слупчане – Kurir.mk

Претреси во Слупчане, пронајдени оружје и муниција

Тале Кристо — Thu, 07 Sep 2023 16:41:16 +0000

Полициски службеници од Одделот за криминалистичка полиција- Сектор за недозволена трговија со дрога, оружје и опасни материи и СВР Куманово- Одделение за недозволена трговија со дрога и оружје, по добиена судска наредба, денеска извршија претрес во дом и други простории кај З.И. (49) во с. Слупчане, општина Липково, соопшти МВР. При претресот пронајдени се шест пиштоли различни марки, седум рамки за куршуми, пневматска пушка „екол“ со оптика за пушката, околу 2500 куршуми различни калибри од 9мм, 7.62мм и 6.35 мм, 64 пиротехнички ракети... З.И. е приведен во полициска станица и по документирање на случајот ќе биде поднесена кривична пријава до ОЈО Куманово.

Екипите на ЕВН почнаа со работа во Слупчане

Ристе Здравков — Wed, 09 Aug 2023 11:49:17 +0000

Екипите на електродистрибуција почнаа со работа во липковското село Слупчане. Во дел од селото веќе се заменети орманите. Договорено е корисниците на социјална парична помош да ги плаќаат заостанатите сметки на рати, кажаа претставниците од општината. Во однос на договорот со жителите од Слупчане од ЕВН велат дека законите кои важат за сите корисници ќе продолжат да важат и понатаму. Претседателот на советот на општина Липково, Зекрија Шаини вели дека активностите на терен течат согласно договорот. – Состојбата беше бурна и луѓето од селото сакаа да знаат што ЕВН ќе работи. Тие се приватна компанија и сакавме да знаеме што конкретно ќе работат како и за сите приватни компании. Половина од селото користат социјална помош и имавме барање долговите да се плаќаат на рати, што важи за сите граѓани во Македонија. ЕВН ќе треба да постави бандери до планот до каде што е селото, изјави Шаини. Во однос на барањето да се плаќа по 3.000 без разлика на потрошувачката, тој кажа дека во тоа препукување преку медиумите со некои луѓе од ЕВН, дел од барањата на слупчанци биле нелогични. – Барањето не е логично, ќе се плаќа колку се троши и не сакаме да бидеме црна точка како што не претставуваа. Оние кои се социјални случаи ќе плаќаат на рати. Останатите плаќаат како и сите во државата, ќе користат поволности што важат за сите, вели Шаини, додавајќи дека во Слупчане има над 60 проценти жители кои плаќаат сметки. Мрежата во Слупчане не е реконструирана повеќе од 20 години од конфликтот 2001.

Стоилковски: Ковачевски не може да обезбеди Слупчане да плаќа струја, а не пак да обезбеди европска иднина

Ивана Ефремовски — Mon, 07 Aug 2023 10:58:53 +0000

Ковачевски не може да обезбеди едно село како Слупчане да плаќа струја и да се постават струјомери на сите куќи, а не пак да обезбеди европска иднина, одговори портпаролот на ВМРО-ДПМНЕ, Наум Стоилковски запрашан дали премиерот Димитар Ковачевски може да обезбеди европска иднина. Стоилковски побара Ковачевски да обезбеди консензус за плаќање на струја, да се постават современи струјомери, пред да зборува за национален консензус. -Епска драма приреди во Слупчане. Нека обезбеди консензус за плаќање на струја, само во едно село, да не се краде струја, да се постават современи струјомери, пред да зборува за национален консензус! Човекот купува време за да се докраде се што може како власт, рече тој. Стоилковски порача: -Единствено за што е возможен консензус е консензус за предвремени избори!

„Драмата во Слупчане не може да ја реши Владата на ДУИ која очигледно е дел од истата и ги дели граѓаните на привилегирани и граѓани од втор ред, спасот е во избори!“

