случај тенк – Kurir.mk

Јанкулоска: Станува збор за крајно неправична постапка, а судот во „Тенк“ ја изгуби улогата на арбитер

Дарко Андоновски — Mon, 25 Feb 2019 12:46:40 +0000

Поранешниот министер за внатрешни работи Гордана Јанкулоска, во својата жалба до Апелација, истакна дека првостепената пресуда е нејасна и противречна и не се истакнати одлучувачките факти и докази. Таа смета дека станува збор за крајно неправична постапка и Судот ја изгубил таа улога на арбитер и се ставил во функција на СЈО. Поради тоа, Јанкулоска бара Апелација да ја разгледа внимателно нејзината жалба и да го врати предметот на разгледување и повторно одлучување. -Обвинението произлезе од кривично-правен настан кој се стави во функција на политичка кампања за промена на функционери меѓу кои и јас, како и за смена на Владата, вели Јанкулоска. Според неа, целосно била игнорирана Европската судска пракса во „Тенк“. -Во жалбата пренесов неколку примери, случаи, неколку Европски судски пресуди, но во интерес на времето нема да ги читам сега, а Вие ги имате пред Вас и имате можност да ги разгледате, рече таа. На крајот од презентација на жалбата, Јанкулоска потенцираше дека во целост останува на се што е напишано во жалбата и зад сите суштествени законски повреди кои се направени во оваа судска постапка.

Се бараше изземање на Кацарска, Џолев одби, Комисијата за заштита од дискриминација утврди дискриминирачки однос кон Јанкулоска

Предраг Кукиќ — Tue, 04 Sep 2018 09:59:21 +0000

Барање за изземање на судијката Добрила Кацарска побараа адвокатите од одбраната на поранешната министерка за внатрешни работи Гордана Јанкулоска на почетокот на денешното рочиште во раздвоената постапка во случајот „Тенк“ на Специјалното јавно обвинителство. Адвокатите Сања Алексиќ и Боро Тасевски објаснија дека барањето за изземање се однесува на мислење добиено на 27 август од седум члена на Комисијата за заштита од дискриминација со кое таа го задолжува судот да ја отстрани веќе утврдената дискриминација во постапката. Од Комисијата за заштита од дискриминација утврдуваат вознемирување од Член 7 став 1 од Законот за спречување и заштита од дискриминација по поднесената претставка на Гордана Јанкулоска против судијката Добрила Кацарска бидејќи ја депривилегирала и ја изложила на деградирачки однос во областа на пол и политичка припадност. Комисијата додава дека Јанкулоска била и навредена и во областа на социјалната сигурност и здравствена заштита при што дошло до вознемирување со повреда на достоинство на лицето и се создала понижувачка состојба. По нецел час претседателот на Кривичниот суд Иван Џолев го одби како неосновано барањето за изземање на судијката Добрила Кацарска. Кацарска на странките им врачи примерок од одлуката, по што судењето продолжи со сослушување на сведокот Зоран Марковски, вработен во Мак Ауто Стар во 2012 година. На прашања од обвинителот, Марковски рече дека бил управител на Мак Ауто Стар, но не бил вклучен во процесот за изготвување понуда и учество на тендерот, а само е потпишан на договорот. - Директно одговорен за тоа е директорот на продажба во тоа време. Цената се формира со тоа што на набавната цена се додаваат царински и акцизни давачки, вообичаената маржа и ДДВ. Ценовник за вакви возила не постои, бидејќи не се дел од секојдневната понуда, рече сведокот. Кажа дека немал контакти со лица од МВР за оваа набавка. Рече и дека додека е управител на Мак Ауто Стар, продавале и други блиндирани возила. На вкрстени прашања од адвокатката Сања Алексиќ, Марковски одговори дека немал никаков контакт со Гордана Јанкулоска и дека оваа постапка за набавка на блиндирано возило била прва извршена по пат на јавна набавка, додека другите продажби на такви возила биле со директно договарање. Сведокот објасни дека кога има потенцијален купец за возило кое се наоѓа во Германија се прави резервација за тоа возило, што не е обврзувачка за нив се до моментот кога купецот ќе ја потврди нарачката, по што се врши нарачка што потоа е обврзувачка за нив.

