Слоу Фуд – Kurir.mk

Овој викенд во Бра, Италија, ќе се одржи „Cheese 2023“ – Меѓународниот фестивал посветен на сирењето

Super Admin — Fri, 15 Sep 2023 06:55:56 +0000

„Cheese“, најголемиот и најважниот меѓународен настан, светски фестивал посветен на природни сирења, занаетчиски млечни производи.., организиран од мрежата на Слоу Фуд, ќе се случува овој викенд во Бра (Италија) од 15-ти до 18-ти септември годинава. Во организација на Slow Food International и Citta di Bra, со поддршка на Regione Piemonte, овогодишната прослава на сирење и млечни производи на едно место ќе ги собере сите мајстори за сирење, сточари, производители и експерти од целиот свет кои се среќаваат за да ги претстават своите производи, да споделат идеи и заеднички решенија за предизвиците со кои се соочуваат, но настанот е отворен и за сите љубители на сирење: се најавуваат конференции, дегустации и работилници или вкупно 122 настани. Ова е „Cheese“ надвор од границите. Фестивал во Бра, сирење на почесна позиција Мајсторите за сирење, сточарите, производителите и експертите од целиот свет се среќаваат во Бра, Италија, на фестивалот „Cheese“, за да ги претстават своите производи, да споделат идеи и заеднички решенија за предизвиците со кои сите се соочуваме, почнувајќи од климатската криза. Традицијата е воспоставена: по 23 години и 11 изданија, „Cheese“ секоја втора година, се фокусира на сирењата, а овој четиридневен настан е суштински важен за целата планета. Организаторот е Slow Food International , градот Бра со подршка на регионот Пиемонте. На меѓународниот пазар ќе бидат присутни изложувачи од 14 земји. Нашата земја на Фестивалот за сирење во Бра ќе биде претставена како ризница на гастрономски и културни традиции, како и крстопат на народи, религии и култури. Република Македонија, чие присуство е финансирано од Министерство за земјоделство, шумарство и водостопанство на Македонија, ќе ги пречека посетителите со интересна програма на дегустации и активности. Елена Каровска Гошевска, програмски координатор во Слоу Фуд Македонија ќе учествува на конференцијата, Септември: време на сезонско селење на стоката. Македонија исто така ќе биде во центарот на работилницата за вкус Сезонско селење на стоката во Македонија на 17 септември а преку оваа работилница, низ кулинарското наследство на Македонија ќе се откријат боите на соживотот меѓу планините и езерата, преку производите на Президиуми, од соленото „парче млеко“ (со планинските сирења од Маврово Река) до слаткото од диви смокви и буковска пиперка, не заборавајќи ги, се разбира, типичните пијалоци во земјата. Вкус на уникатното кулинарско наследство на Македонија и осознавање преку храна, ќе биде преку работилницата за вкус „Сезонското селење на стоката во Македонија“. Станува збор за вековна традиција и нејзиното богато наследство на сирење, проткаено со историја и култура.

„Slow Wine салон 2021“ – настан кој ги слави малите семејни винарии и дава придонес кон едукацијата и градењето на македонската винска култура

Super Admin — Fri, 03 Dec 2021 10:07:52 +0000

„Slow Wine салон 2021“ е дводневен настан кој ќе се одржи на 3-ти и 4-ти декември 2021 во Битола во организација на „Слоу Фуд Македонија“ со локална поддршка на „Слоу Фуд Битола“. Салонот има за цел презентација и промоција на производители на вино, кои ќе ни ги презентираат нивните вински приказни и ќе ни понудат на дегустација вина направени со страст. На третото издание на винскиот салон „Slow Wine салон 2021“ ќе се претстават преку 30 производители, 5 дестилерии и 10 производители на деликатесни производи кои ќе бидат понудени за дегустација на големиот број на љубители на виното и храната. На винскиот салон ќе му претходи промоција на првото македонско издание на „Slow Wine 2021“ која ќе се одржи на 3-ти декември со почеток во 18 часот во Кино Манаки. Се работи за концепт граден низ годините на развој на Слоу Фуд движењето кое од самите почетоци негува култ кон виното, последниве години го преточува во независен вински водич. Придонесот на Слоу Фуд во развојот на винската култура преку поддршка, едукација и промоција на малите семејни винарии, кои како нов бран надоаѓаат на винската сцена е од врвно значење во промоцијата на локалното поднебје, зачувувањето на локалниот биодиверзитет во лозјата, традиционалните техники на производство на вино и зачувувањето на животната средина. Настанот е можност да им се даде видливост на младите винари, малите винарии и нивните уникатни вина. Во сабота на 4-ти декември Офицерскиот дом Битола за првпат ширум ќе ги отвори вратите за сите кои го негуваат култот кон виното, производители и љубители на овој божествен пијалак и ќе се претвори во своевиден „храм на виното“. Ова е еден од првите јавни настани кои ќе се одржат по реконструкцијата и пуштањето во употреба на Офуцерскот дом во Битола и претставува извонредна можност да се почувствува неговата убавина и амбиент збогатен со содржините од програмата на Slow Wine 2021. Ограничен број на влезници за настанот ќе може да се купат онлајн: https://mktickets.mk/event/swbt/ Овој настан е од голема важност во едукацијата и градењето на винската култура, кон посреќна иднина во нашата земја.

