славјанка петровска – Kurir.mk

Митева: Срамота е што Славјанка, како жена министерка, се обидува да го скрие скандалот во АРМ кој првично го призна

Катерина Бојаџиева — Fri, 27 Oct 2023 10:57:15 +0000

Можам само да кажам дека различните изјави на Славјанка Петровска се доказ дека во рамки на институциите на државата секоја незаконито постапување или однесување од страна на власта, тие се обидуваат да го сокријат наместо да го санкционираат, вели портпаролката на ВМРО-ДПМНЕ, Марија Митева запрашана за коментар за изјавите на министерката за одбрана, Славјанка Петровска каде што таа прво, на седница за пратенички прашања во Собрание, признава дека имало секс афера во министерството за одбрана која потоа во телевизиско гостување вечерта, негираше. „Фрапантно е тоа што една министерка на земја членка на НАТО си дозволува да даде една изјава од собраниска говорница, при тоа потенцирајќи дека е запознаена со случајот, а веднаш потоа на интервју, истиот ден, да каже дека не била запознаена. Тоа отвара многу прашања, кој побара од неа да даде различна изјава од таа што ја дала? Кога ја зборува Славјанка вистината, дали од собраниска говорница или на нејзиното интервју? Или да бидам попрецизна, кога лаже“, прашува Митева. И дополнително, додаде Митева, фрапантен е моментот што жена министерка се обидува да сокрие ваков скандал. „Очекуваме одговорност и оставка. Дополнително, Славјанка Петровска континуирано се обидува да креира перцепција во јавноста дека пратеникот Ковачки, кој постојано објавува скандали од нејзиното работење и од работењето на останатите министри, дека креира лажни вести. Напротив, се докажало дека Ковачки, како пратеник, секогаш ги обелоденува скандалите кои што подоцна се потврдува дека се вистинити“, истакна Митева.

Петровска: Не постои реална закана за безбедноста на државата

Ивона Петрова — Thu, 26 Oct 2023 20:12:34 +0000

Не постои реална закана по безбедноста во Северна Македонија, изјави вечерва министерката за одбрана Славјанка Петровска. Во вечерашното гостување во емисијата „Click Plus“ на ТВ21, Петровска рече дека нституциите успешно си ја работат својата работа и оти закани побезедноста нема. - Апсолутно проценките, анализите и информациите со кои располагаме велат дека до овој момент не постои реална закана за безбедноста во Северна Македонија, нагласи министерката за одбрана. Во врска со случајот за наводно сексуално вознемирување во Армијата што денеска од собраниската говорница го актуелизира пратеникот на ВМРО-ДПМНЕ Драган Ковачки, таа кажа дека за таков случај досега не била информирана. - Ако нешто до мене стигне како информација, секогаш без двоумење и притоа без да водам јас истрага, веднаш го повикувам шефот на военото разузнавање и информирам за сите информации кои стигнале до мене, изјави Петровска.

Ковачки со тврдења за злоупотреби на службени позиции во Армијата, Петровска вели ги пријавила сите информации

Ивана Ефремовски — Thu, 26 Oct 2023 11:57:19 +0000

Во Секторот за воена безбедност и разузнавање постојат записи со мои изјави и сите информации кои сум ги имала ги пријавив кај службата задолжена за прибирање на такви информации. Јас не водам истрага и постапки не можам да преземам на своја рака, потенцираше денеска министерката за одбрана Славјанка Петровска во Собранието, во одговор на прашање на пратеникот од ВМРО-ДПМНЕ, Драган Ковачки, за наводни злоупотреби на службени позиции и сексуално вознемирување на офицерки во Армијата. Таа појасни дека не смее министер за одбрана да влијае на истрагата. -Не смее ниту овој ниту кој било друг министер за одбрана да влијае на истрагата. Во Министерството за одбрана, односно во Секторот за воена безбедност и разузнавање постојат записи. Секогаш кога сум добила какви било информации, кои нема да ги кажувам тука затоа што се класифицирани, јас сум ги пријавила до службата. Ниту водам истрага, ниту имам законско право да преземам дел од истрагата која ја води Јавното обвинителство, рече Петровска. Министерката потенцираше дека никогаш нема со политичко влијание да се обидува да се замеша во истрагите и додека не види докази или не биде известена од надлежните органи, нема да може да презема ништо на своја рака. Според пратеникот Ковачки, во АРМ има сериозни случи на злоупотреби на службената позиција и сексуално малтретирање на подредени офицерки и војници од страна на високи офицери, вклучително и од страна на генерали и од началници во воената безбедност. -Истите високи офицери за возврат им ветувале унапредување, школување на Воената академија и други бенефити. За изнудувањето на сексуални услуги од помладите по чин и функција од страна на нивните претпоставени и високи старешини се дознало случајно, т.е. во текот на истрагата за примање мито, кое го обелоденивме ние од ВМРО-ДПМНЕ, а за кое министерката за одбрана негираше. Постојат слики и снимки со кои се потврдува злоупотребата на службената позиција од страна на генерал и полковник и за истото е информирана министерката за одбрана, потенцираше Ковачки. (МИА)