Јанкулоска: Заложбите на Владата за заштита на жените и семејството се реализираат на дело

Даниел Василев — Fri, 01 Jun 2018 17:31:14 +0000

Поради отсуство на поранешната министерка за внатрешни работи, Гордана Јанкулоска денеска се одложи судењето против неа за случајот „Тенк“. -Адвокатите ме информираа дека на рочиштето што беше предвидено за денес, додека бев во болница на преглед и примав терапија за што до судот беше доставена медицинска документација, заедно со документацијата за уредно отворено задолжително породилно боледување (кое според закон се отвара од 45 дена најдоцна до 28 дена пред породување) судијата Кацарска наредила да ми направат вештачење за да се утврди состојбата во која се наоѓам т.е да ме прегледа доктор што таа дополнително ќе го определи за да констатира дали и покрај обемната медицинска документација, препораките од докторите за ризиците за детето, во последните недели од 9 месец на бременоста навистина сум спречена да доаѓам на долготрајните судења кои се одвиваат во отежнати услови и на високи температури, вели Јанкулоска за Нетпрес. Поради ризичната бременост судијката Добрила Кацарска ја раздвои постапката против неа за блиндирнаиот Мерцедес уште во април, а за денеска беше закажан почеток на судењето. Одбраната на Јанкуловска нејзиното отсуство го оправдала со медицинска документација но на предлог на СЈО, судијката побарала целокупната документација за здравствената состојба да биде доставена во судот до понеделник по што ке биде испратнеа на вештачење во Клиниката за Гинекологија со барање да одговорат кој месец е бремена и дали е во состојба да доаѓа и да го следи судењето, потврдија од Кривичниот суд. -Дојде живот, нема веќе потреба од проекти на УСАИД од проекти за Заштита на правата на жените ниту од маршеви за „Платформата за родова еднаквост“ и организирање вечери за женските права од страна на УН Воман и Институтот за човекови права. Изгледа ова е тој „неопходен пресврт, како што доликува на една демократска Европска земја” за кој зборуваше министерката Мила Царовска по повод 8-ми Март и ова се конкретните дела за надминување на родовата нееднаквост и борбата против насилството врз жените. Очигледно ова е производ на секојдневната работа на Владата „на исправање на неправдите и унапредување на правата на жените во Македонија”, за кои зборуваше Радмила Шекеринска на Осмомартовскиот марш во Куманово, објаснува Јанкулоска за Нетпрес. Таа рече дека адвокатот ја ин формирал дека судијката Кацарска закажала 8 дополнителни термини за рочишта на 13,14,29 јуни и 4,5,9,12,14 јули т.е за периодот од 38 и 42 недела или 2 недели после крајниот термин за породување. -Исто така ми пренесоа дека ако во меѓувреме се породам, а не се донесе пресуда, најдоцна 40 дена по породувањето морало да продолжи судењето, без оглед што според Законот што го регулира породилното отсуство, јас и да сакам не смаем да го прекинам боледувањето пред да изминат 45 дена од раѓањето на детето. Но не можам да се оптоварувам со ефикасноста на реформираното судство, во овој момент најважно ми е да се потрудам сето ова, да не влијае на здравјето детето, вели Јанкулоска. За случајот „Тенк“ првостепени пресуда веќе добија Груевски од 2 години затвор и екс началникот Ѓоко Поповски од 6 ипол години затвор.

