слабости – Kurir.mk

Храбро прифати ги: Неколку причини зошто не треба да се плашиш од личните слабости

Ивона Петрова — Mon, 20 Mar 2023 08:23:21 +0000

Многу луѓе чувствуваат страв и срам поради нивните слабости. Може да се плашите од последиците од вашите слабости и да се чувствувате вознемирени поради тоа што вашите слабости ќе станат очигледни на другите. Можеби и самите сметате дека ваша слабост е лошата дисциплина на децата, ниските амбиции, слабите социјални вештини, неразбирањето на одредени концепти, како што се финансиите, интровертноста и слично. Кога луѓето доживуваат нешто за себе како „слабост“, најмногу поради наметнатото мислење од општеството или ниската самодоверба, тие обично избегнуваат се што го поттикнува. Ова води до дополнителна атрофија, на пример, како да мислите дека вашата десна рака е послаба од левата, па секогаш ја користите само левата. Ова всушност ја прави десната рака послаба бидејќи мускулите слабеат. Еве зошто не треба да се плашите од вашите „слабости“ и да избегнувате ситуации во кои може да наидете на нив. 1. Луѓето кои се добри во се може да изгледаат многу досадно, па дури и одбивно. Никој не е совршен, па оние кои се обидуваат да остават таков имиџ делуваат неискрено. 2. Лесно можете да ги надоместите слабостите со тоа што ќе се дружите со луѓе на кои вашата слабост им е силата. 3. Можете да ги комбинирате вашите слабости со вашите силни страни. Ако, на пример, сте одлични во технологијата, но не сакате да се дружите лице в лице, обидете се да најдете пријатели на Интернет. 4. Слабостите може да ве наведат да барате креативни решенија за проблемите на кои другите не би ни помислиле. 5. Да се биде добар во сè не е неопходно за успех во остварувањето на вашите цели. 6. Да се биде добар во сè не е неопходно за да бидеш сакан или почитуван. 7. Ранливоста, како барање помош или совет и откривање на слабости, може да изгради блискост и доверба во односите. 8. Познавањето на вашите слабости може да ви помогне да ги изберете животните патишта и да донесувате големи одлуки. 9. Слабостите не се скаменуваат. Ако сакате да работите на нив, секогаш можете. 10. Слабостите понекогаш имаат неочекувани позитивни последици. Избегнувањето е лошо за менталното здравје и може да предизвика многу проблеми. Колку помалку се плашите од вашите слабости, толку помалку ќе избегнувате сценарија кои предизвикуваат тој срам и вознемиреност. Тоа ќе влијае на тоа како се чувствувате, што постигнувате и вашите односи.

Информација на Народниот правобранител за констатираните слабости во обрзованието

