слободна трговија – Kurir.mk

Олеснета слободна трговија и обезбедување храна меѓу Македонија и Украина

Тале Кристо — Thu, 06 Oct 2022 08:36:34 +0000

Во присуство на премиерот Димитар Ковачевски и неговиот украински колега Денис Шмихал денеска во Прага се потпишани одлуки со кои се дополнува и ревидира постојниот Договор за слободна трговија помеѓу Северна Македонија и Украина, а со цел да се олесни слободната трговија и обезбедувањето храна меѓу двете земји. Одлуките ги потпишаа министерот за земјоделство, шумарство и водостопанство, Љупчо Николовски и заменик министерот за економски развој и трговија на Украина, Тарас Качка. -За време на средбата на која присуствуваше и министерот за надворешни работи Бујар Османи, премиерот Ковачевски, уште еднаш ги потврди позициите на Северна Македонија за силната и недвосмислена поддршка за украинската земја и народ, за нејзината независност, суверенитет и територијален интегритет, информира владината прес-служба. Премиерот Шмахил, стои во соопштението, се заблагодари на нашата делегација предводена од премиерот Ковачевски за неизмерната поддршка што Република Северна Македонија ја дава за Украина. Во разговорите премиерот Ковачевски посочи дека придржувањето кон активностите и политиките на ЕУ и на демократскиот свет, за нас како земја, значи застанување на вистинската страна, во вистински момент. -Со денешното потпишување на договорите поврзани со слободната трговија и обезбедувањето храна, дополнително се зацврстува соработката меѓу двете земји. Потпишаните документи овозможуваат понатамошна либерализација на трговијата со земјоделско-прехранбени производи и на двете страни. Воедно, се овозможува бесцарински извоз, особено на свежото овошје и зеленчук и намалена царина при извоз и увоз на голем број прехранбени производи, истакнуваат од Владата. Појаснуваат дека со овие дополнувања на Договорот за слободна трговија се постигнува многу поголема либерализација во врска со правилата за потекло. Ако досега за извоз во Украина се користеа само суровини од Северна Македонија и Украина и обратно, а за извозот од нашата земја се користеа само суровини со потекло од Северна Македонија и Украина, со овие нови правила ќе биде возможно да се користат и ЕУ суровини. Новиот Договор ќе овозможи користење на суровини од Украина при извоз во ЕУ и обратно, стои во соопштението.

Лондон и Анкара ќе потпишат договор за слободна трговија

Тале Кристо — Mon, 28 Dec 2020 14:15:01 +0000

Велика Британија и Турција утре ќе потпишат договор за слободна трговија, соопшти Министерството за трговија на Обединетото Кралство, прв откако премиерот Борис Џонсон обезбеди нов трговски договор со Европската унија, јави весникот „Сабах“. Двете земји ќе потпишат договор со кој се потврдуваат постојните трговски услови меѓу Анкара и Лондон, а британската министерка за трговија Лиз Трус рече дека се надева дека наскоро ќе биде постигнат посебен трговски договор. – Договорот што очекуваме да го потпишеме оваа недела содржи договори за бесцаринска трговија и ќе помогне во одржување на нашите трговски односи. Ова ќе обезбеди сигурност за илјадници работни места во Велика Британија во производствената, автомобилската и челичната индустрија, се вели во изјавата на Трус. – Сега со нетрпение очекуваме да работиме со Турција со цел во блиска иднина да се постигне амбициозен трговски договор по мерка на Велика Британија и Турција, додава таа. Велика Британија до сега потпиша трговски договори со 62 земји пред крајот на преодниот периодот за на 1 јануари, кога ќе ги напушти трговските договори на ЕУ.

Велика Британија и Турција се подготвуваат утре да склучат договор за слободна трговија

Ивона Петрова — Mon, 28 Dec 2020 06:50:55 +0000

Велика Британија и Турција се подготвуваат да склучат договор за слободна трговија во вторник, јавија британски медиуми, повикувајќи се на соопштение на британското Министерство за меѓународна трговија. Тоа ќе биде прв договор откако премиерот Борис Џонсон постигна нов трговски договор со ЕУ. Двете страни ќе потпишат договор во согласност со постојните трговски услови меѓу Анкара и Лондон, се вели во соопштението. Министерката за меѓународна трговија Елизабет Трас изрази надеж дека наскоро може да се постигне и дополнителен договор. – Договорот, што ќе биде потпишан оваа недела, гарантира отсуство на царини и ќе обезбеди сигурност на илјадници работни места во британската индустрија, рече Трас. Трговските врски меѓу двете земји во 2019 година изнесуваа 25,25 милијарди долари. Велика Британија соопшти дека тоа е петта по големина зделка што ја договорило Министерството по договорите со Јапонија, Канада, Швајцарија и Норвешка. Лондон веќе потпиша трговски договори со 62 земји, што ќе важат по завршувањето на преодниот период за брегзит на 1 јануари следната година.

Лондон и Сингапур потпишаа договор за слободна трговија

Тале Кристо — Thu, 10 Dec 2020 09:25:20 +0000

Лондон и Сингапур денеска потпишаа договор за слободна трговија во време кога има се помалку надеж за компромис меѓу Велика Британија и Европската унија по Брегзит. Договорот во Сингапур го потпишаа министрите за трговија на двете земји и ќе опфаќа трговија во вредност од 22 милијарди долари годишно. Договорот треба да обезбеди значителна поддршка на Велика Британија во Азија, додека земјата преговара за односите со ЕУ по напуштањето на Унијата. Лондон го потпиша првиот голем билатерален трговски договор по Брегзит во октомври со Јапонија. Но, договорот со Сингапур е прв со земја членка на АСЕАН – Асоцијацијата на нации од Југоисточна Азија, која брои 10 членки и околу 650 милиони жители. Договорот за слободна трговија меѓу Велика Британија и Сингапур е направен според постојниот договор меѓу Европската унија и Сингапур. Тој предвидува укинување на царините, отвора реципрочен пристап до пазарите на услуги и ги намалува нецаринските бариери за електронска стока, возила и резервни делови, фармацевтски производи и медицински помагала, како и за производство на обновлива енергија. Се очекува царините да бидат укинати во 2024 година, како што е предвидено во договорот ЕУ-Сингапур. Британскиот премиер Борис Џонсон и претседателката на Европската комисија Урсула фон дер Лајен си дадоа рок до недела да донесат одлука за ќорсокакот во преговорите по Брегзит.