Груевски: Заев кажа дека ќе бидам осуден, тој ја нарача пресудата

Ивона Петрова — Sun, 27 May 2018 17:28:22 +0000

Поранешниот премиер Никола Груевски кој во случајот на СЈО „Тенк“ доби затворска казна од две години гостуваше во Дневникот на Сител телевизија и даде свој коментар по однос на судската пресуда и случаите кои се водат против него. -Како што тргнаа работите со политичкиот прогон уште пред повеќе од една година, можеби и ќе му поверувава со оглед на тоа дека имавме политички монтиран случај. За пресудата во „Тенк“ не се изненадив затоа што уште од првиот ден на судењето, според тоа како судијката го водеше случајот беше јасно. Еден новинар кој со години наназад ги следи рочиштата во судовите, ми спомена во една од паузите дека уште на следење на првото рочиште се посомневал, а веќе по второто и третото одржано рочиште бил сигурен дека ќе бидам осуден, според тоа како судијката го водела случајот, вели Груевски во Дневникот во Сител. Поранешниот премиер и почесен претседател на ВМРО-ДПМНЕ истакна дека во текот на рочиштата се имало едно чувство на нееднаквост, вели од едната страна имало дрско однесување, одземање збор од страна на судијката, а на другата страна едно поданичко однесување. -Јасно е дека станува збор за еден монтиран политички процес каков што немало во Македонија, нешто што е договорено. Самата пресуда не само што беше објавувана еден месец претходно во медиумите и самиот Заев две недели пред објавата на пресуда објави каква ќе биде таа. Тој кажа дека ќе бидам осуден. Да, сметам дека тој ја нарачал. Живееме во време кога дел од судиите се целосно заробени под контрола на власта на принцип на награда давање или казнување, потенцира екс премиерот Груевски.

ВМРО-ДПМНЕ: Правосудствотое на колена, судиите се во грч и работат под политички притисок

Даниел Василев — Fri, 18 May 2018 07:45:50 +0000

Правосудството во Република Македонија е на колена, а судиите се во грч и работат под политички притисок, велат од ВМРО-ДПМНЕ. Според партијата, споредбата како се водат случаите Поткуп и Тенк е најдобар доказ дека не постои правда, туку само политички нарачан прогон. -Случајот Поткуп каде што првообвинет е Зоран Заев, кого цела јавност го виде дека од позиција на градоначалник бара едно евро за себе и едно евро за црквата, чека правна разрешница цели пет години. Обвинението е поднесено уште во 2013 година. Случајот Тенк кој што се базира на незаконски стекнати прислушкувани разговори и претпоставка дека Никола Груевски влијаел врз Јанкулоска да го поттикне Поповски да набавел блиндирано возило, е започнат четири години подоцна. Рочиштата во случајот Поткуп се одложуваа десетици пати и се развлекуваа со месеци и години, а за Тенк се закажуваа експресно и траат дури и по 12 часа, се вели во соопштението. Од ВМРО-ДПМНЕ посочуваат дека во случајот Поткуп сведокот го потврди кривичното дело и барањето поткуп. Потенцираат дека тој Кажа оти Заев му барал едно евро за Вице, едно евро за партијата и едно евро за црквата. -Во случајот Тенк беа повикани околу 40 лица. 15 сведоци на СЈО и уште 20-тина на одбраната. Сите, без исклучок, сведочеа контра обвинителниот акт. Посочија дека претходните блиндирани возила не можеле да ги задоволат безбедноснитр потреби. Во Македонија законите не важат подеднакво за сите, а судиите судат според желба а не според докази и факти. Заеднички за двата спора е што завршуваат во исто време. Во неколку дена треба да биде изречена и пресудата за Зоран Заев и пресудата за случајот Тенк. Заеднички за двата предмети е што сите ги знаат однапред пресудите, а истите ги најави и самиот Заев. Медиумите веќе пишуваа и за наградата што треба да ја добие судијата Добрила Кацарска за одработената задача, потенцираат од ВМРО-ДПМНЕ. Велат дека тоа е разликата меѓу судството кое работело во „режим“ и ослободеното судство откако доjде живот. -Криминалниот картел е недопирлив, а сите неистомисленици се потенцијални политички жртви. Оваа неправда мора да престане. Сите судски одлуки донесени врз притисок еден ден ќе бидат преиспитани, велат од партијата.

Стоилковски: Предметите Тенк и Поткуп се најдобар доказ дека судството работи под политички притисок