Катерина Бојаџиева — Fri, 30 Sep 2022 09:36:42 +0000

Недостиг од учебници или користење оштетени во наставата, недоволна грижа за менталното здравје на учениците, немањето образовни асистенти за учениците со попречености во средните училишта и влијанието на енергетската криза врз работата на училишта се нотирани во Информацијата на Народниот правобранител за констатираните слабости при остварувањето на правото на образование и спроведувањето на воспитно-образованиот процес во основните и средните училишта во земјава, која е доставена до Министерството за образование и наука. Иако е почната учебната 2022/2023 година, се наведува во Информацијата, не запираат реакциите во јавноста за недостиг од учебници за учениците од основните и средните училишта. Родителите и учениците реагираат поради немањето печатени учебници за сите наставни предмети, а се жалат и поради дотраеност на достапните учебници. -Учениците кои посетуваат настава во прво, второ, четврто и петто одделение информираат дека немаат добиено комплети печатени учебници за сите наставни предмети согласно наставниот план и програма, што укажува дека учениците од овие одделенија ја започнаа учебната година со материјали за учење во печатена форма, во кои се обединети содржини од неколку наставни предмети. Народниот правобранител го нотираше и немањето учебници по наставниот предмет Англиски јазик и оваа учебна година, па наместо користење учебник, според наводите, наставниците и учениците се служат со извадоци од постари учебници и други извори на материјали согласно наставната програма. Сознанијата на Народниот правобранител се дека години наназад нема официјално одобрени учебници по Англиски јазик, се наведува во Информацијата. Учениците се жалат дека дополнителен проблем им претставува тоа што најголем дел од добиените учебници се сериозно оштетени, до степен на неупотребливост, поради што родителите се изложуваат на трошок да ги печатат електронските верзии на учебниците. Преку медиумите за ова реагираа и од Сојузот на средношколци наведувајќи дека учениците добиле или многу оштетени учебници од кои не се учи, или дел од нив воопшто не добиле учебници. Овој проблем е присутен во повеќе средни училишта во Скопје, Битола, Прилеп, Велес, Делчево и во други градови. Според нив, недостигот од учебници особено е карактеристичен за стручните предмети во средните стручни училишта. Народниот правобранител укажува на актуелниот Закон за учебници за основно и средно образование според кој учебникот може да биде во употреба пет учебни години, освен учебниците во кои има содржини кои ученикот ги пополнува со пишување, боење, сечење и лепење, како и учебниците за прво, второ и трето одделение. -Земајќи предвид дека новата учебна година почна со реализирање на наставата со физичко присуство, без исклучок за сите ученици, до нашата институција доставени се претставки од родители кои изразија загриженост за ваквата одлука, посочувајќи дека овој начин на реализирање на настава претставува предизвик за хронично болните деца и родители, како и другите членови на потесното семејство, особено имајќи предвид дека пандемијата е се уште актуелна, како и мерките за заштита од Ковид-19, и во таа насока заради непречено образование без да се доведе под прашање здравјето на хронично болните деца, но и здравјето на хронично болните лица во семејствата на учениците како лица во ризик, побараа интервенција со цел да се даде можност и оваа учебна година да продолжи настава со учење од далечина за овие деца, се наведува во Информацијата на Народниот правобранител. Со оглед дека учебната година е во тек, пандемијата со Ковид-19 е се уште присутна, Народниот правобранител му препорачува на Министерството да побара стручно мислење од Комисијата за заразни болести во однос на начинот на следење на настава на хронично болни деца ученици и на ученици кои имаат хронично болни лица во нивните семејства. Притоа потсетува дека сите инволвирани во наставниот процес треба да се грижат и да придонесат за безбедно и непречено одвивање на образовниот процес на децата. Извештајот се осврнува и на трагичниот настан во гимназијата „Р.аде Јовчевски Корчагин“ – Скопје, за кој вели дека сериозно ја потресе јавноста и отвори многу прашања кои бараат сериозна анализа, меѓу кои и прашањето за грижата за менталното здравје на учениците и колку е тоа предмет на анализа и работа на наставниот и стручниот кадар од училишните стручни служби. Народниот правобранител констатира дека мал број ученици имале поддршка од страна на педагошко-психолошката служба, и во мал број на училишта се одржале предавања на тема подобрување на психолошката добросостојба. -Имајќи го предвид наведеното, како и неодамнешниот настан, во кој средношколец си го одзеде животот, Народниот правобранител укажува дека училиштата, покрај воспитно-образовната дејност, даваат клучен придонес во емотивниот и конгнитивниот развој на децата и имаат значајна улога во општествениот развој и промените. Следствено, вработените во училиштата, наставниот кадар и стручните тимови, со оглед на значајната улога во процесот на заштита на децата, на потребите и грижите на децата потребно е да им пристапуваат чувствително грижејќи се за нивните права, приватност и достоинство, се наведува во Извештајот. Народниот правобранител е на мислење дека Министерството за образование и наука, во соработка со другите ресорни министерства (Министерство за здравство, Министерство за труд и социјална политика), и во координација и соработка со училиштата, институциите за заштита на децата, како и локалните самоуправи континуирано треба да преземат активности и мерки за заштита на менталното здравје, како и безбедност на учениците во училиштето и надвор од него. Исто така, стручните соработници во училиштата, потребно е да бидат