Ќе се извини ли Славјанка Петровска што изнесуваше лажни инсинуации во јавноста за т.н. случај “Делчевски ниви”?

Тале Кристо — Sat, 21 Oct 2023 08:57:50 +0000

Веројатно стимулирана и охрабрена од провладината пропаганда и медиумски мегафони Славјанка Петровска во 2021 година храбро изнесуваше инсинуации лаги и невистини во јавноста во врска со т.н. случај “Делчевски ниви” кој што властите го креираа да го нарушат кредибилитетот на ВМРО-ДПМНЕ и директно угледот и интегритетот на Претседателот на опозициската партија Христијан Мицкоски. „Ширењето лажни вести и невистини за наводни притисоци кон пратеникот беше всушност одбрана на криминал. Јавно прашаме дали во овој скандал на нелегално финансирање се вмешани лица блиски до Христијан Мицкоски? Дали меѓу тие лица се и членови на обезбедувањето на Мицкоски и функционери на ВМРО-ДПМНЕ? Очекуваме одговори и од Мицкоски: каква е неговата поврзаност со овој скандал“, рече на прес конференција од пред штабот на Бихачка, високиот партиски функционер на СДСМ Славјанка Петровска. Сега откако надлежните органи го отфрлија овој случај поради тоа што нема никакви докази за сторен криминал, рашањето е дали поради ширењето на лаги и невистини Славјанка Петровска ќе се извини на ВМРО-ДПМНЕ, на претседателот Мицкоски како и на целокупната МАкедонска јавност што потхранета со пропагандата на провладините медиуми сакаше да внесе заблуда во државата додека владата во која таа е еден од најистурените членови ја турка Македонија се подлабоко во калта на сиромаштија, несигурност и криминал и корупција? Извор: bregalnicki.mk

Петровска: Нема реална закана за безбедноста во државата

Ивона Петрова — Fri, 20 Oct 2023 10:09:43 +0000

Република Северна Македонија во моментов нема лоцирано закани по безбедноста на државата и на граѓаните. Институциите, службите, безбедносно - разузнавачката заедница будно ги следат случувањата во Израел и Украина, разменуваат информации и на национално ниво и во рамките на НАТО алијансата и соодветно се подотвуваат доколку се лоцира предизвик да се реагира, изјави министерката за одбрана, Славјанка Петровска во Охрид каде имаше средба со припадниците на доброволните противпожарни друштва од земјава. Таа посочи дека секогаш кога се отвора нов конфликт низ светот, тој предизвикува одредени проблеми, пореметувања во постојаното функционирање на државите, независно дали е тој поблиску или подалеку. - Што поскоро завршат воените дејствија, час поскоро може да се седне на маса и да се разговара за сите проблеми што ги поттикнале конфликтите. Знам дека многу од проблемите се тешки, причините за случувањата се проблематични, меѓутоа ништо не е повредно од човечките животи, рече таа, одговарајќи на новинарски прашања за безбедносната состојба во земјата и регионот по однос актуелните воени конфликти во Израел и војната во Украина. Петровска рече дека не и е познато дека на институциите на државата и биле доставени некакви барања за физичка заштита на припадниците на еврејската заедница во земјата и нивните верски објекти. - Координацијата на безбедносните и разузнавачките служби и информациите што се разменуваат покажуваат дека сега закана нема, независно дали се работи за припадници на една заедница или кон некакви објекти, но тоа не значи дека институциите остануваат само на таа информација. Ќе ги следиме случувањата и доколку е потребно и се укаже некакво вид безбедносна закана, не само Евреите туку секој еден граѓанин на нашата држава ќе биде соодветно заштитен, рече Петровска.