Тале Кристо — Sat, 05 Aug 2023 08:45:02 +0000

Со само две неплатени сметки ЕВН гаси струја во сите населени места во Македонија. Ова не е случај во Слупчане. Таму се дозволени милионски долгови, а никој не преземал мерки. Драмата во Слупчане трае, а очигледно е резултат на корупцијата, на криминалот, на претприемачкиот дух на младите со презиме Ахмети или Груби. Оттука, во ваква една ситуција во која жителите на едно населено место не плаќале толку долго струја отвора низа на дилеми, а надлежните мора да дадат одговор на низа на прашања. Прво, Владата на ДУИ и помалиот коалициски партнер СДСМ и министерот за економија, Крешник Бектеши мора да кажат што е договорено во Слупчане во однос на плаќањето сметки за струја? Второ, дали Владата која се вмеша во овој должничко доверителски спор, е гарант за жителите на Слупчане дека ќе добијат отпис на долговите, или гарант за ЕВН дека ќе ги наплати долговите? Трето, дали Владата ќе оди до таму да дозволи евентуално повисоки сметки за струја на државно ниво за да се покрие разликата? На овие прашања мора да се даде одговор. Оваа ситуација ги дели граѓани, на привилегирани и на граѓани од втор ред кои мора да си ги плаќаат сметките. Ова е скандалозно! Ова што се дозволува е недозволиво непочитување на правни норми! Решение на ваква драма очигледно не може да даде оваа Влада на ДУИ и помалиот коалициски партнер СДСМ, Влада во која министерот Бектеши за ваков скандал коментира „слупчанци се чесни граѓани“. Решението е само во избори! (Интегрален текст од соопштение на ВМРО-ДПМНЕ)

Сериозен пожар попладнево кај Слупчане

Ивона Петрова — Fri, 04 Aug 2023 18:20:38 +0000

Сериозен пожар попладнево избувнал кај Слупчане, а опожарени се трева и грмушки. Според информациите на ЦУК, пожарот во липковско е на линија Слупчане - Ваксинце во насока кон Алашевце. Линијата на огнот е подолга од 300 метри. Во близина на пожарот има борова шума и се прават напори да се спречи ширење во таа насока.

И денеска успешен состанок помеѓу ЕВН и жители на Слупчане

Дарко Андоновски — Fri, 04 Aug 2023 10:44:42 +0000

Успешен состанок одржаа претставниците на ЕВН и жителите на Слупчане, потврдија за МИА од компанијата и од Oпштина Липково. На денешниот состанок се финализираат техничките детали поврзани со модернизирање на мрежата во селото. Во понеделник, ќе има уште еден состанок. -Денескa повторно се одржа успешен состанок меѓу претставници на ЕВН и претставници на селото Слупчане. На состанокот се финализираа техничките детали за реализација на проектот за реконструкција и модернизирање на мрежата. Во понеделник ќе се одржи последниот состанок, по кој следува спроведувањето на проектот, велат од ЕВН. Претседателот на Советот на Општина Липково, Зекирија Шаини изјави дека се очекува да се финализираат некои финеси и детали и да се почне со модернизација на мрежата. - Наскоро очекуваме да почне и модернизација на мрежата во селото, кажа Шаини. Претходниот месец во два наврати жителите на Слупчане остануваа без електрична енергија и испратија барања до ЕВН. Од компанијата, тогаш посочија дека поголем дел од слупчанци не плаќаат струја. На 27 јули беше постигнат договор кој наскоро треба да биде потпишан. Според последни информации модернизирањето на мрежата треба да почне на 9 август годинава.

Заврши состанокот меѓу жителите на Слупчане и ЕВН, за утре најавена нова средба

Катерина Бојаџиева — Thu, 03 Aug 2023 18:06:24 +0000

Заврши состанокот меѓу жителите на Слупчане и претставниците на ЕВН. И од компанијата и претставниците на жителите оценија дека состанокот поминал во позитивна атмосфера кој ќе придонесе целосно да се реши проблемот со електричната енергија во ова село. - Денес претставници на ЕВН се сретнаа со претставници на селото Слупчане. Разговорите се одвиваа во позитивна насока. Преостанува да се реализира уште еден состанок во текот на утрешниот ден, соопштија од ЕВН. Зекирија Шаини, советник во општина Липково, изјави дека состанокот поминал во позитивна атмосфера и дека останува да се договорат техничките детали. -Состанокот помина во позитивна атмосфера, договорот треба да се уреди технички, рече Шаини. По неколкудневните блокади на жителите на Слупчане во два наврати на почетокот и крајот на јули, компанијата и жителите склучија договор на 27 јули годинава.Жителите имаат повеќе барања, меѓу нив и барање да не плаќаат високи сметки за струја. Според последните информации, ЕВН треба да почне да ја реконструира мрежата на 9 август годинава.

