сириза – Kurir.mk

Анкета: Пад на рејтингот на СИРИЗА

Тале Кристо — Thu, 26 Oct 2023 06:41:11 +0000

Намален рејтингот на СИРИЗА и тесна трка со ПАСОК за втората позиција, владејачката Нова демократија естабилна на првото место, а Мицотакис за половина од анкетираните е најсоодветен за премиер, покажуваат резултатите од истражувањето на јавното мислење во Грција спроведено од агенцијата „GPO“ за телевизијата „Стар“, јави дописничката на МИА од Атина. По изборот на Стефанос Каселакис за лидер на СИРИЗА, 70,6 проценти од анкетираните сметаат дека (сигурно или веројатно) најголемата грчка опозициска партија оди во погрешна насока, додека пак оние кои би гласале за СИРИЗА на следните избори, велат дека партијата е во правилна насока. Во однос на распоредот на силите, Нова демократија добива 36,6 отсто, 23,7 проценти повеќе од СИРИЗА, која има 12,9 отсто, а потоа следи ПАСОК со 11,9 отсто. За ситуацијата на Блискиот Исток, речиси девет од десет анкетирани изразуваат загриженост, а 65,4 отсто сметаат дека Грција треба да задржи строго неутрална позиција.

Тројца поранешни министри на СИРИЗА: Партијата е во сериозна криза

Тале Кристо — Wed, 25 Oct 2023 08:16:35 +0000

Итно свикување на Политичкиот секретаријат на СИРИЗА и одржување на Конгресот што е можно поскоро, бараат Ефи Ахциоглу, Насос Илиопулос и Алексис Харицис, пратеници од СИРИЗА и поранешни министри, велејќи дека ситуацијата во партијата е сериозна и „сите имаат одговорност за единството, а пред сè раководството на партијата“, јави дописничката на МИА од Атина. Во заедничката изјава тројцата членови на најголемата грчка опозициска партија истакнуваат дека „СИРИЗА е во многу сериозна криза“ и додаваат дека имаат обврска пред граѓаните кои ги поддржуваат, да го запрат падот на партијата. „Политичките несогласувања постојат и затоа веќе е одредено одржување на вонреден Конгрес, кој сега треба да се забрза. Но, нашиот тек дотогаш треба да биде со почитување на нашите позиции и статутот кој јасно ги дефинира правилата на нашето работење. Не може да се карактеризира со логики на внатрешни непријатели и практики на чистка. СИРИЗА има долга традиција на внатрешна демократија со правила и почитување на процедурите. Дури и во исклучително тешки услови, потрагата по синтеза на различни мислења беше факт. За единство предуслов е колективноста, принципите и придржување до процедурите“, пишуваат тројцата пратеници од СИРИЗА, меѓу кои и Ахциоглу која беше кандидатка за партиски лидер. Заедничката изјава доаѓа откако лидерот на СИРИЗА Стефанос Каселакис во понеделникот избриша тројца членови на партијата, сите поранешни министри, а оваа одлука, голем дел од грчките медиуми ја толкуваа како чекор пред распад на СИРИЗА, со оглед на тоа дека по изборот на Каселакис на лидерската позиција, постојат несогласувања во самата партија. Ден претходно европратеникот Стелиос Кулоглу соопшти дека ја напушта еврогрупата на СИРИЗА и станува независен пратеник во Европскиот Парламент.

Каселакис: Посакувам да бидам достоен на наследството што ми го остави Ципрас

Ивана Ефремовски — Mon, 25 Sep 2023 14:08:51 +0000

Посакувам да бидам достоен за наследството што ми го предаде Ципрас. Одиме напред, рече новиот лидер на СИРИЗА, Стефанос Каселакис по средба со неговиот претходник и поранешен премиер Алексис Ципрас,јави дописничката на МИА од Атина. По вчерашниот втор круг на изборите за лидер на СИРИЗА и победата на Каселакис , стариот и новиот претседател на партијата се сретнаа денеска во канцеларијата на Ципрас во грчкиот Парламент. Ципрас го посоветува неговиот наследник да ужива во првите денови, бидејќи како што рече, за оние кои влегуваат во политиката „радостите не се изобилни, а тешкотиите континуирани“. -Треба да дадеме надеж и перспектива со единство, истакна Ципрас на почетокот од средбата. (МИА)

Ќе ја преземе ли Сириза „човекот од Мајами“?