Ќе му се извини ли Петровска на Мицкоски која велеше дека тој е вмешан во „Делчевски ниви откако ЈО ја прекина истрагата за овој случај?

Катерина Бојаџиева — Fri, 20 Oct 2023 08:46:43 +0000

Уште лага на СДСМ излезе на виделина откако во текот на вчерашниот ден Јавното обвинителство одлучи да се запре постапката за случајот „Делчевски ниви“. Како што се наведува во наредбата истрагата е запрена затоа што одредени сведоци кои првично дале исказ дека осомничените направиле штета на компанијата, сега го смениле исказот. „По анализа на кривичната пријава, исказите на сведоците, исказите на осомничените како и сите обезбедени материјални докази во текот на истражната постапка, се констатира дека од конкретната истражна постапка не произлегоа ниту материјални, ниту вербални докази кои би го потврдиле основното сомнение дека делата кои им се ставаат на товар на осомничените се кривични дела за кои се гони по службена должност, односно произлезе дека пријавените не презеле дејствија кои ги сочинуваат битијата на пријавените кривични дела“, се вели во наредбата за запирање на постапката. Имено во овој случај „Делчевски ниви“ беа осомничени седум лица, а меѓу нив и двајца поранешни управители на „ЕВН електрани“: поранешниот претседател на младината на ВМРО-ДПМНЕ, а партиски функционер, Игор Гиевски, како и Мирослав Митровски, син на поранешниот градоначалник на Ѓорче Петров од редовите на ВМРО-ДПМНЕ, Сокол Митровски. Предметот се однесуваше на купување земјиште од ЕВН Електрани за изградба на фотоволтаични централи, кое било платено 40-тина пати поскапо од реалната пазарна цена. Но, голем број на функционери од СДСМ преку медиумите блиски до нив имплицираа вмешаност на претседателот на ВМРО-ДПМНЕ, Христијан Мицкоски во овој случај. Министерката за одбрана Славјанка Петровска од СДСМ пред две години тврдеше дека парите од продажбата на нивите во Делчево, случај што го отвори Управата за финансиска полиција а беше обелоденет на денот кога требаше да се гласа за недоверба на Владата во Собранието, завршиле во партиското седиште на ВМРО-ДПМНЕ. -Јавноста е запознаена дека Управата за финансиска полиција има отворено предистрага за нелегално финансирање на политичка партија. Станува збор за голем скандал. Според јавно објавените информации преку препродажба на ниви по десеткратно повисока цена обезбедени се милионски средства, на нелегален, криминален начин. Постои основано сомневање дека на крајот овие црни пари завршиле во белиот дворец“, кажа Петровска и додаде: -Јавно прашуваме дали во овој скандал на нелегално финансирање се вмешани лица блиски до Христијан Мицкоски? Дали меѓу тие лица се и членови на обезбедувањето на Мицкоски и функционери на ВМРО-ДПМНЕ? Очекуваме одговори и од Мицкоски: Каква е неговата поврзаност со овој скандал? Но, по вчерашните случување каде се прекина истрагата на овој случај, изјавата на министерката Петровска падна во вода. Сега се поставува прашањето дали Петровска која јавно го напаѓаше претседателот Мицкоски, ќе му се извини и дали свесно лажела се со цел на наштети штета на Мицкоски и ВМРО-ДПМНЕ.