Програма Slow Wine 2021, Вински салон Битола

03.12 2021, петок, Кино Манаки

18-19ч. – Промоција на водичот Slow Wine 2021
19-20ч. – Коктел
20-21ч. – Проекција на филм: Момчињата од Бароло

04.12 2021, сабота, Офицерски дом

16-23ч. – Вински салон со 30 винарии, 5 дестилерии и 10 производители на деликатесни производи.

* Настанот ќе се одржи во согласност со Covid-19 протоколот на Министерството за здравство. Задолжително треба да се покаже сертификат за двојна вакцинација, негативен PCR тест или сертификат за прележан Covid-19 во последните 30 дена. Носење на маска е задолжително.

Прво македонско издание на Slow Wine 2021

Првото македонско издание на Slow Wine 2021, концепт граден низ годините на развој на Слоу Фуд движењето кое од самите почетоци негува култ кон виното, последниве години го преточува во независен вински водич. Slow Wine, преку водичот, усвојува нов пристап на вреднување и промоција на виното и го разгледува неговиот квалитет од аспект на уважување на биодиверзитетот и традиционалното производство. Идејата на Slow Wine е да ги презентира уникатните приказни за винарите, нивната страст и поврзаност со земјата, лозјата, локалните вински сорти грозје и пејзажите, традицијата и технологијата на вино, со фаворизирање на оние кои спроведуваат еколошки одржливи практики на одгледување винова лоза и производство на вино. Во првото македонско издание на Slow Wine 2021 преставени се 7 винарии и 27 вина од локални, регионални и интернационални вински сорти кои се одраз на македонскиот тероар. Oваа публикација е посветена на македонските винарии кои како нов бран се појавуваат во последниве години на винската сцена. Изборот на вина е направен врз основа на посети на винариите, разговори со винарите и сесии на сензорно оценување, благодарение на нашиот тим на експерти за вино, здружен во Slow Wine комитет. Водичот ги пренесува новитетите од винариите, кои ќе им помогнат на љубителите на вино да направат посвесен избор. Ова е само прв чекор, во следните изданија идејата е водичот да се проширува со нови винарии и вина. Првото македонско издание на Slow Wine 2021 ќе биде промовирано овој петок, 3-ти декември 2021, во Битола, на винскиот салон Slow Wine 2021 кој се одржува по трет пат, а оваа година под Slow Wine концептот. Уредници: Слободен Чокревски и Николче Николовски Автор на текст: Ивана Симјановска Членови на Slow Wine комитет: Слободен Чокревски, проф. д-р Виолета Димовска; проф. д-р Горан Миланов, Ивана Симјановска; Александар Вучковски; Дејан Донев; Илија Малинковски; Марија Николовска; Петар Величковиќ; Трајан Димкоски; Лазар Плетварски; Елена Богева; Mилица Плетварска; Кире Петров; Горан Колев; Страшко Милошевски; Николче Николовски; Васко Марковски; Александар Клинчаров; Насловна страница и илустрации: Рената Атаин (2021) Дизајн: ОРТОГРАФ графичка работилница Уредување: Жарко Стојановиќ Фотографии: Петкамен Издавач: Slow Food Macedonia © 2021 [email protected] / www.slowfood.mk