Даниел Василев — Thu, 17 May 2018 12:53:34 +0000

Правната држава е мисловна именка во Република Македонија. Правдата не постои во Македонија. Судството е целосно ставено во функција на политичка пресметка со неистомисленици. Сите процесите се водат врз политички факти. Ова денеска на прес-конференција го истакна портпаролот на ВМРО-ДПМНЕ, Наум Стоилковскил. Тој направи споредба на судските процеси Тенк и Поткуп. - Случајот Поткуп стартува уште во 2013. година кога заради сомневање за коруптивни кривични дела се бара дозвола од надлежните органи, преку посебни истражни мерки и е документирано „барање поткуп“ од Зоран Заев, тогашен градоначалник на Струмица. Целата јавност потоа можеше да го види како бара едно евро за себе, што требало да биде платено кај Вице и едно евро за црквата, по метар квадратен и тоа за приватизација на државно земјиште. Станува збор за стотици илјади евра, рече Стоилковски. Според него, случајот Тенк почнува четири години подоцна, во јануари 2017. година и е почнат врз основа на незаконски стекнати, прислушувани разговори чија автентичност никогаш не е потврдена, бидејќи како што рече, не постои оригинал кој што би се вештачел. - Случајот Тенк во кој се обвинети Никола Груевски, Гордана Јанкуловска и Ѓоко Поповски се базира исклучиво врз претпоставка дека Никола Груевски ги поттикнал Јанкулоска и Поповски да набавеле блиндирано возило за да може тој да се вози во него. Противправна имотна корист не остварил никој, штета на државата не е направена бидејќи мерцедесот што е набавен се уште е во сопственост на Владата и во него се возат високи функционери од актуелниот картел на власт, посочи Стоилковски. Во однос на обвинителниот акт, вели дека тој за случајот Поткуп од страна на, како што рече, партиското обвинителство за кое СДСМ обвинуваше оти е под контрола на ВМРО-ДПМНЕ е поднесено во јуни 2015 година. -Повеќе од две години откако е поднесена кривична пријава и отворена истрага. На крајот Јавниот обвинител го преквалификуваше обвинението само за да се изземе снимката добиена законски со посебни истражни мерки и сега ги убедуваат граѓаните дека не го виделе тоа што го виделе и не го слушнале Заев како бара поткуп. Обвинителниот акт за случајот Тенк е поднесен шест месеци по отворањето на истрагата, односно во јуни 2017 година, спореди Стоилковски. Вели дека првото рочиште за случајот Поткуп е закажно во јануари 2016 година, шест месеци по обвинителниот акт и веданш потоа одложено за март, додека ричиштата за предметот Тенк се закажуваат експресно. -Пред да биде закажано првото рочиште претходеа изјави од Зоран Заев во кои што јавно го понижуваше судот. Велеше дека не го признава и дека нема намера да се пријавува редовно, односно да ја почитува определената мерка. Следуваат најмалку 12 одложени рочишта. Прво Заев беше на службен пат, па адвокатите му патуваа, па Заев беше во Тирана, па во Сараево, па потоа на познатата средба со „Италијанскиот Амбасадор“. Во април 2017 година судењето беше одложено за во мај, а откако Заев од лидер на опозиција стана премиер, судењето се одлагаше и заради отсуство на судијката. Потоа следеше одложување заради посети во странство, па немање услови за прегледување на легално снимениот момент на барање пари. Рочиштата во Поткуп траат кратко и судот не си го пречекорува работното време. Рочиштата за предметот ТЕНК се закажуваат експресно. За правата на одбраната соодветно да не може да се подготви. Судијката Добрила Кацарска закажува и по четири рочишта неделно. Рочиштата траат од утро до мрак дури и по 12 часа. Не се водеше сметка ниту за барања за изземање, ниту за суштински приговори. Следуваа закани за стражарни приведувања дури и ако се доставаа уредни лекарски уверенија, вели портпаролот на ВМРО-ДПМНЕ. Во однос на завршните зборови за двата случаи, Стоилковски вели дека завршните зборови за случајот Поткуп се одржаа на 15. мај, а за Тенк денеска, на 17. мај. Појаснува дека траењето на целата постапка во првиот случај, Поткуп е цели три години, додека Тенк за една година. -Да не заборавиме дека случајот Поткуп е многу поедноставен, со еден обвинет, за разлика од тројца обвинети во случајот Тенк. Случајот Поткуп е со една снимка која е законски прибавена со посебни истражни мерки, а случајот Тенк со повеќе снимки кои се незаконски прибавени. Случајот Поткуп е со еден сведок, а во случајот Тенк мораа да бидат сослушани 40-тина сведоци. Тоа што говореа сведоците во случаите е посебна споредба, вели Стоилковски. Појаснува дека во случајот Поткуп имаше само еден сведок кој го потврди кривичното дело на Заев, додека во случајот Тенк повикани беа околу 40 лица, 15 сведоци на СЈП и уште 20-тина на одбраната. Столковски вели дека сите, без исклучок, сведочеа контра обвинителниот акт. -Посочија дека претходните блиндирани возила не можеле да ги задоволат законските безбедносни потреби. Сведочеа дека мора да се набави ново возило. Сведочеа дека постапката е целосно согласно закон. Сведочеа дека МВР дури не морало да распише тендер. Сведочеа дека не е фаворизирана ниту една компанија бидејќи било кој импортер можел да понуди возило соодветно на барањата. Сведочеа дека немало контакти меѓу МВР и компанијата што го добила тендерот. Сведочеа дека не била побарана нереална маржа и дека практично, никој не остварил некаква противправна корист, ниту е направена некаква штета, рече портпаролот на ВМРО-ДПМНЕ. Стоилковски посочи дека двата процеси влегуваат во финиш, иако едниот е почнат три години порано. Според него, за Поткуп СДСМ врискал дека е воден во време за режим, но молчи за Тенк. -Во првиот Јавниот обвинител го преквалификуваше обвинението само за да се изземе снимката добиена законски начин со посебна истражна мерка и сега ги убедуваат граѓаните дека не го виделе тоа што го виделе и не го слушнале Заев тоа што го бара. Во вториот се игнорира Европската конвенција за човекови права и одлуките на Европскиот суд за човекови права. Не верувам дека некој би прифатил да се обложува како ќе завршат овие два судски процеси. Сите се сомневаат на однапред договорен натпревар во кој секој ќе го добие тоа што не го заслужува. Но, постои голема можност, единствен добитник да биде судијката Добрила Кацарска, која фигурира и во двата предмети, со тоа што ќе го добие местото за кое конкурираше, а тоа е Претседателка на Апелациониот суд. Тоа што се случува сега во судот е неправда која што мора да прекине, рече Стоилковски.