Едначење по глупост

Љупчо Цветановски — Thu, 19 Oct 2023 08:48:23 +0000

Најнеспособната влада во светот и пошироко го реши проблемот со мечките. Се прашувате како, нели? Епа, остроумните Тачевци викнаа „ЕУРЕКА“ и испланираа за една година од сега да испланираат како ќе ги раселат мечкиштата во западна Македонија. Да, заблескаа по навика и смислија да си дадат рок од година дена за да направат план како да се справат со напаста мечкина и како да ги раселат на други локации. Ви се верува во нивната „промуќурност“? Секако, та ова е чиста класика, би било чудно да беше нешто нормално, умно и логично. Оти, вака функционира суријата северни генијалци, а условот да влезеш во бандата очебијно е да имаш IQ под 33 за да не си над гуру Црпко, да ти лепат рачињата, да немаш проблем со продажба на национални интереси, да си природно агресивен и ступидно арогантен, амбицијата и инстант-кариера без никаква основа и поткованост да ти бидат основна мантра, а многу пожелно е да немаш скрупули и да си дудук за се’, со најповршни познавања на кое било поле. Сеопфатен и широкопојасен дунстер, во кратки црти. Затоа, небулозната „одлука“ за мечките е толку природна и нормална. Им прилега, им „стои“ ко „саливена“. Гарант, и оваа мерка е за побрз влез во ЕУ, не знам како не се сетија да го споменат тоа. Тешка, голема мечкина реформа. Украсете ја со европско знаменце. Иако, пиратско многу повеќе ви личи. А, зошто, воопшто и се мачите, таленти? Та додека вие реагирате сите од таму ќе се иселат, па загрозениот вид „луѓе“ ќе стане проблем за мнозинството мечки. Додека вие, според планот, ги иселите и раселите мечките, она малку преостанати луѓе во Маврово и Ростуше ќе фати џенем од Македонија. Ко што тргнало, ако останете на власт, ќе треба да доселуваме луѓе, а не да раселуваме мечки... Туку, како не ви текна да ги излажете мечките дека дошла зимата, па да си легнат пак пустите, ко суртуците ваши со бесплатно здравство во ЕУ што ги лажевте за името. Тоа ви стои и во описот на работното место, патолошки лажговци. Може и нон-стоп да ги лажете, та штом урсусите станат и се рассонат, пак да си легнат и нон-стоп да хибернираат. Истото што им го правите на Македонците со ЕУ - името, па уставот, па јазикот, па Бугарите во него, па историјата... Да, така и мечките ќе испоумираат сами, а богами и Македонците ќе ги снема. Сите останати среќни и задоволни. Или, муљајте ги животинките дека ќе им донесете датум за пролетно будење, исто ко што оној за преговори со ЕУ го носите веќе шестта година по ред, неспособњаковиќи трагикомични. А, од Маврово и Ростуша и околијата сардисана со мечки, исто како и сите нормални Македонци би ви рекле „мечки да ве јадат“... Ве јале или не, оваа ступидна „мечкина услуга“ за мештаните и „брза“ акција на Ќурка и компанија ме потсети и на пораката на Фон Дер Лајен, која ни порача дека историјата се менува?!?! Душичка научнофантастична. И додека очекувате да чуете дека Урсула измислила временска машина, релативизаторката од Брисел ви се врти и ви вели „Зграпчете го моментот!“. Небаре, мигот со војни насекаде е жива посластица за кандидатите за членство. И, госпожа со огледалца за домородците во чантата, таа не, не се менува. Историјата е нешто што минало, нема враќање назад, не се правете недоветни. И, да, звучиш ко Заев. А, околу она патетично, евтино и демек мотивациско - „зграпчете го моментот,“ си спомнувам дека „Зграпчи го денот“ беше една страница во весникот „Вест“. „Најчитаната“, затоа што беше со голотии. Кај нас, пак, многу одамна, 7-ма година по ред царот/премиерот и претседателот се голи, башка боси. На страна и приглупи, сервилни и субмисивни. Олабавете не’, финтиве ви се ветви ко ланскиот снег, а корисните идиоти кои глумат влада во Македонија одамна не ви се ни корисни. Саде идиоти останаа. Дарба си е дарба. И додека Урсула менуваше историја и штелуваше колективна меморија на цел народ, Цаци упорно стануваше за да ја види сала, Таче понизниот се караше со новинари и ламентираше за непокор, Османи бараше да им купиме нов авион, Владата раселуваше мечки, Маричиќ меѓу два бифтека во бифето бладаше за избеганиот воз, Стево се самодемантираше на две минути, Груби леткаше орлиња, црна Бисера се шеткаше по танга по цркви, Обиџуко феминизираше нов светец, Љупче смишљаше како да фати нова пратка путер и пак да стане славен, а низ македонскиот етер провејуваше сенката на најновата политичка појава која ја краси владејачката сцена. Една од карактеристиките и особеностите на македонскиот јазик е едначење по звучност. Има и исклучоци. Една од карактеристиките и особеностите на актуелната влада, доминантна, е ЕДНАЧЕЊЕ ПО ГЛУПОСТ. Потценување на интелигенцијата на сопствениот народ. И не, тука нема исклучоци... Македонската анамнеза за северниот феномен „едначење по глупост“ е јасна. Болеста се лечи само и единствено со една терапија. Иљачот се вика ИЗБОРИ, повеќе дози ОДГОВОРНОСТ, па долга масажа во зандана...