В петок во Битола второ издание на „Боемски вински салон“

Super Admin — Wed, 11 Dec 2019 10:41:28 +0000

„Битола, бабам, Битола. Таму се живот живее. Таму се јаде и пие“

Со овој мал стих „Слоу Фуд Битола“ со задоволство Ве поканува на второто издание на „Боемскиот вински салон“ кој што ќе се оддржи на 13-ти декември од 15 до 22 часот во холот на Народниот Театар Битола. Како што велат самите организатори, салонот има за цел презентација и промоција на производители на вино, кои ќе ни ги презентираат нивните вински приказни и ќе ни понудат на дегустација вина направени со страст. На овој начин тие сакаат да ја градат винската култура во нашиот регион, да едуцираат за значењето на поднебјето, за зачувувањето на локалниот биодиверзитет во лозјата, техниките на производство на вино и зачувувањето на животната средина. На овогодинешното издание на „Боемскиот вински салон“ планирано е да се претстават околу 20 производители со 80 етикети на вино, кои ќе бидат дегустирани од голем број на љубители на виното. Со поддршка на Општина Битола, Горска вода и Народен Театар Битола, „Слоу Фуд Битола“ ќе се потрудат успешно да ја промовираат филозофијата на Слоу Фуд преку презентација на вина од страна на малите винарии. Влезница 150 денари, со која добивате винска чаша и можност да дегустирате 80 етикети на македонско вино од 20 винарии. Дојдете заедно да го славиме виното!

Промоција на здрава храна од локални производители на првиот „Слоу фуд салон“

Super Admin — Mon, 14 Oct 2019 11:32:32 +0000

Под мотото „Храната е движење“ на 18 и 19 октомври во хотел „Александар палас“, Скопје ќе се одржи првиот „Слоу фуд салон“. Храната е енергија која секојдневно му е потребна на нашето тело. Таа е уживање на трпезата, култура што ги зближува луѓето. Во ерата на глобалната трговија храната е брутално сведена на ниво на стока за економска размена и е моќно оружје во рацете на големите индустрии. Системот на храната денес станува значајно еколошко прашање за дискусија и акција. Храната е генератор на одржливиот развој на регионите и проверен извор на благосостојбата на производителите. Храната поттикнува промени во свеста кај консументите. Целта на настанот е да ги промовира малите производители на висококвалитетни производи кои треба да ја валоризираат вредноста преку своето знаење и труд. Истовремено да ги едуцира консументите да избираат квалитетна храна и да ја поддржуваат локалната економија и заштитата на животната средина. Преку настанот сите заедно да дадеме поттик за креирање на позитивна клима за опстојување и развој на малите производства и збогатување на понудата на производи на пазарот. Повеќе од 100 производители ќе ги изложат своите автентични и висококвалитетни производи и ќе ги раскажат своите приказни на посетителите кои ќе имаат можност да се информираат, едуцираат и дегустираат од прва рака. Производителите ќе се презентираат поделени во неколку секции: традиционална и органска храна, мали винарии, занаетчиски производители на пиво и даватели на туристички услуги. Салонот ќе понуди вкусови кои Слоу Фуд Македонија ги заштитува, поддржува и промовира повеќе од 10 години преку својата мрежа. Слоу Фуд обединува членови, активисти, производители, експерти, готвачи, новинари околу филозофијата „Добра, чиста и правична храна, за сите!“ Салонот ќе биде отворен за јавноста во петок 18 октомври од 14-20 часот и сабота 19 октомври 12-20 часот.

Прв „Боемски вински салон“ во Битола

Super Admin — Mon, 24 Dec 2018 09:39:13 +0000

Првото издание на „Боемскиот вински салон“ во Битола ќе се одржи на 27 декември (четврток) во холот на Народен театар Битола со почеток од 15 часот. Салонот има за цел презентација и промоција на производители на вино, кои ќе ни ги презентираат нивните вински приказни и ќе ни понудат на дегустација вина направени со страст. На овој начин сакаме да ја градиме винската култура во нашиот регион, да едуцираме за значењето на поднебјето, за зачувувањето на локалниот биодиверзитет во лозјата, техниките на производство на вино и зачувувањето на животната средина. На првото издание на „Боемски вински салон“ планирано е да се претстават преку 20 производители со 100 етикети на вино, кои ќе бидат дегустирани од голем број на љубители на виното. Организатор на салонот е конвивиумот „Слоу Фуд Битола“, со поддршка на Општина Новаци, ЈП Водовод, Битола, Горска вода, Бабук, ЈП Пазари, Битола и Народен театар Битола, кои ни помогнаа да ја промовираме филозофијата на Слоу Фуд преку презентација на вина од страна на малите винарници.