Синиша Мали – Kurir.mk

Српскиот министер за финансии очекува забавување на инфлацијата

Тале Кристо — Mon, 16 Jan 2023 10:59:05 +0000

Српскиот министер за финансии Синиша Мали денеска изјави дека очекува забавување на инфлацијата, што ќе значи постепено излегување од кризата што Србија не ја предизвика. – Го достигнавме врвот на инфлацијата, забавување на инфлацијата е забележано и во ЕУ, која е наш најголем трговски партнер. Очекувам дека инфлацијата ќе се намали во следните месеци, изјави Мали за РТС. Тој додаде дека столбот на монетарната политика е стабилниот девизен курс, дека Србија има поголеми од кога било девизни резерви и резерви во злато. Тој посочи дека државата направила се за да ги минимизира ефектите од зголемената инфлација. – Имаме контролирани цени на основните прехранбени производи, најевтина струја и гас, ја контролираме цената на горивото, товарот на кризата го презеде државата за да им обезбеди на граѓаните, економијата и стопанството што е можно понормален живот и работење, рече Мали. Тој додаде и дека Србија ќе ги исполни своите ветувања во однос на растот на платите и пензиите.

Српски медиуми: Синиша Мали е најсериозниот кандидат за премиер

Ивона Петрова — Thu, 21 Jul 2022 05:55:55 +0000

Министерот за финансии Синиша Мали е најсериозен кандидат за нов премиер на Србија, јавија белградски медиуми, наведувајќи дека тој „веќе пишува експозе“, пренесе Бета. „Точно е дека претседателот на Србија, Александар Вучиќ, изјави дека има четворица кандидати за мандатарската позиција, од кои двајца се познати на јавноста, двајца не, а меѓу нив има и непартиски експерти, но се чини дека во овој момент министерот Мали е на прагот да стане првиот човек во немањина 11“, објави весникот Данас, повикувајќи се на извор од актуелната власт. Како што понатаму наведува весникот, „информациите се дека тој веќе пишува експозе, но додека не завршат консултациите во СНС и пошироко и додека претседателот (Александар Вучиќ) не донесе конечна одлука, тешко е да се каже со сигурност кој навистина ќе биде нов премиер“.

Мали: Договорено е Србија да складира 500 милиони кубни метри гас во Унгарија

Ивона Петрова — Wed, 25 May 2022 12:32:07 +0000

Министерот за финансии Синиша Мали изјави во Будимпешта, по средбата со унгарскиот министер за надворешни работи и трговија Петер Сијартo, дека е договорено Србија во текот на претстојната зима да складира 500 милиони кубни метри гас во Унгарија, јави дописникот на МИА од Белград. Договорот беше прецизиран откако српскиот претседател Александар Вучиќ и унгарскиот премиер Виктор Орбан во Нови Сад на отворањето на Меѓународниот земјоделски саем се договорија Србија да складира меѓу 300 и 500 милиони кубни метри гас во Унгарија. По средбата, Мали за новинарите изјави дека врз основа на денешниот договор Србија ќе може да повлече три милиони кубни метри дневно од унгарските складишта во октомври, шест милиони кубни метри дневно во ноември, декември и јануари и три милиони во март. Министерот Сијарто рече дека денешните договори се доказ за стратешкото пријателство меѓу двете земји. -Гасот за нашиот сосед ќе го складираме за следната зима, бидејќи имаме повеќе од шест милијарди кубни метри складишен капацитет. Нема да го поддржиме предлогот на Европската унија за нафтено ембарго кон Русија додека не се најде решение кое ќе ја гарантира енергетската безбедност на Унгарија, изјави Сијарто. Министерот Мали изјави дека е договорена заедничка инвестиција во изградба на интерконектори за пренос на електрична енергија меѓу двете земји, за да може вишокот по потреба да се пренесе во Србија и Унгарија и дека е договорено поврзување на електроенергетските мрежи на двете земји, што ќе трае во наредните шест до осум години, за да може да се разменува струјата.

Српски медиуми: Синиша Мали со најголеми шанси за премиер на Србија

Ивона Петрова — Wed, 18 May 2022 06:18:31 +0000

Најголеми шанси да биде нов премиер на Србија има актуелниот министер за финансии Синиша Мали, а во игра се уште три имиња од Српската напредна партија (СНС), пренесе Бета. Според денешното издание на „Вечерње новости“, повикувајќи се на свои информации, станува збор и за Ана Брнабиќ, Милош Вучевиќ и Горан Весиќ. Најмалку шанси да биде нов српски премиер има заменик-градоначалникот на Белград Весиќ, пишува Новости.

Мали: Достапни заеми за бизнисите, пари на располагање и за земјоделците

Тале Кристо — Thu, 16 Apr 2020 16:36:57 +0000

Српскиот министер за финансии Синиша Мали на денешната прес-конференција изјави дека Владата на Србија донесе три важни документи, што се однесуваат на примена на мерките за економска поддршка на стопанството со цел да се ублажат негативните последици од Ковид-19. Како што јави дописникот на МИА од Белград, Мали истакна дека е усвоена регулативата „што се однесува на гарантната шема за која се врзани две милијарди евра, за кои најмногу ќе гарантира Република Србија, а која од следниот вторник ќе биде достапна за сите претприемачи, микро, мали и средни претпријатија“. – Овие се многу поволни заеми до 36 месеци, со грејс период помеѓу девет и 12 месеци. Државата Србија стои зад заемите, а вие искористите ги за ликвидност и обрт на капиталот, порача Мали. Тој додаде и дека се донесени уште две регулативи поврзани со поддршка на земјоделците. – Значи, 2,6 милијарди динари преку Управата за гарарниот платен промет им се достапни на земјоделците од следниот вторник, преку Министерството за земјоделство. Тие пари веќе се во буџетите, тие пари може веднаш да ги искористи Министерството за земјоделство, истакна Мали. Министерот за финансии кажа и дека со документите донесени денеска комплетиран е целиот пакет економски мерки што неодамна беа презентирани. Мали исто така кажа дека проекциите на Меѓународниот монетарен фонд се такви што српската економија ќе има „најмал пад од три проценти или најголем раст оваа година од скоро сите земји во Европа“.