едуцирани и обучени за рано откривање на проблеми во менталното здравје на децата, да ги препознаат знаците од нарушено ментално здравје, со цел превенција, спречување и минимизирање на немили настани кои го загрозуваат здравјето, добросостојбата, и животот на учениците, со почитување на правата на децата и нивниот најдобар интерес. Констатира и недостиг од образовни и лични асистенти за учениците со попреченост вклучени во редовните училишта и дека тоа претставува сериозна бариера за непречено остварување на правото на образование на секое дете. -Согледувајќи го недостигот од образовани асистенти во минатата учебна година, позитивно за истакнување е дека оваа учебна година учениците со попреченост кои следат настава во општинските основни училишта ќе бидат поддржани од вкупно 720 образовни асистенти обезбедени преку Министерството за образование и наука, што е значајно зголемување на бројот на ангажирани асистенти во споредба со минатата година. Народниот правобранител ја поздравува одлуката на Министерството за зголемување на бројот на образовни асистенти, воедно укажува континуирано да се следи состојбата, со цел правично и навремено доделување на образовните асистенти за децата од основното образование за кои овој тип на поддршка во учењето е потребна за непречено образование. Во овој контекст, Народниот правобранител укажува на потребата од неопходноста за континуирана соработка на МОН со надлежните тела за функционална проценка со цел редовно согледување на реалната потреба, а со тоа навремено обезбедување на дополнително потребни образовни асистенти, како сите ученици за кои овој тип на поддршка им е потребен да можат да го остварат своето право, стои во Извештајот на Омбудсманот. Во врска со наведеното, проблем кој е нотиран и оваа учебна година е тоа што за учениците со попреченост кои следат настава во средните училишта не се обезбедени образовни асистенти како системско и трајно решение. -Загрижува тоа што за учениците со попреченост во средните училишта образовни асистенти ќе се обезбедуваат со поддршка на УНДП преку вклучување на евидентираните невработени лица од Агенцијата за вработување на РСМ во програмата за Општинско-корисна работа, а според сознанијата на Народниот правобранител само неколку општини во државата во август објавија јавни повици за ангажирање на образовни асистенти, пришто ангажманот е во времетраење од девет месеци за што ќе добиваат паричен надоместок за работно ангажирање во висина од 9.000 денари, поради што постои голема незаинтересираност од страна на потенцијалните кандидати. Според сознанијата, потенцијалните кандидати кои ќе ја испорачуваат оваа услуга воопшто и не се проценуваат врз основ на нивните професионални квалификации и компетенции, а ќе даваат поддршка во учењето на деца со попреченост што секако претставува одговорна задача која треба максимално посветено и профеионално да се работи, укажува Народниот правобранител. Исто така, проблем на кој посочиле подносители на претставки кај Народниот правобранител е тоа што за учениците со попреченост од државните средни училишта кои се под ингеренции на Министерство за образование и наука, воопшто не е можно добивање образовна асистенција, па тие и во текот на оваа учебна година остануваат без потребната поддршка, со што се повредува правото на квалитетно образование, а воедно се доведуваат во нееднаков третман со другите ученици, што е спротивно на Конвенцијата за права на детето и Конвенцијата за права на лицата со попреченост, и истото не смее да се дозволи. Народниот правобранител препорачува интензивирање на активностите од страна на Министерството за образование и наука со цел донесување нов Закон за средно образование и негово усогласување со Конвенцијата за правата на лицата со попреченост, и во таа насока поддршката за учениците со попреченост во средното образование (образовна асистенција) да биде утврдена како системско решение. -Дотогаш, со оглед дека учебната година е во тек, Народниот правобранител препорачува Министерството согласно надлежностите да ги преземе сите мерки заради овозможување непречено образование и поддршка од образовен асистент за секое дете со попреченост кое следи настава во државните средни училишта кои се под ингеренција на Министерството, додека, пак, во соработка со локалната самоуправа да се изнајде решение за учениците со попреченост вклучени во општинксите средни училишта, наведува Народниот правобранител. Во однос на актуелната енергетска криза во државата, се наведува во Извештајот, од аспект на почитување и непречено остварување на правото на образование на децата/учениците, имајќи ги предвид надлежностите на ова Министерство, кое преку блок-дотации до општините го финансира греењето, а менаџирањето на средствата е во надлежност на локалната самоуправа, укажува дека е потребно Министерството за образование и наука, во соработка со локалната власт, директорите на училиштата на локално и централно ниво, преку спроведување сеопфатна анализа, да ја согледа моменталната состојба за подготвеноста на училиштата за грејната сезона, се со цел непречено реализирање на воспитно-образованиот процес за децата во зимски услови. – Според Народниот правобранител, потребно е да се преземат сите мерки заради непречено одвивање на наставниот процес во училиштата, при што со особено внимание да се следат ефектите на мерките во услови на енергетска криза и секако влијанието на истите врз правата на детето, потсетувајќи дека донесувањето на која било мерка која ги засега децата да биде претходно разгледана и од аспект на најдобриот интерес на детето, со цел непречено и квалитетно образование на секое дете, стои во Извештајот за согледаните состојби во образованието, која Народниот правобранител му ја достави на Министерството за образование и наука.