Ристе Здравков — Tue, 19 Sep 2023 07:18:03 +0000

Бизнисменот Стефанос Каселакис (35) кој живее во Флорида ја испреврте политичката битка за лидер на Сириза. Поради него илјадници партијата за неколку дена доби илјадници нови членови Стефанос Каселакис, 35-годишен бизнисмен, најновиот актер во трката за раководство на главната грчка опозициска левичарска партија Сириза, победи во првиот круг од внатрешните избори во неделата, добивајќи 45 отсто од гласовите. Клучниот втор круг треба да се одржи следната недела во услови на навидум „идеолошка војна“ во партијата, која се очекува да ескалира. Масовното учество на изборите во Сириза беше протолкувано како „олеснување“ за главната опозиција по тешкиот пораз на последните избори во јули кога владејачката партија Нова демократија триумфираше со 41 отсто од гласовите. На изборите учествуваа повеќе од 145.000 луѓе, а се проценува дека околу 40.000 биле нови членови. „Направен е првиот чекор за земјата наскоро да има прогресивна влада“, изјави Каселакис по објавувањето на резултатите. Каселакис, грчки државјанин кој живее во Мајами, САД, е рангиран на прво место со 45%, а потоа следи Ефи Ахциоглу со 36,2%, Еуклид Цакалотос (8,78%), Никос Папас (8,7%) и Стефанос Цумакас (1,3%). Исходот во вториот круг многу ќе зависи од тоа кој кандидат ќе го поддржат другите натпреварувачи. Во својата прва изјава откако тој поднесе оставка минатиот јули, поранешниот лидер на Сириза и премиер Алексис Ципрас коментира дека масовното учество покажува дека „некои побрзаа да ја прогласат Сириза за отсутна […] Ние ќе бидеме тука“. Каселакис влезе во трката во последен момент и преку добро организирана кампања на социјалните мрежи, за само еден викенд успеа сите за зборуваат за него во градот. Неколку грчки медиуми објавија дека потенцијалната победа на Каселакис може да доведе до поделба на Сириза, имајќи предвид дека неколку традиционални левичарски фигури го сметаат за „туѓо тело“ во партијата. Критичарите сугерираат и дека фактот што тој не е пратеник во грчкиот парламент може да претставува пречка во борбата против владејачката Нова демократија. Тие, исто така, го критикуваат дека е нешто „непознато“ во грчката политика, имајќи предвид дека неговото единствено искуство е политиката на САД. Каселакис волонтираше во персоналот на тогашниот сенатор Џо Бајден за претседателските избори во 2008 година. Меѓутоа, за други, Каселакис го претставува „новиот“ елемент што модерната Сириза ѝ треба повторно да застане на нозе и да се соочи со владејачката конзервативна партија Нова демократија. Сепак, неговиот либерален профил не остана незабележан од владата, имајќи предвид дека во моментов, само премиерот Киријакос Мицотакис го освои „либералниот“ простор на политичкиот спектар на Грција. Познати личности од Сириза нагласија дека со Каселакис, левичарската партија ќе допре до пошироката публика, не само до строгиот традиционален левичарски електорат. Неговото учество на изборите се проценува дека привлекло илјадници нови членови. Тврдењето за раскинување на врските со традиционалната левица на „назадното размислување“ беше искажано за време на мандатот на поранешниот лидер Ципрас, а многумина го притиснаа да ја „модернизира“ партијата. Сириза е поврзана со европската левица; Сепак, Ципрас порано учествуваше како набљудувач на состаноците на европските социјалисти, чиј официјален член е Пасок. Политичкиот флерт меѓу Ципрас и социјалистите од ЕУ траеше со години, а социјалистичките политичари како португалскиот премиер Антонио Коста отворено го поддржуваа. Критичарите сугерираат дека резултатот следната недела се очекува да ја одреди, во голема мера, политичката ориентација на партијата.

