сиромашни земји – Kurir.mk

Хари и Меган ќе собираат донации за вакцинација во сиромашните земји: Додека немаат сите еднаков пристап до вакцини пандемијата нема да стивне

Магдалена Андонова — Fri, 07 May 2021 07:50:42 +0000

По повод вториот роденден на неговиот син Арчи, британскиот принц Хари и неговата сопруга Меган Маркл одлучија да апелираат за донатори за финансиска поддршка на акцијата, така што вакцините против коронавирусот ќе бидат достапни и за сиромашните земји. - Додека чувствуваме дека се враќа во нормала, знаеме дека во голем дел од светот, особено во земјите во развој, кампањите за вакцинација сè уште не се започнати, рече парот, кој се повлече од британското кралско семејство и сега живее во федералната американска држава Калифорнија. Парот ги повика луѓето да донираат што повеќе за семејствата во најранливите земји во светот за да можат да се вакцинираат против коронавирусот. - Сè додека сите, насекаде, немаат еднаков пристап до вакцината, светот нема да се опорави од пандемијата, рекоа тие. Собраните средства ќе бидат донирани на Алијансата за вакцини (ГАВИ), партнерство на јавни и приватни тела што ја координира дистрибуцијата на вакцините до сиромашните земји.

Папата Франциск ги повика ММФ и Светска банка да го намалат долгот кон сиромашните земји

Тале Кристо — Thu, 08 Apr 2021 14:47:03 +0000

Папата Франциск ги повика шефовите на светските финансиски институции да го намалат должничкиот товар за сиромашните земји погодени од пандемијата на коронавирусот и да им дадат поголема улога во донесувањето глобални одлуки. Во писмото до учесниците на пролетниот состанок на Меѓународниот монетарен фонд (ММФ) и Светска банка, Папата напиша дека пандемијата го принуди светот да се помири со меѓусебно поврзаната социо-економска, еколошка и политичка криза. „Поимот закрепнување не може да значи враќање кон нееднаквиот и неодржлив модел на економски и социјален живот каде мало малцинство од светското население поседува половина од богатството“, наведува папата Франциск во писмото од 4 април. Тој повика на нов „глобален план“ што „неизбежно значи да им се даде на посиромашните и помалку развиените земји ефективна улога во донесувањето одлуки и олеснување на нивниот пристап до меѓународниот пазар“. Папата Франциск додаде дека духот на глобалната солидарност „бара барем значително намалување на должничкиот товар кон најсиромашните нации, кои се влошени од пандемијата“. Шефовите за финансии на 20-те најголеми економии во средата го продолжија суспендирањето на трошоците за сервисирање на долгови кон земјите во развој, но не успеаја да го откажат долгот или да го ублажат на барање на непрофитни организации.

Најсиромашните земји вакцината ќе ја добијат дури во 2024 година

Магдалена Андонова — Wed, 16 Dec 2020 14:54:19 +0000

Програмата Ковакс на Светската здравствена организација е главната глобална шема за вакцинирање на луѓето во земјите со ниски и средни примања ширум светот против коронавирусот и има за цел до крајот на 2021 година да достави најмалку две милијарди дози вакцини, покривајќи 20 проценти од најранливите земји, главно во Африка, Азија и Латинска Америка. Британските медиуми наведуваат дека поборниците на планот тврдат дека програмата се соочува со недостаток на средства, ризик за снабдување и сложени договори, што може да го оневозможат остварувањето на нејзините цели. Во интерниот извештај на управниот одбор на компанијата Гави, која заедно со СЗО ја води програмата Ковакс, се наведува дека ваквиот неуспех може луѓето во сиромашните земји да ги остави без пристап до вакцини против Ковид-19 до 2024 година. Во извештајот уште се наведува дека „ризикот од неуспех е голем бидејќи шемата е поставена многу брзо и на неистражена територија“. (МИА)

ЕУ може да донира околу 65 милиони вакцини за сиромашните земји

Тале Кристо — Mon, 14 Dec 2020 13:21:52 +0000

Европската унија може да донира на сиромашните земји околу пет проценти од вакцините што ги нарача за своите потреби, јавија некои светски агенции кои имале увид во интерен документ. Доколку овој план предложен од француската Влада се реализира, постои ризик да се загрози шемата за дистрибуција која за сиромашните земји ја предвиде Светската здравствена организација. Сепак, овој предлог на француската Влада би можел да се реализира само доколку ЕУ има вишок вакцини, кои досега ги нарачала од компаниите Фајзер/Бионтек, Модерна, Џонсон и Џонсон, АстраЗенека/Оксфорд, Санофи / ГСК и КјурВак. Во документот подготвен од кабинетот на палатата Матињон се вели дека „донирањето вакцини на сиромашните земји од фондовите на ЕУ би било, на краток рок, најефикасниот начин да се постигне амбициозен план за вакцината како јавно добро“.