Новиот Законот за судови налага ослободителна пресуда за Груевски

Дарко Андоновски — Thu, 17 May 2018 12:49:13 +0000

Адвокатот на поранешниот премиер Никола Груевски, Боро Тасевски ја потсети судијката Кацарска за новите измени и дополнувања на законот за судовите при нејзината одлука во Тенк. -Соочени сме со докази на СЈО со кои се кршат меѓународни стандарди за човекови права на слободи. Материјалите произлезени од незаконското следење на комуникации СЈО ги добивал од политичкиот опонент на обвинетите- СДСМ. Сопственикот на странската подружница Еос Консалтинг која го вршела вештачењето, а и вештаците се исто така од политичката партија СДСМ. ЦД-еата со разговорите не се во оригинална форма, па одбраната беше оневозможена со свој технички советник да ја провери нивната автентичност. Според Европскиот суд за човекови права доколку нема неутралност на вештачењето, се загрозува правото на еднаквоста на оружјата. Повредено е и правото на одбраната да учествува во вештачењето и да користи свој технички советник. Европскиот суд за човекови права вели дека доказите не се објективни доколку во вештачењето не е присутна одбраната. Во оваа постапка повредени се Уставот на РМ како и многу членови од Европската конвенција за човекови права затоа сметам дека единствена правична одлука на судот е ослободителна одлука, потенцира Тасевски. Тој го поздравува стапувањето на сила на Законот за измена и дополнување на законот за судовите според кои судот е должен да ги земе во предвид и да посвети посебно внимание на праксата на Европскиот суд за човекови права и ставовите изразени во конечните пресуди, особено имајќи ги во предвид одредбите од Законот за измена и дополнување на законот за судови, рече адвокатот Тасевски. Кацарска му се заблагодари на Тасевски за тоа што ја потсетил за измените во законот.

Одбраната во Тенк ја проширува листата на докази

Дарко Андоновски — Mon, 14 May 2018 09:40:05 +0000

Во случајот на СЈО Тенк денеска во кривичен одбраната на обвинетите Никола Груевски и Ѓоко Поповски, подаде поднесок заедно со докази и писмено известување од друштвото за надворешен и внатрешен промет Аутомакедонија. Тие бараат од судот да се обезбедат податоци и информации од Аутомакедонија за возило Мерцедес со регистарски таблички ск 039 кс. Во однос на известувањето од Аутомакедонија од 11 мај 2018, обвинителот Стефчо Донев рече дека доколку одбраната не го предложила овој доказ, тоа ќе го стори обвинителството. Судијата Добрила Кацарска даде пауза од 20 минути, да одлучи по ова барање на одбраната.