Каселакис и Ахциоглу во вториот круг за претседател на СИРИЗА

Ристе Здравков — Mon, 18 Sep 2023 05:58:00 +0000

Со 45,47 отсто од гласовите, Стефанос Каселакис победи на вчерашните избори за лидер на СИРИЗА, но без да го достигне потребниот процент за избор во првиот круг, па така заедно со Ефи Ахциоглу, која доби 36,21 отсто, влегуваат во вториот круг што ќе се одржи следната недела, јави дописничката на МИА од Атина. На изборите за претседател на партијата имаше голем одѕив, па гласањето беше продолжено за еден час, а гласале 146.635 членови на СИРИЗА од кои дел се нови, кои се зачлениле вчера. Бизнисменот Стефанос Каселакис, кој живее и работи во САД, а речиси во последен момент ја достави кандидатурата за лидер на СИРИЗА, по соопштувањето на резултатите доцна синоќа рече дека „беше направен првиот чекор за земјата набргу да добие прогресивна Влада“. Поранешната министерка и актуелна пратеничка од СИРИЗА Ефи Ахциоглу рече дека следната недела ќе биде пресудна и ќе се одреди дали „битките што ќе се водат политички или не“, но и дека опозициската партија „не може да плови во матните води на лесни решенија“. За претседател на СИРИЗА кандидирани беа поранешните министри и актуелни пратеници од СИРИЗА Ефи Ахциоглу, Ефклидис Цакалотос и Никос Папас, поранешниот министер од ПАСОК Стефанос Ѕумакас и бизнисменот Стефанос Каселакис. Вториот круг на изборите за претседател на СИРИЗА ќе се одржи в недела на 24 септември.

Четворицата кандидати за лидерското место во Сириза

Ристе Здравков — Mon, 17 Jul 2023 07:33:17 +0000

Поранешните министри во Владата на СИРИЗА и актуелни пратеници Ефи Ахциоглу, Ефклидис Цакалотос и Никос Папас, како и поранешниот министер од ПАСОК Стефанос Ѕумакас се четворицата кандидати за претседател на СИРИЗА, а партијата новиот лидер ќе го избере во септември, јави дописничката на МИА од Атина. На состанокот на Централниот комитет на партијата одржан во текот на викендот било одлучено партиските избори да се одржат на 10 септември, а доколку има потреба, вториот круг да биде шест дена подоцна, на 16 септември. Дополнително, била донесена одлука во ноември да се одржи вонреден Конгрес. По оставката на Алексис Ципрас од лидерската позиција на крајот на јуни, за привремен претседател на пратеничката група на СИРИЗА беше избран Сократис Фамелос и паралелно започнаа итни процедури во опозициската партија за избор на нов лидер. Официјални кандидатури за претседател доставија поранешната министерка за труд и социјална политика Ефи Ахциоглу, поранешниот министер за финансии Ефклидис Цакалотос и поранешниот министер за дигитална политика Никос Папас сите од редовите на СИРИЗА, но и поранешниот министер од ПАСОК Стефанос Ѕумакас, кој на партијата и се приклучи во 2019 година.

СИРИЗА во септември ќе избира нов лидер, пратеникот Фамелос привремен шеф на пратеничката група

Катерина Бојаџиева — Mon, 03 Jul 2023 07:10:34 +0000

Поранешниот министер и пратеникот со долгогодишно парламентарно искуство Сократис Фамелос ќе биде привремениот шеф на пратеничката група на СИРИЗА, а во септември партијата ќе одбере нов лидер, објавија грчките медиуми, јави дописничката на МИА од Атина. Политичкиот секретаријат на СИРИЗА вчера одржа маратонски состанок, на кој била донесена одлука Фамелос да ја предводи партијата и пратеничката група во периодот до избор на нов лидер, особено во пресрет на тридневната расправа во Парламентот од четврток до сабота за гласање доверба на Владата. Партиски извори за грчката новинска агенција АНА-МПА брифирале дека пратеничката група денеска ќе одржи состанок за да ја ратификува одлуката на Политичкиот секретаријат за назначување на Сократис Фамелос за привремен шеф на групата. По оставката на Алексис Ципрас од лидерската позиција во четвртокот, започна итна процедура во СИРИЗА за избор на нов претседател, а вчера, на состанокот биле одлучени следните чекори. Според грчките медиуми, на 15 и 16 јули ќе се состане Централниот комитет и ќе се достават кандидатурите за нов лидер, во август ќе се одржи Конгрес, а на почетокот на септември, членовите на СИРИЗА ќе гласаат за претседател на партијата.