Психолозите советуваат: Еве како полесно да ги прифатите мааните на партнерот

Ристе Здравков — Wed, 02 Mar 2022 08:27:09 +0000

Психолозите често нагласуваат колку е важно да се прифатат слабостите на партнерот во остварувањето здрава љубовна врска. Никој не е совршен и сите имаме свои маани. Сè додека овие недостатоци не нѐ загрозуваат и не се извор на големо незадоволство или несигурност, ние едноставно треба да ги прифатиме. Како да го направите тоа? Следете ги овие совети на терапевтите. Преиспитајте колку се овие маани сериозни Честопати нè нервираат некои аспекти на личноста на нашиот партнер кои не се баш премногу важни. Нашата фрустрација тогаш расте, но мора да се прашаме дали е оправдано во однос на тоа колку навистина се значајни недостатоците на партнерот. Ако вашиот партнер е емоционално сигурен и ги има сите други фундаментални квалитети што ви се многу поважни, тогаш едноставно игнорирајте ги споменатите ситници. Прифатете ги сопствените недостатоци Првиот чекор во прифаќањето на недостатоците на вашиот партнер е сознанието дека и ние ги имаме. И можеме да го иритираме партнерот со некои наши навики или карактеристики. Во моментот кога ќе се фокусираме на неговите недостатоци, забораваме дека и ние не сме совршени. Ние секогаш ја гледаме ситуацијата од наша перспектива, но понекогаш е добро да ја разгледаме ситуацијата и од нашиот партнер, со цел подобро да го разбереме неговото однесување. Размислете зошто одредени маани на партнерот толку многу ве нервираат Можеби ве потсетуваат на претходни лоши љубовни искуства и ги активираат старите чувства во вас. Во тој момент вие всушност не реагирате на однесувањето или личноста на вашиот партнер, туку на сеќавања и претходни настани, т.е. луѓе во вашиот живот. Не принудувајте го партнерот на неважни промени Нормално е да очекувате од партнерот да промени некоја форма на лошо однесување што негативно влијае на вас, него или вашата врска. Ова се големи, важни и значајни промени што можат да ја подобрат љубовната врска. Сепак, не можеме да очекуваме човек да промени сè само заради нас, а особено не да менува некои ситници што воопшто не нѐ загрозуваат, туку само повремено ни „одат“ на нерви. Не заборавајте дека некои навики или однесувања се резултат на вредностите на вашиот партнер кои можат да бидат различни од вашите. Во тој случај, треба да размислите дали сакате да бидете со личност која не ги споделува вашите вредности или не ви пречи да бидете различни.

Дознајте: Кои слабости ги крие секој хороскопски знак?

