0000

Швајцарската Партија на зелените побара денеска на Меѓународната фудбалска федерација (ФИФА) да и биде укинат статусот на непрофитна организација во оваа европската држава во која се наоѓа нејзиното седиште. „Зелените“, кои се петта најбројна партија во Швајцарија најавија дека ќе поднесат барање во швајцарското Собрание за оданочување на ФИФА на ист начин на кој тоа се прави со компаниите со подеднаква големина. -ФИФА не е непрофитно здружение, туку машина која заработува на кршење на човековите права. Да ставиме крај на даночните олеснувања за ФИФА“, порача Алина Треде од Зелената партија. ФИФА се најде под остри критики во дел од западниот свет, откако на седум европски репрезентации кои настапуваат на Светското првенство во Катар им забрани на нивните капитени да носат на рацете лента со натписот „Една љубов“, кој симболизира почитување на толеранцијата и различноста. „ФИФА со забраната за носење на лентата со натписот „Една љубов“ (One love) ги мина сите граници“, истакна Треде од Партијата на зелените.

Швајцарски парламент – Kurir.mk

Швајцарскиот парламент за пропаѓањето и преземањето на банката „Креди Свис“ ќе ги истражува владата, централната банка и регулаторот

Швајцарскиот парламент ќе расправа за укинување на статусот на ФИФА како непрофитна организација