Нова ера во СИРИЗА без Ципрас

Дарко Андоновски — Fri, 30 Jun 2023 07:45:19 +0000

По 15 години, грчката опозициска партија СИРИЗА ќе треба да избере нов лидер, откако Алексис Ципрас вчера соопшти дека се повлекува од позицијата, а се очекува веднаш да почнат процедурите за негов наследник, јави дописничката на МИА од Атина. СИРИЗА врти нова страница, започнува нова ера без Ципрас, односно како што самиот рече, нов циклус во партијата. Грчките медиуми анализираат која ќе биде иднината на СИРИЗА, споменувајќи ги потенцијалните кандидати за претседатели: поранешните министри Ефи Ахциоглу, Алексис Харицис и Евклидис Цакалотос. Весникот „Катимерини“, повикувајќи се на свои извори пишува дека е отворена можноста изборот на нов претседател да биде и во текот на јули, да гласаат членовите на партијата (170.000), а подоцна да се одржи конгресот за кој е потребна подготовка. Очекувањата се дека за време на претстојниот викенд состанок ќе одржи политичкиот секретаријат, а централниот комитет да заседава за седум до десет дена. Партијата треба итно да одбере и претседател на пратеничката група со оглед на тоа дека следната седмица ќе се одржи и тридневна дискусија во Парламентот за гласање доверба на Владата, на која ќе говорат и лидерите на опозициските партии. Коментарите во медиумите се дека партијата не може и не смее долго да остане без лидер, бидејќи за три месеци се локалните избори во Грција. Алексис Ципрас, вчера, се чини дека ги изненади сите, па дури и неговите сопартијци, според медиумите, кога во изјава за новинарите соопшти дека се повлекува од лидерската позиција, најави избор на ново раководство за кое секако нема да биде кандидат. Во 12-минутната изјава, Ципрас се осврна на сето она што во изминатите 15 години го поминал како лидер на партијата, за како што рече, „заедничкото патување“ кое го доведе и до премиерска функција, истакнувајќи дека е горд на она што СИРИЗА го постигна како Влада, излез од меморандумите, закрепнување на општеството и економијата, но и Договорот од Преспа Грчката опозициска партија претрпе голем пораз на двојните парламентарни избори во Грција. На првите избори во мај, СИРИЗА доби 20 од гласовите, двојно помалку од Нова демократија, а на вторите избори во неделата, дополнително се зголеми разликата меѓу двете партии (на 22,73 проценти), левичарската партија загуби гласови, освојувајќи 17,83 проценти. Алексис Ципрас 15 години ја водеше партијата, а во периодот од јануари 2015 година до јули 2019 година додека СИРИЗА беше на власт, беше премиер на Грција.

Ципрас пред борба за политички опстанок – СИРИЗА освои уште помалку гласови од изборите во мај

Ристе Здравков — Mon, 26 Jun 2023 08:38:21 +0000

Главниот противник на Мицотакис, 48-годишниот Алексис Ципрас од СИРИЗА, кој беше премиер на Грција од 2015 до 2019 година, сега треба да се бори за својот политички опстанок по катастрофалниот пораз на вчерашните парламентарни избори. Тој не успеа да ја консолидира својата гласачка база, разединета од партии кои ги формираа некои од неговите поранешни политички соработници. Во својот говор пред сопартијците рече дека СИРИЗА претрпе сериозен изборен пораз, а на нив останува да одлучат по кој пат ќе се движи партијата во иднина.

По големиот пораз на парламентарните избори Ципрас размислувал за оставка

Катерина Бојаџиева — Wed, 31 May 2023 07:08:52 +0000

Она што го помислив беше оставка, тоа беше првото чувство и не беше минливо, тоа беше нешто што ме мачеше со часови и денови, но кога го надминав шокот, сфатив дека единственото нешто што немам право да го правам е да дезертирам, откри лидерот на СИРИЗА Алексис Ципрас говорејќи за изборниот резултат пред десет дена, јави дописничката на МИА од Атина. На изборите на 21 мај СИРИЗА загуби од Нова демократија со над 20 отсто разлика, односно доби двојно помалку гласови од првата партија, а во интервјуто за грчката телевизија „Стар“, прво по изборите, Ципрас истакна дека резултатот за нив бил „болен и голем шок“. -За нас тоа беше шок, шок кој ни создаде големи чувства на тага и разочарување. Не го очекувавме. Затоа, во овој момент она што ни е важно е да го надминеме овој шок, да се прегрупираме и да ги исправиме грешките, посочи Ципрас. Објасни дека не ги бараат виновниците и причините за поразот кај граѓаните или кај противниците, туку во самата политика на партијата „во начинот на кој ја раширивме нашата порака, начинот на кој ја соопштувавме нашата порака“. Ципрас откри дека по изборниот резултат помислил на оставка, но подоцна сфатил дека нема право да го стори тоа пред историјата и пред 1.200.000 граѓани кои гласаа за нив, дека нема право да дезертира и да ги остави сами неговите сопартијци „во тежок момент“. Истакна дека не ги чека реванш, бидејќи резултатот од претходното гласање нема да се најде на следните избори на 25 јуни.