Петровска: Вистински патриотизам е да преземеме политички чекори кои создаваат иднина за следните генерации

Тале Кристо — Tue, 05 Sep 2023 17:44:18 +0000

Министерката за одбрана Славјанка Петровска денеска во Скопје се обратилa на панел-дискусија на тема „Промовирање на демократијата, единство и мирот преку културна дипломатија во новата ера на конфликти и насилство“, како дел од Форумот за културна дипломатија. Во своето обраќање, како што соопштија од МО, министерката Петровска се осврнала на моменталната безбедносна состојба во Европа која е, како што стои во соопштението, нарушена со бруталната руска агресија врз Украина и позицијата и искуството на Северна Македонија во градењето на функционална, стабилна и мултиетничка демократија која практицира европски вредности. - Предизвиците кои се пред нас, дали тоа е вооружен конфликт, хуманитарни кризи или природни непогоди се комплексни и застрашувачки, а одговорот на овие предизвици е реафирмирањето на нашата заложба да бидеме единствени и да работиме заедно, нагласила министерката. Петровска додала дека како земја-членка на НАТО, но и водејќи се од сопствените одлуки и заложби, Северна Македонија е посветена на колективната безбедност на Алијансата, како и на поддршката на Украина како европска демократија која има полно право да ја одбрани својата независност и сувереност. - Алијансата е посилна и пообединета од кога било досега во зацврстувањето на колективната безбедност, како гаранција за сигурноста на НАТО и граѓаните на земјите-членки, подвлекла министерката. Во контекст на културната дипломатија, министерката Петровска истакнала дека таа ги надминува политичките бариери и дека ни овозможува да се обединиме како човештво. Петровска се осврнала на историјата и научените лекции во 32-годишната независност на нашата држава – осамостојувањето на мирен начин, потпишувањето на Охридскиот и Преспанскиот договор за креирање на мултиетничка демократија и за продолжување на патот кон интеграцијата во НАТО, како и на потребата за превземање на следниот чекор кој ќе го отвори патот кон продолжување на интеграцијата во Европската Унија. - Сите ние кои сме присутни, во нашето работно искуство и кариера научивме дека решавањето на тешките прашања побаруваат тешки одлуки кои се важен политички чекор кој гледа кон иднината наместо кон минатото, чекор кој нè води кон подобро утре за следните генерации. Тоа за мене е вистински патриотизам, заклучила министерката. По обраќањето на министерката, панел-дискусијата продолжила со излагања на панелистите меѓу кои и Елмар Брок, поранешен претседавач на Комитетот за надворешни работи во Европскиот парламент, Наталија Гаврилита, поранешна премиерка на Молдавија, Мохамед Ханиф Атмар, поранешен министер за надворешни работи на Авганистан, Хасан Диаб, поранешен премиер на Либан и Фиона О'Луглин, членка на ирскиот Сенат. Во своето излагање Елмар Брок, соопштија од МО, се осврнал на европската идеја и важноста на политиката за проширување и потребата од зголемување на ефикасноста во донесувањето на одлуки во ЕУ. Поранешната премиерка на Молдавија, Гаврилита, пак говорела за молдавското искуство во однос на руската инвазија на Украина, а поранешниот либански премиер Диаб, се осврнал на важноста на високото образование за развој на толеранција, инклузивност и културен диверзивитет кај следните генерации. Панел-дискусијата поддржана од Министерството за одбрана се одржува во рамки на Светскиот форум за демократија и мир, како пет-годишен проект на Институтот за културна дипломатија. Дел од овој Форум се поранешни претседатели на држави и премиери од Западниот Балкан и Југоисточна Европа, министер од Авганистан, како и професори од Институтот за културна дипломатија, поранешни пратеници во Европскиот парламент и собранијата на земјите од регионот.

