скандинавија – Kurir.mk

Невремето Бабет во северна Европа продолжи и денеска, зафатени Велика Британија, северна Германија и јужна Скандинавија

Тале Кристо — Sat, 21 Oct 2023 13:00:49 +0000

Невремето во северна Европа продолжи и денеска во Велика Британија, северна Германија и јужна Скандинавија со силен ветер и обилни врнежи од дожд, кои предизвикаа поплави, евакуација на жителите, прекин на електричната енергија, прекини на сообраќајот. Од четвртокот четири лица ги загубија животите во невремето „Бабет“ како што го нарече британската метеоролошка служба. Последната жртва е 33-годишна жена врз чиј автомобил во петокот паднало дрво на островот Фехман во Балтичкото Море, јави германската новинска агенција ДПА. Останатите три жртви за време на невремето беа во Англија и Шкотска во четвртокот и петокот. Во Фленсбург, германски град јужно од границата со Данска, нивото на водата се зголеми за повеќе од два метра, што е највисоко во последните сто години. Струјата во поплавените делови од градот е исклучена од безбедносни причини. Фериботите и возовите не сообраќаат во погодените области во Германија, Данска и јужна Шведска. Аеродромот во Копенхаген денеска работи, а вчера беа откажани 142 лета. Луѓето се евакуирани од домовите и камповите во тешко погодените области во Данска и многумина се без струја. Општина Хадерслев во јужна Данска одлучи да го евакуира целото крајбрежно подрачје. „Ситуацијата на брегот сега е толку сериозна што е премногу опасно да се остане таму. Погодените подрачја се евакуирани, а итните служби работат“, соопшти синоќа општинската администрација. Данскиот метеоролошки институт предупреди на силен ветер и висок водостој за време на викендот. Во Шкотска, за денеска се прогнозираат до 100 милиметри дожд, а неколку градови се под црвено метеоролошко предупредување, највисоко ниво на загрозеност. Џонатан Вотри од Метеоролошката канцеларија на Обединетото Кралство изјави дека во источна и северна Шкотска веќе паднало колку што паѓа за месец и половина и дека за само три дена може да заврне колку за два месеца. Шкотската агенција за животна средина предупреди дека уште една голема река, Дон, може да се излее денеска. Невремето предизвика прекини на сообрачајот низ Велика Британија, затворени се неколку главни патишта и железници, како и аеродромот Лидс-Бредфорд во северна Англија.

Бурата Ото ја погоди Скандинавија

Тале Кристо — Sat, 18 Feb 2023 13:15:12 +0000

Поради бурата Ото која ја погоди Скандинавија, во Данска се евакуирани бројни станбени згради, затворен е мостот Оресунд кој ги поврзува Копенхаген и Малме во Шведска, а норвешките фериботи се откажани. Ветровите достигнаа брзина и до 145 километри на час во југозападна Норвешка, а метеоролозите во Данска прогласија портокалова временска тревога за јужниот дел на полуостровот Јитланд. Градежна компанија од Копенхаген евакуираше 280 жители од три станбени блокови, предупредувајќи дека невремето може да ги урне. Станува збор за станови од 1950-тите, изградени со грешки и не можат да издржат силни ветрови. Додека невремето се движи источно од Норвешка, мостот Оресунд, преку кој минува и воз, е затворен. Железничките линии меѓу Малме и Гетеборг се откажани, а возачите се повикани да не патуваат.

Од понеделник овие две авиокомпании нема да бараат маски на летовите во Скандинавија

Магдалена Андонова — Fri, 15 Oct 2021 08:21:58 +0000

Авиокомпаниите САС и Норвежен од понеделник нема да бараат носење маски на нивните летови во Скандинавија, односно Норвешка, Шведска и Данска. - Со оглед дека сите три скандинавски земји се отворени за патување и ги укинаа епидемиолошките ограничувања, повеќе не гледаме потреба да бараме носење маски на сите домашни летови, како и летови меѓу Данска, Шведска и Норвешка, рече портпаролката на САС, Фреја Анамац за шведското радио. И компанијата Норвежен на својата веб – страница објави дека повеќе нема да бара носење маски на овие летови поради намалениот ризик од инфекција. Двата превозника нагласија дека за сите нивни летови надвор од Скандинавија, поради меѓународните регулативи, сепак, ќе биде задолжително носење маски. Во изминатиот месец, сите три скандинавски земји ги укинаа сите епидемиолошки мерки, вклучително и обврската за носење маски во различни ситуации, додека во Шведска во ниту еден момент од пандемијата немаше таква обврска.