симоне инзаги – Kurir.mk

Инзаги на клупата на Интер до 2025

Тале Кристо — Tue, 05 Sep 2023 14:19:28 +0000

Симоне Инзаги, кој е на должноста од јуни 2021., го продолжи својот договор како тренер на милански Интер до 2025 година, објави денеска актуелниот лидер во италијанската Серија А. „Милански Интер со задоволство објавува продолжување на договорот со својот тренер Симоне Инзаги, кој сега е поврзан со клубот до 2025 година“, се наведува во краткото соопштение на италијанскиот клуб. Интер под водство на Инзаги ги освои последните две изданија на италијанскиот куп (2022, 2023) Инзаги седна на клупата на Интер во 2021 година, откако претходно го предводеше римски Лацио.

Симоне Инзаги тренер на Интер до 2025 година

Бошко Тасиќ — Wed, 09 Aug 2023 03:56:01 +0000

Интер се договори со тренер Симоне Инзаги за продолжување на соработката до летото 2025 година.

„Ова веќе беше договорено за време на претсезонската турнеја во Азија. Останува само да се официјализира, бидејќи станува збор за обновување на договорот за уште една дополнителна година“, изјави Тинти за италијанските медиуми.

Инзаги пред две години седна на клупата на Интер и неговиот актуелен договор има важност до следното лето.

Тој досега двапати триумфираше со Интер во Купот и во Суперкупот на Италија. Под негово водство тимот играше во финалето на Лигата на шампионите минатата сезона и загуби од Манчестер Сити со 0:1.

Инзаги: Им честитав на моите фудбалери, тие беа одлични и имаа одличен натпревар

Тале Кристо — Sun, 11 Jun 2023 09:09:04 +0000

Тренерот на Интер, Симоне Инзаги ги пофали своите фудбалери и покрај поразот (1:0) од Манчестер сити синоќа во финалето на Лигата на шампионите. - Им честитав на играчите - тие беа одлични и одиграа одличен натпревар. Го загубивме финалето кое сакавме да го добиеме по секоја цена, но тие треба да се гордеат со себе. Не би ги менувал овие играчи за никого, а денес цел свет сфати зошто. Примивме само еден гол против многу силен тим. Многу жалиме, но треба да бидеме горди на себе, го цитира Инзаги „Скај Спорт“. Манчестер Сити за прв пат ја освои Лигата на шампионите. Тимот на Хосеп Гвардиола направи и тројна круна - ја освои Премиер лигата, ФА Купот и Лигата на шампионите.

Инзаги: Знаеме колку е силен Халанд, подготвивме нешто за да го сопреме

Тале Кристо — Sat, 10 Jun 2023 12:46:11 +0000

Тренерот на Интер, Симоне Инзаги ги сподели своите очекувања од финалето на Лигата на шампионите против Манчестер сити. - Знаеме колку е силен Халанд. Подготвивме нешто за да го задржиме. Но, целиот тим треба да игра добро за да ги спречи Халанд и останатите нивни играчи. Манчестер Сити добро напаѓа и добро се брани. Ќе се обидеме да ја играме нашата игра, го цитира Инзаги „Скај Спорт Италија“. Дваесет и двегодишниот Халанд оваа сезона има 52 настапи за „граѓаните“ во сите натпреварувања, постигнувајќи 52 гола и девет асистенции. Финалето од Лигата на шампионите Манчестер сити - Интер ќе се одржи вечер со почеток во 21 часот во Истанбул. Интер го „брка“ четвртиот трофеј, Сити ќе игра за прва титула европски шампион.

Инзаги: Посакувавме и освоивме трофеј

Ивона Петрова — Thu, 25 May 2023 08:05:19 +0000

Тренерот на Интер, Симоне Инзаги е задоволен од освојувањето на трофејот во Купот на Италија. Интер синоќа во финалето на националниот куп ја победи Фиорентина со 2:1. - Среќен сум што го освоивме трофејот што го посакувавме. Фиорентина е добар тим кој ни направи проблеми. Лошо го почнавме натпреварот, погрешен ни беше пристапот, ретко се случува. Но, момците успеаја да останат во играта и потоа да го свртат резултатот. Не чекаат уште два меча во првенството, а потоа и финалето во Истанбул. Сакаме оваа прекрасна сезона да продолжи, изјави Инзаги за „Sport Mediaset“. До крајот на сезоната има уште два натпревара во Серија А со Аталанта и Торино и финалето во Лигата на шампионите со Манчестер сити.