Колку ниско паднавме: Едно село ни ја контролира државата, ЕВН добила гаранции од политички партии дека нема да ги тепаат во Слупчане

Ристе Здравков — Thu, 27 Jul 2023 18:03:55 +0000

Екипите на Електродистрибуција ќе започнат со реализација на проектот за реконструкција на мрежата во Слупчане. Постигнат е договор со мештаните на Слупчане, а гаранции се дадени од локалната власт и од страна на сите политички партии. Наредната недела во организација на министерот за економија и градоначалникот на Липково ќе се одржи состанок во општина Липково на кој ќе се договорат сите детали за организацијата и реализација на проектот и со работа на терен ќе се започне од 9-ти август.

Законот предвидува затворски казни до 5 години за уништување на јавни инсталации

Ивона Петрова — Thu, 27 Jul 2023 10:57:24 +0000

Затворска казна од шест месеци до пет години предвидува кривичниот законик за оној кој ќе уништи, оштети, отстрани, измени или ќе ги направи неупотребливи инсталациите за јавна употреба на вода, топлина, плин или енергија или инсталациите на системите за врски и со тоа ќе предизвика значително нарушување на редовниот живот на граѓаните или стопанското работење. Жителите на Слупчане вчера ги уништија трафостаниците за снабдување со електрична енергија и направија дефект од највисок степен, поради што жителите од селото и пошироко останаа без струја. Тие не им дозволија на екипите на ЕВН да работат и го блокираа патот. -Во врска со случајот во Слупчане, известуваме дека полициските службеници од Секторот за внатрешни работи Куманово постапуваат согласно законските надлежности кои ги имаат, а во координација со ЕВН, со цел расчистување на случајот, велат од Министерството за внатрешни работи. Од ЕВН денеска соопштија дека селата Слупчане и Оризари во општина Липково се уште се без напојување со електрична енергија. Од компанијата велат дека се додека не се создадат нормални услови за работа и се загарантира сигурноста на вработените на Електродистрибуција, нема да работат на санација на дефекти или да извршуваат редовни работни активности во овие села. Како што велат, екипите на Електродистрибуција работеа цела ноќ на санација на дефекти при што е нормализирано снабдувањето со електрична енергија на селата Ваксинце, Алешевце, Руница, Извор и Белановце. –Во текот на ноќта беше предизвикан нов дефект, исто така од мештаните на Слупчане, кој ги остави без струја селата Матејче, Виштица и Никуштак. Овој дефект е саниран и снабдувањето е нормализирано и во овие села. Дефектот на граничниот премин Табановце беше саниран вчера за кратко време, велат од компанијата. Жителите на Слупчане испратиле барање до ЕВН во кое бараат да им се простат досегашни долгови кои изнесуваат по неколку илјади евра, да добијат бесплатни нови приклучоци, без разлика колку ќе потрошат во иднина да не им се фактурира повеќе од 3.000 денари, верските објекти да бидат ослободени од плаќање и слични други барања, кои како што велат од ЕВН, се спротивни на законските регулативи. Според податоците на компанијата загубите во Слупчане се 80 проценти а наплатата е 20 отсто. Министерството за економија денеска ги повика сите граѓани во државата редовно да си ги подмируваат обврските кои ги имаат кон енергетските компании, како и дека секој граѓанин кој се снабдува со електрична енергија во државата има обврска да плати за електрична енергија толку колку што потрошил.

Бектеши: Секој граѓанин е обврзан да си плати за потрошената струја, надлежните да го решат проблемот во Слупчане

Ивона Петрова — Thu, 27 Jul 2023 09:32:06 +0000

Министерството за економија ги повикува сите граѓани во државата редовно да си ги подмируваат обврските кои ги имаат кон енергетските компании. Министерот Крешник Бектеши вели секој граѓанин кој се снабдува со електрична енергија во државата има обврска да плати за електрична енергија толку колку што потрошил. -Министерството за економија согласно надлежностите кои произлегуваат од Законот за енергетика, креира клима со цел да се намалат загубите во пренос и дистрибуција на електрична енергија како и неовластено користење на електрична енергија. Затоа повикуваме дека секој граѓанин треба да плати за тоа што го потрошил бидејќи така функционира пазарната економија. Ги повикуваме сите надлежни институции да постапат согласно нивните надлежности и да се реши проблемот со снабдување со електрична енергија во Слупчане и околните села и да се овозможи работа на екипите на ЕВН Македонија, објави Бектеши.