Катерина Бојаџиева — Mon, 18 Mar 2019 14:45:27 +0000

Сме читале многу пати за најсилните адути и карактеристики на секој хороскопски знак, нешто поретко за нивните слаби точки и маани. Но, како што секој знак може да биде позитивен, така тие кријат и многу антипатични и негативни карактеристики. Прочитајте го следниот текст и дознајте кои се тие негативни особини кои ги крие вашиот знак: Овен: Овните се силен, огнен и тврдоглав знак. Кај нив ретко може да се најде слаба точка, бидејќи многу вешто ги кријат своите недостатоци, со помош на силниот карактер. Но, колку круто да изгледаат, тие всушност се многу емотивни, а најмногу се плашат од осаменост, најчесто, поради потребата некој да ги почитува и да им го крева егото. Слабата точка, исто така им е семејството. Поради тоа им е потребен партнер што постојано ќе биде со нив и ќе им дава поддршка и утеха во тешките времиња. Бик: Тврдоглави материјалисти со цврсти цели. Најслабати карактеристики им се нетрпеливост и тврдоглавост. Ретко сакаат да ризикуваат во животот, бидејќи се плашат од недостаток на финансии, кои би им овозможиле лежерен и мирен живот. На своите блиски сакаат да им обезбедат стабилен живот, поради што понекогаш делуваат како најголеми материјалисти кои живеат исклучително за работа и одмор. Близнаци: Тие се познати по честите промени на расположение, нервози, фатални судбински предвидувања на иднината и недостаток на трпение. Најслабата точка им е соочување со личност посилна од нив. Тогаш ги обзема паника и страв, бидејќи мораат да се соочат сами со себе. Сите проблеми во комуникацијата ги сфаќаат лично, што изнимно лошо делува врз нивната психа. Рак: Најслаба карактеристика им е вродената несигурност и стравот. Секогаш бараат стабилни личности, партнери и безбеднна околина. Најмногу се плашат од губење на саканите личности или статусот во општеството. Не се доволно сигурни во себе, често се интровертни, тивки и скромни, многу ретко се наметнуваат во друштво или меѓу луѓе. Лав: Кралевите секогаш се најубави, најталентирани и најинтересни. Нивните слаби точка се гордост и суета, кои понекогаш немаат граници. Поради тоа, многу лесно може да се манипулира со нив, особено преку комплименти. Се плашат од јавен потсмев и губење на моќта и влијанието во општеството. Девица: Опседнати се контрола и ред, најслабата точка им е губење на истите. Доколку почувствуваат дека губат контрола врз својот живот, стануваат депресивни и нервозни. Голема потреба за самоконтрола доведува до нервни проблеми. Би требало да научат почесто да се опуштаат, бидејќи некои работи во животот едноставно не можат да се контролираат. Вага: Вагите не сакаат конфликти, особено јавни, без разлика дали се работи за непознати луѓе или блиски пријатели. Поради тоа често се воздржуваат. Избегнуваат стресни ситуации и самите себе се убедуваат дека немаат проблеми. Често не можат да се решат што сакаат, па на крај остануваат без ништо. Исто така, слаба точка им е храната во која знаат и да претераат. Шкорпија: Слабата точка им е љубовниот живот, иако се едни од најголемите заводници во Зодијакот. Се обидуваат никогаш да не ја изгубат контролата. Најранливи се кога се заљубени. Не се оптеретуваат со физичкиот изглед, бидејќи ништо не е постојано. Стрелец: Прилагодливи и снаодливи. Најслабата точка им е паранојата, бидејќи секогаш мислат дека некој им работи позади грб. Опседнати се со правдата, затоа не поднесуваат агресија и насилство. Премногу се чувствителни на страдања и туѓи проблеми. Секогаш сакаат да дознаат најмногу што можат. Јарец: Најмногу се плаши од промени, иако секогаш се стреми напред и бара начин како да се искачи на врвот. Сепак, и покрај амбицијата, слаби се на емотивен план. Често им веруваат на луѓето, што знае да заврши негативно за нив. Суеверни се, особено кога се работи за партнерот или членовите на семејството. Водолија: Претенциозен знак кој најмногу се плаши од губење, без разлика дали се работи за професионалниот живот, односно кариерата, или за блиските луѓе, семејството и пријателите. Се плашат од понижување, болести и сиромаштија. Риба: Вешто ги кријат своите несигурности, а слабите точки малкумина можат да ги забележат. Амбициозни се и способни, поради што најмногу се плашат од посилните луѓе. Особено се чувствителни на беспомошните луѓе, децата, постарите лица. И покрај развиената емпатија, понекогаш е добро да се дистанцира од секојдневните проблеми, за да се избегне непотребна депресија.