Петровска и Агелер во посета на учесници на мултилатерална обука во касарната „Илинден“

Тале Кристо — Wed, 30 Aug 2023 15:18:07 +0000

Министерката за одбрана Славјанка Петровска и амбасадорката на САД, Анџела Агелер во касарната „Илинден“ во Скопје ги посетија припадниците на специјалните сили на македонската Армија, Вооружените сили на САД и Армијата на Албанија, кои заеднички ги развиваат своите способности и вештини. Како што информираат од Министерството за одбрана, Петровска пред специјалците порачала дека и ова заедничко извежбување ја покажува блиската соработка помеѓу сојузниците во НАТО. - Драго ми е што сите заедно вежбате, ги подобрувате вашите способности и на овој начин ги развивате способностите со што сте секогаш подготвени да реагирате доколку е потребно. Продолжете да работите заедно, затоа што на тој начин сме многу посилни и тоа е нешто на кое ние сите се потпираме, се наведува во пишаната изјава на Петровска. Амбасадорката на САД се заблагодарила за посветеноста на сите учесници на вежбата и изјавила дека, имајќи ги предвид опасностите со кои се соочува светот, индивидуалната и колективната подготвеност е поважна од кога било порано. Таа истакнала оти е горда на заедничката соработка и се заблагодарила на домаќинот на вежбата. - Заедничката вежба се реализира во касарната „Илинден“ од страна на здружени состави од специјалните сили од Северна Македонија, САД и од Албанија, согласно претходно утврдено сценарио. Заедничкото извежбување ги зголемува оперативната способност и подготвеноста на специјалните сили. Вежбата започна на 21 август годинава, а ќе заврши на 1 септември. Со учеството и обуката на здружените формации, се постигнува напредок на одбранбените способности, се истакнува во соопштението на Министерството за одбрана.

Петровска – Жоли: Покажавме заедништво во зацврстувањето на безбедноста на источното крило

Ристе Здравков — Wed, 30 Aug 2023 11:03:41 +0000

Македонија и Канада покажаа заедништво во зацврстувањето на безбедноста на источното крило на НАТО. Канада иако не е членка на ЕУ, цврсто е уверена дека местото на Македонија е во Европската Унија, како единствен начин за зацврстување на стабилноста, напредокот и за понатамошен развој на трансатлантската соработка, заклучија на денешната средба министерката за одбрана Славјанка Петровска и министерката за надворешни работи на Канада, Мелани Жоли, која е во посета на нашата држава. На средбата Петровска и Жоли разговарале за македонско-канадската одбранбена соработка, како и посветеноста на двете земји во зацврстувањето на колективната безбедност на НАТО, преку учество во мултинационалните сили на Алијансата на источното крило. -Руската агресија врз Украина и целосното непочитување на воспоставениот меѓународен правен поредок ни покажа дека мораме постојано да бидеме будни и посветени на одбраната на нашите вредности – нашата демократија, слобода и сувереност. Благодарност до нашите канадски сојузници под чие водство припадниците на македонската Армија и останатите сојузници во рамките на мултинационалните сили на НАТО во Латвија, ја зацврстуваат безбедноста на сите членки на НАТО, рече Петровска. Министерката Жоли истакна дека Канада високо го цени учеството на припадниците на Армијата на Република Македонија во мултинационалните сили на НАТО во Латвија и порача дека тие се значаен дел од колективната безбедност на Алијансата и сигурноста на сите земји-членки. Жоли потенцираше дека Канада иако не е членка на ЕУ, цврсто е уверена дека местото на Македонија е во Европската Унија, како единствен начин за зацврстување на стабилноста, напредокот и за понатамошен развој на трансатлантската соработка. Жоли го поздрави ставот на министерката дека уставните измени неодложно треба да се донесат бидејќи претставуваат потврда на мултикултурализмот во земјата, а Канада како мултикултурна држава тоа го разбира и поддржува. Поддршката за уставните измени не значи гласање за или против Владата, туку значи поддршка за Македонија, рече Петровска.