Инзаги: Сигурно останувам во Интер

Ивана Ефремовски — Tue, 23 May 2023 19:43:23 +0000

Тренерот на Интер, Симоне Инзаги зборуваше за својата иднина во клубот од Милано. -Останувам 100 проценти. Никогаш не се чувствував загрозен на тренерското место, имам договор, го цитира Инзаги новинарот Алфредо Педула. Четириесет и седумгодишниот Инзаги стана тренер на Интер во 2021 година. Актуелниот договор на италијанскиот фудбалски стручњак истекува на крајот од сезоната 2023/24. Под водство на Инзаги, Интер ги освои Купот и Суперкупот на Италија, а ќе игра финале во Лигата на шампионите.

На Инзаги сеедно му е со кого ќе се соочи во финалето на ЛШ

Ивона Петрова — Wed, 17 May 2023 05:55:48 +0000

Тренерот на Интер, Симоне Инзаги зборуваше за противникот во финалето на Лигата на шампионите. Неговиот тим синоќа го победи Милан со 1:0 и со вкупни 3:0 избори финале во елитното фудбалско натпреварување. - Реал Мадрид и Манчестер сити се двете најдобри екипи во Европа. Среќен сум за нас. Со големо внимание ќе го гледам реваншот, но немам посебна желба за тоа кој да ни биде противник. Ривалот на Интер во финалето ќе биде одреден вечер во пресметката меѓу Манчестер сити и Реал Мадрид (почеток 21 часот). Првиот натпревар заврши нерешено - 1:1.

Премиерлигашки тим заинтересиран за Инзаги

Бошко Тасиќ — Sun, 14 May 2023 04:28:39 +0000

Информациите што доаѓаат од Англија велат дека за Инзаги постои интерес од два премиерлигашки клуба, а најсериозен кандидат за неговиот потпис е Тотенхем. „Спарси“ останаа без главен тренер откако го отпуштија Антонио Конте, а се вели дека претседателот Даниел Леви бил голем фан на Симоне Инзаги и не би имал ништо против да го види италијанскиот стратег на клупата за следната сезона. Дел од фановите со потсмев ја прифатија оваа информација, велејќи дека Инзаги го нема потребното реноме и искуство за Премиер лигата, но сепак не е исклучена можноста за тренерот да се пресели летово на Островот. Ова може да се случи само под услов Инзаги да не ја освои Лигата на шампионите.

Инзаги: Трката со Милан ќе трае 180 минути

Тале Кристо — Wed, 10 May 2023 10:11:48 +0000

Тренерот на Интер, Симоне Инзаги ги искажа своите очекувања за натпреварот со градскиот ривал Милан во полуфиналето на Лигата на шампионите. - Мора да играме со главата и срцето. Во нашиот дух не се сомневам, но ќе мора да ја искористиме и главата, бидејќи сигурно ќе има тешки моменти. Трката ќе трае 180 минути и не смееме да заборавиме на тоа. Имавме седум дербија во последните 20 месеци. Победувавме и губевме. Можеме да извлечеме по некои заклучоци од тие натпревари, но сите средби се различни едни од други. Играчите треба да се жртвуваат за доброто на партнерите. Ја поминавме групата каде беа Барселона и Баерн, попатно заработивме важно искуство. Со Порто и Бенфика се соочивме со уште две многу тешки пречки, но ги надминавме. Има уште една пред нас. Ги знаеме силните страни на Леао и ќе преземеме мерки на претпазливост доколку тој биде на теренот, но тоа нема да влијае на целокупниот план за игра. Милан знае да игра фудбал, не се само противнападите. Мораме да бидеме добри во сите аспекти, изјави тренерот на Интер. Натпреварот ќе се игра вечер од 21 часот, домаќин ќе биде Милан.

Интер му постави ултиматум на Инзаги

Дарко Андоновски — Sun, 16 Apr 2023 13:58:29 +0000

Тренерот на Интер, Симоне Инзаги е блиску до отказ по синоќешниот поразот од Монца во 30. коло од Серија А (0:1), пренесува „Football Italia“. Според изворот, по натпреварот, раководството на Интер се сретнало со Инзаги, изразувајќи го неговото незадоволство од резултатите на тимот на последните натпревари. Иднината на тренерот на „нероаѕурите“ зависи од резултатите од пресметката со Бенфика во четвртфиналето на Лигата на шампионите (2:0 во првиот натпревар) и од тоа дали миланезите ќе изборат пласман во Лигата на шампионите следната сезона. По 30 кола, Интер е петти во Серија А со 51 бод, два бода зад Милан на четвртото место.