УНИЦЕФ ќе испрати две милијарди дози вакцини против коронавирус во сиромашните земји

Дарко Андоновски — Mon, 23 Nov 2020 11:26:34 +0000

Земјите во развој следната година „во мамутска операција“ ќе добијат речиси две милијарди дози вакцини против Ковид-19, соопшти агенцијата на ОН за деца – УНИЦЕФ. Организацијата соопшти дека соработува со 350 авиокомпании и логистички компании за доставување на потребните вакцини и инјекции во сиромашните земји како Бурунди, Авганистан и Јемен, како дел од Ковакс, глобален план за дистрибуција на вакцини против Ковид-19 на Светската здравствена организација (СЗО). – Ќе соработуваме на овој план за да обезбедиме доволен капацитет за транспорт за оваа историска мамутска операција, рече Етлева Кадили, директорка на одделот за снабдување при УНИЦЕФ. Целта на Ковакс – проект заеднички предводен од СЗО, групата ГАВИ и Коалицијата за епидемиолошка подготвеност – е да спречи одделни земји да складираат вакцини против Ковид-19 и да обезбеди вакцина за сите најранливи групи во сите земји. – Потребна ни е целата расположлива помош додека се подготвуваме да доставиме дози на вакцини, инјекции и заштитна опрема за да ги заштитиме здравствените работници ширум светот, рече Кадили, официјален претставник на УНИЦЕФ, кој е најголемиот купувач и дистрибутер на вакцини во светот. Без оглед на моменталната пандемија, УНИЦЕФ дистрибуира над две милијарди дози за рутинска имунизација секоја година во речиси 100 земји во светот. Се очекува до крајот на оваа година здравствените регулатори да ги одобрат првите вакцини против Ковид-19.

Ковакс обезбеди над две милијарди долари за вакцини за сиромашните земји

Тале Кристо — Fri, 13 Nov 2020 14:33:23 +0000

Глобалната иницијатива Ковакс, заеднички покрената од СЗО и Алијансата за вакцини (ГАВИ), ја надмина својата цел да собере повеќе од две милијарди долари за купување и дистрибуција на вакцини за Ковид-19 за сиромашните земји, но посочува дека сè уште недостасуваат финансиски средства. Досега, вкупно 184 земји учествуваат во инструментот Ковакс, од кои 92 се земји со низок и среден приход, квалификувани за пристап до вакцини за Ковид-19 во рамки на т.н. „Заложба за напредување на пазарот“, (АМС). Финансирањето за АМЦ ќе овозможи Ковакс да купи почетни милијарди дози вакцини за 92 земји што не можат да си го дозволат тоа. – И државите и поединците ширум светот ги вовлекоа рацете длабоко во своите џебови и ни помогнаа да ја постигнеме нашата цел, нагласи шефот на ГАВИ, Сет Беркли. Сепак, тој, исто така, предупреди дека итно им требаат средства за лекување и дијагностицирање. До крајот на 2021 година им требаат дополнителни 5,3 милијарди долари за дијагностика и 6,1 милијарди долари за терапевтски процедури. Потребни им се и други пет милијарди долари во 2021 година за да набават дози вакцина Ковид-19.

Г-7: Сиромашните земји да се ослободат од отплата на долгот и во 2021 година

Магдалена Андонова — Mon, 17 Aug 2020 18:14:26 +0000

Министрите за финансии на Г-7 денеска оценија дека е подобрена економската состојба во нивните земји и се договорија да продолжат да ги координаираат своите одговори на пандемијата со Ковид-19, изјави портпаролот на американското Министерство за финансии. На телеконференцијата, министрите ги повикаа сите официјални билатерални кредитори во целост да го спроведат замрзнувањето на долгот на најсиромашните земји во светот, откако тоа беше договорено на ниво на Групата 20 најразвиени светски економии. Министрите на земјите-членки на Г-7 се согласија и да ги разгледаат дополнителните опции за земјите со ниски приходи, вклучително и ослободување од отплатата на долгот да продолжи и во 2021 година. (МИА)

Светска банка ќе им помогне на најсиромашните земји по пандемијата

Тале Кристо — Sat, 04 Apr 2020 08:41:54 +0000

Претседателот на Светска банка, Дејвид Мелпес очекува дека пандемијата на новиот коронавирус ќе предизвика голема, глобална рецесија, која најтешко ќе ги погоди најсиромашните и најчувствителните земји. – Планираме да реагираме силно со програмите за поддршка, посебно кон малите земји, објави Мелпес преку социјалната бизнис мрежа Линкедин. Тој најави дека наскоро ќе разговара со лидерите на Етиопија, кенија и други држави.