Груевски: Предметот „Тенк“ е сериозно конструиран, денешните сведоци потврдуваат дека нема прекршување на законите

Даниел Василев — Wed, 25 Apr 2018 15:03:03 +0000

Поранешниот претседател на ВМРО-ДПМНЕ, Никола Груевски по денешното судење за случајот „Тенк“ рече дека денеска имало тројца сведоци кои дале нова светлина на работите кои водат до тоа дека во тендерската процедура нема прекршување на законите. Тој појаснува дека првиот сведок од компанијата АутоМакедонија, Зоран Василевски рекол оти со промените на законите за монопол во Македонија од 2005 и 2006 година, на тендер можат да конкурираат сите увозници на возила, а не само генералните застапници. -Тоа ја побива тезата на СЈО дека со тендерот бил протежиран Макауто Стар, вели Груевски. Според него, сведокот од АутоМакедонија рекол дека компанијата продава автомобили за кои тие не се генерални застапници. Груевски вели дека вториот сведок, економскиот вештак Страхил Глигоровски потврдил оти компанијата од која бил купен Мерцедесот не заработила екстра профит -Тој потврди дека во случајот со набавката на ова возило не постои штето. Имено, тој кажа дека компанијата која го продала автомобилот заработила вообичаена маржа, појаснува Груевски додавајќи дека таа нема заработено екстра профит и оти нема никаква штета. Според него, третиот сведок, Тале Герамитчиевски е контроверзен бидејќи бил ангажиран од компанијата ЕОС Консалтинг, чиј раководител е поранешниот потпретседател на владата на СДСМ, Димитар Бузески. Груевски вели дека вештакот е поранешен пратеник на СДСМ и поранешен заменик министер за образование. -Тоа се луѓе кои што со години како мои политички противници оделе по куќи, оделе по медиуми, оделе каде ќе стигнат, говореле против мене, се бореле против мене, ме оцрнувале лично. И сега тие луѓе, од стотици компании за вештачење во Македонија, од над 1000 вештаци во Македонија, баш тие луѓе СЈО ги одбрала да бидат вештаци и да изработат вештачење врз база на кое Судот треба да донесе пресуда, вели Груевски. Тој појаснува дека првата контроверзна работа во изборот на вештакот е што тој е машински инженер, а требал да вештачи интелектуална сопственост. -Лицето јавно призна дека не се чувствува како експерт за блиндирани возила. Дури кажа и дека во Македонија нема експерти за блиндирани возила, рече Груевски. Вели дека со тоа самиот потврдил оти бил избран вештак кој не може да биде релевантен. Груевски појаснува дека вештакот открил оти пропуштил да направи споредба со возилата произведени во САД, Јапонија, Русија и Кина. Поранешниот претседател на ВМРО-ДПМНЕ посочува дека обвинителот рекол оти ниту една конкурентска компанија која продава автомобили немале никаква жалба во врска со тендерот, па затоа МВР немала потреба да го коригира тендерот. -Некој се плашел да направи поголема споредба. Станува збор за предмет кој е сериозно конструиран, рече Груевски. На новинарско прашање Груевски вели дека во моментот на државата и се потребни најмалку пет блиндирани возила бидејќи целиот возен парк е премногу стар и е во премногу лоша состојба, како безбедносна, така и сообраќајна. Најмалку пет вакви возила треба да набави државата. Целиот возен парк е премногу стар и е во премногу лоша состојба, како сообраќајна така и безбедносна. ВИДЕО: А1.он

Сведок вештак во „Тенк“: Компанијата Макауто Стар немала екстра профит со продажбата на блиндираниот Мерцедес

Даниел Василев — Wed, 25 Apr 2018 13:00:08 +0000

Во Кривичниот суд во Скопје денеска сведокот вештак Страхил Глигоровски даде изјава во однос на вештачењето во случајот Тенк. Тој рече дека бил ангажиран од странска подружница во Скопје, од фирмата ЕОС Консалтинг АД Рим од Италија. На вештачењето не била присутна одбраната и сведокот потврди дека при вештачењето утврдено е дека компанијата од каде е купено блиндираното возило направила вообичаен профит, односно немала екстра добивка.